ਅਗਲੇ ਸੈਸ਼ਨ ''ਚ 300 ਪ੍ਰਾਈਵੇਟ ਇੰਜੀਨੀਅਰਿੰਗ ਕਾਲਜਾਂ ''ਚ ਨਹੀਂ ਹੋਵੇਗਾ ਦਾਖਲਾ

ਜਲੰਧਰ (ਸੁਮਿਤ)— ਦੇਸ਼ ਭਰ ਵਿਚ ਵਿਦਿਆਰਥੀਆਂ ਵਿਚ ਭਾਵੇਂ ਇੰਜੀਨੀਅਰਿੰਗ ਦਾ ਕ੍ਰੇਜ਼ ਬਰਕਰਾਰ ਹੈ ਪਰ ਇਸ ਦੇ ਬਾਵਜੂਦ ਬਹੁਤ ਸਾਰੇ ਕਾਲਜ ਅਜਿਹੇ ਹਨ, ਜਿਨ੍ਹਾਂ 'ਚ ਕੁਲ ਸੀਟਾਂ 'ਚੋਂ 30 ਫੀਸਦੀ ਵੀ ਨਹੀਂ ਭਰਦੀਆਂ। ਇਹ ਸਿਲਸਿਲਾ ਇਕ ਜਾਂ ਦੋ ਸਾਲਾਂ ਤੋਂ ਨਹੀਂ, ਸਗੋਂ ਪਿਛਲੇ ਕਈ ਸਾਲਾਂ ਤੋਂ ਚੱਲਿਆ ਆ ਰਿਹਾ ਹੈ। ਆਲ ਇੰਡੀਆ ਕੌਂਸਲਿੰਗ ਫਾਰ ਟੈਕਨੀਕਲ ਐਜੂਕੇਸ਼ਨ (ਏ. ਆਈ. ਸੀ. ਟੀ. ਈ.) ਅਤੇ ਐੱਨ. ਐੱਚ. ਆਰ. ਡੀ. ਵੱਲੋਂ ਅਜਿਹੇ ਕਾਲਜਾਂ 'ਤੇ ਪੂਰੀ ਨਜ਼ਰ ਰੱਖੀ ਜਾ ਰਹੀ ਸੀ। ਲਗਾਤਾਰ ਹਰ ਸਾਲ ਜੋ ਕਾਲਜ ਆਪਣੀ ਇਨਰੋਲਮੈਂਟ ਨੂੰ ਸੁਧਾਰ ਨਹੀਂ ਸਕਿਆ, ਨੂੰ ਬੰਦ ਕਰਨ ਦਾ ਫੈਸਲਾ ਵੀ ਕੌਂਸਲ ਵੱਲੋਂ ਲਿਆ ਜਾ ਰਿਹਾ ਹੈ। 
ਮਿਲੀ ਜਾਣਕਾਰੀ ਅਨੁਸਾਰ ਕੌਂਸਲ ਅਤੇ ਐੱਮ. ਐੱਚ. ਆਰ. ਡੀ. ਵੱਲੋਂ ਅਜਿਹੇ 300 ਪ੍ਰਾਈਵੇਟ ਇੰਜੀਨੀਅਰਿੰਗ ਕਾਲਜਾਂ ਦੀ ਪਛਾਣ ਕੀਤੀ ਗਈ ਹੈ, ਜਿਨ੍ਹਾਂ ਦੀ 30 ਫੀਸਦੀ ਤੋਂ ਘੱਟ ਇਨਰੋਲਮੈਂਟ ਲਗਾਤਾਰ ਚੱਲੀ ਆ ਰਹੀ ਹੈ। ਇਨ੍ਹਾਂ 'ਚੋਂ ਕਰੀਬ 150 ਕਾਲਜ ਤਾਂ ਅਜਿਹੇ ਦੱਸੇ ਜਾ ਰਹੇ ਹਨ ਜੋ 20 ਫੀਸਦੀ ਇਨਰੋਲਮੈਂਟ 'ਤੇ ਹੀ ਕਾਲਜ ਚਲਾ ਰਹੇ ਹਨ। ਏ. ਆਈ. ਸੀ. ਟੀ. ਈ. ਅਤੇ ਐੱਮ. ਐੱਚ. ਆਰ. ਡੀ. ਵੱਲੋਂ ਅਜਿਹੇ ਇੰਜੀਨੀਅਰਿੰਗ ਕਾਲਜਾਂ 'ਤੇ ਐਕਸ਼ਨ ਲੈਂਦਿਆਂ ਇਨ੍ਹਾਂ ਨੂੰ ਬੰਦ ਕਰਨ ਦਾ ਫੈਸਲਾ ਲਿਆ ਜਾ ਰਿਹਾ ਹੈ। ਜਾਣਕਾਰੀ ਮੁਤਾਬਕ ਇਨ੍ਹਾਂ ਕਾਲਜਾਂ ਨੂੰ ਅਗਲੇ ਸਾਲ 2018-19 ਵਿਚ ਦਾਖਲਾ ਪ੍ਰਕਿਰਿਆ ਨਹੀਂ ਚਲਾਉਣ ਲਈ ਕਿਹਾ ਜਾ ਰਿਹਾ ਹੈ। ਏ. ਆਈ. ਸੀ. ਟੀ. ਈ. ਦਾ ਮੰਨਣਾ ਹੈ ਕਿ ਜਿਨ੍ਹਾਂ ਕਾਲਜਾਂ ਵਿਚ ਇਨਰੋਲਮੈਂਟ ਲਗਾਤਾਰ ਘੱਟ ਚੱਲੀ ਆ ਰਹੀ ਹੈ, ਅਜਿਹੇ ਕਾਲਜਾਂ 'ਚ ਕੋਈ ਨਾ ਕੋਈ ਤਰੁੱਟੀ ਜ਼ਰੂਰ ਹੋਵੇਗੀ ਕਿਉਂਕਿ ਕੁਆਲਿਟੀ ਐਜੂਕੇਸ਼ਨ ਦੇਣ ਵਾਲੇ ਕਾਲਜਾਂ ਦੀਆਂ ਸੀਟਾਂ ਤਾਂ ਪਹਿਲ ਦੇ ਆਧਾਰ 'ਤੇ ਭਰਦੀਆਂ ਹਨ।
ਇਕ ਹੋਰ ਜਾਣਕਾਰੀ ਮੁਤਾਬਕ ਇਨ੍ਹਾਂ 300 ਕਾਲਜ ਤੋਂ ਇਲਾਵਾ 500 ਹੋਰ ਕਾਲਜ ਵੀ ਜਾਂਚ ਦੇ ਘੇਰੇ ਵਿਚ ਹਨ। ਇਨ੍ਹਾਂ ਕਾਲਜਾਂ ਵਿਚ ਵੀ ਇਨਰੋਲਮੈਂਟ ਬਹੁਤ ਘੱਟ ਹੈ ਅਤੇ ਬੱਚਿਆਂ ਦੀ ਗਿਣਤੀ ਵਧਾਉਣ ਵਿਚ ਇਹ ਕਾਲਜ ਅਸਫਲ ਰਹੇ ਹਨ। ਅਜੇ ਇਨ੍ਹਾਂ ਕਾਲਜਾਂ ਦੀ ਕੋਈ ਅਧਿਕਾਰਤ ਸੂਚੀ ਨਹੀਂ ਮਿਲੀ ਪਰ ਇਨ੍ਹਾਂ ਸਾਰੇ ਕਾਲਜਾਂ ਨੂੰ ਕੌਂਸਲ ਵੱਲੋਂ ਅਗਲੇ ਸੈਸ਼ਨ ਵਿਚ ਦਾਖਲਾ ਨਾ ਕਰਨ ਲਈ ਨਿਰਦੇਸ਼ ਜਾਰੀ ਕੀਤੇ ਜਾ ਰਹੇ ਹਨ। ਹੁਣ ਦੇਖਦੇ ਹਾਂ ਕਿ ਹੋਰ 500 ਕਾਲਜਾਂ 'ਤੇ ਕੀ ਐਕਸ਼ਨ ਹੋਵੇਗਾ।