ਬੇਟੇ ਦੇ ਮੈਡਲ ਦਾ ਰੰਗ ਬਦਲਣ ਦਾ ਕੋਈ ਗਮ ਨਹੀਂ ਪਰ ਤਿਰੰਗਾ ਉੱਚਾ ਲਹਿਰਾਉਣ ਦਾ ਮਾਣ

ਲੁਧਿਆਣਾ (ਵਿੱਕੀ) - 25 ਸਾਲ ਦਾ ਲੁਧਿਆਣਵੀ ਵੇਟ ਲਿਫਟਰ ਵਿਕਾਸ ਠਾਕੁਰ ਨੇ ਆਸਟਰੇਲੀਆ ਦੇ ਗੋਲਡ ਕੋਸਟ 'ਚ ਚੱਲ ਰਹੀ 21ਵੀਂ ਕਾਮਨਵੈਲਥ ਖੇਡਾਂ 'ਚ 4 ਸਾਲ ਬਾਅਦ ਫਿਰ ਤੋਂ ਇਤਿਹਾਸ ਰਚਦੇ ਹੋਏ ਭਾਰਤ ਦੀ ਝੋਲੀ 'ਚ ਕਾਂਸੇ ਦਾ ਮੈਡਲ ਪਾਇਆ ਹੈ । ਜਿਉਂ ਹੀ ਵਿਕਾਸ ਨੇ ਕਾਮਨਵੈਲਥ ਖੇਡਾਂ ਦਾ ਦੂਜਾ ਮੈਡਲ ਚੁੰਮਿਆ ਤਾਂ ਘਰ ਵਿਚ ਟੀ. ਵੀ. ਦੇ ਸਾਹਮਣੇ ਬੈਠੇ ਉਸ ਦੇ ਮੁਕਾਬਲੇ ਨੂੰ ਵੇਖ ਰਹੇ ਪਰਿਵਾਰਕ ਮੈਬਰਾਂ ਦੀਆਂ ਅੱਖਾਂ 'ਚ ਖੁਸ਼ੀ ਦੇ ਹੰਝੂ ਆ ਗਏ । ਰੇਲਵੇ ਵਿਚ ਗਾਰਡ ਦੇ ਤੌਰ 'ਤੇ ਡਿਊਟੀ ਕਰਨ ਵਾਲੇ ਵਿਕਾਸ ਦੇ ਪਿਤਾ ਬ੍ਰਿਜ ਲਾਲ ਠਾਕੁਰ ਜੋ ਕਿ ਪੈਰ ਦੇ ਆਪ੍ਰੇਸ਼ਨ ਦੇ ਬਾਅਦ ਜ਼ੇਰੇ ਇਲਾਜ ਹਨ ਨੇ ਆਪਣੇ ਬੇਟੇ ਦੀ ਇਸ ਉੁਪਲੱਬਧੀ ਦੀ ਖੁਸ਼ੀ ਵਿਚ ਪੈਰ ਦੇ ਦਰਦ ਨੂੰ ਭੁੱਲ ਭੰਗੜਾ ਪਾਉਣਾ ਸ਼ੁਰੂ ਕਰ ਦਿੱਤਾ ।ਠਾਕੁਰ ਨੇ ਕਿਹਾ ਕਿ ਬੇਸ਼ੱਕ ਕਾਮਨਵੈਲਥ ਖੇਡਾਂ 'ਚ ਵਿਕਾਸ ਦੀ ਇਸ ਉੁਪਲੱਬਧੀ 'ਚ ਉਸ ਦੇ ਮੈਡਲ ਦਾ ਰੰਗ ਬਦਲ ਗਿਆ ਹੈ ਪਰ ਉਨ੍ਹਾਂ ਨੂੰ ਇਸ ਗੱਲ ਦਾ ਮਾਣ ਹੈ ਕਿ ਉਨ੍ਹਾਂ ਦੇ ਬੇਟੇ ਦੀ ਉਪਲੱਬਧੀ ਨੇ 7 ਸਮੁੰਦਰੋਂ ਪਾਰ ਵੀ ਤਿਰੰਗਾ ਲਹਿਰਾਇਆ ਹੈ ।  ਰੇਖੀ ਸਿਨੇਮਾ ਰੋਡ 'ਤੇ ਰੇਲਵੇ ਕਾਲੋਨੀ 'ਚ ਸ ਥਿਤ ਵਿਕਾਸ ਦੇ ਘਰ 'ਤੇ ਉਸ ਦੀ ਉਪਲੱਬਧੀ ਦੇ ਬਾਅਦ ਵਧਾਈਆਂ ਦੇਣ ਵਾਲਿਆਂ ਦੀਆਂ ਲਾਈਨਾਂ ਲੱਗ ਗਈਆਂ । ਖਾਸ ਗੱਲ ਤਾਂ ਇਹ ਹੈ ਕਿ ਵਿਕਾਸ ਦੀ ਭੈਣ ਅਭਿਲਾਸ਼ਾ ਜਿਸ ਦਾ ਦਿੱਲੀ 'ਚ ਵਿਆਹ ਹੋਇਆ ਹੈ, ਉਹ ਵੀ ਆਪਣੇ ਭਰਾ ਦੀ ਇਸ ਪ੍ਰਾਪਤੀ ਨੂੰ ਦੇਖਣ ਪਤੀ ਸੰਗੀਤ ਦੇ ਨਾਲ ਪਹਿਲਾਂ ਹੀ ਲੁਧਿਆਣਾ ਆ ਚੁੱਕੀ ਸੀ ਅਤੇ ਆਪਣੇ ਮਾਪਿਆਂ ਨਾਲ ਬੈਠ ਕੇ ਪੂਰੇ 2 ਘੰਟੇ ਤੱਕ ਟੀ. ਵੀ. 'ਤੇ ਭਰਾ ਦੇ ਮੁਕਾਬਲੇ ਨੂੰ ਵੇਖਦੇ ਹੋਏ ਉਸ ਦੇ ਮੈਡਲ ਜਿੱਤਣ ਦੀ ਕਾਮਨਾ ਕਰਦੀ ਰਹੀ ।  
ਜਿਉਂ ਹੀ ਵਿਕਾਸ ਨੇ ਮੈਡਲ ਜਿੱਤਿਆ ਤਾਂ ਸਭ ਤੋਂ ਪਹਿਲਾਂ ਉਸ ਨੇ ਆਪਣੇ ਜੀਜਾ ਸੰਗੀਤ ਨੂੰ ਆਸਟਰੇਲੀਆ ਤੋਂ ਫੋਨ ਕਰ ਕੇ ਕਿਹਾ ਕਿ ਲਵ ਯੂ, ਜੀਜੂ ਮੈਂ ਇੰਡੀਆ ਲਈ ਫਿਰ ਤੋਂ ਮੈਡਲ ਜਿੱਤ ਲਿਆ । ਦਿੱਲੀ ਨਿਵਾਸੀ ਸੰਗੀਤ ਨੇ ਦੱਸਿਆ ਕਿ ਵਿਕਾਸ ਦੇ ਮੂੰਹੋਂ ਇਹ ਸ਼ਬਦ ਸੁਣਦੇ ਹੀ ਉਸ ਨੂੰ ਮਾਣ ਹੋਇਆ ਅਤੇ ਉਸ ਨੇ ਵਿਕਾਸ ਨੂੰ ਵਧਾਈ ਵੀ ਦਿੱਤੀ । ਇਸ ਦੇ ਬਾਅਦ ਵਿਕਾਸ ਨੇ ਆਪਣੇ ਪਿਤਾ ਬ੍ਰਿਜ ਠਾਕੁਰ, ਮਾਤਾ ਆਸ਼ਾ ਅਤੇ ਭੈਣ ਅਭਿਲਾਸ਼ਾ ਦੇ ਨਾਲ ਕੁੱਝ ਮਿੰਟ ਤੱਕ ਗੱਲ ਕੀਤੀ । ਬ੍ਰਿਜ ਠਾਕੁਰ ਨੇ ਦੱਸਿਆ ਕਿ ਵਿਕਾਸ 12 ਅਪ੍ਰੈਲ ਨੂੰ ਦਿੱਲੀ ਤੋਂ ਲੁਧਿਆਣਾ ਆ ਸਕਦਾ ਹੈ ।  

ਇਸ ਵਾਰ ਬਦਲੀ ਵੇਟ ਕੈਟਾਗਰੀ ਤੇ ਇਸ ਤਰ੍ਹਾਂ ਹਾਸਲ ਕੀਤਾ ਮੁਕਾਮ
ਇੱਥੇ ਦੱਸ ਦੇਈਏ ਕਿ ਆਸਟਰੇਲੀਆ ਵਿਚ ਚੱਲ ਰਹੀਆਂ ਕਾਮਨਵੈਲਥ ਖੇਡਾਂ 'ਚ ਵਿਕਾਸ ਨੇ ਆਪਣਾ ਭਾਰ ਵਰਗ ਬਦਲਦੇ ਹੋਏ 94 ਕਿਲੋਗ੍ਰਾਮ ਵੇਟ ਕੈਟਾਗਰੀ 'ਚ ਭਾਗ ਲਿਆ ਹੈ । ਜਦੋਂ ਕਿ ਇਸ ਤੋਂ ਪਹਿਲਾਂ ਉਹ 85 ਕਿਲੋਗ੍ਰਾਮ ਵਿਚ ਭਾਗ ਲੈਂਦਾ ਰਿਹਾ ਹੈ । ਭਾਰਤ ਦੀ ਝੋਲੀ ਵਿਚ ਤੀਜਾ ਕਾਂਸੀ ਦਾ ਮੈਡਲ ਜਿੱਤਣ ਵਾਲੇ ਵਿਕਾਸ ਨੇ 94 ਕਿਲੋਗ੍ਰਾਮ ਭਾਰ ਵਰਗ ਵਿਚ ਕੁੱਲ 351 ਕਿਲੋਗ੍ਰਾਮ ਭਾਰ ਚੁੱਕਿਆ ।
ਉਨ੍ਹਾਂ ਨੇ ਸਨੈਚ ਵਿਚ 159 ਕਿਲੋਗ੍ਰਾਮ ਭਾਰ ਚੁੱਕ ਕੇ ਬਿਹਤਰ ਪ੍ਰਦਰਸ਼ਨ ਕੀਤਾ, ਉਥੇ ਹੀ ਕਲੀਨ ਐਂਡ ਜਰਕ ਵਿਚ ਚੰਗੇ ਪ੍ਰਦਰਸ਼ਨ ਤੋਂ ਖੁੰਝ ਜਾਣ ਕਾਰਨ ਉਨ੍ਹਾਂ ਨੂੰ ਕਾਂਸੀ ਦੇ ਮੈਡਲ 'ਤੇ ਸਬਰ ਕਰਨਾ ਪਿਆ । ਵਿਕਾਸ ਨੇ ਸਨੈਚ ਵਿਚ ਪਹਿਲੀ ਕੋਸ਼ਿਸ਼ ਨਾਲ 152 ਕਿਲੋਗ੍ਰਾਮ ਅਤੇ ਦੂਜੀ ਕੋਸ਼ਿਸ਼ ਵਿਚ 156 ਕਿਲੋਗ੍ਰਾਮ ਭਾਰ ਚੁੱਕਿਆ । ਤੀਜੀ ਕੋਸ਼ਿਸ਼ ਵਿਚ 159 ਕਿਲੋਗ੍ਰਾਮ ਭਾਰ ਚੁੱਕ ਕੇ ਸਭ ਤੋਂ ਵਧੀਆ ਪ੍ਰਦਰਸ਼ਨ ਕੀਤਾ । ਇਸ ਦੇ ਬਾਅਦ ਕਲੀਨ ਐਂਡ ਜਰਕ ਵਿਚ ਉਸ ਨੇ ਪਹਿਲੀ ਕੋਸ਼ਿਸ਼ ਵਿਚ 192 ਕਿਲੋਗ੍ਰਾਮ ਭਾਰ ਚੁੱਕਿਆ, ਦੂਜੀ ਅਤੇ ਤੀਜੀ ਕੋਸ਼ਿਸ਼ ਵਿਚ ਉਹ 200 ਕਿਲੋਗ੍ਰਾਮ ਦਾ ਭਾਰ ਚੁੱਕਣ ਵਿਚ ਅਸਫਲ ਰਹੇ ਅਤੇ ਦੁਬਾਰਾ ਕਾਮਨਵੈਲਥ ਖੇਡਾਂ ਦਾ ਗੋਲਡ ਮੈਡਲ ਚੁੰਮਣ ਤੋਂ ਪੱਛੜ ਗਏ । ਵਿਕਾਸ ਨੂੰ ਕਾਂਸੇ ਦਾ ਮੈਡਲ ਮਿਲਿਆ ।
ਭੈਣ ਦੀ ਦੁਆ-ਭਗਵਾਨ ਹਰ ਭੈਣ ਨੂੰ ਦੇਵੇ ਵਿਕਾਸ ਵਰਗਾ ਭਰਾ
ਭਰਾ ਵਿਕਾਸ ਦੀ ਇਸ ਸ਼ਾਨਦਾਰ ਉੁਪਲੱਬਧੀ 'ਤੇ ਭੈਣ ਅਭਿਲਾਸ਼ਾ ਦੀਆਂ ਅੱਖਾਂ 'ਚ ਖੁਸ਼ੀ ਦੇ ਹੰਝੂ ਆ ਗਏ ।ਅਭਿਲਾਸ਼ਾ ਨੇ ਕਿਹਾ ਕਿ ਉਹ ਆਪਣੀ ਖੁਸ਼ੀ ਨੂੰ ਬਿਆਨ ਨਹੀਂ ਕਰ ਸਕਦੀ ਕਿ ਉਸ ਦੇ ਛੋਟੇ ਭਰਾ ਨੇ ਦੇਸ਼ ਦਾ ਮਾਣ ਵਧਾਇਆ ਹੈ । ਉਨ੍ਹਾਂ ਕਿਹਾ ਕਿ ਉਹ ਇਹੀ ਦੁਆ ਕਰਦੀ ਹੈ ਕਿ ਭਗਵਾਨ ਅਜਿਹਾ ਭਰਾ ਸਭ ਭੈਣਾਂ ਨੂੰ ਦੇਵੇ ਜੋ ਦੇਸ਼ ਦਾ ਨਾਂ ਰੌਸ਼ਨ ਕਰੇ । ਉਸ ਨੇ ਕਿਹਾ ਕਿ ਆਸਟਰੇਲੀਆ ਵਿਚ ਜਾਣ ਤੋਂ ਪਹਿਲਾਂ ਵਿਕਾਸ ਮੈਨੂੰ ਅਤੇ ਆਪਣੇ ਜੀਜਾ ਨੂੰ ਮਿਲ ਕੇ ਗਿਆ ਅਤੇ ਉਸ ਨੇ ਬਹੁਤ ਆਤਮ ਵਿਸ਼ਵਾਸ ਦੇ ਨਾਲ ਕਿਹਾ ਸੀ ਕਿ ਮੈਡਲ ਦੇ ਬਿਨਾਂ ਨਹੀਂ ਆਵਾਂਗਾ । ਇੱਛਾ ਨੇ ਕਿਹਾ ਕਿ ਵਿਕਾਸ ਆਪਣੇ ਜੀਜਾ ਸੰਗੀਤ ਦੇ ਨਾਲ ਕਾਫ਼ੀ ਪਿਆਰ ਕਰਦਾ ਹੈ ਅਤੇ ਆਪਣੀ ਹਰ ਗੱਲ ਉਨ੍ਹਾਂ ਦੇ ਨਾਲ ਸ਼ੇਅਰ ਕਰਦਾ ਹੈ ।  
ਪਿਤਾ ਨੇ ਪਹਿਲਾਂ ਹੀ ਕੰਧ 'ਤੇ ਲਿਖ ਦਿੱਤਾ ਕਿ ਪੁੱਤਰ ਲਿਆਏਗਾ ਕਾਂਸੇ ਜਾਂ ਸਿਲਵਰ ਦਾ ਮੈਡਲ

ਕਹਿੰਦੇ ਹਨ ਕਿ ਹਰ ਮਾਂ-ਬਾਪ ਨੂੰ ਆਪਣੇ ਬੱਚਿਆਂ ਦੀ ਕਾਬਲੀਅਤ ਬਾਰੇ ਪੂਰਾ ਪਤਾ ਹੁੰਦਾ ਹੈ । ਇਸ ਗੱਲ ਨੂੰ ਸੱਚ ਸਾਬਤ ਕਰ ਵਿਖਾਇਆ ਹੈ ਮੈਡਲ ਜੇਤੂ ਵਿਕਾਸ ਦੇ ਪਿਤਾ ਬ੍ਰਿਜ ਠਾਕੁਰ ਨੇ ਜਿਨ੍ਹਾਂ ਨੇ ਵਿਕਾਸ ਦੇ ਐਤਵਾਰ ਨੂੰ ਮੁਕਾਬਲੇ ਤੋਂ ਇਕ ਦਿਨ ਪਹਿਲਾਂ ਸ਼ਨੀਵਾਰ ਨੂੰ ਹੀ ਘਰ ਦੇ ਇਕ ਕਮਰੇ ਦੀ ਦੀਵਾਰ 'ਤੇ ਪੈੱਨ ਨਾਲ ਲਿਖ ਕੇ ਉਸ ਦੇ ਕਾਂਸੇ ਜਾਂ ਸਿਲਵਰ ਮੈਡਲ ਜਿੱਤਣ ਦਾ ਦਾਅਵਾ ਕਰ ਦਿੱਤਾ ਸੀ । ਜਿਉਂ ਹੀ ਵਿਕਾਸ ਨੇ ਉੁਪਲੱਬਧੀ ਹਾਸਲ ਕੀਤੀ ਤਾਂ ਉਨ੍ਹਾਂ ਨੇ ਕੰਧ 'ਤੇ ਲਿਖੇ ਆਪਣੇ ਉਨ੍ਹਾਂ ਸ਼ਬਦਾਂ ਨੂੰ ਵੀ ਚੁੰਮਿਆ । ਬ੍ਰਿਜ ਠਾਕੁਰ ਨੇ ਦੱਸਿਆ ਕਿ ਵਿਕਾਸ ਪਿਛਲੇ 4 ਸਾਲ ਤੋਂ ਹੀ ਐੱਨ. ਆਈ. ਐੱਸ. ਪਟਿਆਲਾ 'ਚ ਟਰੇਨਿੰਗ ਲੈ ਰਿਹਾ ਹੈ । ਪਿਛਲੇ ਮਹੀਨਿਆਂ ਵਿਚ ਹੀ ਉਸ ਨੇ ਕਾਮਨਵੈਲਥ ਖੇਡਾਂ ਵਿਚ 94 ਕਿਲੋਗ੍ਰਾਮ ਵੇਟ ਕੈਟਾਗਿਰੀ ਵਿਚ ਖੇਡਣ ਦਾ ਫ਼ੈਸਲਾ ਲੈ ਕੇ ਤਿਆਰੀ ਸ਼ੁਰੂ ਕੀਤੀ । ਉਨ੍ਹਾਂ ਕਿਹਾ ਕਿ ਵਿਕਾਸ ਦਾ ਸੁਪਨਾ ਉਲੰਪਿਕਸ ਵਿਚ ਭਾਰਤ ਲਈ ਮੈਡਲ ਜਿੱਤਣਾ ਹੈ ।  
ਪ੍ਰਧਾਨ ਮੰਤਰੀ ਮੋਦੀ ਨੇ ਟਵੀਟ ਕਰ ਕੇ ਦਿੱਤੀ ਵਧਾਈ
ਵਿਕਾਸ ਨੂੰ ਉਸ ਦੀ ਇਸ ਉਪਲੱਬਧੀ 'ਤੇ ਜਿੱਥੇ ਪੂਰਾ ਦੇਸ਼ ਵਧਾਈ ਦੇ ਰਿਹਾ ਹੈ, ਉਥੇ ਹੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀ ਬਾਕਾਇਦਾ ਟਵੀਟ ਕਰ ਕੇ ਵਿਕਾਸ ਨੂੰ ਮੁਬਾਰਕਬਾਦ ਦਿੱਤੀ ਹੈ । ਟਵੀਟ ਵਿਚ ਪ੍ਰਧਾਨ ਮੰਤਰੀ ਨੇ ਲਿਖਿਆ ਹੈ ਕਿ ਵਿਕਾਸ ਤੁਹਾਡੀ ਇਸ ਉਪਲੱਬਧੀ ਨੇ ਦੇਸ਼ ਵਾਸੀਆਂ ਦੇ ਚਿਹਰੇ 'ਤੇ ਖੁਸ਼ੀ ਲਿਆ ਦਿੱਤੀ ਹੈ ।  
ਬਾਕਸਿੰਗ ਕਰਦਾ-ਕਰਦਾ ਬਣ ਗਿਆ ਵੇਟ ਲਿਫਟਰ
ਵਿਕਾਸ ਜਦੋਂ 6 ਸਾਲ ਦਾ ਸੀ ਤਾਂ ਬਾਕਸਿੰਗ ਕਰਦਾ ਸੀ । ਪਿਤਾ ਨੇ ਦੱਸਿਆ ਕਿ ਉਸ ਵਿਚ ਇੰਨਾ ਜਨੂੰਨ ਸੀ ਕਿ ਰੇਤ ਦੀ ਭਰੀ ਬੋਰੀ ਨੂੰ ਟੰਗ ਕੇ ਉਸ ਵਿਚ ਮੁੱਕੇ ਮਾਰਿਆ ਕਰਦਾ ਸੀ ।  ਲੁਧਿਆਣਾ ਵਿਚ ਬਾਕਸਿੰਗ ਸੈਂਟਰ ਨਾ ਹੋਣ ਨਾਲ ਉਸ ਨੂੰ ਘਰ ਦੇ ਨੇੜੇ ਵੇਟ ਲਿਫਟਿੰਗ ਕਲੱਬ ਵਿਚ ਟ੍ਰੇਨਿੰਗ ਸ਼ੁਰੂ ਕਰਵਾ ਦਿੱਤੀ । ਤਦ ਵਿਕਾਸ ਸਿਰਫ 9 ਸਾਲ ਦਾ ਸੀ ਅਤੇ ਉਸ ਨੇ ਨਿਯਮਤ ਅਭਿਆਸ ਨੂੰ ਆਪਣੇ ਰੁਟੀਨ 'ਚ ਸ਼ਾਮਲ ਕਰ ਕੇ ਅੱਜ ਇਸ ਮੁਕਾਮ ਤੱਕ ਪੁੱਜਣ ਦਾ ਸਫਰ ਤੈਅ ਕੀਤਾ ਹੈ ।
ਵਿਕਾਸ ਦੀਆਂ ਵਿਸ਼ੇਸ਼ ਉਪਲੱਬਧੀਆਂ
* 2017 'ਚ ਕਾਮਨਵੈਲਥ ਚੈਂਪੀਅਨਸ਼ਿਪ ਗੋਲਡ ਕੋਸਟ ਵਿਚ ਕਾਂਸੇ ਦਾ ਮੈਡਲ ਜਿੱਤਿਆ
* 2016 'ਚ ਸੈਫ ਖੇਡ ਭਾਰਤ ਵਿਚ ਗੋਲਡ ਮੈਡਲ
* 2015 'ਚ ਸੀਨੀਅਰ ਕਾਮਨਵੈਲਥ ਚੈਂਪੀਅਨਸ਼ਿਪ ਭਾਰਤ ਵਿਚ ਗੋਲਡ ਮੈਡਲ
* 2014 ਵਿਚ ਗਲਾਸਗੋ ਕਾਮਨਵੈਲਥ ਖੇਡਾਂ ਵਿਚ ਸਿਲਵਰ ਮੈਡਲ
* 2013 ਵਿਚ ਸੀਨੀਅਰ ਕਾਮਨਵੈਲਥ ਚੈਂਪੀਅਨਸ਼ਿਪ ਮਲੇਸ਼ੀਆ ਤੋਂ ਸਿਲਵਰ ਮੈਡਲ
* 2013 ਵਿਚ ਜੂ. ਕਾਮਨਵੈਲਥ ਚੈਂਪੀਅਨਸ਼ਿਪ ਸਮੋਆ ਵਿਚ ਗੋਲਡ ਮੈਡਲ