ਪੰਜਾਬ ਸਿੱਖਿਆ ਮੰਤਰੀ ਨੇ ਲਿਆ ਵੱਡਾ ਫੈਸਲਾ, 637 ਸਕੂਲ ਹੀ ਹੋਣਗੇ ਮਰਜ

ਗੁਰਦਾਸਪੁਰ (ਵਿਨੋਦ)-ਪੰਜਾਬ ਸਰਕਾਰ ਨੇ 20 ਤੋਂ ਘੱਟ ਵਿਦਿਆਰਥੀਆਂ ਵਾਲੇ ਸਰਕਾਰੀ ਮੁੱਢਲੇ ਸਕੂਲਾਂ ਦਾ ਇਕ ਕਿਲੋਮੀਟਰ ਦਾਇਰੇ ਵਿਚ ਆਉਣ ਵਾਲੇ ਹੋਰ ਮੁੱਢਲੇ ਸਕੂਲਾਂ ਵਿਚ ਮਰਜ ਕਰਨ ਦਾ ਫੈਸਲਾ ਲਿਆ ਹੈ। ਸੂਬੇ ਵਿਚ ਅਜਿਹੇ ਕਰੀਬ 637 ਸਕੂਲ ਹਨ। 
ਪਹਿਲਾਂ ਸਰਕਾਰ ਨੇ 800 ਸਕੂਲਾਂ ਨੂੰ ਮਰਜ ਕਰਨ ਦਾ ਫੈਸਲਾ ਲਿਆ ਸੀ ਪਰ ਬਾਅਦ ਵਿਚ ਇਕ ਕਿਲੋਮੀਟਰ ਦੇ ਦਾਇਰੇ ਦੀ ਸ਼ਰਤ ਕਾਰਨ 163 ਸਕੂਲ ਇਸ ਤੋਂ ਬਾਹਰ ਹੋ ਗਏ ਹਨ। ਮਰਜ ਹੋਣ ਵਾਲੇ ਸਕੂਲਾਂ ਵਿਚੋਂ 47 ਸਕੂਲਾਂ ਵਿਚ ਵਿਦਿਆਰਥੀਆਂ ਦੀ ਗਿਣਤੀ 5 ਤੋਂ ਵੀ ਘੱਟ ਹੈ ਅਤੇ 15 ਸਕੂਲਾਂ ਵਿਚ 3-3 ਹੀ ਵਿਦਿਆਰਥੀ ਹਨ। 
ਬੀਤੇ ਦਿਨ ਸਿੱਖਿਆ ਅਧਿਕਾਰੀਆਂ ਕੋਲੋਂ ਰਿਪੋਰਟ ਮਿਲਣ ਤੋਂ ਬਾਅਦ ਸਿੱਖਿਆ ਮੰਤਰੀ ਅਰੁਣਾ ਚੌਧਰੀ ਨੇ ਇਕ ਬੈਠਕ ਵਿਚ ਕਿਹਾ ਕਿ ਵਿਭਾਗ ਇਸ ਗੱਲ ਦਾ ਖਾਸ ਖਿਆਲ ਰੱਖੇ ਕਿ ਬੰਦ ਕੀਤੇ ਜਾਣ ਵਾਲੇ ਸਕੂਲਾਂ ਨੂੰ ਇਕ ਕਿਲੋਮੀਟਰ ਦੇ ਦਾਇਰੇ ਵਿਚ ਸਥਿਤ ਦੂਜੇ ਸਕੂਲਾਂ ਵਿਚ ਹੀ ਮਰਜ ਕੀਤਾ ਜਾਵੇ, ਨਾਲ ਹੀ ਸਕੂਲਾਂ ਵਿਚ ਤਾਇਨਾਤ ਸਟਾਫ ਨੂੰ ਪਾਰਦਰਸ਼ਤਾ ਤਹਿਤ ਦੂਜੇ ਸਕੂਲਾਂ ਵਿਚ ਭੇਜਿਆ ਜਾਵੇ। ਅਗਲੇ ਸਿੱਖਿਆ ਸੈਸ਼ਨ ਤੋਂ ਪਹਿਲਾਂ ਇਨ੍ਹਾਂ ਸਕੂਲਾਂ ਨੂੰ ਦੂਜੇ ਸਕੂਲਾਂ ਵਿਚ ਮਰਜ ਕਰ ਦਿੱਤਾ ਜਾਵੇਗਾ। 25 ਅਕਤੂਬਰ ਤੋਂ ਇਹ ਕਵਾਇਦ ਸ਼ੁਰੂ ਹੋ ਜਾਵੇਗੀ।