ਖਹਿਰਾ ਨੇ ਭੁਲੱਥ ''ਚ ਬਲਾਕ ਸੰਮਤੀ ਤੇ ਜ਼ਿਲਾ ਪ੍ਰੀਸ਼ਦ ਚੋਣਾਂ ਨੂੰ ਹਾਈਜੈਕ ਕਰਨ ਲਈ ਪੁਲਸ ’ਤੇ ਲਾਏ ਗੰਭੀਰ ਦੋਸ਼

ਭੁਲੱਥ (ਭੂਪੇਸ਼) - ਭੁਲੱਥ ਦੇ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨੇ ਇਲਾਕੇ ਦੀ ਪੁਲਸ ਵੱਲੋਂ ਬਲਾਕ ਸੰਮਤੀ ਤੇ ਜ਼ਿਲਾ ਪ੍ਰੀਸ਼ਦ ਚੋਣਾਂ ਨੂੰ ਪ੍ਰਭਾਵਿਤ ਕਰਨ ਲਈ ਕੀਤੀਆਂ ਗਈਆਂ ਗੈਰ-ਕਾਨੂੰਨੀ ਕਾਰਵਾਈਆਂ ਦੀ ਤਿੱਖੀ ਨਿੰਦਾ ਕੀਤੀ ਹੈ। ਉਨ੍ਹਾਂ ਨੇ ਦੋਸ਼ ਲਗਾਇਆ ਕਿ ਸੂਬਾ ਸਰਕਾਰ ਦੇ ਇਸ਼ਾਰੇ ’ਤੇ ਪੁਲਸ ਕਾਂਗਰਸੀ ਉਮੀਦਵਾਰਾਂ ਅਤੇ ਵਰਕਰਾਂ ਨੂੰ ਝੂਠੇ ਕੇਸਾਂ ’ਚ ਫਸਾ ਕੇ ਚੋਣ ਮੈਦਾਨ ਤੋਂ ਬਾਹਰ ਕਰਨ ਦੀ ਸਾਜ਼ਿਸ਼ ਕਰ ਰਹੀ ਹੈ।

ਖਹਿਰਾ ਨੇ ਖਾਸ ਤੌਰ ’ਤੇ ਐੱਫ. ਆਈ. ਆਰ. ਨੰਬਰ 251, ਮਿਤੀ 14 ਨਵੰਬਰ 2025, ਥਾਣਾ ਸੁਭਾਨਪੁਰ ਦਾ ਜ਼ਿਕਰ ਕੀਤਾ, ਜੋ ਕਥਿਤ ਹੜ੍ਹ ਰਾਹਤ ਸਮੱਗਰੀ ਚੋਰੀ ਮਾਮਲੇ ’ਚ 4 ਮਹੀਨਿਆਂ ਬਾਅਦ ਸਿਰਫ ਕਾਂਗਰਸ ਸਮਰਥਕਾਂ ਨੂੰ ਡਰਾਉਣ ਤੇ ਚੋਣ ਲੜਨ ਤੋਂ ਰੋਕਣ ਲਈ ਦਰਜ ਕੀਤੀ ਗਈ ਸੀ। 

ਕਾਂਗਰਸ ਉਮੀਦਵਾਰ ਦੇ ਘਰ ਪੁਲਸ ਦੀ ਗੈਰ-ਕਾਨੂੰਨੀ ਰੇਡ
ਖਹਿਰਾ ਨੇ ਦੱਸਿਆ ਕਿ 4 ਦਸੰਬਰ 2025 ਸਵੇਰੇ 7 ਵਜੇ ਕਾਂਗਰਸੀ ਉਮੀਦਵਾਰ ਦੇ ਘਰ ਪੁਲਸ ਨੇ ਗੈਰ-ਕਾਨੂੰਨੀ ਰੇਡ ਕੀਤੀ। ਐੱਸ. ਆਈ., ਇੰਚਾਰਜ ਚੌਕੀ ਨਡਾਲਾ ਨੇ ਤਕਰੀਬਨ 10 ਪੁਲਸ ਕਰਮਚਾਰੀਆਂ ਨਾਲ ਮਿਲ ਕੇ ਗੁਰਜੀਤ ਸਿੰਘ ਕਾਂਗਰਸ ਉਮੀਦਵਾਰ ਬਲਾਕ ਸੰਮਤੀ ਜ਼ੋਨ ਚੱਕੋਕੀ ਦੇ ਘਰ ’ਤੇ ਅਚਾਨਕ ਛਾਪੇਮਾਰੀ ਕੀਤੀ ਤਾਂ ਜੋ ਉਸ ਨੂੰ ਅੱਜ ਨਾਮਜ਼ਦਗੀ ਭਰਨ ਤੋਂ ਰੋਕਿਆ ਜਾ ਸਕੇ। ਉਨ੍ਹਾਂ ਕਿਹਾ ਕਿ ਇਹ ਰੇਡ ਇਸ ਗੱਲ ਦੇ ਬਾਵਜੂਦ ਕੀਤੀ ਗਈ ਕਿ ਗੁਰਜੀਤ ਸਿੰਘ ਅਤੇ ਹੋਰ ਮੁਲਜ਼ਮਾਂ ਨੂੰ 2 ਦਸੰਬਰ 2025 ਨੂੰ ਸੈਸ਼ਨ ਜੱਜ-1 ਕਪੂਰਥਲਾ ਦੀ ਅਦਾਲਤ ਵੱਲੋਂ ਅਗਾਊਂ ਜ਼ਮਾਨਤ ਮਿਲ ਚੁੱਕੀ ਸੀ ਅਤੇ ਅਦਾਲਤ ਨੇ ਸਾਫ਼ ਕਿਹਾ ਸੀ ਕੀ ਹੁਣ ਪੁਲਸ ਰਿਮਾਂਡ ਦੀ ਲੋੜ ਨਹੀਂ ਹੈ।

ਖਹਿਰਾ ਨੇ ਇਸ ਕਾਰਵਾਈ ਨੂੰ ਅਦਾਲਤੀ ਹੁਕਮਾਂ ਦੀ ਖੁੱਲ੍ਹੀ ਉਲੰਘਣਾ ਅਤੇ ਚੱਕੋਕੀ ਪਿੰਡ ਦੇ ‘ਆਪ’ ਉਮੀਦਵਾਰ ਦੀ ਮਦਦ ਲਈ ਕੀਤੀ ਗਈ ਸਿਆਸੀ ਰੇਡ ਕਰਾਰ ਦਿੱਤਾ।

ਹੋਰ ਕਾਂਗਰਸੀ ਆਗੂਆਂ ਨੂੰ ਵੀ ਝੂਠੀ FIR ਵਿੱਚ ਕੀਤਾ ਗਿਆ ਸ਼ਾਮਲ
ਵਿਧਾਇਕ ਖਹਿਰਾ ਨੇ ਕਿਹਾ ਕਿ ਹੋਰ ਕਾਂਗਰਸੀ ਆਗੂਆਂ ਨੂੰ ਵੀ ਝੂਠੀ ਐੱਫ. ਆਈ. ਆਰ. 251 ’ਚ ਸ਼ਾਮਲ ਕੀਤਾ ਗਿਆ ਹੈ। ਵਿਧਾਇਕ ਖਹਿਰਾ ਨੇ ਦੱਸਿਆ ਕਿ ਐੱਸ. ਐੱਚ. ਓ. ਸੁਭਾਨਪੁਰ ਅਤੇ ਚੌਕੀ ਇੰਚਾਰਜ ਨਡਾਲਾ ਵੱਲੋਂ ਕਾਂਗਰਸ ਪਾਰਟੀ ਦੇ ਹੋਰ ਆਗੂਆਂ ਨੂੰ ਵੀ ਜਾਣਬੁੱਝ ਕੇ ਇਸੇ ਝੂਠੀ ਐੱਫ. ਆਈ. ਆਰ. ’ਚ ਨਾਮਜ਼ਦ ਕੀਤਾ ਜਾ ਰਿਹਾ ਹੈ ਤਾਂ ਜੋ ਉਹ ਚੋਣ ਪ੍ਰਚਾਰ ਵਿਚ ਹਿੱਸਾ ਨਾ ਲੈ ਸਕਣ।

ਤਾਜ਼ਾ ਤੌਰ ‘ਤੇ ਨਾਮਜ਼ਦ ਕੀਤੇ ਕਾਂਗਰਸੀ ਨੇਤਾ ਇਹ ਹਨ:
    1.    ਗੁਰਮੀਤ ਸਿੰਘ, ਸਰਪੰਚ ਬੁਤਾਲਾ
    2.    ਪੰਜਾਬਾ ਸਿੰਘ, ਪਿੰਡ ਬੁਤਾਲਾ
    3.    ਬੁਟਾਲਾ ਦੇ ਹੋਰ 3 ਕਾਂਗਰਸ ਵਰਕਰ
    4.    ਗੁਰਪ੍ਰੀਤ ਸਿੰਘ, ਐਕਸ ਵਾਈਸ ਚੇਅਰਮੈਨ ਬਲਾਕ ਸੰਮਤੀ, ਪਿੰਡ ਲੱਖਣ ਕੇ ਪੱਡਾ
    5.    ਪੂਰਨ ਸਿੰਘ, ਕਾਂਗਰਸ ਉਮੀਦਵਾਰ ਬਲਾਕ ਸੰਮਤੀ ਜ਼ੋਨ ਲੱਖਣ ਕੇ ਪੱਡਾ

ਖਹਿਰਾ ਨੇ ਦੋਸ਼ ਲਗਾਇਆ ਕਿ ਇਹ ਨਵੀਆਂ ਨਾਮਜ਼ਦਗੀਆਂ ਆਪ ਸਰਪੰਚ ਜਗਤਾਰ ਸਿੰਘ (ਚਕੋਕੀ ਜ਼ੋਨ ਆਪ ਉਮੀਦਵਾਰ) ਦੇ ਦਬਾਅ ਹੇਠ ਕੀਤੀਆਂ ਗਈਆਂ ਹਨ।

“ਜੇ ਅੱਜ ਦਖਲ ਨਾ ਦਿੱਤਾ, ਤਾਂ ਹੋਰ ਕਾਂਗਰਸੀ ਉਮੀਦਵਾਰਾਂ ਨੂੰ ਵੀ ਫਸਾਇਆ ਜਾਵੇਗਾ”
ਖਹਿਰਾ ਨੇ ਕਿਹਾ ਕਿ ਇਹ ਸਭ ਪੁਲਸ ਦੀ ਦਹਿਸ਼ਤ ਅਤੇ ਸਿਆਸੀ ਸਾਜ਼ਿਸ਼ ਦਾ ਹਿੱਸਾ ਹੈ। ਜੇਕਰ ਸਟੇਟ ਇਲੈਕਸ਼ਨ ਕਮਿਸ਼ਨ ਅੱਜ ਹੀ ਸਖ਼ਤ ਕਾਰਵਾਈ ਨਹੀਂ ਕਰਦਾ ਤਾਂ ਐੱਸ. ਐੱਚ. ਓ. ਭੁਲੱਥ ਅਤੇ ਏ. ਐੱਸ.ਆਈ. ਚੌਕੀ ਇੰਚਾਰਜ ਨਡਾਲਾ ਹੋਰ ਕਾਂਗਰਸੀ ਉਮੀਦਵਾਰਾਂ ਅਤੇ ਵਰਕਰਾਂ ਨੂੰ ਵੀ ਝੂਠੇ ਕੇਸਾਂ ਵਿਚ ਫਸਾਉਣਗੇ, ਜੋ ਕਿ ਲੋਕਤੰਤਰ ਦੀ ਹੱਤਿਆ ਹੈ। 

ਐਸ.ਆਈ. ਬਲਜਿੰਦਰ ਸਿੰਘ ਨੂੰ ਤੁਰੰਤ ਬਰਖਾਸਤ ਕਰਨ ਦੀ ਮੰਗ
ਖਹਿਰਾ ਨੇ ਮੰਗ ਕੀਤੀ ਹੈ ਕਿ:
    •    ਐਸ.ਆਈ. ਬਲਜਿੰਦਰ ਸਿੰਘ ਅਤੇ ਛਾਪੇਮਾਰੀ ਵਿੱਚ ਸ਼ਾਮਲ ਸਾਰੇ ਪੁਲਸ ਕਰਮਚਾਰੀਆਂ ਨੂੰ ਤੁਰੰਤ ਸਸਪੈਂਡ ਅਤੇ ਟ੍ਰਾਂਸਫਰ ਕੀਤਾ ਜਾਵੇ
    •    SHO ਸੁਭਾਨਪੁਰ ਵਿਰੁੱਧ ਸਖ਼ਤ ਵਿਭਾਗੀ ਕਾਰਵਾਈ ਕੀਤੀ ਜਾਵੇ
    •    ਸਾਰੇ ਕਾਂਗਰਸ ਉਮੀਦਵਾਰਾਂ ਨੂੰ ਨਾਮਜ਼ਦਗੀਆਂ ਭਰਨ ਅਤੇ ਚੋਣ ਪ੍ਰਚਾਰ ਕਰਨ ਲਈ ਭੈ-ਮੁਕਤ ਮਾਹੌਲ ਦਿੱਤਾ ਜਾਵੇ

“ਚੋਣਾਂ ਮੁਫ਼ਤ ਤੇ ਨਿਰਪੱਖ ਹੋਣੀਆਂ ਚਾਹੀਦੀਆਂ ਹਨ – ਪੁਲਸ ਤਰਾਸ਼ੀ ਦਾ ਹਥਿਆਰ ਨਹੀਂ ਬਣ ਸਕਦੀ”

ਖਹਿਰਾ ਨੇ ਸਟੇਟ ਇਲੈਕਸ਼ਨ ਕਮਿਸ਼ਨ ਨੂੰ ਤੁਰੰਤ ਦਖਲ ਦੇਣ ਦੀ ਕੀਤੀ ਅਪੀਲ
ਖਹਿਰਾ ਨੇ ਕਿਹਾ ਕਿ “ਜਦੋਂ ਪੁਲਸ ਹੀ ਸਿਆਸੀ ਤਾਕਤਾਂ ਦਾ ਹਥਿਆਰ ਬਣ ਜਾਵੇ, ਤਾਂ ਮੁਫ਼ਤ ਤੇ ਨਿਰਪੱਖ ਚੋਣਾਂ ਸੰਭਵ ਨਹੀਂ ਰਹਿੰਦੀਆਂ। ਮੈਂ ਕਮਿਸ਼ਨ ਨੂੰ ਬੇਨਤੀ ਕਰਦਾ ਹਾਂ ਕਿ ਅੱਜ ਹੀ ਕਾਰਵਾਈ ਕਰਕੇ ਲੋਕਤੰਤਰ ਦੀ ਰੱਖਿਆ ਕਰੋ।”