ਅੰਮ੍ਰਿਤਸਰ ਰੇਲ ਹਾਦਸਾ: ਇਹ ਦਰਦਭਰੀਆਂ ਕਹਾਣੀਆਂ ਰੁਆ ਦੇਣਗੀਆਂ ਤੁਹਾਨੂੰ (ਦੇਖੋ ਤਸਵੀਰਾਂ)

ਅੰਮ੍ਰਿਤਸਰ- ਅੰਮ੍ਰਿਤਸਰ 'ਚ ਜੌੜਾ ਫਾਟਕ ਨੇੜੇ ਸ਼ੁੱਕਰਵਾਰ ਸ਼ਾਮ ਨੂੰ ਰਾਵਣ ਦਹਿਨ ਦੇਖਣ ਦੌਰਾਨ ਰੇਲ ਹਾਦਸੇ ਦਾ ਸ਼ਿਕਾਰ ਹੋਏ ਲੋਕਾਂ ਦੇ ਰਿਸ਼ਤੇਦਾਰਾਂ ਨੂੰ ਭਰੋਸਾ ਨਹੀਂ ਹੋ ਰਿਹਾ ਹੈ ਕਿ ਉਨ੍ਹਾਂ ਦੇ ਆਪਣੇ ਹੁਣ ਇਸ ਦੁਨੀਆ 'ਚ ਨਹੀਂ ਰਹੇ।

ਇੱਥੇ ਦੇ ਨਿਵਾਸੀ ਵਿਜੈ ਕੁਮਾਰ ਉਹ ਦ੍ਰਿਸ਼ ਯਾਦ ਕਰ ਕੇ ਹੁਣ ਵੀ ਕੰਬ ਉੱਠਦੇ ਹਨ ਜਦੋਂ ਉਨ੍ਹਾਂ ਨੇ ਆਪਣੇ 18 ਸਾਲ ਬੇਟੇ ਦੇ ਕੱਟੇ ਹੋਏ ਸਿਰ ਦੀ ਤਸਵੀਰ ਆਪਣੇ ਵਟਸਐਪ 'ਤੇ ਤੜਕੇ 3 ਵਜੇ ਦੇਖੀ। ਵਿਜੈ ਦੇ 2 ਪੁੱਤਰਾਂ 'ਚੋਂ ਇਕ ਅਸ਼ੀਸ਼ ਵੀ ਘਟਨਾ ਵਾਲੀ ਥਾਂ 'ਤੇ ਸੀ। ਉਸ ਦੀ ਜਾਨ ਬੱਚ ਗਈ ਪਰ ਦੂਜਾ ਪੁੱਤਰ ਮਨੀਸ਼ ਉਨ੍ਹਾਂ ਖੁਸ਼ਕਿਸਮਤ ਨਾ ਨਿਕਲਿਆ। ਵਿਜੈ ਨੂੰ ਜਦੋਂ ਇਸ ਹਾਦਸੇ ਦਾ ਪਤਾ ਲੱਗਿਆ ਤਾਂ ਉਹ ਆਪਣੇ ਬੇਟੇ ਦੀ ਤਲਾਸ਼ ਵਿਚ ਇਕ ਹਸਪਤਾਲ ਤੋਂ ਦੂਜੇ ਹਸਪਤਾਲ ਭੱਟਕਦੇ ਰਿਹਾ ਪਰ ਕੁਝ ਪਤਾ ਨਹੀਂ ਚੱਲਿਆ। ਫਿਰ ਅਚਾਨਕ ਉਨ੍ਹਾਂ ਦੇ ਫੋਨ ਦੇ ਵਟਸਐਪ 'ਤੇ ਇਕ ਤਸਵੀਰ ਆਈ ਜਿਸ ਵਿਚ ਉਨ੍ਹਾਂ ਦੇ ਪੁੱਤਰ ਦਾ ਕੱਟਿਆ ਹੋਇਆ ਸਿਰ ਸੀ। ਇਸ ਭਾਲ ਵਿਚ ਉਨ੍ਹਾਂ ਨੂੰ ਇਕ ਹੱਥ ਅਤੇ ਇਕ ਪੈਰ ਮਿਲਿਆ ਪਰ ਉਹ ਉਨ੍ਹਾਂ ਦੇ ਬੇਟੇ ਦਾ ਨਹੀਂ ਸੀ। ਕੰਭਦੀ ਆਵਾਜ਼ ਨਾਲ ਵਿਜੈ ਦੱਸਦੇ ਰਹੇ, ''ਮਨੀਸ਼ ਨੀਲੀ ਜੀਨਸ ਪਹਿਨੀ ਹੋਈ ਸੀ, ਇਹ ਪੈਰ ਉਸਦਾ ਨਹੀਂ ਹੋ ਸਕਦਾ। ਮੇਰੀ ਤਾਂ ਦੁਨੀਆ ਹੀ ਉਜੜ ਗਈ। ''

ਇਸੇ ਤਰ੍ਹਾਂ ਇਸ ਹਾਦਸੇ ਦੌਰਾਨ ਉਥੇ ਮੌਜੂਦ ਸਪਨਾ ਨਾਂ ਦੀ ਕੁੜੀ ਦੇ ਸਿਰ ਵਿਚ ਸੱਟ ਲੱਗੀ ਹੈ। ਉਸ ਨੇ ਦੱਸਿਆ ਕਿ ਉਹ ਰਾਵਣ ਦਹਿਨ ਵਟਸਐਪ ਵੀਡੀਓ ਕਾਲ ਰਾਹੀਂ ਆਪਣੇ ਪਤੀ ਨੂੰ ਦਿਖਾ ਰਹੀ ਸੀ। ਜਦੋਂ ਪੁਤਲਿਆਂ ਨੂੰ ਅੱਗ ਲੱਗੀ ਤਾਂ ਲੋਕ ਪਿੱਛੇ ਹੱਟਣ ਲੱਗੇ ਅਤੇ ਪਟੜੀਆਂ ਕੋਲ ਆ ਗਏ। ਜਦੋਂ ਟਰੇਨ ਕੋਲ ਪਹੁੰਚ ਰਹੀ ਸੀ ਤਾਂ ਲੋਕ ਪਟੜੀ ਖਾਲੀ ਕਰਨ ਲੱਗੇ ਅਤੇ ਦੂਜੀ ਪਟੜੀ 'ਤੇ ਆ ਗਏ। ਇਨ੍ਹੇ ਵਿਚ ਇਕ ਹੋਰ ਟਰੇਨ ਤੇਜ਼ ਗਤੀ ਨਾਲ ਉੱਥੇ ਆ ਗਈ ਅਤੇ ਫਿਰ ਭੱਜਦੌੜ ਮੱਚ ਗਈ। ਸਪਨਾ ਨੇ ਇਸ ਹਾਦਸੇ ਵਿਚ ਆਪਣੀ ਰਿਸ਼ਤੇ ਦੀ ਭੈਣ ਅਤੇ ਇਕ ਸਾਲ ਦੀ ਭਤੀਜੀ ਨੂੰ ਗੁਆ ਦਿੱਤਾ। ਉਹ ਦੱਸਦੀ ਹੈ ਕਿ ਹਫੜਾ-ਦਫੜੀ ਵਿਚ ਲੋਕ ਇੱਧਰ-ਉੱਧਰ ਭੱਜਣ ਲੱਗੇ ਅਤੇ ਬੱਚੀ ਪੱਥਰਾਂ 'ਤੇ ਜਾ ਡਿੱਗੀ ਅਤੇ ਉਸ ਦੀ ਮਾਂ ਨੂੰ ਲੋਕਾਂ ਦੇ ਪੈਰਾਂ ਹੇਠਾਂ ਕੁੱਚਲੀ ਗਈ।

ਉੱਤਰ-ਪ੍ਰਦੇਸ਼ ਦੇ ਹਰਦੋਈ ਨਿਵਾਸੀ ਅਤੇ ਦਿਹਾੜੀ ਮਜ਼ਦੂਰ 40 ਸਾਲ ਦੇ ਜਗੁਨੰਦਨ ਨੂੰ ਸਿਰ ਅਤੇ ਪੈਰ 'ਚ ਸੱਟ ਆਈ ਹੈ।  ਉਨ੍ਹਾਂ ਨੇ ਦੱਸਿਆ ਕਿ ਉਹ ਘਟਨਾ ਸਮੇਂ ਪਟੜੀਆਂ 'ਤੇ ਨਹੀਂ ਸੀ ਪਰ ਜਦੋਂ ਰਾਵਣ ਸੜਣ ਲੱਗਾ ਤਾਂ ਅੱਗੇ ਮੌਜੂਦ ਭੀੜ ਪਿੱਛੇ ਹੱਟਣ ਲੱਗੀ ਅਤੇ ਉਹ ਵੀ ਧੱਕਾ ਖਾਂਦੇ ਹੋਏ ਪਿੱਛੇ ਹੋ ਗਏ। ਜਖ਼ਮੀ ਹੋਏ ਕਈ ਲੋਕਾਂ ਨੇ ਉਸ ਪਲ ਨੂੰ ਯਾਦ ਕਰਦੇ ਹੋਏ ਦੱਸਿਆ ਕਿ ਉਨ੍ਹਾਂ ਨੂੰ ਉੱਥੇ ਆ ਰਹੀ ਟਰੇਨ ਦਾ ਹਾਰਨ ਸੁਣਾਈ ਨਹੀਂ ਦਿੱਤਾ। ਇਕ ਹੋਰ ਟਰੇਨ ਕੁਝ ਦੇਰ ਪਹਿਲਾਂ ਹੀ ਉੱਥੋਂ ਲੰਘੀ ਸੀ। ਪਟਾਕਿਆਂ ਦੇ ਰੌਲੇ ਵਿਚ ਟਰੇਨ ਦੀ ਆਵਾਜ਼ ਦੱਬੀ ਗਈ।