ਰੋਮਾਂਚਕ ਮੁਕਾਬਲੇ ’ਚ ਗੁਜਰਾਤ ਜਾਇੰਟਸ ਨੇ ਦਿੱਲੀ ਕੈਪਿਟਲ ਨੂੰ  4 ਦੌੜਾਂ ਤੋਂ ਹਰਾਇਆ

ਮੁੰਬਈ - ਸੋਫੀ ਡਿਵਾਈਨ (95/2 ਵਿਕਟਾਂ) ਦੇ ਆਲਰਾਉਂਡ ਪ੍ਰਦਰਸ਼ਨ ਦੇ ਦਮ 'ਤੇ, ਗੁਜਰਾਤ ਜਾਇੰਟਸ ਵੂਮੈਨ ਨੇ ਐਤਵਾਰ ਨੂੰ ਮਹਿਲਾ ਪ੍ਰੀਮੀਅਰ ਲੀਗ (WPL) ਦੇ ਚੌਥੇ ਮੈਚ ’ਚ ਦਿੱਲੀ ਕੈਪੀਟਲਜ਼ ਵੂਮੈਨ ਨੂੰ ਚਾਰ ਦੌੜਾਂ ਨਾਲ ਹਰਾਇਆ। ਦਿੱਲੀ ਕੈਪੀਟਲਜ਼ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਗੁਜਰਾਤ ਜਾਇੰਟਸ ਨੇ ਨਿਰਧਾਰਤ 20 ਓਵਰਾਂ ’ਚ 209 ਦੌੜਾਂ ਦਾ ਵਿਸ਼ਾਲ ਸਕੋਰ ਬਣਾਇਆ। ਗੁਜਰਾਤ ਲਈ, ਬੇਥ ਮੂਨੀ ਅਤੇ ਸੋਫੀ ਡਿਵਾਈਨ ਦੀ ਓਪਨਿੰਗ ਜੋੜੀ ਨੇ 94 ਦੌੜਾਂ ਜੋੜ ਕੇ ਚੰਗੀ ਸ਼ੁਰੂਆਤ ਦਿੱਤੀ। ਸ਼੍ਰੀ ਚਰਨੀ ਨੇ ਨੌਵੇਂ ਓਵਰ ’ਚ ਬੇਥ ਮੂਨੀ (19) ਨੂੰ ਆਊਟ ਕਰਕੇ ਦਿੱਲੀ ਕੈਪੀਟਲਜ਼ ਨੂੰ ਪਹਿਲੀ ਸਫਲਤਾ ਦਿਵਾਈ।

ਇਸ ਤੋਂ ਬਾਅਦ ਕਪਤਾਨ ਐਸ਼ਲੇ ਗਾਰਡਨਰ ਅਤੇ ਡੇਵਾਈਨ ਬੱਲੇਬਾਜ਼ੀ ਲਈ ਆਏ ਅਤੇ ਪਾਰੀ ਦੀ ਕਮਾਨ ਸੰਭਾਲੀ। 11ਵੇਂ ਓਵਰ ’ਚ, ਨੰਦਿਨੀ ਸ਼ਰਮਾ ਨੇ ਡੇਵਾਈਨ ਨੂੰ ਆਪਣਾ ਸ਼ਿਕਾਰ ਬਣਾਇਆ ਜੋ ਸੈਂਕੜੇ ਵੱਲ ਵਧ ਰਹੀ ਸੀ। ਸੋਫੀ ਡੇਵਾਈਨ ਨੇ 42 ਗੇਂਦਾਂ ’ਚ ਅੱਠ ਛੱਕੇ ਅਤੇ ਸੱਤ ਚੌਕੇ ਲਗਾ ਕੇ 95 ਦੌੜਾਂ ਦੀ ਪਾਰੀ ਖੇਡੀ। ਐਸ਼ਲੇ ਗਾਰਡਨਰ ਨੇ 26 ਗੇਂਦਾਂ ’ਚ ਚਾਰ ਚੌਕੇ ਅਤੇ ਤਿੰਨ ਛੱਕੇ ਲਗਾ ਕੇ 49 ਦੌੜਾਂ ਬਣਾਈਆਂ। ਅਨੁਸ਼ਕਾ ਸ਼ਰਮਾ (13) ਅਤੇ ਕਾਸ਼ਵੀ ਗੌਤਮ (14) ਦੌੜਾਂ ਬਣਾਉਣ ਤੋਂ ਬਾਅਦ ਆਊਟ ਹੋ ਗਈਆਂ। ਗੁਜਰਾਤ ਨੇ ਆਖਰੀ ਓਵਰ ’ਚ ਚਾਰ ਵਿਕਟਾਂ ਗੁਆ ਦਿੱਤੀਆਂ। ਦਿੱਲੀ ਕੈਪੀਟਲਸ ਲਈ ਨੰਦਿਨੀ ਸ਼ਰਮਾ ਨੇ ਪੰਜ ਵਿਕਟਾਂ ਲਈਆਂ। ਸ਼ਿਨੇਲ ਹੈਨਰੀ ਅਤੇ ਸ਼੍ਰੀ ਚਰਨੀ ਨੇ ਦੋ-ਦੋ ਵਿਕਟਾਂ ਲਈਆਂ। ਸ਼ੈਫਾਲੀ ਵਰਮਾ ਨੇ ਇੱਕ ਬੱਲੇਬਾਜ਼ ਨੂੰ ਆਊਟ ਕੀਤਾ।

ਇਸ ਤੋਂ ਬਾਅਦ, ਦਿੱਲੀ ਕੈਪੀਟਲਸ ਵੱਲੋਂ ਬੱਲੇਬਾਜ਼ੀ ਕਰਨ ਆਈ, ਲਿਜ਼ੇਲ ਲੀ ਅਤੇ ਸ਼ੈਫਾਲੀ ਵਰਮਾ ਦੀ ਜੋੜੀ ਨੇ 41 ਦੌੜਾਂ ਜੋੜੀਆਂ। ਪੰਜਵੇਂ ਓਵਰ ’ਚ 14 ਦੌੜਾਂ ਬਣਾ ਕੇ ਸ਼ੈਫਾਲੀ ਵਰਮਾ ਆਊਟ ਹੋ ਗਈ। ਇਸ ਤੋਂ ਬਾਅਦ ਲੌਰਾ ਵੂਲਫੇਟਰ ਨੇ ਲਿਜ਼ੇਲ ਲੀ ਨਾਲ ਦੂਜੇ ਵਿਕਟ ਲਈ 90 ਦੌੜਾਂ ਜੋੜੀਆਂ। 15ਵੇਂ ਓਵਰ ’ਚ, ਕਾਸ਼ਵੀ ਗੌਤਮ ਨੇ ਲਿਜ਼ੇਲ ਲੀ ਨੂੰ ਆਊਟ ਕਰਕੇ ਪਵੇਲੀਅਨ ਭੇਜ ਦਿੱਤਾ। ਲਿਜ਼ੇਲ ਲੀ ਨੇ 54 ਗੇਂਦਾਂ ਵਿੱਚ 12 ਚੌਕੇ ਅਤੇ ਤਿੰਨ ਛੱਕੇ ਲਗਾ ਕੇ 86 ਦੌੜਾਂ ਦੀ ਪਾਰੀ ਖੇਡੀ। ਸ਼ੈਨੇਲ ਹੈਨਰੀ ਸੱਤ ਦੌੜਾਂ ਬਣਾ ਕੇ ਆਊਟ ਹੋ ਗਈ।

ਆਖਰੀ ਓਵਰ ਸੁੱਟਣ ਆਈ ਸੋਫੀ ਡੇਵਾਈਨ ਨੇ ਕਪਤਾਨ ਜੇਮੀਮਾ ਰੌਡਰਿਗਜ਼ (15) ਨੂੰ ਆਊਟ ਕਰਕੇ ਪੈਵੇਲੀਅਨ ਭੇਜ ਦਿੱਤਾ। ਇਸੇ ਓਵਰ ’ਚ ਡੇਵਾਈਨ ਨੇ ਲੌਰਾ ਵੂਲਫੈਟਰ ਨੂੰ ਵੀ ਆਊਟ ਕਰ ਦਿੱਤਾ, ਜਿਸ ਨਾਲ ਦਿੱਲੀ ਦੀਆਂ ਮੈਚ ਜਿੱਤਣ ਦੀਆਂ ਉਮੀਦਾਂ ਨੂੰ ਪੰਜਵਾਂ ਝਟਕਾ ਲੱਗਾ। ਲੌਰਾ ਵੂਲਫੈਟਰ ਨੇ 38 ਗੇਂਦਾਂ ’ਚ 77 ਦੌੜਾਂ ਬਣਾਈਆਂ, ਜਿਸ ’ਚ ਨੌਂ ਚੌਕੇ ਅਤੇ ਤਿੰਨ ਛੱਕੇ ਲੱਗੇ। ਦਿੱਲੀ ਨਿਰਧਾਰਤ 20 ਓਵਰਾਂ ਵਿੱਚ ਪੰਜ ਵਿਕਟਾਂ 'ਤੇ ਸਿਰਫ਼ 205 ਦੌੜਾਂ ਹੀ ਬਣਾ ਸਕੀ ਅਤੇ ਮੈਚ ਚਾਰ ਦੌੜਾਂ ਨਾਲ ਹਾਰ ਗਈ। ਗੁਜਰਾਤ ਜਾਇੰਟਸ ਲਈ ਸੋਫੀ ਡੇਵਾਈਨ ਅਤੇ ਰਾਜੇਸ਼ਵਰੀ ਗਾਇਕਵਾੜ ਨੇ ਦੋ-ਦੋ ਵਿਕਟਾਂ ਲਈਆਂ। ਕਾਸ਼ਵੀ ਗੌਤਮ ਨੇ ਇਕ ਬੱਲੇਬਾਜ਼ ਨੂੰ ਆਊਟ ਕੀਤਾ।