ਸਵੇਰੇ 3:30 ਵਜੇ ਤੱਕ ਮਾਮਲਿਆਂ ਦੀ ਸੁਣਵਾਈ ਕਰਨ ਤੋਂ ਬਾਅਦ ਇਹ ਜੱਜ ਅਗਲੇ ਦਿਨ ਫਿਰ ਡਿਊਟੀ ''ਤੇ

ਮੁੰਬਈ — ਮੁੰਬਈ ਹਾਈ ਕੋਰਟ ਦੇ ਜਸਟਿਸ ਐੱਸ.ਜੇ. ਕਥਾਵਾਲਾ ਨੇ ਕਿਸੇ ਫਿਲਮ ਦੀ ਭੂਮਿਕਾ ਨਹੀਂ ਨਿਭਾਈ ਪਰ ਉਨ੍ਹਾਂ ਨੇ ਸ਼ੁੱਕਰਵਾਰ ਨੂੰ ਰੋਜ਼ਾਨਾ ਦੇ ਸਮੇਂ ਵਾਂਗ ਸ਼ੁਰੂ ਹੋਈ ਕੋਰਟ 'ਚ ਅਗਲੇ ਦਿਨ ਸਵੇਰੇ 3:30 ਵਜੇ ਤੱਕ ਮਾਮਲਿਆਂ ਦੀ ਸੁਣਵਾਈ ਕੀਤੀ। ਜਸਟਿਸ ਸ਼ਾਹਰੁਖ ਜੇ. ਕਥਾਵਾਲਾ ਤੋਂ ਇਲਾਵਾ ਹੋਰ ਸਾਰੇ ਜੱਜ ਸ਼ਾਮ 5 ਵਜੇ ਬਕਾਇਆ ਮਾਮਲਿਆਂ ਦਾ ਨਿਪਟਾਰਾ ਕਰਕੇ ਚਲੇ ਗਏ। ਜਸਟਿਸ ਕਥਾਵਾਲਾ ਇਸੇ ਕੋਸ਼ਿਸ਼ ਵਿਚ ਲੱਗੇ ਰਹੇ ਕਿ 5 ਮਈ ਤੋਂ ਅਦਾਲਤ ਵਿਚ ਗਰਮੀਆਂ ਦੀਆਂ ਛੁੱਟੀਆਂ ਸ਼ੁਰੂ ਹੋ ਰਹੀਆਂ ਹਨ ਅਤੇ ਜ਼ਿਆਦਾ ਤੋਂ ਜ਼ਿਆਦਾ ਮਾਮਲਿਆਂ ਦਾ ਨਿਪਟਾਰਾ ਹੋ ਜਾਵੇ।
ਕਈ ਮਾਮਲਿਆਂ 'ਤੇ ਹੋਈ ਸੁਣਵਾਈ
ਮੁੰਬਈ ਹਾਈਕੋਰਟ ਦੇ ਜਸਟਿਸ ਸ਼ਾਹਰੁਖ ਜੇ ਕਥਾਵਾਲਾ ਦੀ ਕੋਰਟ ਅਗਲੇ ਦਿਨ ਸਵੇਰੇ ਸਾਢੇ ਤਿੰਨ ਵਜੇ ਤੱਕ ਚੱਲੀ। ਇਸ ਦੌਰਾਨ ਕਈ ਮਾਮਲਿਆਂ ਦੀ ਸੁਣਵਾਈ ਦੇ ਨਾਲ-ਨਾਲ ਪਟੀਸ਼ਨਾਂ 'ਤੇ ਜ਼ਰੂਰੀ ਹਦਾਇਤਾਂ ਵੀ ਦਿੱਤੀਆਂ ਗਈਆਂ। ਜੱਜ ਦੇ ਨਾਲ ਮੌਜੂਦ ਰਹੇ ਇਕ ਸੀਨੀਅਰ ਐਡਵੋਕੇਟ ਨੇ ਦੱਸਿਆ,'ਕੋਰਟ ਰੂਮ ਸੀਨੀਅਰ ਵਕੀਲਾਂ ਨਾਲ ਭਰਿਆ ਹੋਇਆ ਸੀ, ਜਿਨ੍ਹਾਂ ਦੇ ਮਾਮਲਿਆਂ ਦੀ ਸੁਣਵਾਈ ਚਲ ਰਹੀ ਸੀ। ਇਸ ਦੌਰਾਨ ਲਗਭਗ 100 ਜਨਤਕ ਪਟੀਸ਼ਨਾਂ ਸਨ, ਜਿਨ੍ਹਾਂ 'ਤੇ ਤਤਕਾਲੀ ਅੰਤਰਿਮ ਰਾਹਤ ਦੀ ਮੰਗ ਕੀਤੀ ਗਈ ਸੀ।
ਇਹ ਪਹਿਲਾ ਮੌਕਾ ਸੀ ਜਦੋਂ ਜਸਟਿਸ ਕਥਾਵਾਲਾ ਨੇ ਸ਼ੁੱਕਰਵਾਰ ਨੂੰ ਇੰਨੀ ਦੇਰ ਤੱਕ ਮਾਮਲਿਆਂ ਦੀ ਸੁਣਵਾਈ ਕੀਤੀ। ਦੋ ਹਫਤੇ ਪਹਿਲਾਂ ਵੀ ਉਹ ਆਪਣੇ ਚੈਂਬਰ ਵਿਚ ਦੇਰ ਰਾਤ ਤੱਕ ਮਾਮਲਿਆਂ ਦੀ ਸੁਣਵਾਈ ਕਰਦੇ ਰਹੇ ਸਨ। ਇਕ ਹੋਰ ਸੀਨੀਅਰ ਵਕੀਲ ਪ੍ਰਵੀਨ ਸਮਦਾਨੀ ਨੇ ਕਿਹਾ, 'ਜਸਟਿਸ ਕਥਾਵਾਲਾ ਉਸ ਸਮੇਂ ਵੀ(ਸਵੇਰੇ ਸਾਢੇ ਤਿੰਨ ਵਜੇ ਤੱਕ) ਉਨ੍ਹੇ ਹੀ ਚੁਸਤ ਦਿਖ ਰਹੇ ਸਨ ਜਿਵੇਂ ਕੋਈ ਸਵੇਰੇ ਦਫਤਰ ਆਉਣ ਸਮੇਂ ਲੱਗਦੇ ਹਨ।' ਮੇਰਾ ਮਾਮਲਾ ਸਭ ਤੋਂ ਆਖਿਰ ਵਿਚ ਸੁਣੇ ਜਾਣ ਵਾਲੇ ਮਾਮਲਿਆਂ ਵਿਚ ਸ਼ਾਮਲ ਸੀ। ਉਸ ਦੇਰ ਰਾਤ ਦੇ ਸਮੇਂ ਵੀ ਜਸਟਿਸ ਨੇ ਸਾਡੀ ਗੱਲ ਬਹੁਤ ਹੀ ਧਿਆਨ ਨਾਲ ਸੁਣੀ ਅਤੇ ਹੁਕਮ ਪਾਸ ਕੀਤਾ।
ਰਾਤ ਭਰ ਸੁਣਵਾਈ ਕਰਦੇ ਰਹੇ, ਸਵੇਰੇ ਫਿਰ ਪਹੁੰਚ ਗਏ
ਜਸਟਿਸ ਕਥਾਵਾਲਾ ਆਮ ਤੌਰ 'ਤੇ ਦੂਸਰੇ ਜੱਜਾਂ ਦੇ ਮੁਕਾਬਲੇ ਕਰੀਬ 1 ਘੰਟਾ ਪਹਿਲਾ ਸਵੇਰੇ 10 ਵਜੇ ਅਦਾਲਤੀ ਕਾਰਵਾਈ ਸ਼ੁਰੂ ਕਰ ਦਿੰਦੇ ਹਨ ਅਤੇ 5 ਵਜੇ ਤੋਂ ਬਾਅਦ ਵੀ ਮਾਮਲਿਆਂ ਦੀ ਸੁਣਵਾਈ ਕਰਦੇ ਰਹਿੰਦੇ ਹਨ। ਉਨ੍ਹਾਂ ਦੇ ਸਟਾਫ ਦੇ ਹੀ ਇਕ ਮੈਂਬਰ ਨੇ ਦੱਸਿਆ ਕਿ ਦੇਰ ਰਾਤ ਤੱਕ ਮਾਮਲਿਆਂ ਦੀ ਸੁਣਵਾਈ ਕਰਨ ਦੇ ਬਾਵਜੂਦ ਅਗਲੇ ਦਿਨ ਜਸਟਿਸ ਸਵੇਰੇ ਤੈਅ ਸਮੇਂ 'ਤੇ ਆਪਣੇ ਚੈਂਬਰ 'ਚ ਮਾਮਲਿਆਂ ਦੀ ਸੁਣਵਾਈ ਲਈ ਪਹੁੰਚ ਗਏ।