IND vs NZ T20I ਲੜੀ ਵਿਚਾਲੇ ਆਈ ਬੁਰੀ ਖਬਰ, ਸਟਾਰ ਖਿਡਾਰੀ ਪੂਰੀ ਸੀਰੀਜ਼ ਤੋਂ ਹੋਇਆ ਬਾਹਰ

ਸਪੋਰਟਸ ਡੈਸਕ- ਭਾਰਤ ਖ਼ਿਲਾਫ਼ ਚੱਲ ਰਹੀ 5 ਮੈਚਾਂ ਦੀ ਟੀ-20I ਲੜੀ ਵਿੱਚ 0-2 ਨਾਲ ਪਿੱਛੇ ਚੱਲ ਰਹੀ ਨਿਊਜ਼ੀਲੈਂਡ ਦੀ ਟੀਮ ਨੂੰ ਵੱਡਾ ਝਟਕਾ ਲੱਗਾ ਹੈ। ਟੀਮ ਦੇ ਤਜਰਬੇਕਾਰ ਤੇਜ਼ ਗੇਂਦਬਾਜ਼ ਮੈਟ ਹੈਨਰੀ ਪਿੰਨੀ ਵਿੱਚ ਖਿੱਚ ਕਾਰਨ ਲੜੀ ਦੇ ਬਾਕੀ ਰਹਿੰਦੇ ਤਿੰਨੋਂ ਮੈਚਾਂ ਤੋਂ ਬਾਹਰ ਹੋ ਗਏ ਹਨ। ਕ੍ਰਾਈਸਟਚਰਚ ਵਿਖੇ ਖੇਡੇ ਗਏ ਦੂਜੇ ਟੀ-20I ਮੈਚ ਦੌਰਾਨ ਹੈਨਰੀ ਮਹਿਜ਼ ਦੋ ਓਵਰ ਗੇਂਦਬਾਜ਼ੀ ਕਰਨ ਤੋਂ ਬਾਅਦ ਦਰਦ ਕਾਰਨ ਮੈਦਾਨ ਛੱਡ ਗਏ ਸਨ। ਗੇਂਦਬਾਜ਼ਾਂ ਦੇ ਵਰਕਲੋਡ ਨੂੰ ਸੰਭਾਲਣ ਲਈ ਲਏ ਗਏ ਇਸ ਫੈਸਲੇ ਤੋਂ ਬਾਅਦ ਹੈਨਰੀ ਹੁਣ 2 ਨਵੰਬਰ ਨੂੰ ਆਕਲੈਂਡ ਵਿਖੇ ਵਨਡੇ (ODI) ਟੀਮ ਨਾਲ ਜੁੜਨਗੇ।

ਹੈਨਰੀ ਤੋਂ ਇਲਾਵਾ ਤੇਜ਼ ਗੇਂਦਬਾਜ਼ ਲੌਕੀ ਫਰਗਿਊਸਨ ਵੀ ਇਹਤਿਆਤ ਦੇ ਤੌਰ 'ਤੇ ਵੈਲਿੰਗਟਨ ਵਿਖੇ ਹੋਣ ਵਾਲੇ ਤੀਜੇ ਟੀ-20I ਮੈਚ ਵਿੱਚ ਨਹੀਂ ਖੇਡਣਗੇ, ਹਾਲਾਂਕਿ ਉਹ ਆਖ਼ਰੀ ਦੋ ਮੈਚਾਂ ਵਿੱਚ ਟੀਮ 'ਚ ਵਾਪਸੀ ਕਰਨਗੇ। ਦੂਜੇ ਪਾਸੇ, ਕਾਈਲ ਜੈਮੀਸਨ ਵੀ ਇਸ ਟੀ-20I ਲੜੀ ਦੇ ਬਾਕੀ ਮੈਚਾਂ ਵਿੱਚ ਹਿੱਸਾ ਨਹੀਂ ਲੈਣਗੇ। ਜੈਮੀਸਨ ਤੀਜੇ ਟੀ-20I ਤੋਂ ਬਾਅਦ ਕੈਂਟਰਬਰੀ ਵੱਲੋਂ ਫੋਰਡ ਟ੍ਰਾਫ਼ੀ ਦਾ ਮੈਚ ਖੇਡਣਗੇ ਅਤੇ ਇਸ ਤੋਂ ਬਾਅਦ ਵਨਡੇ ਲੜੀ ਲਈ ਨਿਊਜ਼ੀਲੈਂਡ ਟੀਮ ਨਾਲ ਜੁੜਨਗੇ।

ਗੇਂਦਬਾਜ਼ੀ ਵਿਭਾਗ ਵਿੱਚ ਆਏ ਇਨ੍ਹਾਂ ਬਦਲਾਅ ਤੋਂ ਬਾਅਦ ਨਿਊਜ਼ੀਲੈਂਡ ਨੇ ਬਲੇਅਰ ਟਿਕਨਰ ਨੂੰ ਆਖ਼ਰੀ ਤਿੰਨ ਮੈਚਾਂ ਲਈ ਅਤੇ ਜੋਸ਼ ਕਲਾਰਕਸਨ ਨੂੰ ਆਖ਼ਰੀ ਦੋ ਮੈਚਾਂ ਲਈ ਟੀਮ ਵਿੱਚ ਸ਼ਾਮਲ ਕੀਤਾ ਹੈ। ਇਸ ਤੋਂ ਇਲਾਵਾ ਮੈਟ ਫਿਸ਼ਰ ਤੀਜੇ ਟੀ-20I ਲਈ ਕਵਰ ਵਜੋਂ ਟੀਮ ਦੇ ਨਾਲ ਵੈਲਿੰਗਟਨ ਜਾਣਗੇ। ਲੜੀ ਵਿੱਚ 0-2 ਨਾਲ ਪਿੱਛੇ ਚੱਲ ਰਹੀ ਨਿਊਜ਼ੀਲੈਂਡ ਟੀਮ ਲਈ ਵੈਲਿੰਗਟਨ ਵਿੱਚ ਹੋਣ ਵਾਲਾ ਤੀਜਾ ਮੁਕਾਬਲਾ ਹਾਰ ਦੇ ਸਿਲਸਿਲੇ ਨੂੰ ਰੋਕਣ ਅਤੇ ਲੜੀ ਵਿੱਚ ਵਾਪਸੀ ਕਰਨ ਦੇ ਲਿਹਾਜ਼ ਨਾਲ ਬਹੁਤ ਅਹਿਮ ਹੋਵੇਗਾ।