ਈਜੀ ਜਾਂ ਬੀਜੀ ਰਜਿਸਟਰੀ, ਰਜਿਸਟਰੀ ਦਫ਼ਤਰਾਂ ’ਚ NOC ਤੋਂ ਬਾਅਦ ‘ਫੀਫੋ’ ਬਣ ਰਹੀ ਮੁਸੀਬਤ

ਅੰਮ੍ਰਿਤਸਰ(ਨੀਰਜ)-ਇਕ ਪਾਸੇ ਐੱਨ. ਓ. ਸੀ. ਦੀ ਜਟਿਲ ਪ੍ਰਕਿਰਿਆ ਕਾਰਨ ਲੋਕਾਂ ਨੂੰ ਭਾਰੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਉੱਥੇ ਹੀ ਹੁਣ ਈਜੀ ਰਜਿਸਟਰੀ ਸਿਸਟਮ ’ਚ ਲਾਗੂ ਕੀਤਾ ਗਿਆ ਫੀਫੋ (ਫਰਸਟ ਕਮ ਫਰਸਟ ਸਰਵ) ਵੀ ਲੋਕਾਂ ਲਈ ਮੁਸੀਬਤ ਬਣਦਾ ਜਾ ਰਿਹਾ ਹੈ। ਫੀਫੋ ਸਿਸਟਮ ਕਾਰਨ ਪ੍ਰਾਪਰਟੀ ਰਜਿਸਟ੍ਰੇਸ਼ਨ, ਪਾਵਰ ਆਫ ਅਟਾਰਨੀ, ਤਬਦੀਲ ਮਲਕੀਅਤ ਸਮੇਤ ਹੋਰ ਦਸਤਾਵੇਜ਼ਾਂ ਦੀ ਆਨਲਾਈਨ ਅਪ੍ਰੂਵਲ ਪ੍ਰਕਿਰਿਆ ਇੰਨੀ ਸੁਸਤ ਹੋ ਗਈ ਹੈ ਕਿ ਸਾਰੇ ਕਾਗਜ਼ਾਤ ਪੂਰੇ ਹੋਣ ਦੇ ਬਾਵਜੂਦ ਵੀ ਲੋਕਾਂ ਨੂੰ ਘੰਟਿਆਂ ਤੱਕ ਉਡੀਕ ਕਰਨੀ ਪੈਂਦੀ ਹੈ। ਲੋਕ ਸਬ-ਰਜਿਸਟਰਾਰ ਦਫ਼ਤਰਾਂ ਦੇ ਚੱਕਰ ਲਗਾਉਣ ਲਈ ਮਜ਼ਬੂਰ ਹਨ।

ਇਹ ਵੀ ਪੜ੍ਹੋ- ਹੋਲੀ ਤੋਂ ਪਹਿਲਾਂ ਰੇਲਵੇ ਦਾ ਵੱਡਾ ਤੋਹਫ਼ਾ: ਇਨ੍ਹਾਂ ਦਿਨਾਂ ਨੂੰ ਚੱਲਣਗੀਆਂ ਸਪੈਸ਼ਲ ਟਰੇਨਾਂ, ਜਾਣੋ ਸਮਾਂ ਤੇ ਤਰੀਕ

ਫੀਫੋ ਸਿਸਟਮ ਅਧੀਨ ਜਦ ਤੱਕ ਪਹਿਲੀ ਅਪਾਇੰਟਮੈਂਟ ਨਾਲ ਸਬੰਧਤ ਫਾਈਲ ਦੀ ਪੂਰੀ ਕਾਰਵਾਈ ਕਰ ਕੇ ਆਨਲਾਈਨ ਅਪ੍ਰੂਵਲ ਨਹੀਂ ਹੁੰਦੀ, ਤਦ ਤੱਕ ਅਗਲੀ ਆਨਲਾਈਨ ਅਪਾਇੰਟਮੈਂਟ ਸਬ-ਰਜਿਸਟਰਾਰ ਦੀ ਆਈ. ਡੀ. ’ਚ ਖੁੱਲ੍ਹਦੀ ਹੀ ਨਹੀਂ। ਜੇਕਰ ਕਿਸੇ ਵਿਅਕਤੀ ਦੀ ਫਾਈਲ ਤਕਨੀਕੀ ਖ਼ਰਾਬੀ, ਦਸਤਾਵੇਜ਼ਾਂ ਦੀ ਜਾਂਚ, ਇਤਰਾਜ਼, ਗਵਾਹ ਦੀ ਗੈਰਹਾਜ਼ਰੀ ਜਾਂ ਹੋਰ ਕਿਸੇ ਕਾਰਨ ਰੁਕ ਜਾਂਦੀ ਹੈ ਤਾਂ ਇਸ ਨਾਲ ਬਾਕੀ ਸਾਰੀਆਂ ਅਪਾਇੰਟਮੈਂਟਾਂ ਆਪੇ ਹੀ ਰੁਕ ਜਾਂਦੀਆਂ ਹਨ। ਇਸ ਕਾਰਨ ਹੋਰ ਅਰਜ਼ੀਕਾਰਾਂ ਨੂੰ ਬਿਨਾਂ ਗਲਤੀ ਦੇ ਉਡੀਕ ਕਰਨੀ ਪੈਂਦੀ ਹੈ।

ਇਹ ਵੀ ਪੜ੍ਹੋ- ਪੰਜਾਬ 'ਚ ਵੱਡਾ ਹਾਦਸਾ: ਆਰਮੀ ਗੱਡੀ ਨੇ ਆਟੋ ਨੂੰ ਮਾਰੀ ਜ਼ੋਰਦਾਰ ਟੱਕਰ, 2 ਲੋਕਾਂ ਦੀ ਮੌਕੇ 'ਤੇ ਮੌਤ

ਈਜੀ ਰਜਿਸਟਰੀ ਵਿਚ ਪਹਿਲਾਂ ਅਪਲੋਡ ਕੀਤੇ ਜਾਂਦੇ ਹਨ ਦਸਤਾਵੇਜ਼

ਈਜੀ ਰਜਿਸਟਰੀ ਸਿਸਟਮ ਅਧੀਨ ਲੋਕਾਂ ਨੂੰ ਪਹਿਲਾਂ ਸੰਬੰਧਤ ਪੋਰਟਲ ’ਤੇ ਆਪਣੇ ਦਸਤਾਵੇਜ਼ ਅਪਲੋਡ ਕਰਨੇ ਪੈਂਦੇ ਹਨ। ਇਸ ਤੋਂ ਬਾਅਦ ਸਬ-ਰਜਿਸਟਰਾਰ ਵੱਲੋਂ ਆਨਲਾਈਨ ਜਾਂਚ ਕੀਤੀ ਜਾਂਦੀ ਹੈ ਅਤੇ ਅਪ੍ਰੂਵਲ ਮਿਲਣ ਉਪਰੰਤ ਹੀ ਅਰਜ਼ੀਕਾਰ ਆਨਲਾਈਨ ਅਪਾਇੰਟਮੈਂਟ ਲੈ ਸਕਦਾ ਹੈ। ਪਰ ਜੇਕਰ ਪਹਿਲੀ ਅਪਾਇੰਟਮੈਂਟ ਕਲੀਅਰ ਨਾ ਹੋਣ ਕਰ ਕੇ ਫਾਈਲ ਨੂੰ ਅਪ੍ਰੂਵਲ ਸੀਰੀਅਲ ’ਚ ਅਟਕਾ ਦਿੱਤਾ ਜਾਵੇ ਤਾਂ ਈਜੀ ਰਜਿਸਟਰੀ ਅਸਲ ’ਚ ਬੀਜੀ ਰਜਿਸਟਰੀ ਬਣ ਕਰ ਕੇ ਰਹਿ ਜਾਂਦੀ ਹੈ। ਇਸ ਕਾਰਨ ਵਸੀਕਾ ਨਵੀਸ ਅਤੇ ਰਜਿਸਟਰੀ ਤਿਆਰ ਕਰਨ ਵਾਲੇ ਲੋਕ ਵੀ ਪ੍ਰੇਸ਼ਾਨ ਹਨ ਅਤੇ ਆਮ ਜਨਤਾ ਨੂੰ ਵੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਇਹ ਵੀ ਪੜ੍ਹੋ- ਪੰਜਾਬ 'ਚ ਪਟਵਾਰੀਆਂ ਦੇ ਵੱਡੇ ਪੱਧਰ 'ਤੇ ਤਬਾਦਲੇ

ਈਜੀ ਰਜਿਸਟਰੀ ’ਚ ਟਾਈਮ ਬਾਊਂਡ ਵੀ ਬਣਿਆ ਲੋਕਾਂ ਲਈ ਮੁਸੀਬਤ

ਈਜੀ ਰਜਿਸਟਰੀ ਸਿਸਟਮ ’ਚ ਲਾਗੂ ਟਾਈਮ ਬਾਊਂਡ ਆਨਲਾਈਨ ਅਪਾਇੰਟਮੈਂਟ ਪ੍ਰਣਾਲੀ ਵੀ ਲੋਕਾਂ ਲਈ ਸਮੱਸਿਆ ਬਣੀ ਹੋਈ ਹੈ। ਨਵੇਂ ਸਿਸਟਮ ਅਨੁਸਾਰ ਜੇਕਰ ਕਿਸੇ ਵਿਅਕਤੀ ਦੀ ਅਪਾਇੰਟਮੈਂਟ ਸਵੇਰੇ 11 ਵਜੇ ਜਾਂ ਕਿਸੇ ਹੋਰ ਨਿਸ਼ਚਿਤ ਸਮੇਂ ’ਤੇ ਤੈਅ ਹੈ, ਤਾਂ ਅਰਜ਼ੀਕਾਰ ਨੂੰ ਹਰ ਹਾਲਤ ’ਚ ਉਸ ਸਮੇਂ ਤੋਂ ਪਹਿਲਾਂ ਪਹੁੰਚ ਕੇ ਆਪਣੀ ਦਸਤਾਵੇਜ਼ੀ ਕਾਰਵਾਈ ਪੂਰੀ ਕਰਨੀ ਪੈਂਦੀ ਹੈ। ਜੇਕਰ ਟ੍ਰੈਫਿਕ ਜਾਂ ਕਿਸੇ ਹੋਰ ਕਾਰਨ ਕਰ ਕੇ ਦੇਰੀ ਹੋ ਜਾਵੇ, ਤਾਂ ਸਿਸਟਮ ਆਪਣੇ ਆਪ ਅਪਾਇੰਟਮੈਂਟ ਨੂੰ ਸਬ-ਰਜਿਸਟਰਾਰ ਦੀ ਆਈ. ਡੀ. ਤੋਂ ਲਾਕ ਕਰ ਦਿੰਦਾ ਹੈ।

ਡੀਡ ਰਾਈਟਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਨਰੇਸ਼ ਸ਼ਰਮਾ ਨੇ ਦੱਸਿਆ ਕਿ ਤਕਨੀਕੀ ਖ਼ਰਾਬੀ, ਟ੍ਰੈਫਿਕ ਜਾਮ ਜਾਂ ਹੋਰ ਕਿਸੇ ਕਾਰਨ ਨਾਲ ਦੇਰੀ ਹੋਣ ’ਤੇ ਅਪਾਇੰਟਮੈਂਟ ਆਪਣੇ ਆਪ ਰੱਦ ਹੋ ਜਾਂਦੀ ਹੈ ਅਤੇ ਅਰਜ਼ੀਕਾਰ ਨੂੰ ਮੁੜ ਤੋਂ ਪੂਰੀ ਪ੍ਰਕਿਰਿਆ ਸ਼ੁਰੂ ਕਰਨੀ ਪੈਂਦੀ ਹੈ। ਇਸ ਨਾਲ ਸਮਾਂ ਵੀ ਬਰਬਾਦ ਹੁੰਦਾ ਹੈ ਅਤੇ ਮਾਨਸਿਕ ਤਣਾਅ ਵੀ ਵਧਦਾ ਹੈ। ਉਨ੍ਹਾਂ ਸਰਕਾਰ ਤੋਂ ਮੰਗ ਕੀਤੀ ਕਿ ਨਵੇਂ ਸਿਸਟਮ ’ਚ ਟਾਈਮ ਬਾਊਂਡ ਨਿਯਮਾਂ ’ਚ ਸੋਧ ਕੀਤੀ ਜਾਵੇ ਤਾਂ ਜੋ ਲੋਕ ਪ੍ਰੇਸ਼ਾਨ ਨਾ ਹੋਣ।

ਜਾਅਲੀ ਰਜਿਸਟਰੀਆਂ ਰੋਕਣ ਵਿਚ ਸਿਸਟਮ ਅਜੇ ਵੀ ਨਾਕਾਮ

ਸਰਕਾਰ ਵੱਲੋਂ ਦਾਅਵਾ ਕੀਤਾ ਗਿਆ ਸੀ ਕਿ ਈਜੀ ਰਜਿਸਟਰੀ ਸਿਸਟਮ ਨਾਲ ਪਾਰਦਰਸ਼ਤਾ ਆਵੇਗੀ, ਪਰ ਜਾਅਲੀ ਦਸਤਾਵੇਜ਼ਾਂ ਰਾਹੀਂ ਹੋ ਰਹੀਆਂ ਜਾਅਲੀ ਰਜਿਸਟਰੀਆਂ ਦੇ ਮਾਮਲੇ ’ਚ ਨਵਾਂ ਸਿਸਟਮ ਅਜੇ ਵੀ ਫੇਲ੍ਹ ਸਾਬਤ ਹੋ ਰਿਹਾ ਹੈ। ਹਾਲ ਹੀ ’ਚ ਜਾਅਲੀ ਰਜਿਸਟਰੀਆਂ ਦੇ ਰਿਕਾਰਡ ਟੁੱਟੇ ਹਨ ਅਤੇ ਇਕ-ਦੋ ਨਹੀਂ, ਸਗੋਂ 8 ਜਾਅਲੀ ਰਜਿਸਟਰੀਆਂ ਫੜੀਆਂ ਗਈਆਂ ਹਨ। ਐੱਸ. ਡੀ. ਐੱਮ. ਦਫ਼ਤਰ ਵੱਲੋਂ ਜਾਂਚ ਉਪਰੰਤ ਮੁਲਜ਼ਮਾਂ ਖ਼ਿਲਾਫ਼ ਐੱਫ. ਆਈ. ਆਰ. ਦਰਜ ਕਰਨ ਦੀ ਲਿਖਤੀ ਸਿਫ਼ਾਰਸ਼ ਵੀ ਕੀਤੀ ਜਾ ਚੁੱਕੀ ਹੈ।

ਪਹਿਲਾਂ ਟੋਕਨ ਸਿਸਟਮ ਨਾਲ ਅੱਧੇ ਘੰਟੇ ’ਚ ਹੁੰਦੀ ਸੀ ਰਜਿਸਟਰੀ

ਈਜੀ ਰਜਿਸਟਰੀ ਸਿਸਟਮ ਤੋਂ ਪਹਿਲਾਂ ਆਨਲਾਈਨ ਅਪਾਇੰਟਮੈਂਟ ਤੋਂ ਬਾਅਦ ਸਬ-ਰਜਿਸਟਰਾਰ ਵੱਲੋਂ ਟੋਕਨ ਜਾਰੀ ਕੀਤਾ ਜਾਂਦਾ ਸੀ ਅਤੇ ਅੱਧੇ ਘੰਟੇ ’ਚ ਰਜਿਸਟਰੀ ਮੁਕੰਮਲ ਹੋ ਜਾਂਦੀ ਸੀ। ਪਰ ਹੁਣ ਆਨਲਾਈਨ ਅਪਾਇੰਟਮੈਂਟ ਤੋਂ ਲੈ ਕੇ ਹੋਰ ਕਾਰਵਾਈਆਂ ਤੱਕ ਲੋਕਾਂ ਨੂੰ ਕਈ ਦਿਨਾਂ ਤੱਕ ਇੰਤਜ਼ਾਰ ਕਰਨਾ ਪੈ ਰਿਹਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e