ਵਿਜੀਲੈਂਸ ਬਿਊਰੋ ਵਲੋਂ ਰਿਸ਼ਵਤ ਲੈਂਦੀ ਇੰਸਪੈਕਟਰ ਰੰਗੇਂ ਹੱਥੀਂ ਕਾਬੂ

ਖੰਨਾ, (ਜ.ਬ.)— ਲੁਧਿਆਣਾ ਵਿਜੀਲੈਂਸ ਦੀ ਟੀਮ ਨੇ ਸ਼ਿਕਾਇਤਕਰਤਾ ਬਲਵਿੰਦਰ ਸਿੰਘ ਦੀ ਸ਼ਿਕਾਇਤ 'ਤੇ ਸਾਂਝ ਕੇਂਦਰ ਦੀ ਇੰਚਾਰਜ ਇੰਸਪੈਕਟਰ ਪ੍ਰਵੀਨ ਸ਼ਰਮਾ ਨੂੰ 15 ਹਜ਼ਾਰ ਦੀ ਰਿਸ਼ਵਤ ਲੈਂਦੇ ਕਾਬੂ ਕੀਤਾ ਹੈ । ਵਿਜੀਲੈਂਸ ਨੂੰ ਦਿੱਤੀ ਸ਼ਿਕਾਇਤ 'ਚ ਬਲਵਿੰਦਰ ਸਿੰਘ ਨੇ ਦੱਸਿਆ ਕਿ ਉਸਦੀ ਭੈਣ ਹਰਵਿੰਦਰ ਕੌਰ ਦੇ ਪਤੀ ਦੀ ਕੁੱਝ ਸਮਾਂ ਪਹਿਲਾਂ ਮੌਤ ਹੋ ਗਈ ਸੀ । ਜਿਸਦੇ ਬਾਅਦ ਕੰਗਣਵਾਲ ਪਿੰਡ 'ਚ ਉਸਨੂੰ ਉਸਦੇ ਸਹੁਰਾ, ਨਣਦ, ਨਣਦੋਈਆ, ਜੇਠ, ਜਠਾਣੀ ਖਿਲਾਫ ਧੱਕੇ ਨਾਲ ਘਰ ਤੋਂ ਬੱਚੇ ਸਮੇਤ ਬਾਹਰ ਕੱਢਣ, ਜਾਇਦਾਦ 'ਚੋਂ ਕੋਈ ਹਿੱਸਾ ਨਾ ਦੇਣ ਗਾਲੀ-ਗਲੌਚ ਕਰਨ, ਮਾਰਕੁੱਟ ਕਰਨ ਤੇ ਜਾਨੋਂ ਮਾਰ ਦੇਣ ਦੀਆਂ ਧਮਕੀਆਂ ਦੇਣ ਖਿਲਾਫ ਐੱਸ.ਐੱਸ.ਪੀ ਖੰਨਾ ਨੂੰ ਇਕ ਦਰਖ਼ਾਸਤ ਦਿੱਤੀ ਸੀ । ਜਿਸਦਾ ਸਮਝੌਤਾ ਇੰਸਪੈਕਟਰ ਪ੍ਰਵੀਨ ਸ਼ਰਮਾ ਨੇ 3 ਲੱਖ ਰੁਪਏ 'ਚ ਕਰਵਾਇਆ ਸੀ । ਸਮਝੌਤੇ ਦੇ ਇਕ ਲੱਖ ਰੁਪਏ ਤਾਂ ਦੇ ਦਿੱਤੇ ਗਏ ਪਰ ਬਾਕੀ ਦੇ ਪੈਸੇ ਦਿਵਾਉਣ ਦੇ ਨਾਮ 'ਤੇ ਇੰਸਪੈਕਟਰ ਪ੍ਰਵੀਨ ਸ਼ਰਮਾ 30 ਹਜ਼ਾਰ ਰੁਪਏ ਮੰਗ ਰਹੀ ਸੀ । ਅਸਮੱਰਥਾ ਜਤਾਉਣ 'ਤੇ ਉਨਾਂ ਦਾ ਸੌਦਾ 15 ਹਜ਼ਾਰ ਰੁਪਏ 'ਚ ਤੈਅ ਹੋਇਆ ਸੀ ।
ਜਾਣਕਾਰੀ ਅਨੁਸਾਰ ਹਰਵਿੰਦਰ ਕੌਰ ਨੇ ਪਹਿਲਾਂ ਤਾਂ ਪੁਲਸ ਇੰਸਪੈਕਟਰ ਨਾਲ ਫ਼ੋਨ 'ਤੇ ਗੱਲਬਾਤ ਕੀਤੀ ਫਿਰ ਵਿਜੀਲੈਂਸ ਦੇ ਨਾਲ ਸੰਪਰਕ ਕੀਤਾ । ਵਿਜੀਲੈਂਸ ਦੇ ਡੀ.ਐੱਸ.ਪੀ ਜਸਵਿੰਦਰ ਸਿੰਘ ਦੀ ਅਗਵਾਈ ਵਾਲੀ ਪੁਲਸ ਪਾਰਟੀ ਨੇ ਪਲਾਨ ਬਣਾ ਕੇ ਹਰਵਿੰਦਰ ਕੌਰ ਨੇ 15 ਹਜ਼ਾਰ ਰੁਪਏ ਦੇਣ ਲਈ ਪ੍ਰਵੀਨ ਸ਼ਰਮਾ ਦੇ ਖੰਨਾ ਸਥਿਤ ਦਫ਼ਤਰ ਭੇਜਿਆ । ਜਦੋਂ ਉਹ ਰਿਸ਼ਵਤ ਲੈ ਰਹੀ ਸੀ ਤਾਂ ਵਿਜੀਲੈਂਸ ਨੇ ਉਸਨੂੰ ਰੰਗੇ ਹੱਥੀ ਗ੍ਰਿਫਤਾਰ ਕਰ ਲਿਆ । ਪ੍ਰਵੀਨ ਸ਼ਰਮਾ ਖਿਲਾਫ ਥਾਣਾ ਵਿਜੀਲੈਂਸ ਬਿਊਰੋ ਲੁਧਿਆਣਾ 'ਚ ਕੇਸ ਦਰਜ ਕਰ ਕੇ ਮਾਮਲੇ ਦੀ ਅਗਲੇਰੀ ਜਾਂਚ ਜਾਰੀ ਹੈ ।