ਅਨਾਹਤ ਵਾਸ਼ਿੰਗਟਨ ''ਚ ਸਕੁਐਸ਼ ਆਨ ਫਾਇਰ ਦੇ ਸੈਮੀਫਾਈਨਲ ''ਚ ਪੁੱਜੀ

ਵਾਸ਼ਿੰਗਟਨ : ਵਾਸ਼ਿੰਗਟਨ ਵਿੱਚ ਖੇਡੇ ਜਾ ਰਹੇ 'ਸਕੁਐਸ਼ ਆਨ ਫਾਇਰ ਓਪਨ' (PSA Bronze Level) ਵਿੱਚ ਭਾਰਤ ਦੀ ਉੱਭਰਦੀ ਸਟਾਰ ਅਨਾਹਤ ਸਿੰਘ ਨੇ ਆਪਣੀ ਖੇਡ ਦਾ ਲੋਹਾ ਮਨਾਉਂਦਿਆਂ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾਈ ਹੈ। ਵਿਸ਼ਵ ਦੀ 31ਵੇਂ ਨੰਬਰ ਦੀ ਖਿਡਾਰਨ ਅਨਾਹਤ ਨੇ ਮਹਿਲਾ ਸਿੰਗਲਜ਼ ਦੇ ਕੁਆਰਟਰ ਫਾਈਨਲ ਵਿੱਚ ਇੱਕ ਬੇਹੱਦ ਰੋਮਾਂਚਕ ਉਲਟਫੇਰ ਕਰਦਿਆਂ ਮਿਸਰ ਦੀ ਦੂਜੀ ਸੀਡ ਅਤੇ ਵਿਸ਼ਵ ਦੀ 17ਵੇਂ ਨੰਬਰ ਦੀ ਖਿਡਾਰਨ ਸਨਾ ਇਬਰਾਹਿਮ ਨੂੰ ਸ਼ਿਕਸਤ ਦਿੱਤੀ।

ਮੁਕਾਬਲੇ ਵਿਚ 0-2 ਨਾਲ ਪੱਛੜਨ ਤੋਂ ਬਾਅਦ ਕੀਤੀ ਸ਼ਾਨਦਾਰ ਵਾਪਸੀ 
ਇਸ ਮੁਕਾਬਲੇ ਵਿੱਚ ਅਨਾਹਤ ਸਿੰਘ ਇੱਕ ਸਮੇਂ 0-2 ਨਾਲ ਪਿੱਛੇ ਚੱਲ ਰਹੀ ਸੀ, ਜਦੋਂ ਉਸ ਨੇ ਪਹਿਲੇ ਦੋ ਸੈੱਟ 8-11, 8-11 ਨਾਲ ਗੁਆ ਦਿੱਤੇ ਸਨ। ਹਾਲਾਂਕਿ, ਤੀਜੇ ਅਤੇ ਚੌਥੇ ਗੇਮ ਵਿੱਚ ਵੀ ਉਹ 5-6 ਨਾਲ ਪਿੱਛੇ ਸੀ, ਪਰ ਉੱਥੋਂ ਉਸ ਨੇ ਸ਼ਾਨਦਾਰ ਵਾਪਸੀ ਕੀਤੀ ਅਤੇ ਅਗਲੇ ਤਿੰਨੋਂ ਸੈੱਟ 11-7, 11-8, 11-7 ਨਾਲ ਜਿੱਤ ਕੇ ਮੈਚ ਆਪਣੇ ਨਾਮ ਕਰ ਲਿਆ। ਹੁਣ ਸੈਮੀਫਾਈਨਲ ਵਿੱਚ ਅਨਾਹਤ ਦਾ ਸਾਹਮਣਾ ਅਮਰੀਕਾ ਦੀ ਸਬਰੀਨਾ ਸੋਭੀ ਨਾਲ ਹੋਵੇਗਾ।

ਦੂਜੇ ਪਾਸੇ, ਪੁਰਸ਼ ਵਰਗ ਵਿੱਚ ਭਾਰਤ ਨੂੰ ਨਿਰਾਸ਼ਾ ਹੱਥ ਲੱਗੀ ਹੈ। ਭਾਰਤੀ ਖਿਡਾਰੀ ਵੀਰ ਚੋਟਰਾਨੀ ਪੁਰਸ਼ਾਂ ਦੇ ਕੁਆਰਟਰ ਫਾਈਨਲ ਵਿੱਚ ਇੰਗਲੈਂਡ ਦੇ ਛੇਵੀਂ ਸੀਡ ਡੇਕਲਾਨ ਜੇਮਸ ਹੱਥੋਂ ਹਾਰ ਕੇ ਟੂਰਨਾਮੈਂਟ ਤੋਂ ਬਾਹਰ ਹੋ ਗਏ ਹਨ। ਜੇਮਸ ਨੇ ਵੀਰ ਚੋਟਰਾਨੀ ਨੂੰ 8-11, 11-6, 14-12, 11-9 ਨਾਲ ਮਾਤ ਦਿੱਤੀ।