ਪੰਜਾਬ 'ਚ ਵੋਟਰਾਂ ਦੇ ਮੂਡ ਨੇ ਉਡਾਈ ਉਮੀਦਵਾਰਾਂ ਦੀ ਨੀਂਦ

ਚੰਡੀਗੜ੍ਹ— ਲੋਕ ਸਭਾ ਚੋਣਾਂ ਦੇ ਨਤੀਜਿਆਂ ਤੋਂ ਪਹਿਲਾਂ ਆਏ ਐਗਜ਼ਿਟ ਪੋਲ ਦੇ ਨਤੀਜਿਆਂ ਨੇ ਉਮੀਦਵਾਰਾਂ ਦੇ ਦਿਲਾਂ ਦੀਆਂ ਧੜਕਣਾਂ ਵਧਾਈਆਂ ਹੋਈਆਂ ਹਨ ਪਰ ਜ਼ਿਆਦਾ ਨੀਂਦ ਉਨ੍ਹਾਂ ਹਲਕਿਆਂ ਦੇ ਉਮੀਦਵਾਰਾਂ ਦੀ ਉਡੀ ਹੈ, ਜਿਥੇ ਵੋਟ ਫੀਸਦੀ ਵਿਚ ਗਿਰਾਵਟ ਵੇਖੀ ਗਈ ਹੈ। ਪੰਜਾਬ ਵਿਚ ਪਿਛਲੀਆਂ ਚੋਣਾਂ ਦੇ ਮੁਕਾਬਲੇ ਲਗਭਗ ਘੱਟ ਵੋਟਾਂ ਪੋਲ ਹੋਈਆਂ ਹਨ। ਪਿਛਲੀ ਵਾਰ 70.63 ਫੀਸਦੀ ਲੋਕਾਂ ਨੇ ਵੋਟ ਦੇ ਆਪਣੇ ਅਧਿਕਾਰ ਦੀ ਵਰਤੋਂ ਕੀਤੀ ਸੀ, ਜਦਕਿ ਚੋਣ ਕਮਿਸ਼ਨ ਦੇ ਡਾਟਾ ਅਨੁਸਾਰ ਇਸ ਵਾਰ 65.77 ਫੀਸਦੀ ਲੋਕਾਂ ਨੇ ਹੀ ਵੋਟ ਦੇ ਆਪਣੇ ਹੱਕ ਦੀ ਵਰਤੋਂ ਕੀਤੀ। ਹਾਲਾਂਕਿ ਇਸ ਵਾਰ ਵੋਟਰਾਂ ਦੀ ਗਿਣਤੀ ਵਿਚ ਕਾਫੀ ਚੰਗਾ ਵਾਧਾ ਹੋਇਆ ਹੈ ਅਤੇ ਪੰਜਾਬ ਵਿਚ 20892674 ਵੋਟ ਰਜਿਸਟਰਡ ਸਨ ਪਰ ਇਨ੍ਹਾਂ ਵਿਚੋਂ ਲਗਭਗ 1 ਕਰੋੜ 37 ਲੱਖ ਵੋਟਰਾਂ ਨੇ ਹੀ ਵੋਟ ਦੇ ਆਪਣੇ ਹੱਕ ਦੀ ਵਰਤੋਂ ਕੀਤੀ, ਜਦਕਿ ਪਿਛਲੀ ਵਾਰ ਇਹ ਅੰਕੜਾ ਇਕ ਕਰੋੜ 38 ਲੱਖ ਤੋਂ ਵੀ ਜ਼ਿਆਦਾ ਸੀ।
ਸਭ ਤੋਂ ਘੱਟ ਅੰਮ੍ਰਿਤਸਰ ਵਿਚ ਪੋਲਿੰਗ
ਅੰਮ੍ਰਿਤਸਰ ਵਿਚ ਪਿਛਲੀਆਂ ਚੋਣਾਂ ਦੇ ਮੁਕਾਬਲੇ ਇਸ ਵਾਰ ਘੱਟ ਪੋਲਿੰਗ ਹੋਈ ਹੈ। ਅੰਮ੍ਰਿਤਸਰ ਵਿਚ ਸਿਰਫ 55.35 ਫੀਸਦੀ ਲੋਕਾਂ ਨੇ ਵੋਟ ਦੇ ਆਪਣੇ ਅਧਿਕਾਰ ਦੀ ਵਰਤੋਂ ਕੀਤੀ। ਅੰਮ੍ਰਿਤਸਰ ਦੇ ਕੁਲ ਵੋਟਰਾਂ 1507875 ਦਾ ਜੇਕਰ ਫੀਸਦੀ ਦੇ ਲਿਹਾਜ ਨਾਲ ਹਿਸਾਬ ਲਾਇਆ ਜਾਵੇ ਤਾਂ ਇਸ ਵਾਰ ਲਗਭਗ 849647 ਵੋਟਰਾਂ ਨੇ ਵੋਟ ਪਾਈ। ਜਦਕਿ ਪਿਛਲੀ ਵਾਰ 1007286 ਲੋਕਾਂ ਨੇ ਵੋਟਾਂ ਦੇ ਆਪਣੇ ਅਧਿਕਾਰ ਦੀ ਵਰਤੋਂ ਕੀਤੀ ਸੀ। ਇਸ ਲਈ ਇਸ ਵਾਰ 157639 ਘੱਟ ਲੋਕਾਂ ਨੇ ਵੋਟ ਪਾਈ। ਲੋਕਾਂ ਦੀ ਘੱਟ ਗਿਣਤੀ ਵਿਚ ਵੋਟ ਪਾਉਣ ਲਈ ਉਤਰਨਾ ਹੀ ਇਸ ਸੀਟ ਦੇ ਉਮੀਦਵਾਰਾਂ ਦੀ ਨੀਂਦ ਉਡਾਉਣ ਲਈ ਕਾਫੀ ਹੈ। ਇਹੀ ਹਾਲਤ ਲੁਧਿਆਣਾ, ਫਰੀਦਕੋਟ, ਫਤਿਹਗੜ੍ਹ ਸਾਹਿਬ, ਜਲੰਧਰ ਅਤੇ ਸੰਗਰੂਰ ਸੀਟਾਂ 'ਤੇ ਰਹੀ ਅਤੇ ਇਥੇ ਵੀ ਵੋਟਰਾਂ ਨੇ ਦਿਲਚਸਪੀ ਨਹੀਂ ਦਿਖਾਈ। ਹਾਲਾਂਕਿ ਜਗ ਬਾਣੀ ਨੇ ਘੱਟ ਵੋਟਿੰਗ ਦੇ ਕਾਰਨਾਂ ਦੀ ਜਾਣਕਾਰੀ ਹਾਸਲ ਕਰਨ ਲਈ ਪੰਜਾਬ ਦੇ ਚੋਣ ਕਮਿਸ਼ਨਰ ਨਾਲ ਕਈ ਵਾਰ ਗੱਲ ਕਰਨ ਦੀ ਕੋਸ਼ਿਸ਼ ਕੀਤੀ ਪਰ ਬਿਜ਼ੀ ਹੋਣ ਕਾਰਨ ਉਨ੍ਹਾਂ ਨਾਲ ਸੰਪਰਕ ਨਹੀਂ ਹੋ ਸਕਿਆ।
ਇਹ ਰਹੇ ਘੱਟ ਵੋਟਿੰਗ ਹੋਣ ਦੇ ਕਾਰਨ
1. ਗਰਮੀ ਕਾਰਨ ਵੋਟਰ ਦੁਪਹਿਰ ਦੇ ਸਮੇਂ ਬਾਹਰ ਨਹੀਂ ਨਿਕਲੇ।
2. ਦੋਵਾਂ ਦਲਾਂ ਪ੍ਰਤੀ ਨਾਰਾਜ਼ਗੀ ਕਾਰਨ ਕਈ ਸਥਾਨਾਂ 'ਤੇ ਵੋਟਾਂ ਨਹੀਂ ਪਈਆਂ।
3. ਡੇਰਾ ਬਿਆਸ ਵਿਚ ਭੰਡਾਰੇ ਕਾਰਨ ਵੀ ਵੋਟਰ ਬਿਜ਼ੀ ਰਹੇ।
4. ਕਈ ਸਥਾਨਾਂ 'ਤੇ ਵੋਟਰਾਂ ਦਾ ਐਡਰੈੱਸ ਬਦਲਣ ਕਾਰਨ ਵੋਟ ਬਦਲ ਗਈ।
5. ਕੁਝ ਲੋਕ ਵੀਕੈਂਡ ਮਨਾਉਣ ਸ਼ਨੀਵਾਰ ਨੂੰ ਹੀ ਛੁੱਟੀ 'ਤੇ ਚਲੇ ਗਏ ਸਨ।