ਪਿਆਰ ਪਾਉਣ ਲਈ ਔਰਤ ਨੇ ਰਚੀ ਸਾਜ਼ਿਸ਼, ਆਪਣੀ ਹੀ ਅਸ਼ਲੀਲ ਵੀਡੀਓ ਕੀਤੀ ਵਾਇਰਲ
01/12/2020 6:39:07 PM
ਨੰਗਲ (ਜ.ਬ.)— ਨੰਗਲ ਸਬ-ਡਿਵੀਜ਼ਨ 'ਚ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਨੂੰ ਜਾਣ ਤੁਸੀਂ ਵੀ ਹੈਰਾਨ ਰਹਿ ਜਾਓਗੇ। ਦਰਅਸਲ ਇਕ ਔਰਤ ਨੇ ਆਪਣੇ ਵਿਆਹ ਤੋਂ ਪਹਿਲਾਂ ਵਾਲਾ ਪਿਆਰ ਪਾਉਣ ਲਈ ਆਪਣੇ ਪੇਕੇ ਪਿੰਡ 'ਚ ਰਹਿਣ ਵਾਲੇ ਪੁਰਾਣੇ ਆਸ਼ਿਕ ਨਾਲ ਮਿਲ ਕੇ ਆਪਣੀ ਹੀ ਅਸ਼ਲੀਲ ਵੀਡੀਓ ਬਣਾ ਕੇ ਉਸ ਨੂੰ ਨੈੱਟ ਉੱਤੇ ਵਾਇਰਲ ਕਰ ਦਿੱਤਾ। ਔਰਤ ਨੇ ਇਸ ਘਿਨਾਉਣੇ ਕੰਮ ਦਾ ਦੋਸ਼ ਆਪਣੇ ਪਤੀ 'ਤੇ ਲਗਾ ਦਿੱਤਾ। ਪੁਲਸ ਨੇ ਇਕ ਸਾਲ ਤੋਂ ਜ਼ਿਆਦਾ ਸਮੇਂ ਬਾਅਦ ਇਸ ਮਸਲੇ ਨੂੰ ਸੁਲਝਾਉਂਦੇ ਹੋਏ ਇਸ ਮਾਮਲੇ ਦੀ ਪੂਰੀ ਹਕੀਕਤ ਸਾਹਮਣੇ ਲਿਆ ਦਿੱਤੀ ਅਤੇ ਪਤੀ ਨੂੰ ਬੇਕਸੂਰ ਸਾਬਤ ਕਰਕੇ ਔਰਤ ਅਤੇ ਉਸ ਦੇ ਪੁਰਾਣੇ ਆਸ਼ਿਕ ਖਿਲਾਫ ਮੁਕੱਦਮਾ ਦਰਜ ਕਰ ਦਿੱਤਾ।
ਪੁਲਸ ਦੀ ਐੱਫ. ਆਈ. ਆਰ. ਅਨੁਸਾਰ ਰਮੇਸ਼ ਕੁਮਾਰ (ਕਾਲਪਨਿਕ ਨਾਮ) ਨੰਗਲ ਨੇ 2018 ਦੇ ਅਗਸਤ ਮਹੀਨੇ 'ਚ ਪੁਲਸ ਨੂੰ ਦਿੱਤੀ ਸ਼ਿਕਾਇਤ 'ਚ ਲਿਖਿਆ ਕਿ ਮੇਰੀ ਪਤਨੀ ਦੀ ਅਸ਼ਲੀਲ ਵੀਡੀਓ ਨੈੱਟ ਉੱਤੇ ਵਾਇਰਲ ਹੋਈ ਹੈ। ਇਸ ਵੀਡੀਓ 'ਚ ਮੇਰੀ ਪਤਨੀ ਨਾਲ ਇਕ ਵਿਅਕਤੀ ਵੀ ਹੈ। ਉਸ ਨੇ ਪੁਲਸ ਤੋਂ ਮੰਗ ਕੀਤੀ ਕਿ ਮੇਰੀ ਪਤਨੀ ਤੋਂ ਪੁੱਛਗਿੱਛ ਕੀਤੀ ਜਾਵੇ ਅਤੇ ਵੀਡੀਓ ਵਾਇਰਲ ਕਰਨ ਵਾਲੇ ਵਿਅਕਤੀ ਦਾ ਪਤਾ ਲਗਾਇਆ ਜਾਵੇ। ਮੈਨੂੰ ਇਸ ਵੀਡੀਓ ਬਾਰੇ ਕੁਝ ਨਹੀਂ ਪਤਾ।
ਪਤੀ 'ਤੇ ਲਾਏ ਅਸ਼ਲੀਲ ਵੀਡੀਓ ਕਰਨ ਦੇ ਦੋਸ਼
ਉੱਧਰ ਹੀ ਦੂਜੇ ਪਾਸੇ ਪਤਨੀ ਨੇ ਆਪਣੇ ਪਤੀ ਖਿਲਾਫ ਪੁਲਸ ਨੂੰ ਸ਼ਿਕਾਇਤ ਕੀਤੀ ਕਿ ਮੇਰੇ ਪਤੀ ਨੇ ਮੇਰੀ ਅਸ਼ਲੀਲ ਵੀਡੀਓ ਬਣਾ ਕੇ ਆਪਣੇ ਇਕ ਰਿਸ਼ਤੇਦਾਰ ਨਾਲ ਮਿਲ ਕੇ ਨੈੱਟ ਉੱਤੇ ਵਾਇਰਲ ਕਰ ਦਿੱਤੀ ਹੈ। ਸਾਡਾ ਵਿਆਹ 2016 ਨੂੰ ਹੋਇਆ ਸੀ। ਮੇਰਾ ਸਹੁਰਾ ਪਰਿਵਾਰ ਮੈਨੂੰ ਤੰਗ-ਪ੍ਰੇਸ਼ਾਨ ਕਰਦਾ ਹੈ। ਵੀਡੀਓ ਵਾਇਰਲ ਹੋਣ ਨਾਲ ਮੇਰੇ ਪੇਕੇ ਪਰਿਵਾਰ ਦਾ ਅਤੇ ਮੇਰਾ ਨਾਮ ਬਦਨਾਮ ਹੋਇਆ ਹੈ।
ਜਾਂਚ ਕਰਨ 'ਤੇ ਹੋਇਆ ਖੁਲਾਸਾ
ਪੁਲਸ ਨੇ ਪੜਤਾਲ 'ਚ ਲਿਖਿਆ ਕਿ ਪਤਨੀ ਅੰਜੂ (ਕਾਲਪਨਿਕ ਨਾਮ) ਦੇ ਉਸ ਦੇ ਪੇਕੇ ਪਿੰਡ 'ਚ ਰਹਿਣ ਵਾਲੇ ਇਕ ਨੌਜਵਾਨ ਨਾਲ ਨਾਜਾਇਜ਼ ਸੰਬੰਧ ਸਨ। ਇਹ ਦੋਵੇਂ ਬਚਪਨ ਤੋਂ ਹੀ ਪਿਆਰ ਕਰਦੇ ਸਨ। ਪਤਨੀ ਨੇ ਆਪਣੇ ਪਹਿਲੇ ਪਿਆਰ ਨੂੰ ਪਾਉਣ ਲਈ ਆਪਣੀ ਅਸ਼ਲੀਲ ਵੀਡੀਓ ਬਣਾ ਕੇ ਨੈੱਟ ਉੱਤੇ ਵਾਇਰਲ ਕੀਤੀ। ਇਸ 'ਚ ਪਤੀ ਰਮੇਸ਼ ਕੁਮਾਰ ਦਾ ਕੋਈ ਦੋਸ਼ ਨਹੀਂ ਹੈ। ਪੁਲਸ ਨੇ ਔਰਤ ਅਤੇ ਉਸ ਦੇ ਪੇਕੇ ਪਿੰਡ ਦੇ ਨੌਜਵਾਨ ਦੇ ਖਿਲਾਫ ਵੱਖ-ਵੱਖ ਧਾਰਾਵਾਂ ਅਧੀਨ ਮਾਮਲਾ ਦਰਜ ਕਰ ਦਿੱਤਾ ਹੈ।
ਕੀ ਕਹਿਣੈ ਡੀ. ਐੱਸ. ਪੀ. ਦਾ
ਡੀ. ਐੱਸ. ਪੀ. ਦਾ ਕਹਿਣਾ ਹੈ ਕਿ ਮੈਂ ਇਸ ਮਾਮਲੇ ਦੀ ਤਫਤੀਸ਼ ਕਰ ਰਿਹਾ ਹਾਂ। ਸਾਡੀ ਤਫਤੀਸ਼ 'ਚ ਇਹ ਹਕੀਕਤ ਸਾਹਮਣੇ ਆਈ ਕਿ ਔਰਤ ਨੇ ਆਪਣੇ ਪੁਰਾਣੇ ਆਸ਼ਿਕ ਨਾਲ ਮਿਲ ਕੇ ਵੀਡੀਓ ਵਾਇਰਲ ਕੀਤੀ ਹੈ। ਅਸੀਂ ਮਾਮਲਾ ਦਰਜ ਕਰ ਲਿਆ ਹੈ। ਮਾਮਲਾ ਦਰਜ ਕਰਨ ਤੋਂ ਬਾਅਦ ਅਸੀਂ ਮੁਲਜ਼ਮਾਂ ਦੇ ਘਰਾਂ 'ਚ ਛਾਪੇਮਾਰੀ ਕੀਤੀ ਪਰ ਕੋਈ ਨਹੀਂ ਮਿਲਿਆ। ਬਾਕੀ ਅਸਲੀਅਤ ਮੁਲਜ਼ਮਾਂ ਨੂੰ ਫੜਨ ਤੋਂ ਬਾਅਦ ਪਤਾ ਚੱਲੇਗੀ।
