Asia Cup Rising Stars : ਸੈਮੀਫਾਈਨਲ ''ਚ ਬੰਗਲਾਦੇਸ਼ ਹੱਥੋਂ ਹਾਰ ਕੇ ਟੀਮ ਇੰਡੀਆ ਹੋਈ ਬਾਹਰ
Friday, Nov 21, 2025 - 07:12 PM (IST)
ਸਪੋਰਟਸ ਡੈਸਕ- ਏਸ਼ੀਆ ਕੱਪ ਰਾਈਜ਼ਿੰਗ ਸਟਾਰਸ 2025 ਵਿੱਚ ਇੰਡੀਆ-ਏ ਦਾ ਸਫ਼ਰ ਖਤਮ ਹੋ ਗਿਆ ਹੈ। ਬੰਗਲਾਦੇਸ਼ ਏ ਵਿਰੁੱਧ ਇੱਕ ਰੋਮਾਂਚਕ ਸੈਮੀਫਾਈਨਲ ਮੈਚ ਵਿੱਚ ਇੰਡੀਆ-ਏ ਸੁਪਰ ਓਵਰ ਵਿੱਚ ਹਾਰ ਗਿਆ, ਜਿਸ ਨਾਲ ਉਹ ਟੂਰਨਾਮੈਂਟ ਤੋਂ ਬਾਹਰ ਹੋ ਗਿਆ। ਬੰਗਲਾਦੇਸ਼-ਏ ਨੇ ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ 194 ਦੌੜਾਂ ਬਣਾਈਆਂ। ਜਵਾਬ ਵਿੱਚ ਟੀਮ ਇੰਡੀਆ ਨੇ 20 ਓਵਰਾਂ ਵਿੱਚ ਇੰਨੀਆਂ ਹੀ ਦੌੜਾਂ ਬਣਾਈਆਂ। ਇੰਡੀਆ-ਏ ਨੇ ਆਖਰੀ ਗੇਂਦ 'ਤੇ ਮੈਚ ਬਰਾਬਰ ਕਰ ਦਿੱਤਾ ਪਰ ਸੁਪਰ ਓਵਰ ਵਿੱਚ ਜਿੱਤਣ ਦਾ ਆਪਣਾ ਮੌਕਾ ਗੁਆ ਦਿੱਤਾ। ਭਾਰਤੀ ਟੀਮ ਸੁਪਰ ਓਵਰ ਵਿੱਚ ਇੱਕ ਵੀ ਦੌੜ ਬਣਾਉਣ ਵਿੱਚ ਅਸਫਲ ਰਹੀ ਅਤੇ ਫਿਰ ਇਕ ਵਾਈਡ ਬਾਲ ਨਾਲ ਹੀ ਬੰਗਲਾਦੇਸ਼ ਨੇ ਜਿੱਤ ਲਈ ਜ਼ਰੂਰੀ ਇਕ ਦੌੜ ਹਾਸਿਲ ਕਰਦੇ ਹੋਏ ਫਾਈਨਲ 'ਚ ਜਗ੍ਹਾ ਪੱਕੀ ਕਰ ਲਈ।
ਦੋਹਾ ਦੇ ਵੈਸਟ ਐਂਡ ਇੰਟਰਨੈਸ਼ਨਲ ਸਟੇਡੀਅਮ ਵਿੱਚ ਬੰਗਲਾਦੇਸ਼-ਏ ਨੇ ਪਹਿਲਾਂ ਬੱਲੇਬਾਜ਼ੀ ਕੀਤੀ ਅਤੇ ਉਨ੍ਹਾਂ ਦੇ ਬੱਲੇਬਾਜ਼ਾਂ ਨੇ ਧਮਾਕੇਦਾਰ ਸ਼ੁਰੂਆਤ ਕੀਤੀ। ਸਲਾਮੀ ਬੱਲੇਬਾਜ਼ ਹਬੀਬੁਰ ਰਹਿਮਾਨ ਨੇ ਸਿਰਫ਼ 46 ਗੇਂਦਾਂ ਵਿੱਚ 65 ਦੌੜਾਂ ਬਣਾਈਆਂ, ਜਦੋਂ ਕਿ ਉਨ੍ਹਾਂ ਦੇ ਸਾਥੀ ਜ਼ੀਸ਼ਾਨ ਆਲਮ ਨੇ ਵੀ 14 ਗੇਂਦਾਂ ਵਿੱਚ 26 ਦੌੜਾਂ ਦੀ ਸ਼ਾਨਦਾਰ ਸ਼ੁਰੂਆਤ ਕੀਤੀ। ਹਾਲਾਂਕਿ, ਭਾਰਤ-ਏ ਨੇ ਵਿਚਕਾਰਲੇ ਓਵਰਾਂ ਵਿੱਚ ਜ਼ਬਰਦਸਤ ਵਾਪਸੀ ਕੀਤੀ ਅਤੇ 16.2 ਓਵਰਾਂ ਵਿੱਚ 6 ਡਿਗਾ ਦਿੱਤੀਆਂ ਜਦੋਂਕਿ ਬੰਗਲਾਦੇਸ਼ ਨੇ 130 ਦੌੜਾਂ ਬਣਾਈਆਂ।
ਪਰ ਫਿਰ ਐੱਸਐੱਮ ਮਹਿਰੋਬ ਹਸਨ ਦੇ ਬੱਲੇ ਦਾ ਤੂਫਾਨ ਆਇਆ। ਇਸ ਬੱਲੇਬਾਜ਼ ਨੇ ਸਿਰਫ਼ 18 ਗੇਂਦਾਂ ਵਿੱਚ 48 ਦੌੜਾਂ ਬਣਾਈਆਂ, ਜਿਸ ਵਿੱਚ 6 ਛੱਕੇ ਅਤੇ 1 ਚੌਕਾ ਲੱਗਾ। ਇਸ ਨਾਲ ਬੰਗਲਾਦੇਸ਼ ਏ ਨੇ 194 ਦੌੜਾਂ ਬਣਾਈਆਂ। ਭਾਰਤ-ਏ ਲਈ, ਗੁਰਜਪਨੀਤ ਸਿੰਘ ਨੇ ਸਭ ਤੋਂ ਵੱਧ ਦੋ ਵਿਕਟਾਂ ਲਈਆਂ ਪਰ ਸਪਿਨਰ ਸੁਯਸ਼ ਸ਼ਰਮਾ ਸਭ ਤੋਂ ਵੱਧ ਕਿਫਾਇਤੀ ਸਾਬਤ ਹੋਇਆ ਉਸਨੇ 4 ਓਵਰਾਂ ਵਿੱਚ 17 ਦੌੜਾਂ ਦਿੱਤੀਆਂ ਅਤੇ 1 ਵਿਕਟ ਲਈ।
ਟੀਮ ਇੰਡੀਆ ਲਈ, 14 ਸਾਲਾ ਵੈਭਵ ਸੂਰਿਆਵੰਸ਼ੀ ਨੇ ਇੱਕ ਵਾਰ ਫਿਰ ਸ਼ਾਨਦਾਰ ਸ਼ੁਰੂਆਤ ਕੀਤੀ, ਪਹਿਲੇ ਓਵਰ ਵਿੱਚ 19 ਦੌੜਾਂ ਬਣਾਈਆਂ। ਪਹਿਲੇ ਓਵਰ ਵਿੱਚ 2 ਛੱਕੇ ਲਗਾਉਣ ਤੋਂ ਬਾਅਦ ਵੈਭਵ ਨੇ ਦੂਜੇ ਓਵਰ ਵਿੱਚ ਵੀ ਦੋ ਛੱਕੇ ਲਗਾਏ ਅਤੇ ਜਲਦੀ ਹੀ ਟੀਮ ਇੰਡੀਆ 3.1 ਓਵਰਾਂ ਵਿੱਚ 50 ਦੌੜਾਂ ਤੱਕ ਪਹੁੰਚ ਗਈ। ਹਾਲਾਂਕਿ ਵੈਭਵ ਉਸੇ ਓਵਰ ਵਿੱਚ ਆਊਟ ਹੋ ਗਿਆ ਸੀ, ਪ੍ਰਿਯਾਂਸ਼ ਆਰੀਆ ਨੇ ਪਾਰੀ ਨੂੰ ਸੰਭਾਲਿਆ ਅਤੇ ਛੱਕਿਆਂ ਅਤੇ ਚੌਕਿਆਂ ਦਾ ਮੀਂਹ ਵਰ੍ਹਾਇਆ। ਪ੍ਰਿਯਾਂਸ਼ ਨੇ 10ਵੇਂ ਓਵਰ ਵਿੱਚ ਆਊਟ ਹੋਣ ਤੋਂ ਪਹਿਲਾਂ ਟੀਮ ਨੂੰ 98 ਦੌੜਾਂ ਤੱਕ ਪਹੁੰਚਾਇਆ ਸੀ।
ਹਾਲਾਂਕਿ ਇਸ ਸਮੇਂ ਤੱਕ ਟੀਮ ਇੰਡੀਆ ਦੀਆਂ ਤਿੰਨ ਵਿਕਟਾਂ ਡਿੱਗ ਗਈਆਂ ਸਨ ਪਰ ਕਪਤਾਨ ਜਿਤੇਸ਼ ਸ਼ਰਮਾ ਨੇ ਕਮਾਨ ਸੰਭਾਲੀ ਅਤੇ ਨੇਹਲ ਵਢੇਰਾ ਨਾਲ ਮਿਲ ਕੇ ਟੀਮ ਨੂੰ 150 ਦੌੜਾਂ ਤੱਕ ਪਹੁੰਚਾਇਆ। ਹਾਲਾਂਕਿ, ਜਿਤੇਸ਼ 15ਵੇਂ ਓਵਰ ਦੀ ਆਖਰੀ ਗੇਂਦ 'ਤੇ ਆਊਟ ਹੋ ਗਿਆ ਅਤੇ ਬੰਗਲਾਦੇਸ਼ ਨੇ ਵਾਪਸੀ ਕੀਤੀ, ਜਿਸ ਨਾਲ ਭਾਰਤ-ਏ ਨੂੰ ਮੁਸ਼ਕਲ ਵਿੱਚ ਪਾ ਦਿੱਤਾ ਗਿਆ। ਆਖਰੀ ਓਵਰ ਵਿੱਚ ਜਿੱਤ ਲਈ 16 ਦੌੜਾਂ ਦੀ ਲੋੜ ਸੀ, ਆਸ਼ੂਤੋਸ਼ ਸ਼ਰਮਾ ਨੇ ਤੀਜੀ ਗੇਂਦ 'ਤੇ ਛੱਕਾ ਲਗਾਇਆ। ਆਸ਼ੂਤੋਸ਼ ਨੇ ਅਗਲੀ ਗੇਂਦ 'ਤੇ ਚੌਕਾ ਲਗਾਇਆ। ਹੁਣ ਦੋ ਗੇਂਦਾਂ 'ਤੇ ਚਾਰ ਦੌੜਾਂ ਦੀ ਲੋੜ ਸੀ ਪਰ ਆਸ਼ੂਤੋਸ਼ ਪੰਜਵੀਂ ਗੇਂਦ 'ਤੇ ਬੋਲਡ ਹੋ ਗਿਆ।
ਆਖਰੀ ਓਵਰ ਵਿੱਚ ਹਰਸ਼ ਦੂਬੇ ਨੇ ਫੀਲਡਰ ਵੱਲ ਸਿੱਧਾ ਸ਼ਾਟ ਮਾਰਿਆ ਪਰ ਭਾਰਤੀ ਬੱਲੇਬਾਜ਼ ਦੋ ਦੌੜਾਂ ਲਈ ਭੱਜਿਆ। ਬੰਗਲਾਦੇਸ਼ ਦੇ ਕੀਪਰ ਨੇ ਰਨ-ਆਊਟ ਦੀ ਕੋਸ਼ਿਸ਼ ਕਰਨ ਦੀ ਗਲਤੀ ਕੀਤੀ ਅਤੇ ਅਸਫਲ ਰਹੇ। ਭਾਰਤੀ ਬੱਲੇਬਾਜ਼ਾਂ ਨੇ ਇਸਦਾ ਫਾਇਦਾ ਉਠਾਇਆ ਅਤੇ ਤੀਜੀ ਦੌੜ ਪੂਰੀ ਕੀਤੀ, ਜਿਸ ਨਾਲ ਮੈਚ ਟਾਈ ਹੋ ਗਿਆ, ਜਿਸਦਾ ਫੈਸਲਾ ਫਿਰ ਸੁਪਰ ਓਵਰ ਦੁਆਰਾ ਕੀਤਾ ਗਿਆ।
