ਕੀ ਪੰਜਾਬ ਮੁੜ ਅੱਤਵਾਦ ਦੇ ਕੰਢੇ ’ਤੇ ਖੜ੍ਹਾ?  ISI ਦੀ ਛਤਰ-ਛਾਇਆ ਹੇਠ ਵੱਡੀ ਸਾਜ਼ਿਸ਼: 4 ਮਹੀਨੇ, 2 ਧਮਾਕੇ

ਜਲੰਧਰ (ਇੰਟ.)-ਪੰਜਾਬ ਇਕ ਵਾਰ ਫਿਰ ਅਜਿਹੇ ਮੋੜ ’ਤੇ ਖੜ੍ਹਾ ਵਿਖਾਈ ਦੇ ਰਿਹਾ ਹੈ, ਜਿੱਥੇ ਅਤੀਤ ਦੇ ਪਰਛਾਵੇਂ ਵਰਤਮਾਨ ਦੀਆਂ ਸੁਰੱਖਿਆ ਚਿੰਤਾਵਾਂ ਨਾਲ ਟਕਰਾਉਣ ਲੱਗੇ ਹਨ। ਸਿਰਫ਼ ਚਾਰ ਮਹੀਨਿਆਂ ਦੇ ਅੰਦਰ ਰੇਲਵੇ ਦੇ ਅਹਿਮ ਮਾਲ ਢੋਆ-ਢੁਆਈ ਲਾਂਘੇ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਭੰਨ-ਤੋੜ ਦੀਆਂ 2 ਯੋਜਨਾਬੱਧ ਕੋਸ਼ਿਸ਼ਾਂ ਨੇ ਨਾ ਸਿਰਫ਼ ਸੁਰੱਖਿਆ ਏਜੰਸੀਆਂ ਦੀ ਨੀਂਦ ਉਡਾ ਦਿੱਤੀ ਹੈ, ਸਗੋਂ ਇਕ ਵੱਡੀ ਅਤੇ ਡੂੰਘੀ ਸਾਜ਼ਿਸ਼ ਦੀ ਦਸਤਕ ਵੀ ਦਿੱਤੀ ਹੈ।

ਸ਼ੁਰੂਆਤੀ ਜਾਂਚ 'ਚ ਸਾਹਮਣੇ ਆ ਰਹੇ ਸੰਕੇਤ ਇਸ ਪਾਸੇ ਇਸ਼ਾਰਾ ਕਰ ਰਹੇ ਹਨ ਕਿ ਇਹ ਘਟਨਾਵਾਂ ਵੱਖਰੀਆਂ-ਵੱਖਰੀਆਂ ਨਹੀਂ, ਸਗੋਂ ਸਰਹੱਦ ਪਾਰ ਤੋਂ ਚਲਾਈ ਜਾ ਰਹੀ ਇਕ ਸੰਗਠਿਤ ਰਣਨੀਤੀ ਦਾ ਹਿੱਸਾ ਹੋ ਸਕਦੀਆਂ ਹਨ, ਜਿਸ ਵਿਚ ਆਈ. ਐੱਸ. ਆਈ. ਦੀ ਸਰਗਰਮ ਭੂਮਿਕਾ ਅਤੇ ਖ਼ਾਲਿਸਤਾਨ ਪੱਖੀ ਸੰਗਠਨਾਂ ਦਾ ਮੁੜ ਸੁਰਜੀਤ ਹੋਣਾ ਸ਼ਾਮਲ ਹੈ। ਧਮਾਕਿਆਂ ਨੂੰ ਕਥਿਤ ਤੌਰ ’ਤੇ ਅੰਜਾਮ ਦੇਣ ਵਾਲੇ ਸੰਗਠਨਾਂ ਵਿਚ ਖ਼ਾਲਿਸਤਾਨ ਟਾਈਗਰ ਫੋਰਸ (ਕੇ. ਟੀ. ਐੱਫ਼.) ਅਤੇ ਖ਼ਾਲਿਸਤਾਨ ਜ਼ਿੰਦਾਬਾਦ ਫੋਰਸ (ਕੇ. ਜ਼ੈੱਡ. ਐੱਫ਼.) ਸ਼ਾਮਲ ਹਨ। ਅਜਿਹੇ ਵਿਚ ਸਭ ਤੋਂ ਵੱਡਾ ਸਵਾਲ ਇਹੀ ਹੈ ਕਿ ਕੀ ਪੰਜਾਬ ਫਿਰ ਉਸੇ ਦੌਰ ਦੀ ਦਹਿਲੀਜ਼ ’ਤੇ ਖੜ੍ਹਾ ਹੈ, ਜਿਸ ਨੂੰ ਉਸ ਨੇ ਬੜੀ ਮੁਸ਼ਕਲ ਨਾਲ ਪਿੱਛੇ ਛੱਡਿਆ ਸੀ?

ਇਹ ਵੀ ਪੜ੍ਹੋ: ISI ਆਧਾਰਿਤ ਜਾਸੂਸੀ ਨੈੱਟਵਰਕ ਦਾ ਪਰਦਾਫ਼ਾਸ਼! ਦੋ ਮੁਲਜ਼ਮ ਗ੍ਰਿਫ਼ਤਾਰ, DGP ਦੇ ਵੱਡੇ ਖ਼ੁਲਾਸੇ

ਡੈਡੀਕੇਟਿਡ ਫ੍ਰੇਟ ਕਾਰੀਡੋਰ ਹੀ ਨਿਸ਼ਾਨੇ ’ਤੇ
ਪੰਜਾਬ ਦੇ ਪਟਿਆਲਾ ਜ਼ਿਲੇ ਵਿਚ ਰਾਜਪੁਰਾ-ਸ਼ੰਭੂ ਦੇ ਵਿਚਾਲੇ ਬਥੌਣੀਆ ਪਿੰਡ ਦੇ ਕੋਲ ਡੈਡੀਕੇਟਿਡ ਫ੍ਰੇਟ ਕਾਰੀਡੋਰ (ਡੀ. ਐੱਫ਼. ਸੀ.) ਟ੍ਰੈਕ ’ਤੇ ਹੋਏ ਧਮਾਕੇ ਵਿਚ ਇਕ ਸ਼ੱਕੀ ਨੌਜਵਾਨ ਦੀ ਮੌਕੇ ’ਤੇ ਹੀ ਦਰਦਨਾਕ ਮੌਤ ਹੋ ਗਈ ਸੀ। ਇਸ ਘਟਨਾਚੱਕਰ ਦੀ ਜ਼ਿੰਮੇਵਾਰੀ ਖ਼ਾਲਿਸਤਾਨੀ ਅੱਤਵਾਦੀ ਸੰਗਠਨ ਖ਼ਾਲਿਸਤਾਨ ਟਾਈਗਰ ਫੋਰਸ (ਕੇ. ਟੀ. ਐੱਫ਼.) ਨੇ ਲਈ ਹੈ।

ਇਹ ਘਟਨਾ ਕੋਈ ਇਕੱਲੀ ਕੜੀ ਨਹੀਂ ਹੈ। ਇਸ ਤੋਂ ਪਹਿਲਾਂ ਜਨਵਰੀ ਮਹੀਨੇ ਵਿਚ ਫਤਿਹਗੜ੍ਹ ਸਾਹਿਬ ਦੇ ਸਰਹਿੰਦ ਇਲਾਕੇ ਵਿਚ ਇਸੇ ਡੀ. ਐੱਫ਼. ਸੀ. ਟ੍ਰੈਕ ਨੂੰ ਨਿਸ਼ਾਨਾ ਬਣਾਉਂਦੇ ਹੋਏ ਧਮਾਕਾ ਕੀਤਾ ਗਿਆ ਸੀ। ਉਸ ਹਮਲੇ ਵਿਚ ਟ੍ਰੈਕ ਦਾ ਹਿੱਸਾ ਉੱਖੜ ਗਿਆ, ਮਾਲਗੱਡੀ ਦਾ ਇੰਜਣ ਲੀਹੋਂ ਲੱਥ ਗਿਆ ਅਤੇ ਦੋ ਲੋਕ ਜ਼ਖ਼ਮੀ ਹੋ ਗਏ। ਘਟਨਾ ਦੇ ਤੁਰੰਤ ਬਾਅਦ ਪਾਬੰਦੀਸ਼ੁਦਾ ਖ਼ਾਲਿਸਤਾਨ ਜ਼ਿੰਦਾਬਾਦ ਫੋਰਸ (ਕੇ. ਜ਼ੈੱਡ. ਐੱਫ਼.) ਨੇ ਸੋਸ਼ਲ ਮੀਡੀਆ ’ਤੇ ਗਣਤੰਤਰ ਦਿਵਸ ਤੋਂ ਪਹਿਲਾਂ ਜ਼ਿੰਮੇਵਾਰੀ ਲੈਂਦੇ ਹੋਏ ਇਸ ਨੂੰ ‘ਟ੍ਰੇਲਰ’ ਕਰਾਰ ਦਿੱਤਾ ਸੀ। ਇਥੇ ਜ਼ਿਕਰਯੋਗ ਇਹ ਹੈ ਕਿ ਦੋਵਾਂ ਹੀ ਖ਼ਾਲਿਸਤਾਨੀ ਸੰਗਠਨਾਂ ਨੂੰ ਭਾਰਤ ਸਰਕਾਰ ਦੇ ਕੇਂਦਰੀ ਗ੍ਰਹਿ ਮੰਤਰਾਲੇ ਵੱਲੋਂ ਗੈਰ-ਕਾਨੂੰਨੀ ਗਤੀਵਿਧੀਆਂ (ਰੋਕਥਾਮ) ਐਕਟ, 1967 ਦੇ ਤਹਿਤ ਪਾਬੰਦੀਸ਼ੁਦਾ ਐਲਾਨਿਆ ਗਿਆ ਹੈ।

ਇਹ ਵੀ ਪੜ੍ਹੋ: ਜਲੰਧਰ 'ਚ ISI ਨਾਲ ਜੁੜੇ ਜਾਸੂਸੀ ਨੈਟਵਰਕ ਦਾ ਪਰਦਾਫ਼ਾਸ਼! ਲਾਈਵ ਫੁਟੇਜ਼ ਜਾ ਰਹੀ ਸੀ ਪਾਕਿਸਤਾਨ

‘ਕਾਪੀਕੈਟ’ ਜਾਂ ਸੰਗਠਿਤ ਨੈੱਟਵਰਕ?
ਹਾਲ ਹੀ ਵਿਚ ਹੋਏ ਬੰਬ ਧਮਾਕੇ ਵਿਚ ਪੁਲਸ ਨੇ 4 ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਕ ਰਿਪੋਰਟ ਮੁਤਾਬਕ ਪੰਜਾਬ ਪੁਲਸ ਹੁਣ ਪਟਿਆਲਾ ਅਤੇ ਸਰਹਿੰਦ ਧਮਾਕਿਆਂ ਨੂੰ ਜੋੜ ਕੇ ਦੇਖ ਰਹੀ ਹੈ। ਜਾਂਚ ਇਸ ਗੱਲ ’ਤੇ ਕੇਂਦ੍ਰਿਤ ਹੈ ਕਿ ਕੀ ਇਹ ਕੇ. ਜ਼ੈੱਡ. ਐੱਫ. ਦੀ ਸਿੱਧੀ ਸਾਜ਼ਿਸ਼ ਹੈ ਜਾਂ ਫਿਰ ਹੋਰ ਅੱਤਵਾਦੀ ਮਾਡਿਊਲ ਇਸ ਦੀ ਨਕਲ ਕਰ ਰਹੇ ਹਨ। ਦੋਵਾਂ ਥਾਵਾਂ ਤੋਂ ਮਿਲੇ ਸੈਂਪਲਾਂ ਦਾ ਫੋਰੈਂਸਿਕ ਵਿਸ਼ਲੇਸ਼ਣ ਕੀਤਾ ਜਾ ਰਿਹਾ ਹੈ, ਤਾਂ ਜੋ ਧਮਾਕਾਖੇਜ਼ ਸਮੱਗਰੀ ਦੇ ਸਰੋਤ ਅਤੇ ਸਰਹੱਦ ਪਾਰ ਸਮੱਗਲਿੰਗ ਦੇ ਨੈੱਟਵਰਕ ਦਾ ਪਰਦਾਫਾਸ਼ ਕੀਤਾ ਜਾ ਸਕੇ।

ਸਰਹੱਦ ’ਤੇ ਸਖ਼ਤ ਨਿਗਰਾਨੀ
ਹਾਲਾਤ ਦੀ ਗੰਭੀਰਤਾ ਨੂੰ ਵੇਖਦੇ ਹੋਏ ਖ਼ੁਫ਼ੀਆ ਏਜੰਸੀਆਂ ਹਾਈ ਅਲਰਟ ’ਤੇ ਹਨ। 553 ਕਿਲੋਮੀਟਰ ਲੰਬੀ ਪੰਜਾਬ-ਪਾਕਿਸਤਾਨ ਸਰਹੱਦ ’ਤੇ ਨਿਗਰਾਨੀ ਹੋਰ ਸਖ਼ਤ ਕਰ ਦਿੱਤੀ ਗਈ ਹੈ। ਪੰਜਾਬ ਦੇ ਡੀ. ਜੀ. ਪੀ. ਗੌਰਵ ਯਾਦਵ ਅਤੇ ਰੇਲਵੇ ਅਧਿਕਾਰੀਆਂ ਨੇ ਭਰੋਸਾ ਦਿੱਤਾ ਹੈ ਕਿ ਕਾਰੀਡੋਰ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ ਅਤੇ ਸੰਚਾਲਨ ਆਮ ਵਾਂਗ ਹੋ ਚੁੱਕਾ ਹੈ ਪਰ ਖ਼ਤਰੇ ਦੀ ਘੰਟੀ ਸਾਫ਼ ਸੁਣਾਈ ਦੇ ਰਹੀ ਹੈ ਕਿ ਪੰਜਾਬ ਨੂੰ ਇਕ ਵਾਰ ਫਿਰ ਸੁਚੇਤ ਰਹਿਣਾ ਹੋਵੇਗਾ।

ਇਹ ਵੀ ਪੜ੍ਹੋ: ਪੰਜਾਬ 'ਚ 5 ਦਿਨ ਅਹਿਮ! 8 ਜ਼ਿਲ੍ਹਿਆਂ ਲਈ Alert, 3 ਮਈ ਤੱਕ ਮੌਸਮ ਦੀ ਹੋਈ ਵੱਡੀ ਭਵਿੱਖਬਾਣੀ

ਆਈ. ਐੱਸ. ਆਈ. ਦੀਆਂ ਕਈ ਸਾਜ਼ਿਸ਼ਾਂ ਨਾਕਾਮ
ਪਿਛਲੇ ਕੁਝ ਮਹੀਨਿਆਂ ਵਿਚ ਪੰਜਾਬ ਪੁਲਸ ਨੇ ਆਈ. ਐੱਸ. ਆਈ. ਸਮਰਥਿਤ ਕਈ ਅੱਤਵਾਦੀ ਮਾਡਿਊਲਾਂ ਦਾ ਪਰਦਾਫ਼ਾਸ਼ ਕੀਤਾ ਹੈ। ਅਪ੍ਰੈਲ ਵਿਚ ਪੁਲਸ ਟਿਕਾਣਿਆਂ ’ਤੇ ਗ੍ਰੇਨੇਡ ਹਮਲੇ ਦੀ ਯੋਜਨਾ ਬਣਾ ਰਹੇ ਗਿਰੋਹ ਨੂੰ ਫੜਿਆ ਗਿਆ, ਜਦਕਿ ਚੰਡੀਗੜ੍ਹ ਵਿਚ ਭਾਜਪਾ ਮੁੱਖ ਦਫ਼ਤਰ ਦੇ ਬਾਹਰ ਹੋਏ ਧਮਾਕੇ ਦੇ ਪਿੱਛੇ ਵੀ ਅਜਿਹੇ ਹੀ ਨੈੱਟਵਰਕ ਦਾ ਹੱਥ ਸਾਹਮਣੇ ਆਇਆ। ਖ਼ੁਫ਼ੀਆ ਏਜੰਸੀਆਂ ਦਾ ਕਹਿਣਾ ਹੈ ਕਿ ਆਈ. ਐੱਸ. ਆਈ. ਹੁਣ ਸਿੱਧੇ ਹਮਲੇ ਕਰਨ ਦੀ ਬਜਾਏ ਸਥਾਨਕ ਓਵਰ-ਗਰਾਊਂਡ ਵਰਕਰਾਂ ਅਤੇ ਗੁਪਤ ਸੰਗਠਨਾਂ ਰਾਹੀਂ ‘ਸਾਫਟ ਟਾਰਗੈੱਟ’ ’ਤੇ ਵਾਰ ਕਰ ਰਹੀ ਹੈ।

ਕੇ. ਟੀ. ਐੱਫ਼. ਅਤੇ ਕੇ. ਜ਼ੈੱਡ. ਐੱਫ਼. ਦੇ ਗਠਨ ਤੋਂ ਲੈ ਕੇ ਗਲੋਬਲ ਨੈੱਟਵਰਕ ਤੱਕ ਖ਼ਾਲਿਸਤਾਨੀ ਅੱਤਵਾਦ ਦਾ ਪੂਰਾ ਖਾਕਾ
ਪੰਜਾਬ ਵਿਚ ਅਸਥਿਰਤਾ ਪੈਦਾ ਕਰਨ ਦੇ ਉਦੇਸ਼ ਨਾਲ ਸਰਗਰਮ ਅੱਤਵਾਦੀ ਸੰਗਠਨਾਂ ਵਿਚ ਖ਼ਾਲਿਸਤਾਨ ਟਾਈਗਰ ਫੋਰਸ (ਕੇ. ਟੀ. ਐੱਫ਼.) ਅਤੇ ਖ਼ਾਲਿਸਤਾਨ ਜ਼ਿੰਦਾਬਾਦ ਫੋਰਸ (ਕੇ. ਜ਼ੈੱਡ. ਐੱਫ਼.) ਸ਼ਾਮਲ ਦੱਸੇ ਜਾ ਰਹੇ ਹਨ। ਸਾਊਥ ਏਸ਼ੀਅਨ ਟੈਰੇਰਿਜ਼ਮ ਪੋਰਟਲ (ਐੱਸ. ਏ. ਟੀ. ਪੀ.) ਅਤੇ ਸੁਰੱਖਿਆ ਏਜੰਸੀਆਂ ਦੀਆਂ ਰਿਪੋਰਟਾਂ ਇਨ੍ਹਾਂ ਸਮੂਹਾਂ ਦੇ ਪਾਕਿਸਤਾਨ ਕੁਨੈਕਸ਼ਨ ਅਤੇ ਖ਼ਤਰਨਾਕ ਇਰਾਦਿਆਂ ਦਾ ਖ਼ੁਲਾਸਾ ਕਰਦੀਆਂ ਰਹੀਆਂ ਹਨ।

ਖ਼ਾਲਿਸਤਾਨ ਟਾਈਗਰ ਫੋਰਸ
ਗਠਨ ਅਤੇ ਲੀਡਰਸ਼ਿਪ : ਕੇ. ਟੀ. ਐੱਫ਼. ਦੀ ਸਥਾਪਨਾ ਬੱਬਰ ਖ਼ਾਲਿਸਤਾਨ ਇੰਟਰਨੈਸ਼ਨਲ (ਬੀ. ਕੇ. ਆਈ.) ਦੇ ਸਾਬਕਾ ਅੱਤਵਾਦੀ ਜਗਤਾਰ ਸਿੰਘ ਤਾਰਾ ਨੇ ਕੀਤੀ ਸੀ, ਜੋ 1995 ਵਿਚ ਪੰਜਾਬ ਦੇ ਤੱਤਕਾਲੀ ਮੁੱਖ ਮੰਤਰੀ ਬੇਅੰਤ ਸਿੰਘ ਦੇ ਕਤਲ ਵਿਚ ਸ਼ਾਮਲ ਸੀ। 2004 ਵਿਚ ਬੁੜੈਲ ਜੇਲ ਤੋਂ ਫਰਾਰ ਹੋ ਕੇ ਤਾਰਾ ਪਾਕਿਸਤਾਨ ਪਹੁੰਚਿਆ ਅਤੇ ਬਾਅਦ ਵਿਚ ਉਸ ਨੇ ਥਾਈਲੈਂਡ ਨੂੰ ਆਪਣਾ ਬੇਸ ਬਣਾਇਆ।

ਇਹ ਵੀ ਪੜ੍ਹੋ: ਜਲੰਧਰ 'ਚ ਵੱਡੀ ਵਾਰਦਾਤ! ਕਲੱਬ ਕਬਾਨਾ ਨੇੜੇ ਸ਼ਰੇਆਮ ਵੱਢਿਆ ਨੌਜਵਾਨ, ਚੱਲੀਆਂ ਤਲਵਾਰਾਂ ਤੇ ਹਥਿਆਰ

ਨੈੱਟਵਰਕ ਅਤੇ ਅੰਤਰਰਾਸ਼ਟਰੀ ਪਹੁੰਚ : ਮੁੱਖ ਤੌਰ ’ਤੇ ਪਾਕਿਸਤਾਨ ਤੋਂ ਚਲਾਏ ਜਾ ਰਹੇ ਇਸ ਸੰਗਠਨ ਦੀਆਂ ਤਾਰਾਂ ਫਰਾਂਸ, ਕੈਨੇਡਾ, ਸਪੇਨ, ਜਰਮਨੀ ਅਤੇ ਥਾਈਲੈਂਡ ਤੱਕ ਫੈਲੀਆਂ ਹੋਈਆਂ ਹਨ।
ਫੰਡਿੰਗ ਅਤੇ ਜਿਹਾਦੀ ਸਬੰਧ : ਕੇ. ਟੀ. ਐੱਫ. ਨੂੰ ਪਾਕਿਸਤਾਨ ਦੀ ਆਈ. ਐੱਸ. ਆਈ. ਤੋਂ ਭਾਰੀ ਵਿੱਤੀ ਮਦਦ ਮਿਲਦੀ ਹੈ। ਇਸ ਦੇ ਸਬੰਧ ਲਸ਼ਕਰ-ਏ-ਤੋਇਬਾ (ਐੱਲ. ਈ. ਟੀ.) ਵਰਗੇ ਸੰਗਠਨਾਂ ਨਾਲ ਵੀ ਹਨ।
ਆਪ੍ਰੇਸ਼ਨ : ਇਹ ਮਾਡਿਊਲ ਪੰਜਾਬ ਵਿਚ ਵੀ. ਆਈ. ਪੀ. ਕਤਲਾਂ, ਧਮਾਕਿਆਂ ਅਤੇ ਹਥਿਆਰਬੰਦ ਹਮਲਿਆਂ ਰਾਹੀਂ ਦਹਿਸ਼ਤ ਫੈਲਾਉਣ ਦੀ ਰਣਨੀਤੀ ’ਤੇ ਕੰਮ ਕਰਦਾ ਹੈ।

ਖ਼ਾਲਿਸਤਾਨ ਜ਼ਿੰਦਾਬਾਦ ਫੋਰਸ
ਗਠਨ ਅਤੇ ਲੀਡਰਸ਼ਿਪ : ਕੇ. ਜ਼ੈੱਡ. ਐੱਫ਼. ਦਾ ਗਠਨ 1993 ਵਿਚ ਜੰਮੂ ਦੇ ਸਿਮਬਲ ਕੈਂਪ ਦੇ ਰਹਿਣ ਵਾਲੇ ਰਣਜੀਤ ਸਿੰਘ ਉਰਫ਼ ‘ਨੀਟਾ’ ਨੇ ਕੀਤਾ ਸੀ।
ਮਕਸਦ ਅਤੇ ਹਿੰਸਾ : ਇਸ ਦਾ ਐਲਾਨਿਆ ਉਦੇਸ਼ ਹਥਿਆਰਬੰਦ ਸੰਘਰਸ਼ ਰਾਹੀਂ ਸੁਤੰਤਰ ‘ਸਿੱਖ ਮਾਤਭੂਮੀ’ ਬਣਾਉਣਾ ਹੈ। ਇਹ ਸੰਗਠਨ ਵਿਆਨਾ (2009) ਵਿਚ ਸੰਤ ਰਾਮਾਨੰਦ ਦੇ ਕਤਲ ਅਤੇ 2010 ਵਿਚ ਬਾਬਾ ਗੁਰਿੰਦਰ ਸਿੰਘ ਢਿੱਲੋਂ ’ਤੇ ਹਮਲੇ ਵਰਗੇ ਫਿਰਕੂ ਅਪਰਾਧਾਂ ਵਿਚ ਸ਼ਾਮਲ ਰਿਹਾ ਹੈ।
ਵਿਦੇਸ਼ੀ ਨੈੱਟਵਰਕ : ਕੇ. ਜ਼ੈੱਡ. ਐੱਫ. ਦੀ ਮੌਜੂਦਗੀ ਸਵਿਟਜ਼ਰਲੈਂਡ, ਇਟਲੀ, ਜਰਮਨੀ, ਯੂ. ਕੇ., ਅਮਰੀਕਾ ਅਤੇ ਨੇਪਾਲ ਵਰਗੇ ਦੇਸ਼ਾਂ ਵਿਚ ਹੈ।
ਫੰਡਿੰਗ ਮਾਡਲ: ਇਸ ਦੀ ਕਮਾਈ ਦਾ ਮੁੱਖ ਸਰੋਤ ਨਸ਼ਾ ਸਮੱਗਲਿੰਗ, ਜਾਅਲੀ ਭਾਰਤੀ ਕਰੰਸੀ (ਐੱਫ. ਆਈ. ਸੀ. ਐੱਨ.) ਅਤੇ ਵਿਦੇਸ਼ਾਂ ਤੋਂ ਮਿਲਣ ਵਾਲੀ ਮਦਦ ਹੈ। ਇਸ ਦੇ ਸਬੰਧ ਹਿਜ਼ਬੁਲ ਮੁਜਾਹਿਦੀਨ ਅਤੇ ਜੈਸ਼-ਏ-ਮੁਹੰਮਦ ਵਰਗੇ ਸਮੂਹਾਂ ਨਾਲ ਵੀ ਉਜਾਗਰ ਹੋਏ ਹਨ।
ਕਾਰਜਪ੍ਰਣਾਲੀ : ਕੇ. ਜ਼ੈੱਡ. ਐੱਫ਼. ਜਨਤਕ ਆਵਾਜਾਈ ਅਤੇ ਭੀੜ-ਭਾੜ ਵਾਲੀਆਂ ਥਾਵਾਂ ’ਤੇ ਧਮਾਕੇ ਕਰਨ ਵਿਚ ਮਾਹਰ ਰਿਹਾ ਹੈ।

ਇਹ ਵੀ ਪੜ੍ਹੋ: ਪੰਜਾਬ 'ਚ ਪ੍ਰਸ਼ਾਸਨਿਕ ਫੇਰਬਦਲ! ਇਨ੍ਹਾਂ ਅਫ਼ਸਰਾਂ ਦੇ ਕੀਤੇ ਗਏ ਤਬਾਦਲੇ

ਸੁਰੱਖਿਆ ਏਜੰਸੀਆਂ ਦੀ ਕਾਰਵਾਈ
ਹਾਲ ਹੀ ਦੇ ਸਾਲਾਂ ਵਿਚ ਕੇ. ਜ਼ੈੱਡ. ਐੱਫ਼. ਦੇ ਕਈ ਮਾਡਿਊਲ ਤਬਾਹ ਕੀਤੇ ਗਏ ਹਨ। 2019 ਵਿਚ ਤਰਨਤਾਰਨ ਦੇ ਚੋਹਲਾ ਸਾਹਿਬ ਤੋਂ ਭਾਰੀ ਮਾਤਰਾ ਵਿਚ ਏ. ਕੇ.-47, ਗ੍ਰੇਨੇਡ ਅਤੇ ਜਾਅਲੀ ਨੋਟਾਂ ਦੀ ਬਰਾਮਦਗੀ ਨੇ ਇਨ੍ਹਾਂ ਦੇ ਵੱਡੇ ਹਮਲਿਆਂ ਦੀ ਸਾਜ਼ਿਸ਼ ਨੂੰ ਨਾਕਾਮ ਕਰ ਦਿੱਤਾ। ਭਾਰਤ ਸਰਕਾਰ ਨੇ ਯੂ. ਏ. ਪੀ. ਏ. ਦੇ ਤਹਿਤ ਇਨ੍ਹਾਂ ਸੰਗਠਨਾਂ ਨੂੰ ਪਾਬੰਦੀਸ਼ੁਦਾ ਕਰ ਕੇ ਇਨ੍ਹਾਂ ਦੀਆਂ ਗਤੀਵਿਧੀਆਂ ’ਤੇ ਸਖ਼ਤ ਨਜ਼ਰ ਰੱਖੀ ਹੈ। ਆਈ.ਐੱਸ.ਆਈ. ਇਨ੍ਹਾਂ ਵੱਖ-ਵੱਖ ਮਾਡਿਊਲਾਂ ਨੂੰ ਇਕਜੁੱਟ ਕਰਕੇ ਪੰਜਾਬ ਨੂੰ ਤੋੜਨ ਦੀ ਲਗਾਤਾਰ ਕੋਸ਼ਿਸ਼ ਕਰ ਰਹੀ ਹੈ।

ਇਹ ਵੀ ਪੜ੍ਹੋ: Punjab: 'ਮੇਰੇ ਨਾਲ ਜੋ ਕਰਨਾ ਹੈ...', ਔਰਤਾਂ ਦਾ ਕਾਰਨਾਮਾ ਜਾਣ ਤੁਹਾਡੇ ਵੀ ਉੱਡ ਜਾਣਗੇ ਹੋਸ਼

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e