ਆਨਲਾਈਨ ਖ਼ਰੀਦਿਆ ਆਈਫੋਨ ਨਿਕਲਿਆ ਖ਼ਰਾਬ, ਰਿਫੰਡ ਨਾ ਦੇਣ ’ਤੇ ਐਮੇਜ਼ਾਨ ਨੂੰ 7 ਹਜ਼ਾਰ ਹਰਜਾਨਾ

ਚੰਡੀਗੜ੍ਹ (ਪ੍ਰੀਕਸ਼ਿਤ) : ਜ਼ਿਲ੍ਹਾ ਖ਼ਪਤਕਾਰ ਝਗੜਾ ਨਿਵਾਰਣ ਕਮਿਸ਼ਨ ਨੇ ਐਮੇਜ਼ਾਨ ਰਿਟੇਲ ਇੰਡੀਆ ਨੂੰ ਅਨੁਚਿਤ ਵਪਾਰਕ ਅਭਿਆਸਾਂ ਦਾ ਦੋਸ਼ੀ ਠਹਿਰਾਉਂਦਿਆਂ 7 ਹਜ਼ਾਰ ਰੁਪਏ ਹਰਜਾਨਾ ਲਾਇਆ ਹੈ। ਸ਼ਿਕਾਇਤਕਰਤਾ ਕੈਪਟਨ ਵੱਲੋਂ ਮੋਬਾਇਲ ਖਰੀਦਣ ਲਈ ਅਦਾ 56,905 ਰੁਪਏ ਦੀ ਰਕਮ ਵਾਪਸ 9 ਫ਼ੀਸਦੀ ਸਲਾਨਾ ਦੀ ਦਰ ਨਾਲ ਵਿਆਜ ਸਮੇਤ ਮੋੜਨ ਦੇ ਨਿਰਦੇਸ਼ ਦਿੱਤੇ ਹਨ। ਐਮੇਜ਼ਾਨ ਨੇ ਕਮਿਸ਼ਨ ’ਚ ਦਿੱਤੇ ਜਵਾਬ ’ਚ ਕਿਹਾ ਕਿ ਇਹ ਸਿਰਫ਼ ਈ-ਕਾਮਰਸ ਪਲੇਟਫਾਰਮ ਹੈ ਤੇ ਅਸਲ ਵਿਵਾਦ ਖ਼ਪਤਕਾਰ, ਵਿਕਰੇਤਾ ਤੇ ਨਿਰਮਾਤਾ ਵਿਚਕਾਰ ਹੈ। ਕੰਪਨੀ ਦਾ ਕਹਿਣਾ ਹੈ ਕਿ ਸ਼ਿਕਾਇਤਕਰਤਾ ਵੱਲੋਂ ਵਾਪਸ ਕੀਤਾ ਮੋਬਾਇਲ ਉਹ ਨਹੀਂ ਸੀ, ਜੋ ਡਿਲੀਵਰ ਕੀਤਾ ਗਿਆ ਸੀ।

ਇਸ ਕਾਰਨ ਖਪਤਕਾਰ ਕਿਸੇ ਵੀ ਰਿਪਲੇਸਮੈਂਟ ਜਾਂ ਰਿਫੰਡ ਦਾ ਹੱਕਦਾਰ ਨਹੀਂ ਹੈ। ਉੱਥੇ ਹੀ ਫੋਨ ਨਿਰਮਾਤਾ ਕੰਪਨੀ ਐਪਲ ਨੇ ਜਵਾਬ ’ਚ ਕਿਹਾ ਕਿ ਖ਼ਪਤਕਾਰ ਨੇ ਫੋਨ ਐਮੇਜ਼ਾਨ ਤੋਂ ਖਰੀਦਿਆ ਸੀ, ਨਾ ਕਿ ਸਿੱਧੇ ਕੰਪਨੀ ਤੋਂ। ਸਰਵਿਸ ਸੈਂਟਰ ਨੇ ਫੋਨ ਨੂੰ ਅੱਗੇ ਜਾਂਚ ਲਈ ਬੈਂਗਲੁਰੂ ਸਥਿਤ ਰਿਪੇਅਰ ਸੈਂਟਰ ਭੇਜਣ ਦੀ ਸਲਾਹ ਦਿੱਤੀ ਸੀ ਪਰ ਖ਼ਪਤਕਾਰ ਨੇ ਮਨ੍ਹਾਂ ਕਰ ਦਿੱਤਾ। ਰਿਫੰਡ ਦੀ ਜ਼ਿੰਮੇਵਾਰੀ ਐਮੇਜ਼ਾਨ ਦੀ ਹੈ, ਕਿਉਂਕਿ ਉਸ ਨੇ ਫੋਨ ਵਾਪਸ ਲੈਕੇ ਰਿਫੰਡ ਦਾ ਭਰੋਸਾ ਦਿੱਤਾ ਸੀ। ਸਰਵਿਸ ਸੈਂਟਰ ਨੇ ਕਿਹਾ ਕਿ ਫੋਨ ਰਿਸਟਾਰਟ ਲੂਪ ’ਚ ਫਸਿਆ ਸੀ, ਜੋ ਸਾਫ਼ਟਵੇਅਰ ਅਪਡੇਟ ਤੋਂ ਬਾਅਦ ਵੀ ਠੀਕ ਨਹੀਂ ਹੋਇਆ। ਜਾਂਚ ’ਚ ਹਾਰਡਵੇਅਰ ਖ਼ਰਾਬੀ ਦੀ ਪੁਸ਼ਟੀ ਹੋਈ। ਉਨ੍ਹਾਂ ਫੋਨ ਨੂੰ ਅੱਗੇ ਰਿਪੇਅਰ ਲਈ ਭੇਜਣ ਨੂੰ ਕਿਹਾ ਪਰ ਖ਼ਪਤਕਾਰ ਨੇ ਸਿਰਫ਼ ਖ਼ਰਾਬੀ ਦੀ ਰਿਪੋਰਟ ਲੈ ਕੇ ਫੋਨ ਵਾਪਸ ਲੈ ਲਿਆ।