ਨਾਜਾਇਜ਼ ਸਬੰਧਾਂ ਕਾਰਨ ਵਿਅਕਤੀ ਦਾ ਕਤਲ

 ਬਠਿੰਡਾ,  (ਸੁਖਵਿੰਦਰ)-  ਨਾਜਾਇਜ਼ ਸਬੰਧਾਂ ਦੇ ਸ਼ੱਕ ਕਾਰਨ ਬੇਅੰਤ ਨਗਰ ਵਿਚ ਇਕ ਵਿਅਕਤੀ ਦੇ ਸਿਰ ’ਤੇ ਕਿਸੇ ਹਥਿਆਰ ਨਾਲ ਵਾਰ ਕਰ ਕੇ ਕਤਲ ਕਰ ਦਿੱਤਾ ਗਿਆ। ਕਤਲ ਉਸ ਵਕਤ ਕੀਤਾ ਗਿਆ ਜਦ ਮ੍ਰਿਤਕ ਆਪਣੀ ਝੌਂਪੜੀ ਵਿਚ ਸੌਂ ਰਿਹਾ ਸੀ। ਪੁਲਸ ਨੇ ਇਸ ਸਬੰਧ ਵਿਚ ਉਕਤ ਵਿਅਕਤੀ ਦੇ ਗੁਆਂਢ ਵਿਚ ਰਹਿਣ ਵਾਲੇ ਪਤੀ-ਪਤਨੀ ਖਿਲਾਫ ਮਾਮਲਾ ਦਰਜ ਕੀਤਾ ਹੈ ਅਤੇ ਅਗਲੀ ਪੜਤਾਲ ਕੀਤੀ ਜਾ ਰਹੀ ਹੈ। 
 ਪੁਲਸ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਬੇਅੰਤ ਨਗਰ ਦੇ 25 ਗਜ਼ ਕੁਆਰਟਰਾਂ ਦੇ ਕਰੀਬ ਰਹਿਣ ਵਾਲਾ ਰਾਧੇ ਚੌਧਰੀ (26) ਬਠਿੰਡਾ ਦੀ ਇਕ ਬੇਕਰੀ ਵਿਚ ਕੰਮ ਕਰਦਾ ਸੀ। ਮੂਲ ਰੂਪ ਵਿਚ ਬਿਹਾਰ ਦਾ ਰਹਿਣ ਵਾਲਾ ਰਾਧੇ ਚੌਧਰੀ ਵਿਆਹਿਆ ਹੋਇਆ ਸੀ ਅਤੇ ਉਸਦੀ ਪਤਨੀ ਅਤੇ ਇਕ ਬੱਚਾ ਬਿਹਾਰ ਵਿਚ ਹੀ ਰਹਿੰਦੇ ਸਨ ਅਤੇ ਉਹ ਇਕੱਲਾ ਹੀ ਇਥੇ ਰਹਿੰਦਾ ਸੀ। ਪਤਾ ਚੱਲਿਆ ਹੈ ਕਿ ਨੌਜਵਾਨ ਦੇ ਬਿਹਾਰ ਦੇ ਹੀ ਮੂਲ ਨਿਵਾਸੀ ਆਪਣੇ ਗੁਆਂਢੀ ਸ਼ੁਕਲ ਦੇਵ ਯਾਦਵ ਦੀ ਪਤਨੀ ਸਰਿਤਾ ਨਾਲ ਨਾਜਾਇਜ਼ ਸਬੰਧ ਸਨ ਅਤੇ ਇਨ੍ਹਾਂ ਹੀ ਸਬੰਧਾਂ ਕਾਰਨ ਸ਼ੁਕਲ ਦੇਵ ਅਤੇ ਰਾਧੇ ਚੌਧਰੀ ਵਿਚ ਝਗੜਾ ਰਹਿੰਦਾ ਸੀ। 
 ਪਿਛਲੀ ਰਾਤ ਜਦ ਰਾਧੇ ਚੌਧਰੀ ਆਪਣੀ ਝੌਂਪੜੀ ਵਿਚ ਸੌਂ ਰਿਹਾ ਸੀ ਤਾਂ ਸ਼ੁਕਲ ਦੇਵ ਯਾਦਵ ਨੇ ਕਿਸੇ ਹਥਿਆਰ ਨਾਲ ਇਸਦੇ ਸਿਰ ’ਤੇ ਵਾਰ ਕਰ ਕੇ ਉਸਦਾ ਕਤਲ ਕਰ ਦਿੱਤਾ। ਪੁਲਸ ਅਨੁਸਾਰ ਇਸ ਵਿਚ ਉਸਦੀ ਪਤਨੀ ਸਰਿਤਾ ਨੇ ਵੀ ਸਾਥ ਦਿੱਤਾ। ਘਟਨਾ ਦਾ ਪਤਾ ਸਵੇਰੇ ਆਸ-ਪਾਸ ਦੇ ਲੋਕਾਂ ਨੂੰ ਲੱਗਿਆ ਤਾਂ ਉਨ੍ਹਾ ਨੇ ਪੁਲਸ ਅਤੇ ਸਹਾਰਾ ਜਨਸੇਵਾ ਨੂੰ ਸੂਚਿਤ ਕੀਤਾ। ਪੁਲਸ ਕਾਰਵਾਈ ਤੋਂ ਬਾਅਦ ਵਰਕਰਾਂ ਨੇ ਲਾਸ਼ ਨੂੰ ਸਿਵਲ ਹਸਪਤਾਲ ਪਹੁੰਚਾਇਆ। ਪੁਲਸ ਨੇ ਮ੍ਰਿਤਕ ਦੇ ਰਿਸ਼ਤੇਦਾਰ ਬਬਲੂ ਚੌਧਰੀ ਦੇ ਬਿਆਨਾਂ ਦੇ ਆਧਾਰ ’ਤੇ ਉਕਤ ਜੋੜੇ ਖਿਲਾਫ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਅਗਲੀ ਕਾਰਵਾਈ ਕੀਤੀ ਜਾ ਰਹੀ ਹੈ। ਥਾਣਾ ਸਿਵਲ ਲਾਈਨ ਦੇ ਮੁਖੀ ਰਛਪਾਲ ਸਿੰਘ ਨੇ ਦੱਸਿਆ ਕਿ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਦੇ ਯਤਨ ਕੀਤੇ ਜਾ ਰਹੇ ਹਨ।