ਪਾਰੀ ''ਚ ਸਭ ਤੋਂ ਵੱਧ ਛੱਕੇ ਲਗਾਉਣ ਦਾ ਵਿਸ਼ਵ ਰਿਕਾਰਡ ਬਣਾਉਣ ''ਤੇ ਬੋਲੇ ਬਾਦੋਨੀ

ਨਵੀਂ ਦਿੱਲੀ— ਉੱਤਰੀ ਦਿੱਲੀ ਸਟ੍ਰਾਈਕਰਸ ਦੇ ਖਿਲਾਫ ਰਿਕਾਰਡ 19 ਛੱਕੇ ਲਗਾਉਣ ਵਾਲੇ ਦੱਖਣੀ ਦਿੱਲੀ ਦੇ ਸੁਪਰਸਟਾਰਜ਼ ਦੇ ਕਪਤਾਨ ਆਯੂਸ਼ ਬਾਦੋਨੀ ਦਾ ਮੰਨਣਾ ਹੈ ਕਿ ਦਿੱਲੀ ਪ੍ਰੀਮੀਅਰ ਲੀਗ (ਡੀ.ਪੀ.ਐੱਲ.) ਮੈਚ 'ਚ ਆਪਣੀ ਸ਼ਾਨਦਾਰ ਟਾਈਮਿੰਗ ਦੇ ਆਧਾਰ 'ਤੇ ਉਹ 55 ਗੇਂਦਾਂ 'ਚ 165 ਦੌੜਾਂ ਦੀ ਰਿਕਾਰਡ-ਤੋੜ ਪਾਰੀ ਖੇਡਣ 'ਚ ਸਫਲ ਰਹੇ। 
ਇਸ 24 ਸਾਲਾ ਸੱਜੇ ਹੱਥ ਦੇ ਖਿਡਾਰੀ ਦੀ ਧਮਾਕੇਦਾਰ ਪਾਰੀ ਦੇ ਦਮ 'ਤੇ ਦੱਖਣੀ ਦਿੱਲੀ ਸੁਪਰਸਟਾਰਜ਼ ਨੇ ਸ਼ਨੀਵਾਰ ਨੂੰ ਖੇਡੇ ਗਏ ਮੈਚ ਨੂੰ 112 ਦੌੜਾਂ ਨਾਲ ਜਿੱਤ ਕੇ ਸੈਮੀਫਾਈਨਲ ਲਈ ਟਿਕਟ ਕਟਵਾਇਆ। ਇਸ ਦੌਰਾਨ ਬਾਦੋਨੀ ਨੇ ਸਲਾਮੀ ਬੱਲੇਬਾਜ਼ ਪ੍ਰਿਯਾਂਸ਼ ਆਰੀਆ (120) ਨਾਲ ਦੂਜੇ ਵਿਕਟ ਲਈ 286 ਦੌੜਾਂ ਦੀ ਸਾਂਝੇਦਾਰੀ ਕਰਕੇ ਟੀ-20 ਕ੍ਰਿਕਟ 'ਚ ਨਵਾਂ ਰਿਕਾਰਡ ਬਣਾਇਆ। ਇੰਡੀਅਨ ਪ੍ਰੀਮੀਅਰ ਲੀਗ (ਆਈ.ਪੀ.ਐੱਲ.) 'ਚ ਲਖਨਊ ਸੁਪਰਜਾਇੰਟਸ ਲਈ ਖੇਡਣ ਵਾਲੇ ਬਾਦੋਨੀ ਨੇ 19 ਛੱਕੇ ਲਗਾਏ, ਜੋ ਟੀ-20 ਕ੍ਰਿਕਟ 'ਚ ਇਕ ਨਵਾਂ ਰਿਕਾਰਡ ਹੈ।
ਇਸ ਤੋਂ ਪਹਿਲਾਂ ਟੀ-20 ਮੈਚ ਦੀ ਇੱਕ ਪਾਰੀ ਵਿੱਚ ਸਭ ਤੋਂ ਵੱਧ ਛੱਕੇ ਮਾਰਨ ਦਾ ਰਿਕਾਰਡ ਵੈਸਟਇੰਡੀਜ਼ ਦੇ ਕ੍ਰਿਸ ਗੇਲ ਅਤੇ ਐਸਟੋਨੀਆ ਦੇ ਸਾਹਿਲ ਚੌਹਾਨ ਦੇ ਨਾਂ ਸੀ। ਦੋਵਾਂ ਬੱਲੇਬਾਜ਼ਾਂ ਨੇ ਇੱਕੋ ਜਿਹੇ 18 ਛੱਕੇ ਲਗਾਏ ਸਨ। ਬਾਦੋਨੀ ਨੇ ਕਿਹਾ, 'ਮੈਂ ਸਿਰਫ ਗੇਂਦ ਨੂੰ ਚੰਗੀ ਤਰ੍ਹਾਂ ਹਿੱਟ ਕਰਨ 'ਤੇ ਧਿਆਨ ਦੇ ਰਿਹਾ ਸੀ, ਮੈਂ ਕਦੇ ਨਹੀਂ ਸੋਚਿਆ ਸੀ ਕਿ ਮੈਂ ਇਕ ਪਾਰੀ 'ਚ 19 ਛੱਕੇ ਲਗਾਵਾਂਗਾ। ਮੈਂ ਸਿਰਫ ਗੇਂਦ ਨੂੰ ਟਾਈਮਿੰਗ 'ਤੇ ਧਿਆਨ ਦਿੰਦਾ ਹਾਂ ਅਤੇ ਗੇਂਦ ਨੂੰ ਸਖਤ ਹਿੱਟ ਕਰਨ ਦੀ ਕੋਸ਼ਿਸ਼ ਨਹੀਂ ਕਰਦਾ ਹਾਂ।
ਇਸ ਪਾਰੀ ਤੋਂ ਬਾਅਦ ਆਈਪੀਐੱਲ ਦੀ ਆਗਾਮੀ ਮੇਗਾ ਨਿਲਾਮੀ ਵਿੱਚ ਕਈ ਫ੍ਰੈਂਚਾਇਜ਼ੀ ਟੀਮਾਂ ਬਾਦੋਨੀ ਲਈ ਬੋਲੀ ਲਗਾਉਣਗੀਆਂ। ਇਸ ਨੌਜਵਾਨ ਬੱਲੇਬਾਜ਼ ਨੇ ਕਿਹਾ, 'ਮੈਂ ਫਿਲਹਾਲ (ਆਈਪੀਐੱਲ) ਮੈਗਾ ਨਿਲਾਮੀ ਬਾਰੇ ਨਹੀਂ ਸੋਚ ਰਿਹਾ ਹਾਂ। ਇੱਕ ਕਪਤਾਨ ਦੇ ਤੌਰ 'ਤੇ, ਮੇਰਾ ਧਿਆਨ ਫਿਲਹਾਲ ਡੀਪੀਐੱਲ ਜਿੱਤਣ 'ਤੇ ਹੈ। ਉਨ੍ਹਾਂ ਨੇ ਕਿਹਾ, 'ਆਈਪੀਐੱਲ 'ਚ ਖੇਡਣ ਨਾਲ ਇੱਥੇ (ਡੀਪੀਐੱਲ) ਬੱਲੇਬਾਜ਼ ਦੇ ਤੌਰ 'ਤੇ ਮੇਰਾ ਕੰਮ ਕਾਫੀ ਆਸਾਨ ਹੋ ਗਿਆ ਹੈ। ਅਸੀਂ ਉੱਥੇ ਵਿਸ਼ਵ ਪੱਧਰੀ ਗੇਂਦਬਾਜ਼ਾਂ ਦਾ ਸਾਹਮਣਾ ਕਰਦੇ ਹਾਂ ਅਤੇ ਫਿਰ ਇੱਥੇ ਆ ਕੇ ਖੇਡਣਾ ਮੁਕਾਬਲਤਨ ਆਸਾਨ ਹੋ ਜਾਂਦਾ ਹੈ।
ਲਖਨਊ ਸੁਪਰਜਾਇੰਟਸ ਦੇ ਸਹਾਇਕ ਕੋਚ ਜੌਂਟੀ ਰੋਡਸ ਨੇ ਬਾਦੋਨੀ ਦੀ ਤੁਲਨਾ ਦੱਖਣੀ ਅਫਰੀਕਾ ਦੇ ਸਾਬਕਾ ਹਮਲਾਵਰ ਸਲਾਮੀ ਬੱਲੇਬਾਜ਼ ਹਰਸ਼ੇਲ ਗਿਬਸ ਨਾਲ ਕੀਤੀ ਹੈ। ਇਸ ਬਾਰੇ ਪੁੱਛੇ ਜਾਣ 'ਤੇ ਬਾਦੋਨੀ ਨੇ ਕਿਹਾ, 'ਜੌਂਟੀ ਅਤੇ ਮੇਰੇ ਬਹੁਤ ਚੰਗੇ ਰਿਸ਼ਤੇ ਹਨ। ਮੈਂ ਇਸ ਤਰ੍ਹਾਂ ਦੀ ਤਾਰੀਫ ਕੀਤੇ ਜਾਣ ਲਈ ਉਨ੍ਹਾਂ ਦਾ ਧੰਨਵਾਦ ਕਰਨਾ ਚਾਹੁੰਦਾ ਹਾਂ ਅਤੇ ਸਿਰਫ ਇਹ ਕਹਿਣਾ ਚਾਹੁੰਦਾ ਹਾਂ ਕਿ ਨਾਲ ਜਲਦੀ ਮਿਲਾਂਗੇ ਜੌਂਟੀ।