T20 WC, IND v AFG : ਭਾਰਤ ਨੇ ਅਫਗਾਨਿਸਤਾਨ ਨੂੰ 66 ਦੌੜਾਂ ਨਾਲ ਹਰਾਇਆ

ਆਬੂ ਧਾਬੀ - ਰੋਹਿਤ ਸ਼ਰਮਾ ਤੇ ਲੋਕੇਸ਼ ਰਾਹੁਲ ਦੇ ਅਰਧ ਸੈਂਕੜੇ ਤੋਂ ਬਾਅਦ ਰਵੀ ਚੰਦਰਨ ਅਸ਼ਵਿਨ ਦੀ ਅਗਵਾਈ ਵਿਚ ਗੇਂਦਬਾਜ਼ਾਂ ਦੇ ਬਿਹਤਰ ਪ੍ਰਦਰਸ਼ਨ ਨਾਲ ਭਾਰਤ ਨੇ ਆਈ. ਸੀ. ਸੀ. ਟੀ-20 ਵਿਸ਼ਵ ਕੱਪ ਦੇ ਸੁਪਰ-12 ਪੜਾਅ ਦੇ ਗਰੁੱਪ-2 ਮੈਚ ਵਿਚ ਅਫਗਾਨਿਸਤਾਨ ਨੂੰ 66 ਦੌੜਾਂ ਨਾਲ ਹਰਾ ਕੇ ਜਿੱਤ ਦਾ ਖਾਤਾ ਖੋਲ੍ਹਿਆ। ਭਾਰਤ ਦੇ 211 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਅਫਗਾਨਿਸਤਾਨ ਦੀ ਟੀਮ 7 ਵਿਕਟਾਂ 'ਤੇ 144 ਦੌੜਾਂ ਹੀ ਬਣਾ ਸਕੀ। ਅਫਗਾਨਿਸਤਾਨ ਦੇ 6 ਬੱਲੇਬਾਜ਼ ਦੋਹਰੇ ਅੰਕ ਵਿਚ ਪੁੱਜੇ ਪਰ ਕਪਤਾਨ ਮੁਹੰਮਦ ਨਬੀ (35 ਦੌੜਾਂ) ਅਤੇ ਕਰੀਮ ਜੰਨਤ (ਅਜੇਤੂ 42 ਦੌੜਾਂ) ਹੀ 20 ਦੌੜਾਂ ਦੇ ਅੰਕੜਿਆਂ ਨੂੰ ਪਾਰ ਕਰ ਸਕੇ। ਦੋਵਾਂ ਨੇ 6ਵੇਂ ਵਿਕਟ ਲਈ 57 ਦੌੜਾਂ ਵੀ ਜੋੜੀਆਂ। ਭਾਰਤ ਵੱਲੋਂ ਮੁਹੰਮਦ ਸ਼ੰਮੀ ਨੇ 3 ਵਿਕਟਾਂ ਝਟਕਾਈਆਂ, ਜਦੋਂਕਿ ਅਸ਼ਵਿਨ ਨੇ ਬੇਹੱਦ ਕਿਫਾਇਤੀ ਗੇਂਦਬਾਜ਼ੀ ਕਰਦੇ ਹੋਏ 4 ਓਵਰਾਂ 'ਚ 14 ਦੌੜਾਂ ਦੇ ਕੇ 2 ਵਿਕਟਾਂ ਹਾਸਲ ਕੀਤੀਆਂ।

ਜਸਪ੍ਰੀਤ ਬੁਮਰਾਹ ਅਤੇ ਰਵਿੰਦਰ ਜਡੇਜਾ ਨੇ ਵੀ 1-1 ਵਿਕਟ ਹਾਸਲ ਕੀਤੀ। ਰੋਹਿਤ (74) ਤੇ ਰਾਹੁਲ (69) ਦੇ ਅਰਧ ਸੈਂਕੜਿਆਂ ਤੇ ਦੋਵਾਂ 'ਚ ਪਹਿਲੇ ਵਿਕਟ ਦੀ 140 ਦੌੜਾਂ ਦੀ ਸਾਂਝੇਦਾਰੀ ਨਾਲ 2 ਵਿਕਟਾਂ 'ਤੇ 210 ਦੌੜਾਂ ਬਣਾਈਆਂ, ਜੋ ਮੌਜੂਦਾ ਟੂਰਨਾਮੈਂਟ ਦਾ ਸਭ ਤੋਂ ਉੱਚ ਸਕੋਰ ਹੈ। ਰੋਹਿਤ ਨੇ 47 ਗੇਂਦਾਂ ਦੀ ਆਪਣੀ ਪਾਰੀ ਵਿਚ 8 ਚੌਕੇ ਅਤੇ 3 ਛੱਕੇ ਮਾਰੇ, ਜਦੋਂਕਿ ਰਾਹੁਲ ਨੇ 48 ਗੇਂਦਾਂ ਦਾ ਸਾਹਮਣਾ ਕਰਦੇ ਹੋਏ 6 ਚੌਕੇ ਅਤੇ 2 ਛੱਕੇ ਜੜੇ। ਹਾਰਦਿਕ ਪੰਡਯਾ ਤੇ ਰਿਸ਼ਭ ਪੰਤ ਨੇ ਤੀਜੀ ਵਿਕਟ ਲਈ 3.3 ਓਵਰਾਂ ਵਿਚ 63 ਦੌੜਾਂ ਦੀ ਤੇਜ਼ਤੱਰਾਰ ਸਾਂਝੇਦਾਰੀ ਕੀਤੀ, ਜਿਸ ਨਾਲ ਭਾਰਤ ਨੇ ਅੰਤਿਮ 9 ਓਵਰਾਂ ਵਿਚ 119 ਦੌੜਾਂ ਬਟੋਰੀਆਂ। ‘ਕਰੋ ਜਾਂ ਮਰੋ’ ਦੇ ਇਸ ਮੁਕਾਬਲੇ ਵਿਚ ਜਿੱਤ ਤੋਂ ਬਾਅਦ ਭਾਰਤ ਦੇ 3 ਮੈਚਾਂ ਵਿਚ 1 ਜਿੱਤ ਨਾਲ 2 ਅੰਕ ਹੋ ਗਏ ਹਨ। ਇਸ ਜਿੱਤ ਨਾਲ ਭਾਰਤ ਦੇ ਨੈੱਟ ਰਨ ਰੇਟ ਵਿਚ ਵੀ ਸੁਧਾਰ ਹੋਇਆ ਹੈ। ਅਫਗਾਨਿਸਤਾਨ ਦੇ 4 ਮੈਚਾਂ ਵਿਚ 2 ਜਿੱਤ ਨਾਲ 4 ਅੰਕ ਹਨ।

ਅਫਗਾਨਿਸਤਾਨ ਦੀ ਸ਼ੁਰੂਆਤ ਚੰਗੀ ਨਹੀਂ ਰਹੀ। ਸ਼ੰਮੀ ਨੇ ਤੀਜੇ ਓਵਰ ਦੀ ਅੰਤਿਮ ਗੇਂਦ ਉੱਤੇ ਮੁਹੰਮਦ ਸ਼ਹਜਾਦ ਨੂੰ ਮਿਡ ਆਫ 'ਤੇ ਅਸ਼ਵਿਨ ਦੇ ਹੱਥੋਂ ਕੈਚ ਕਰਵਾਇਆ। ਬੁਮਰਾਹ ਦੀ ਅਗਲੀ ਗੇਂਦ 'ਤੇ ਸਲਾਮੀ ਬੱਲੇਬਾਜ਼ ਹਜਰਤੁੱਲਾਹ ਜਜਈ ਵੀ ਸ਼ਾਰਦੁਲ ਠਾਕੁਰ ਨੂੰ ਕੈਚ ਦੇ ਬੈਠਾ, ਜਿਸ ਨਾਲ ਅਫਗਾਨਿਸਤਾਨ ਦਾ ਸਕੋਰ 2 ਵਿਕਟਾਂ 'ਤੇ 13 ਦੌੜਾਂ ਹੋ ਗਈਆਂ। ਸ਼ੰਮੀ ਦੀ ਪਾਰੀ ਦੇ 5ਵੇਂ ਓਵਰ 'ਚ ਰਹਮਾਨੁੱਲਾਹ ਗੁਰਬਾਜ ਨੇ ਲਗਾਤਾਰ 2 ਛੱਕੇ ਅਤੇ ਇਕ ਚੌਕੇ ਨਾਲ 21 ਦੌੜਾਂ ਬਟੋਰੀਆਂ। ਗੁਲਬਦੀਨ ਨਾਇਬ ਨੇ ਪੰਡਯਾ ਦਾ ਸਵਾਗਤ 2 ਚੌਕਿਆਂ ਨਾਲ ਕੀਤਾ, ਜਿਸ ਨਾਲ ਅਫਗਾਨਿਸਤਾਨ ਨੇ ਪਾਵਰਪਲੇ ਵਿਚ 2 ਵਿਕਟਾਂ ਉੱਤੇ 47 ਦੌੜਾਂ ਬਣਾਈਆਂ। ਰਹਮਾਨੁੱਲਾਹ ਇਸ ਤੋਂ ਬਾਅਦ ਰਵਿੰਦਰ ਜਡੇਜਾ 'ਤੇ ਵੱਡਾ ਸ਼ਾਟ ਖੇਡਣ ਦੀ ਕੋਸ਼ਿਸ਼ ਵਿਚ ਗੇਂਦ ਨੂੰ ਹਵਾ ਵਿਚ ਲਹਿਰਾ ਗਿਆ ਅਤੇ ਬਾਊਂਡਰੀ 'ਤੇ ਪੰਡਯਾ ਨੇ ਕੈਚ ਫੜਨ ਵਿਚ ਕੋਈ ਗਲਤੀ ਨਹੀਂ ਕੀਤੀ। ਅਫਗਾਨਿਸਤਾਨ ਦੀਆਂ 50 ਦੌੜਾਂ 8ਵੇਂ ਓਵਰ ਵਿਚ ਪੂਰੀਆਂ ਕੀਤੀਆਂ। ਅਸ਼ਵਿਨ ਨੇ ਗੁਲਬਦੀਨ ਨੂੰ ਐੱਲ. ਪੀ. ਡਬਲਯੂ. ਕਰਨ ਤੋਂ ਬਾਅਦ ਨਜੀਬੁੱਲਾਹ ਜਾਦਰਾਨ ਨੂੰ ਬੋਲਡ ਕਰ ਕੇ ਅਫਗਾਨਿਸਤਾਨ ਦਾ ਸਕੋਰ 5 ਵਿਕਟਾਂ 'ਤੇ 69 ਦੌੜਾਂ ਕੀਤਾ। ਅਫਗਾਨਿਸਤਾਨ ਨੇ 15 ਓਵਰਾਂ ਵਿਚ 5 ਵਿਕਟਾਂ ਉੱਤੇ 88 ਦੌੜਾਂ ਬਣਾਈਆਂ। ਟੀਮ ਨੂੰ ਅੰਤਿਮ 5 ਓਵਰਾਂ ਵਿਚ ਜਿੱਤ ਲਈ 123 ਦੌੜਾਂ ਦੀ ਦਰਕਾਰ ਸੀ ਪਰ ਟੀਮ ਇਸ ਸਕੋਰ ਦੇ ਆਸ-ਪਾਸ ਵੀ ਨਹੀਂ ਪਹੁੰਚ ਸਕੀ।

ਇਹ ਖ਼ਬਰ ਪੜ੍ਹੋ- T20 WC, IND v AFG : ਭਾਰਤ ਨੇ ਅਫਗਾਨਿਸਤਾਨ ਨੂੰ ਦਿੱਤਾ 211 ਦੌੜਾਂ ਦਾ ਟੀਚਾ

ਇਹ ਖ਼ਬਰ ਪੜ੍ਹੋ- ਰੋਹਿਤ ਸ਼ਰਮਾ ਨੇ ਲਗਾਇਆ 23ਵਾਂ ਅਰਧ ਸੈਂਕੜਾ, ਇਹ ਰਿਕਾਰਡ ਵੀ ਕੀਤੇ ਆਪਣੇ ਨਾਂ

ਪਲੇਇੰਗ ਇਲੈਵਨ- 

ਅਫਗਾਨਿਸਤਾਨ : ਹਜ਼ਰਤੁੱਲਾ ਜ਼ਜ਼ਈ, ਮੁਹੰਮਦ ਸ਼ਹਿਜ਼ਾਦ (ਵਿਕਟਕੀਪਰ), ਰਹਿਮਾਨਉੱਲ੍ਹਾ ਗੁਰਬਾਜ਼, ਨਜੀਬੁੱਲਾ ਜ਼ਾਦਰਾਨ, ਮੁਹੰਮਦ ਨਬੀ (ਕਪਤਾਨ), ਗੁਲਬਦੀਨ ਨਾਇਬ, ਸ਼ਰਫੂਦੀਨ ਅਸ਼ਰਫ, ਰਾਸ਼ਿਦ ਖਾਨ, ਕਰੀਮ ਜਨਤ, ਨਵੀਨ-ਉਲ-ਹੱਕ, ਹਾਮਿਦ ਹਸਨ

ਭਾਰਤ : ਕੇ. ਐੱਲ. ਰਾਹੁਲ, ਰੋਹਿਤ ਸ਼ਰਮਾ, ਵਿਰਾਟ ਕੋਹਲੀ (ਕਪਤਾਨ), ਸੂਰਯਕੁਮਾਰ ਯਾਦਵ, ਰਿਸ਼ਭ ਪੰਤ (ਵਿਕਟਕੀਪਰ), ਹਾਰਦਿਕ ਪੰਡਯਾ, ਰਵਿੰਦਰ ਜਡੇਜਾ, ਰਵੀਚੰਦਰਨ ਅਸ਼ਵਿਨ, ਸ਼ਾਰਦੁਲ ਠਾਕੁਰ, ਮੁਹੰਮਦ ਸ਼ੰਮੀ, ਜਸਪ੍ਰੀਤ ਬੁਮਰਾਹ

ਨੋਟ- ਇਸ ਖ਼ਬਰ ਸਬੰਧੀ ਕਮੈਂਟ ਕਰਕੇ ਦਿਓ ਆਪਣੀ ਰਾਏ।