ਨਿਊਜ਼ੀਲੈਂਡ ਦੇ ਚਾਡ ਬੋਵੇਸ ਨੇ ਲਿਸਟ ਏ ਕ੍ਰਿਕਟ ਵਿੱਚ ਲਗਾਇਆ ਸਭ ਤੋਂ ਤੇਜ਼ ਦੋਹਰਾ ਸੈਂਕੜਾ

ਵੇਲਿੰਗਟਨ, (ਭਾਸ਼ਾ) ਨਿਊਜ਼ੀਲੈਂਡ ਦੇ ਸਲਾਮੀ ਬੱਲੇਬਾਜ਼ ਚਾਡ ਬੋਵੇਸ ਨੇ ਬੁੱਧਵਾਰ ਨੂੰ ਸਿਰਫ 103 ਗੇਂਦਾਂ ਵਿੱਚ ਦੋਹਰਾ ਸੈਂਕੜਾ ਲਗਾ ਕੇ ਲਿਸਟ ਏ ਕ੍ਰਿਕਟ ਵਿੱਚ ਨਵਾਂ ਰਿਕਾਰਡ ਬਣਾਇਆ। ਖੇਡ ਦੇ ਇਸ ਫਾਰਮੈਟ 'ਚ ਸਭ ਤੋਂ ਤੇਜ਼ ਦੋਹਰਾ ਸੈਂਕੜਾ ਲਗਾਉਣ ਦਾ ਰਿਕਾਰਡ ਬੋਵੇਸ ਦੇ ਨਾਂ ਹੈ, ਜੋ ਇਸ ਤੋਂ ਪਹਿਲਾਂ ਭਾਰਤ ਦੇ ਨਾਰਾਇਣ ਜਗਦੀਸਨ ਅਤੇ ਆਸਟ੍ਰੇਲੀਆ ਦੇ ਟ੍ਰੈਵਿਸ ਹੈੱਡ ਦੇ ਨਾਂ ਸੀ। 

ਦੱਖਣੀ ਅਫਰੀਕਾ 'ਚ ਜਨਮੇ ਨਿਊਜ਼ੀਲੈਂਡ ਦੇ ਬੱਲੇਬਾਜ਼ ਬੋਵੇਸ ਨੇ ਫੋਰਡ ਟਰਾਫੀ 'ਚ ਓਟੈਗੋ ਖਿਲਾਫ ਕੈਂਟਰਬਰੀ ਲਈ ਖੇਡਦੇ ਹੋਏ ਇਹ ਉਪਲੱਬਧੀ ਹਾਸਲ ਕੀਤੀ। ਉਹ ਆਖਰਕਾਰ 110 ਗੇਂਦਾਂ ਵਿੱਚ 205 ਦੌੜਾਂ ਬਣਾ ਕੇ ਆਊਟ ਹੋ ਗਿਆ, ਜੋ ਕਿ ਲਿਸਟ ਏ ਕ੍ਰਿਕਟ ਵਿੱਚ ਉਸਦਾ ਸਭ ਤੋਂ ਵੱਡਾ ਸਕੋਰ ਵੀ ਹੈ। ਜਗਦੀਸਨ ਅਤੇ ਹੈੱਡ ਨੇ 114 ਗੇਂਦਾਂ ਵਿੱਚ ਆਪਣੇ-ਆਪਣੇ ਦੋਹਰੇ ਸੈਂਕੜੇ ਪੂਰੇ ਕੀਤੇ। ਹੈੱਡ ਨੇ 2021-22 ਦੇ ਮਾਰਸ਼ ਕੱਪ ਵਿੱਚ ਦੱਖਣੀ ਆਸਟਰੇਲੀਆ ਲਈ ਖੇਡਦੇ ਹੋਏ ਇਹ ਉਪਲਬਧੀ ਹਾਸਲ ਕੀਤੀ ਸੀ, ਜਦੋਂ ਕਿ ਤਾਮਿਲਨਾਡੂ ਦੇ ਜਗਦੀਸਨ ਨੇ 2022 ਵਿਜੇ ਹਜ਼ਾਰੇ ਟਰਾਫੀ ਵਿੱਚ ਅਰੁਣਾਚਲ ਪ੍ਰਦੇਸ਼ ਖ਼ਿਲਾਫ਼ ਆਪਣੀ ਰਿਕਾਰਡ-ਤੋੜ 277 ਦੌੜਾਂ ਦੀ ਪਾਰੀ ਦੌਰਾਨ ਇਹ ਉਪਲਬਧੀ ਹਾਸਲ ਕੀਤੀ ਸੀ।