ਬਜਟ ’ਚ ਮਰਦਮਸ਼ੁਮਾਰੀ 2027 ਲਈ 6,000 ਕਰੋੜ ਰੁਪਏ ਦੀ ਵਿਵਸਥਾ

ਨਵੀਂ ਦਿੱਲੀ, (ਭਾਸ਼ਾ)- ਕੇਂਦਰੀ ਬਜਟ ’ਚ 2027 ਦੀ ਮਰਦਮਸ਼ੁਮਾਰੀ ਲਈ 6,000 ਕਰੋੜ ਰੁਪਏ ਦੀ ਅਲਾਟਮੈਂਟ ਕੀਤੀ ਗਈ ਹੈ। ਕੋਵਿਡ ਮਹਾਮਾਰੀ ਕਰ ਕੇ ਲੱਗਭਗ 6 ਸਾਲ ਦੀ ਦੇਰੀ ਤੋਂ ਬਾਅਦ, 1 ਅਪ੍ਰੈਲ ਤੋਂ 16ਵੀਂ ਮਰਦਮਸ਼ੁਮਾਰੀ ਦੀ ਕਵਾਇਦ ਸ਼ੁਰੂ ਹੋਣ ਵਾਲੀ ਹੈ।

ਵਿੱਤ ਮੰਤਰੀ ਨਿਰਮਲਾ ਸੀਤਾਰਾਮਨ ਨੇ ਸੰਸਦ ’ਚ ਮਾਲੀ ਸਾਲ 2026-27 ਲਈ ਜੋ ਬਜਟ ਅੰਦਾਜ਼ੇ ਪੇਸ਼ ਕੀਤੇ, ਉਨ੍ਹਾਂ ’ਚ ਮਰਦਮਸ਼ੁਮਾਰੀ, ਸਰਵੇਖਣ ਅਤੇ ਅੰਕੜਾ/ਭਾਰਤ ਦੇ ਰਜਿਸਟਰਾਰ ਜਨਰਲ (ਆਰ. ਜੀ. ਆਈ.) ਲਈ 6,000 ਕਰੋੜ ਰੁਪਏ ਰੱਖੇ ਗਏ ਹਨ, ਜੋ 2025-26 ਦੇ ਸੋਧੇ ਹੋਏ ਅੰਦਾਜ਼ੇ ’ਚ ਅਲਾਟ ਕੀਤੇ 1,040 ਕਰੋੜ ਰੁਪਏ ਤੋਂ ਲੱਗਭਗ 6 ਗੁਣਾ ਵੱਧ ਹੈ। ਬਜਟ ਦਸਤਾਵੇਜ਼ ’ਚ ਕਿਹਾ ਗਿਆ ਹੈ, ‘‘ਇਸ ’ਚ ਭਾਰਤ ਦੇ ਰਜਿਸਟਰਾਰ ਜਨਰਲ ਅਤੇ ਸੈਂਸਸ ਕਮਿਸ਼ਨਰ ਦੇ ਦਫ਼ਤਰ ਅਤੇ ਆਰ. ਜੀ. ਆਈ. ਦੀਆਂ ਵੱਖ-ਵੱਖ ਯੋਜਨਾਵਾਂ, ਜਿਨ੍ਹਾਂ ’ਚ ਰਾਸ਼ਟਰੀ ਜਨਸੰਖਿਆ ਰਜਿਸਟਰ (ਐੱਨ. ਪੀ. ਆਰ.) ਅਤੇ ਮਰਦਮਸ਼ੁਮਾਰੀ 2027 ’ਤੇ ਖਰਚੇ ਸ਼ਾਮਲ ਹਨ, ਲਈ ਵਿਵਸਥਾ ਸ਼ਾਮਲ ਹੈ।’’ ਮਰਦਮਸ਼ੁਮਾਰੀ 2027 ’ਚ ਕੀਤੀ ਜਾਵੇਗੀ, ਜਿਸ ’ਚ ਲੱਦਾਖ ਵਰਗੇ ਬਰਫ਼ ਨਾਲ ਢਕੇ ਖੇਤਰਾਂ ਲਈ ਸੰਦਰਭ ਮਿਤੀ 1 ਅਕਤੂਬਰ 2026 ਅਤੇ ਦੇਸ਼ ਦੇ ਬਾਕੀ ਹਿੱਸਿਆਂ ਲਈ 1 ਮਾਰਚ 2027 ਹੋਵੇਗੀ।