ਅਕਾਲੀ ਸਰਕਾਰ ਦੌਰਾਨ ਸਡ਼ਕਾਂ ਦੀ ਘਟੀਆ ਉਸਾਰੀ ਦੀ ਹੋਵੇਗੀ ਜਾਂਚ : ਵਿਜੇ ਇੰਦਰ ਸਿੰਗਲਾ

ਬਠਿੰਡਾ(ਵਰਮਾ)-ਬਠਿੰਡਾ-ਅੰਮ੍ਰਿਤਸਰ 6 ਲੇਨ ਸਡ਼ਕ ਧਸਣ ਦੇ ਮਾਮਲੇ ਨੂੰ ਲੈ ਕੇ ਲੋਕ ਨਿਰਮਾਣ ਮੰਤਰੀ ਵਿਜੇ ਇੰਦਰ ਸਿੰਗਲਾ ਨੇ ਸਪੱਸ਼ਟ ਕੀਤਾ ਕਿ ਅਕਾਲੀ ਸਰਕਾਰ ਦੌਰਾਨ ਘਟੀਆ ਸਮੱਗਰੀ ਨਾਲ ਬਣਾਈਆਂ ਸਡ਼ਕਾਂ ਦੀ ਜਾਂਚ ਹੋਵੇਗੀ ਤੇ ਮੁਲਜ਼ਮ ਠੇਕੇਦਾਰਾਂ ਸਮੇਤ ਅਧਿਕਾਰੀਆਂ ਨੂੰ ਛੱਡਿਆ ਨਹੀਂ ਜਾਵੇਗਾ। ਉਨ੍ਹਾਂ ਕਿਹਾ ਕਿ 2200 ਕਰੋਡ਼ ਰੁਪਏ ਦੀ ਲਾਗਤ ਨਾਲ ਬਠਿੰਡਾ-ਅੰਮ੍ਰਿਤਸਰ ਸਡ਼ਕ ਦਾ ਧੱਸਣਾ ਇਕ ਗੰਭੀਰ ਮਾਮਲਾ ਹੈ, ਕਿਉਂਕਿ ਰਾਸ਼ਟਰੀ ਮਾਰਗ ’ਤੇ ਗੱਡੀਆਂ ਦਾ ਆਉਣਾ ਜਾਣਾ ਲੱਗਿਆ ਰਹਿੰਦਾ ਹੈ ਅਜਿਹੇ ਵਿਚ ਕੋਈ ਵੀ ਦੁਰਘਟਨਾ ਬਰਦਾਸ਼ਤ ਨਹੀਂ ਹੋਵੇਗੀ। ਉਨ੍ਹਾਂ ਦੱਸਿਆ ਕਿ ਸ਼ੁੱਕਰਵਾਰ ਸ਼ਾਮ ਤੱਕ ਜਾ ਸ਼ਨੀਵਾਰ ਇਸਦੀ ਰਿਪੋਰਟ ਮਿਲੇਗੀ ਉਸ ਤੋਂ  ਬਾਅਦ ਅਗਲੀ ਕਾਰਵਾਈ ਕੀਤੀ ਜਾਵੇਗੀ। ਲੋਕ ਨਿਰਮਾਣ ਵਿਭਾਗ ਦੇ ਵਿਜੀਲੈਂਸ ਅਧਿਕਾਰੀਆਂ ਨਾਲ ਚੰਡੀਗਡ਼੍ਹ ਤੇ ਪਟਿਆਲਾ ਤੋਂ ਟੀਮਾਂ ਨੇ ਇਸ ਸਡ਼ਕ ਦਾ ਦੌਰਾ ਕੀਤਾ ਅਤੇ ਐਕਸੀਅਨ ਗਗਨਦੀਪ ਸਿੰਘ ਦੀ ਅਗਵਾਈ ਵਿਚ ਧੱਸੀ ਸਡ਼ਕ ਦੇ ਨਮੂਨੇ ਵੀ ਭਰੇ ਗਏ। ਸ਼ੁੱਕਰਵਾਰ ਨੂੰ ਵੱਡੀ ਗਿਣਤੀ ’ਚ ਅਧਿਕਾਰੀਆਂ ਜਾਂਚ ਲਈ ਪਹੁੰਚੇ। ਕੁਆਲਿਟੀ ਕੰਟਰੋਲ ਦੇ ਅਧਿਕਾਰੀ ਵੀ ਮੌਕੇ ’ਤੇ ਪਹੁੰਚੇ ਉਨ੍ਹਾਂ ਨੇ ਵੀ ਆਪਣੀ ਰਿਪੋਰਟ ਤਿਆਰ ਕਰਨ ਦੀ ਗੱਲ ਕਹੀ। ਜ਼ਿਕਰਯੋਗ ਹੈ ਕਿ ਵੀਰਵਾਰ ਸਵੇਰੇ 5 ਵਜੇ ਇਕ ਭਾਰੀ ਟਰੱਕ ਉਥੋਂ ਲੰਘ ਰਿਹਾ ਸੀ ਜੋ ਧੱਸ ਗਿਆ ਤੇ ਪਿੱਛੇ ਤੇਜ ਰਫਤਾਰ ਨਾਲ ਆ ਰਹੀ ਸਵਿਫਟ ਕਾਰ ਟਰੱਕ ਨਾਲ ਟਕਰਾ ਗਈ, ਜਿਸ ਕਾਰਨ ਕਾਰ ’ਚ ਸਵਾਰ ਚਾਰ ਮੈਂਬਰਾਂ ਨੂੰ ਮਾਮੂਲੀ ਸੱਟਾਂ ਆਈਆਂ ਸੀ। ਪੁਲਸ ਤੇ ਲੋਕ ਨਿਰਮਾਣ ਵਿਭਾਗ ਦੇ ਅਧਿਕਾਰੀਆਂ ਨੇ ਬੈਰੀਗੇਟ ਲਗਾ ਕੇ ਲੱਗਭਗ ਅੱਧਾ ਕਿਲੋਮੀਟਰ ਸਡ਼ਕ ਨੂੰ ਬੰਦ ਕਰ ਦਿੱਤਾ ਸੀ ਜਿਸ ਦੀ ਜਾਂਚ ਸ਼ੁਰੂ ਹੋ ਚੁੱਕੀ ਹੈ।