ਭਾਨਵਾਲ ਜੂਨੀਅਰ ਵਿਸ਼ਵ ਕੁਸ਼ਤੀ ''ਚ ਲਗਾਤਾਰ 2 ਤਮਗੇ ਜਿੱਤਣ ਵਾਲਾ ਪਹਿਲਾ ਭਾਰਤੀ ਬਣਿਆ

ਨਵੀਂ ਦਿੱਲੀ- ਸਾਜਨ ਭਾਨਵਾਲ ਸਲੋਵਾਕੀਆ ਦੇ ਤਰਨਾਵਾ ਵਿਚ 77 ਕਿ. ਗ੍ਰਾ. ਗ੍ਰੀਕੋ ਰੋਮਨ ਵਰਗ ਵਿਚ ਚਾਂਦੀ ਦੇ ਤਮਗੇ ਨਾਲ ਜੂਨੀਅਰ ਵਿਸ਼ਵ ਕੁਸ਼ਤੀ ਚੈਂਪੀਅਨਸ਼ਿਪ ਵਿਚ ਲਗਾਤਾਰ 2 ਤਮਗੇ ਜਿੱਤਣ ਵਾਲਾ ਪਹਿਲਾ ਭਾਰਤੀ ਬਣਿਆ। ਸੋਨੀਪਤ ਦੇ ਨੇੜੇ ਇਕ ਪਿੰਡ ਵਿਚ ਰਹਿਣ ਵਾਲੇ 20 ਸਾਲ ਦੇ ਭਾਨਵਾਲ ਲਈ ਰੂਸ ਦਾ ਇਸਲਾਮ ਓਪੀਏਵ ਕਾਫੀ ਮਜ਼ਬੂਤ ਵਿਰੋਧੀ ਸਾਬਿਤ ਹੋਇਆ। ਰੂਸ ਦੇ ਖਿਡਾਰੀ ਨੇ 8-0 ਦੀ ਬੜ੍ਹਤ ਦੇ ਨਾਲ ਤਕਨੀਕੀ ਤਜਰਬੇ ਦੇ ਆਧਾਰ 'ਤੇ ਮੁਕਾਬਲਾ ਜਿੱਤਿਆ। ਯੂਨਾਈਟਿਡ ਵਰਲਡ ਰੈਸਲਿੰਗ ਦੀ ਅਧਿਕਾਰਕ ਵੈੱਬਸਾਈਟ ਅਨੁਸਾਰ ਭਾਨਵਾਲ ਸ਼ੁਰੂਆਤੀ 90 ਸੈਕੰਡ ਵਿਚ ਹੀ ਬੁਰੀ ਤਰ੍ਹਾਂ ਪੱਛੜ ਗਿਆ ਅਤੇ ਫਿਰ ਵਾਪਸੀ ਨਹੀਂ ਕਰ ਸਕਿਆ।  ਜੁਲਾਈ ਵਿਚ ਜੂਨੀਅਰ ਏਸ਼ੀਆ ਚੈਂਪੀਅਨਸ਼ਿਪ ਵਿਚ ਸੋਨ ਤਮਗਾ ਜਿੱਤਣ ਵਾਲੇ ਹਰਿਆਣਾ ਦੇ ਭਾਨਵਾਲ ਨੇ ਇਸ ਤੋਂ ਪਹਿਲਾਂ ਫਿਨਲੈਂਡ ਦੇ ਟੈਂਪੇਅਰ ਵਿਚ 2017 ਵਿਸ਼ਵ ਜੂਨੀਅਰ ਚੈਂਪੀਅਨਸ਼ਿਪ ਵਿਚ ਕਾਂਸੀ ਤਮਗਾ ਜਿੱਤਿਆ ਸੀ। ਇਕ ਹੋਰ ਭਾਰਤੀ ਵਿਜੇ ਨੇ ਇਸ ਤੋਂ ਪਹਿਲਾਂ ਤੁਰਕੀ ਦੇ ਸਿਹਾਤ ਅਹਿਮਤ ਲਿਮਾਨ ਨੂੰ 55 ਕਿ. ਗ੍ਰਾ. ਗ੍ਰੀਕੋ ਰੋਮਨ ਵਿਚ 16.8 ਨਾਲ ਹਰਾ ਕੇ ਕਾਂਸੀ ਤਮਗਾ ਜਿੱਤਿਆ।