ਰੋਜ਼ੀ-ਰੋਟੀ ਕਮਾਉਣ ਲਈ ਗਿਆ ਸੀ ਵਿਦੇਸ਼, ਪਨਾਮਾ ਦੇ ਜੰਗਲਾਂ 'ਚ ਹੋਈ ਮੌਤ (ਵੀਡੀਓ)

ਕਪੂਰਥਲਾ— ਰੋਜ਼ੀ-ਰੋਟੀ ਕਮਾਉਣ ਖਾਤਿਰ ਵਿਦੇਸ਼ ਜਾਣ ਵਾਲੇ ਪਿੰਡ ਨਡਾਲਾ ਦੇ ਸੁਨੀਲ ਕੁਮਾਰ ਦੀ ਅਮਰੀਕਾ ਜਾਂਦੇ ਸਮੇਂ ਪਨਾਮਾ ਦੇ ਜੰਗਲਾਂ 'ਚ ਮੌਤ ਹੋ ਗਈ। ਸੁਨੀਲ ਦੇ ਪਿਤਾ ਦਵਿੰਦਰ ਕੁਮਾਰ ਜੋ ਨਡਾਲਾ 'ਚ ਕੱਪੜੇ ਦੀ ਦੁਕਾਨ ਕਰਦੇ ਹਨ, ਨੇ ਦੱਸਿਆ ਕਿ ਉਨ੍ਹਾਂ ਨੇ ਨਾਲ ਲੱਗਦੇ ਪਿੰਡ ਟਾਂਡੀ ਦੇ ਇਕ ਏਜੰਟ ਜਸਬੀਰ ਸਿੰਘ ਨੂੰ ਆਪਣੇ ਇਕਲੌਤੇ ਬੇਟੇ ਨੂੰ ਅਮਰੀਕਾ ਭੇਜਣ ਲਈ 23.50 ਲੱਖ ਰੁਪਏ 'ਚ ਸੌਦਾ ਤੈਅ ਕੀਤਾ ਸੀ। ਸੌਦਾ ਤੈਅ ਹੋਣ ਤੋਂ ਬਾਅਦ ਏਜੰਟ ਨੂੰ 19 ਲੱਖ ਦੇ ਦਿੱਤੇ ਅਤੇ 21 ਅਪ੍ਰੈਲ ਨੂੰ ਰੁਪਏ ਲੈਣ ਦੇ ਬਾਅਦ 24 ਅਪ੍ਰੈਲ ਨੂੰ ਏਜੰਟ ਨੇ ਬੇਟੇ ਦੀ ਪਨਾਮਾ ਲਈ ਫਲਾਈਟ ਕਰਵਾ ਦਿੱਤੀ। 
ਉਨ੍ਹਾਂ ਨੇ ਅੱਗੇ ਦੱਸਦੇ ਹੋਏ ਕਿਹਾ ਕਿ ਪਨਾਮਾ ਦੇ ਜੰਗਲਾਂ 'ਚੋਂ ਲੰਘਦੇ ਹੋਏ 8 ਜੂਨ ਨੂੰ ਉਨ੍ਹਾਂ ਦੀ ਬੇਟੇ ਨਾਲ ਆਖਰੀ ਵਾਰੀ ਫੋਨ ਜ਼ਰੀਏ ਗੱਲ ਹੋਈ ਅਤੇ ਉਸ ਦੇ ਬਾਅਦ ਕੋਈ ਗੱਲ ਨਹੀਂ ਹੋ ਸਕੀ। ਉਨ੍ਹਾਂ ਨੇ ਦੱਸਿਆ ਕਿ ਹੁਣ ਪਤਾ ਲੱਗਾ ਹੈ ਕਿ ਜੰਗਲ ਦੇ ਰਸਤੇ 'ਚ ਜਾਂਦੇ ਸਮੇਂ ਡੋਂਕਰ ਨੇ ਉਸ ਨੂੰ ਨਦੀ 'ਚ ਧੱਕਾ ਦੇ ਦਿੱਤਾ ਸੀ, ਜਿਸ ਤੋਂ ਬਾਅਦ ਉਸ ਦੀ ਹਾਲਤ ਦਿਨ-ਬ-ਦਿਨ ਖਰਾਬ ਹੁੰਦੀ ਗਈ ਅਤੇ ਉਸ ਨੂੰ ਤੁਰਨ-ਫਿਰਨ ਦੇ ਯੋਗ ਵੀ ਨਾ ਛੱਡਿਆ। ਕਰੀਬ 10 ਦਿਨ ਪਹਿਲਾਂ ਉਸ ਦੀ ਮੌਤ ਹੋ ਗਈ ਅਤੇ ਪਨਾਮਾ ਕੈਂਪ 'ਚ ਰੁਕੇ ਪੰਜਾਬੀ ਲੋਕਾਂ ਨੇ 500 ਡਾਲਰ ਇਕੱਠੇ ਕਰਕੇ ਉਸ ਦੀ ਲਾਸ਼ ਨੂੰ ਉਥੇ ਹੀ ਦਫਨ ਕਰ ਦਿੱਤਾ ਹੈ। ਪਰਿਵਾਰ ਨੇ ਭਾਰਤ ਸਰਕਾਰ ਤੋਂ ਮਦਦ ਦੀ ਮੰਗ ਕਰਦੇ ਹੋਏ ਦੋਸ਼ੀ ਏਜੰਟ ਖਿਲਾਫ ਸਖਤ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ। ਉਥੇ ਹੀ ਦੋਸ਼ੀ ਏਜੰਟ ਅਜੇ ਤੱਕ ਫਰਾਰ ਦੱਸਿਆ ਜਾ ਰਿਹਾ ਹੈ।