ਡੀ. ਐਫ. ਐਸ. ਸੀ ਨੇ ਜਲਦੀ ਅਦਾਇਗੀ ਕਰਵਾਉਣ ਦਾ ਦਿੱਤਾ ਭਰੋਸਾ

ਸਾਦਿਕ (ਪਰਮਜੀਤ) - ਟਰੱਕ ਯੂਨੀਅਨ ਸਾਦਿਕ ਵੱਲੋਂ ਕਣਕ ਦੇ ਸ਼ੀਜਨ ਦੌਰਾਨ ਵੱਖ ਵੱਖ ਖਰੀਦ ਏਜੰਸੀਆਂ ਦੀ ਕੀਤੀ ਗਈ ਬੋਰੀਆਂ ਦੀ ਢੋਆ ਢੋਆਈ ਦਾ ਢਾਈ ਕਰੋੜ ਰੁਪਏ ਅੱਜੇ ਬਾਕੀ ਹਨ ਅਤੇ ਟਰੱਕ ਅਪ੍ਰੇਟਰ ਝੋਨੇ ਦਾ ਸ਼ੀਜਨ ਲਗਾਉਣ ਲਈ ਦਰ ਦਰ ਦੀਆਂ ਠੋਕਰਾਂ ਖਾ ਰਹੇ ਹਨ । ਦਾਣਾ ਮੰਡੀ ਸਾਦਿਕ 'ਚ ਝੋਨੇ ਦੀ ਖਰੀਦ ਸ਼ੁਰੂ ਕਰਾਉਣ ਆਏ ਹਲਕਾ ਵਿਧਾਇਕ ਕੁਸ਼ਲਦੀਪ ਸਿੰਘ ਕਿੱਕੀ ਢਿੱਲੋ ਅਤੇ ਡਿਪਟੀ ਕਮਿਸ਼ਨਰ ਫਰੀਦਕੋਟ ਸ਼੍ਰੀ ਰਾਜੀਵ ਪ੍ਰਾਸ਼ਰ ਨੂੰ ਟਰੱਕ ਅਪ੍ਰੇਟਰਾਂ ਦੇ ਇਕ ਵਫਦ ਨੇ ਮਿਲ ਕੇ ਅਦਾਇਗੀ ਦੇਣ ਦੀ ਮੰਗ ਕੀਤੀ। ਇਸ ਮੌਕੇ ਵਫਦ 'ਚ ਸ਼ਿਵਰਾਜ ਸਿੰਘ ਢਿੱਲੋਂ, ਦਲਜੀਤ ਸਿੰਘ ਢਿੱਲੋਂ, ਹੀਰਾ ਸਿੰਘ ਸੰਧ ਸ਼ਾਮਲ ਸਨ। ਉਨਾਂ ਕਿੱਕੀ ਢਿੱਲੋਂ ਤੇ ਡਿਪਟੀ ਕਮਿਸ਼ਨਰ ਨੂੰ ਦੱਸਿਆ ਕਿ ਕਣਕ-2017 ਦਾ ਮਾਰਕਫੈਡ ਵੱਲ 1 ਕਰੋੜ 25 ਲੱਖ 55 ਹਜ਼ਾਰ 385 ਰੁਪਏ, ਵੇਅਰ ਹਾਊਸ ਵੱਲ ਸੱਤ ਲੱਖ, ਪਨਸਪ ਵੱਲ 15 ਲੱਖ ਅਤੇ ਐਫ. ਸੀ. ਆਈ ਵੱਲ 50 ਲੱਖ ਰੁਪਏ ਬਾਕੀ ਹਨ। ਪਿਛਲੇ ਸਾਲਾਂ ਦਾ ਕਰੀਬ 40 ਲੱਖ ਬਕਾਇਆ ਹੈ। ਝੋਨੇ ਦੇ ਸ਼ੀਜਨ ਦੀ ਸ਼ੁਰੂਆਤ ਹੋ ਗਈ ਹੈ ਅਤੇ ਹਰ ਟਰੱਕ ਅਪ੍ਰੇਟਰ ਨੂੰ ਰੁਪਏ ਦੀ ਲੋੜ ਹੈ। ਵਫਦ ਦੀ ਗੱਲ ਧਿਆਨ ਨਾਲ ਸੁਨਣ ਤੋਂ ਬਾਅਦ ਉਨਾਂ ਡੀ. ਐਫ. ਐਸ. ਸੀ ਫਰੀਦਕੋਟ ਤੋਂ ਮਾਮਲੇ ਦੀ ਜਾਣਕਾਰੀ ਲਈ। ਮੈਡਮ ਨੇ ਦੱਸਿਆ ਕਿ ਖਜਾਨੇ 'ਚ ਰੁਪਏ ਨਾ ਜਮਾਂ ਨਾ ਹੋਣ ਕਾਰਨ ਅਦਾਇਗੀ ਲੇਟ ਹੋਈ ਹੈ ਜਲਦੀ ਹੀ ਐਲ. ਓ. ਸੀ ਆਉਣ 'ਤੇ ਸਾਰੀ ਅਦਾਇਗੀ ਕਰਵਾ ਦਿੱਤੀ ਜਾਵੇਗੀ। ਇਸ ਮੌਕੇ ਮਹੰਤਾ ਸਿੰਘ, ਸਤਪਾਲ ਸਿੰਘ ਮੁਨਸ਼ੀ ਟਰੱਕ ਯੂਨੀਅਨ, ਰਛਪਾਲ ਸਿੰਘ ਬਰਾੜ ਮੌਜੂਦ ਹੋਏ ।