ਦਿੱਲੀ ਕੈਪੀਟਲਜ਼ ਦੇ ਮਾਲਕ ਹੈਂਪਸ਼ਾਇਰ ਕਾਉਂਟੀ ''ਚ ਵੱਡੀ ਹਿੱਸੇਦਾਰੀ ਖਰੀਦਣ ਲਈ ਸਹਿਮਤ

ਲੰਡਨ : ਇੰਡੀਅਨ ਪ੍ਰੀਮੀਅਰ ਲੀਗ ਫਰੈਂਚਾਇਜ਼ੀ ਦਿੱਲੀ ਕੈਪੀਟਲਜ਼ ਦੇ ਸਹਿ-ਮਾਲਕ ਜੀਐੱਮਆਰ ਸਮੂਹ ਨੇ 120 ਮਿਲੀਅਨ ਪੌਂਡ (ਲਗਭਗ 1278 ਕਰੋੜ ਰੁਪਏ) ਵਿੱਚ ਬਹੁਮਤ ਹਿੱਸੇਦਾਰੀ ਖਰੀਦਣ ਲਈ ਇੰਗਲਿਸ਼ ਕਾਉਂਟੀ ਟੀਮ ਹੈਂਪਸ਼ਾਇਰ ਨਾਲ ਸਮਝੌਤੇ ਲਈ ਸਹਿਮਤੀ ਦਿੱਤੀ ਹੈ। ਹੈਂਪਸ਼ਾਇਰ ਇਸ ਤਰ੍ਹਾਂ ਵਿਦੇਸ਼ੀ ਇਕਾਈ ਦੀ ਮਲਕੀਅਤ ਵਾਲੀ ਪਹਿਲੀ ਕਾਉਂਟੀ ਟੀਮ ਬਣ ਜਾਵੇਗੀ। ਇਸ ਨਾਲ ਜੀਐੱਮਆਰ ਗਰੁੱਪ ਇਸ ਟੀਮ ਦੇ 51 ਫੀਸਦੀ ਸ਼ੇਅਰਾਂ 'ਤੇ ਕੰਟਰੋਲ ਕਰੇਗਾ। ਇੱਕ ਰਿਪੋਰਟ ਵਿੱਚ ਦੱਸਿਆ ਗਿਆ ਹੈ, 'ਇਹ ਸਮਝਿਆ ਜਾਂਦਾ ਹੈ ਕਿ ਦਿੱਲੀ ਕੈਪੀਟਲਸ ਦੇ ਮਾਲਕਾਂ ਨੇ ਆਪਣੇ ਆਈਪੀਐੱਲ ਵਿਰੋਧੀ ਲਖਨਊ ਸੁਪਰਜਾਇੰਟਸ ਨੂੰ ਪਛਾੜ ਦਿੱਤਾ ਹੈ।
ਜੀਐੱਮਆਰ ਗਰੁੱਪ ਕੋਲ ਯੂਟੀਲਿਟੀ ਬਾਊਲ (ਹੈਂਪਸ਼ਾਇਰ ਵਿੱਚ ਇੱਕ ਕ੍ਰਿਕਟ ਸਟੇਡੀਅਮ), ਇੱਕ ਹਿਲਟਨ ਹੋਟਲ ਅਤੇ ਉਸੇ ਸਥਾਨ 'ਤੇ ਇੱਕ ਗੋਲਫ ਕੋਰਸ ਦਾ ਕੰਟਰੋਲ ਵੀ ਹੋਵੇਗਾ। ਦਿੱਲੀ ਕੈਪੀਟਲਜ਼ ਦੇ ਸਹਿ-ਮਾਲਕ ਹੋਣ ਤੋਂ ਇਲਾਵਾ, ਜੀਐੱਮਆਰ ਗਰੁੱਪ ਦੁਬਈ ਕੈਪੀਟਲਜ਼ (ਆਈਐੱਲਟੀ20, ਯੂਏਈ) ਅਤੇ ਮੇਜਰ ਲੀਗ ਕ੍ਰਿਕਟ (USA) ਫ੍ਰੈਂਚਾਇਜ਼ੀ ਸੀਏਟਲ ਓਰਕਾਸ ਦਾ ਵੀ ਮਾਲਕ ਹੈ।
ਇੰਗਲੈਂਡ ਅਤੇ ਵੇਲਜ਼ ਕ੍ਰਿਕਟ ਬੋਰਡ (ਈਸੀਬੀ), ਹੈਂਪਸ਼ਾਇਰ ਕਲੱਬ ਦੇ ਅਧਿਕਾਰੀ ਅਤੇ ਨਵੇਂ ਮਾਲਕ ਜਲਦੀ ਹੀ ਸੌਦੇ ਬਾਰੇ ਅਧਿਕਾਰਤ ਐਲਾਨ ਕਰਨਗੇ। ਇਸ ਪ੍ਰਾਪਤੀ ਨਾਲ ਹੈਂਪਸ਼ਾਇਰ ਨੂੰ 'ਦਿ ਹੰਡਰਡ' ਵਰਗੇ ਘਰੇਲੂ ਟੂਰਨਾਮੈਂਟਾਂ ਲਈ ਦਿੱਲੀ ਕੈਪੀਟਲਜ਼ ਦੇ ਕੁਝ ਨੌਜਵਾਨ ਖਿਡਾਰੀਆਂ ਤੱਕ ਪਹੁੰਚ ਮਿਲਣ ਦੀ ਸੰਭਾਵਨਾ ਵੀ ਖੁੱਲ੍ਹਣ ਦੀ ਉਮੀਦ ਹੈ।
ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (ਬੀ.ਸੀ.ਸੀ.ਆਈ.) ਹਾਲਾਂਕਿ ਸਰਗਰਮ ਭਾਰਤੀ ਕ੍ਰਿਕਟਰਾਂ ਨੂੰ ਵਿਦੇਸ਼ੀ ਟੂਰਨਾਮੈਂਟਾਂ ਵਿੱਚ ਖੇਡਣ ਦੀ ਇਜਾਜ਼ਤ ਨਹੀਂ ਦਿੰਦਾ ਹੈ। ਇੱਕ ਹੋਰ ਮਹੱਤਵਪੂਰਨ ਘਟਨਾਕ੍ਰਮ ਵਿੱਚ ਇੱਕ ਹੋਰ ਇੰਗਲਿਸ਼ ਕਾਉਂਟੀ ਟੀਮ ਯਾਰਕਸ਼ਰ ਨੇ ਹੈਡਿੰਗਲੇ ਅਧਾਰਤ ਕਲੱਬ ਦੀ ਸੰਭਾਵਿਤ ਪ੍ਰਾਪਤੀ ਲਈ ਰਾਜਸਥਾਨ ਰਾਇਲਜ਼ ਨਾਲ ਆਪਣੀ ਗੱਲਬਾਤ ਮੁੜ ਸ਼ੁਰੂ ਕੀਤੀ ਹੈ। ਇਸ ਲਈ ਵੋਟਿੰਗ ਰਾਹੀਂ ਯਾਰਕਸ਼ਰ ਦੇ 6,000 ਮੈਂਬਰਾਂ ਦੀ ਸਹਿਮਤੀ ਦੀ ਲੋੜ ਪਵੇਗੀ।