ਏਸ਼ੀਅਨ ਐਸੋਸੀਏਸ਼ਨ ਨੇ IBA ਦੇ ਹੱਕ 'ਚ ਪਾਈ ਵੋਟ

ਸਪੋਰਟਸ ਡੈਸਕ - ਓਲੰਪਿਕ ਵਿਚ ਮੁੱਕੇਬਾਜ਼ੀ ਦਾ ਭਵਿੱਖ ਪਹਿਲਾਂ ਹੀ ਵਿਚਾਲੇ ਲਟਕਿਆ ਹੈ ਅਤੇ ਹੁਣ ਖੇਡ ਦੀ ਏਸ਼ੀਆਈ ਸੰਚਾਲਨ ਸੰਸਥਾ ਨੇ ਮੁਅੱਤਲ ਅੰਤਰਰਾਸ਼ਟਰੀ ਮੁੱਕੇਬਾਜ਼ੀ ਸੰਘ (ਆਈ.ਬੀ.ਏ.) ਦੇ ਹੱਕ ਵਿਚ ਵੋਟ ਪਾ ਕੇ ਇਸ ਦੀਆਂ ਮੁਸ਼ਕਲਾਂ ਵਧਾ ਦਿੱਤੀਆਂ ਹਨ। ਗੁਪਤ ਮਤਦਾਨ ਰਾਹੀਂ ਕਰਵਾਈ ਗਈ ਵੋਟਿੰਗ ਵਿੱਚ 21 ਦੇਸ਼ਾਂ ਨੇ ਆਈ.ਬੀ.ਏ. ਦੇ ਨਾਲ ਬਣੇ ਰਹਿਣ ਦੇ ਪੱਖ ਵਿੱਚ ਜਦੋਂ ਕਿ 14 ਦੇਸ਼ਾਂ ਨੇ ਇਸ ਖੇਡ ਦੇ ਸੰਚਾਲਨ ਲਈ ਗਠਿਤ ਕੀਤੀ ਗਈ ਨਵੀਂ ਸੰਸਥਾ ਵਿਸ਼ਵ ਮੁੱਕੇਬਾਜ਼ੀ ਵਿੱਚ ਸ਼ਾਮਲ ਹੋਣ ਦੇ ਹੱਕ ਵਿੱਚ ਵੋਟ ਦਿੱਤੀ। ਭਾਰਤ ਤੋਂ ਇਲਾਵਾ ਵੋਟਿੰਗ ਵਿੱਚ ਹਿੱਸਾ ਲੈਣ ਵਾਲੇ ਹੋਰ ਦੇਸ਼ਾਂ ਵਿੱਚ ਬਹਿਰੀਨ, ਭੂਟਾਨ, ਬਰੂਨੇਈ, ਕੰਬੋਡੀਆ, ਚੀਨ, ਚੀਨੀ ਤਾਈਪੇ, ਤਿਮੋਰ ਲੇਸਟੇ, ਹਾਂਗਕਾਂਗ, ਇੰਡੋਨੇਸ਼ੀਆ, ਈਰਾਨ, ਇਰਾਕ, ਜਾਪਾਨ, ਜਾਰਡਨ, ਕਜ਼ਾਕਿਸਤਾਨ, ਕਿਰਗਿਸਤਾਨ, ਲਾਓਸ, ਲੇਬਨਾਨ, ਮਕਾਊ, ਮਲੇਸ਼ੀਆ, ਮਿਆਂਮਾਰ, ਨੇਪਾਲ, ਪਾਕਿਸਤਾਨ, ਫਲਸਤੀਨ, ਫਿਲੀਪੀਨਜ਼, ਕਤਰ, ਸਾਊਦੀ ਅਰਬ, ਸਿੰਗਾਪੁਰ, ਸ਼੍ਰੀਲੰਕਾ, ਸੀਰੀਆ, ਤਜ਼ਾਕਿਸਤਾਨ, ਥਾਈਲੈਂਡ, ਤੁਰਕਮੇਨਿਸਤਾਨ, ਸੰਯੁਕਤ ਅਰਬ ਅਮੀਰਾਤ, ਉਜ਼ਬੇਕਿਸਤਾਨ, ਵੀਅਤਨਾਮ ਅਤੇ ਯਮਨ ਸ਼ਾਮਲ ਸਨ। ਭਾਰਤ ਨੇ ਨਿਗਰਾਨ ਵਜੋਂ ਹਿੱਸਾ ਲਿਆ।
ਆਈਬੀਏ ਅੰਤਰਰਾਸ਼ਟਰੀ ਓਲੰਪਿਕ ਕਮੇਟੀ (ਆਈਓਸੀ) ਨਾਲ ਵਿਵਾਦ ਵਿੱਚ ਹੈ। ਆਈਓਸੀ ਨੇ ਟੋਕੀਓ ਅਤੇ ਪੈਰਿਸ ਖੇਡਾਂ ਲਈ ਓਲੰਪਿਕ ਯੋਗਤਾ ਪ੍ਰਕਿਰਿਆ ਦੀ ਜ਼ਿੰਮੇਵਾਰੀ ਸੰਭਾਲ ਲਈ ਹੈ। ਏਸ਼ੀਅਨ ਬਾਕਸਿੰਗ ਕਨਫੈਡਰੇਸ਼ਨ (ਏਐੱਸਬੀਸੀ) ਦੇ ਵਿਸ਼ਵ ਮੁੱਕੇਬਾਜ਼ੀ ਵਿੱਚ ਸ਼ਾਮਲ ਹੋਣ ਤੋਂ ਇਨਕਾਰ ਕਰਨ ਦੇ ਇਸ ਫੈਸਲੇ ਤੋਂ ਬਾਅਦ, 2028 ਵਿੱਚ ਲਾਸ ਏਂਜਲਸ ਵਿੱਚ ਹੋਣ ਵਾਲੀਆਂ ਓਲੰਪਿਕ ਖੇਡਾਂ ਵਿੱਚ ਮੁੱਕੇਬਾਜ਼ੀ ਨੂੰ ਸ਼ਾਮਲ ਕਰਨ ਨੂੰ ਲੈ ਕੇ ਮੁਸ਼ਕਲਾਂ ਵਧ ਗਈਆਂ ਹਨ। ਵੋਟਿੰਗ ਤੋਂ ਬਾਅਦ ਆਈਬੀਏ ਨੇ ਵਿਸ਼ਵ ਮੁੱਕੇਬਾਜ਼ੀ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਕਿਹਾ ਕਿ ਨਵੀਂ ਸੰਸਥਾ ਕੋਲ ਪ੍ਰਮੁੱਖ ਅੰਤਰਰਾਸ਼ਟਰੀ ਮੁਕਾਬਲਿਆਂ ਦੇ ਆਯੋਜਨ ਲਈ ਸਰੋਤਾਂ ਦੀ ਘਾਟ ਹੈ। ਆਈਬੀਏ ਨੇ ਇੱਕ ਬਿਆਨ ਵਿੱਚ ਕਿਹਾ, “ਵਿਸ਼ਵ ਮੁੱਕੇਬਾਜ਼ੀ ਕੋਲ ਪ੍ਰਮੁੱਖ ਅੰਤਰਰਾਸ਼ਟਰੀ ਮੁਕਾਬਲਿਆਂ ਦੇ ਆਯੋਜਨ ਲਈ ਵਿੱਤ, ਮੁਹਾਰਤ ਅਤੇ ਸਹਾਇਤਾ ਨਹੀਂ ਹੈ। ਉਸ ਦਾ ਮੁੱਕੇਬਾਜ਼ੀ ਨੂੰ ਅੱਗੇ ਵਧਾਉਣ ਦਾ ਕੋਈ ਇਰਾਦਾ ਨਹੀਂ ਹੈ। ” ਏਸ਼ੀਅਨ ਸੰਸਥਾ ਦੇ ਸਮਰਥਨ ਦਾ ਸੁਆਗਤ ਕਰਦੇ ਹੋਏ, ਆਈਬੀਏ ਨੇ ਕਿਹਾ ਕਿ ਇਹ ਸਾਲਾਂ ਦੌਰਾਨ ਆਪਣੇ ਚੰਗੇ ਕੰਮ ਦੀ ਪੁਸ਼ਟੀ ਕਰਦਾ ਹੈ।
ਬਿਆਨ ਵਿੱਚ ਕਿਹਾ ਗਿਆ ਹੈ, "ਇਹ ਫੈਸਲਾ (ਏਐੱਸਬੀਸੀ ਦੁਆਰਾ) ਵਿਸ਼ਵ ਭਰ ਵਿੱਚ ਮੁੱਕੇਬਾਜ਼ੀ ਦੇ ਵਿਕਾਸ ਲਈ ਆਈਬੀਏ ਦੀ ਸਾਲਾਂ ਦੀ ਸਖ਼ਤ ਮਿਹਨਤ ਅਤੇ ਆਈਬੀਏ ਮੁੱਕੇਬਾਜ਼ੀ ਪਰਿਵਾਰ ਦੀ ਸੱਚੀ ਏਕਤਾ ਨੂੰ ਦਰਸਾਉਂਦਾ ਹੈ। ਆਈਬੀਏ ਨੇ ਉਨ੍ਹਾਂ ਰਾਸ਼ਟਰੀ ਫੈਡਰੇਸ਼ਨਾਂ 'ਤੇ ਵੀ ਨਿਸ਼ਾਨ ਵਿੰਨ੍ਹਿਆ ਜਿਨ੍ਹਾਂ ਨੇ ਗੁਪਤ ਵੋਟਿੰਗ ਦੌਰਾਨ ਉਸ ਦੇ ਵਿਰੁੱਧ ਵੋਟ ਕੀਤੀ ਸੀ। ਬਿਆਨ ਵਿੱਚ ਕਿਹਾ ਗਿਆ ਹੈ, “ਕਿਸੇ ਸੰਸਥਾ ਵਿੱਚ ਸ਼ਾਮਲ ਹੋਣ ਦਾ ਕੋਈ ਵਾਜਬ ਨਹੀਂ ਹੈ ਜਿਸਦਾ ਮੁੱਕੇਬਾਜ਼ੀ ਨੂੰ ਉਤਸ਼ਾਹਤ ਕਰਨ ਦਾ ਕੋਈ ਇਰਾਦਾ ਨਹੀਂ ਹੈ ਪਰ ਉਹ ਸਿਰਫ ਆਪਣੀ ਲੀਡਰਸ਼ਿਪ ਦੀਆਂ ਨਿੱਜੀ ਇੱਛਾਵਾਂ ਨੂੰ ਪੂਰਾ ਕਰਦੀ ਹੈ। ਜਿੱਥੋਂ ਤੱਕ ਭਾਰਤ ਦਾ ਸਵਾਲ ਹੈ ਤਾਂ ਭਾਰਤੀ ਮੁੱਕੇਬਾਜ਼ੀ ਫੈਡਰੇਸ਼ਨ (ਬੀਐੱਫਆਈ) ਮਈ ਵਿੱਚ ਵਿਸ਼ਵ ਮੁੱਕੇਬਾਜ਼ੀ ਵਿੱਚ ਸ਼ਾਮਲ ਹੋਣ ਲਈ ਸਹਿਮਤ ਹੋ ਗਈ ਸੀ।