ਸੁਖੋਈ Su-30MKI ਜਹਾਜ਼ ਤੋਂ ਲੌਂਗ-ਰੇਂਜ ਗਲਾਈਡ ਬੰਬ ''ਖਗਾਂਤਕ-243'' ਦਾ ਸਫ਼ਲ ਪਰੀਖਣ
Friday, Sep 04, 2026 - 12:03 AM (IST)
ਨਵੀਂ ਦਿੱਲੀ : ਭਾਰਤੀ ਰੱਖਿਆ ਖੇਤਰ ਨੇ ਆਤਮਨਿਰਭਰਤਾ ਦੀ ਦਿਸ਼ਾ ਵਿੱਚ ਇੱਕ ਹੋਰ ਵੱਡੀ ਅਤੇ ਇਤਿਹਾਸਕ ਪ੍ਰਾਪਤੀ ਹਾਸਲ ਕਰ ਲਈ ਹੈ। ਦੇਸ਼ ਵਿੱਚ ਹੀ ਮੁਕੰਮਲ ਤੌਰ 'ਤੇ ਵਿਕਸਿਤ ਕੀਤੇ ਗਏ 'ਖਗਾਂਤਕ-243' ਲੌਂਗ-ਰੇਂਜ ਗਲਾਈਡ ਬੰਬ ਦਾ ਪਹਿਲਾ ਸਫ਼ਲ ਪਰੀਖਣ ਕੀਤਾ ਗਿਆ ਹੈ। ਪਰੀਖਣ ਦੌਰਾਨ ਇਸ ਗਲਾਈਡ ਬੰਬ ਨੇ ਰੇਗਿਸਤਾਨੀ ਇਲਾਕੇ ਵਿੱਚ ਬਣਾਏ ਗਏ ਆਪਣੇ ਨਿਸ਼ਾਨੇ 'ਤੇ ਬਿਲਕੁਲ ਸਹੀ ਵਾਰ ਕੀਤਾ, ਜਿਸ ਨਾਲ ਉੱਥੇ ਇੱਕ ਜ਼ਬਰਦਸਤ ਧਮਾਕਾ ਹੋਇਆ।
ਇਸ ਆਧੁਨਿਕ ਗਲਾਈਡ ਬੰਬ ਦਾ ਪਰੀਖਣ ਭਾਰਤੀ ਹਵਾਈ ਸੈਨਾ ਦੇ ਸ਼ਕਤੀਸ਼ਾਲੀ ਸੁਖੋਈ Su-30MKI ਫਾਈਟਰ ਜੈੱਟ ਰਾਹੀਂ ਕੀਤਾ ਗਿਆ। ਇਸ ਸਫ਼ਲ ਟੈਸਟ ਨਾਲ ਭਾਰਤੀ ਹਵਾਈ ਸੈਨਾ ਨੂੰ ਯੁੱਧ ਦੇ ਮੈਦਾਨ ਵਿੱਚ ਬਹੁਤ ਵੱਡੀ ਰਣਨੀਤਕ ਅਤੇ ਸੈਨਿਕ ਬੜ੍ਹਤ ਮਿਲੇਗੀ। ਹੁਣ ਭਾਰਤੀ ਲੜਾਕੂ ਜਹਾਜ਼ਾਂ ਨੂੰ ਦੁਸ਼ਮਣ ਦੇ ਹਵਾਈ ਰੱਖਿਆ ਖੇਤਰ ਦੇ ਬਿਲਕੁਲ ਨੇੜੇ ਜਾਣ ਦੀ ਜ਼ਰੂਰਤ ਨਹੀਂ ਪਵੇਗੀ, ਸਗੋਂ ਉਹ ਇੱਕ ਸੁਰੱਖਿਅਤ ਦੂਰੀ ਤੋਂ ਹੀ ਦੁਸ਼ਮਣ ਦੇ ਟਿਕਾਣਿਆਂ ਨੂੰ ਪੂਰੀ ਤਰ੍ਹਾਂ ਤਬਾਹ ਕਰਨ ਦੇ ਸਮਰੱਥ ਹੋਣਗੇ।
ਕੀ ਹਨ 'ਖਗਾਂਤਕ-243' ਦੀਆਂ ਮੁੱਖ ਖੂਬੀਆਂ?
ਭਾਰ ਅਤੇ ਸਮਰੱਥਾ: ਇਹ ਲਗਭਗ 300 ਕਿਲੋਗ੍ਰਾਮ ਵਜ਼ਨੀ ਇੱਕ ਸਟੈਂਡ-ਆਫ਼ ਪ੍ਰੀਸੀਜ਼ਨ ਹਥਿਆਰ ਹੈ, ਜਿਸ ਵਿੱਚ 125 ਕਿਲੋਗ੍ਰਾਮ ਦਾ ਬਹੁਤ ਹੀ ਸ਼ਕਤੀਸ਼ਾਲੀ 'Mk-81' ਵਾਰਹੈੱਡ ਲਗਾਇਆ ਗਿਆ ਹੈ।
ਲੰਬੀ ਮਾਰਕ ਸਮਰੱਥਾ: ਜੇਕਰ ਇਸ ਬੰਬ ਨੂੰ ਜਹਾਜ਼ ਰਾਹੀਂ ਵਧੇਰੇ ਉਚਾਈ ਤੋਂ ਲਾਂਚ (ਡ੍ਰੌਪ) ਕੀਤਾ ਜਾਂਦਾ ਹੈ, ਤਾਂ ਇਹ 140 ਕਿਲੋਮੀਟਰ ਤੋਂ ਵੀ ਜ਼ਿਆਦਾ ਦੀ ਦੂਰੀ ਤੈਅ ਕਰਕੇ ਵਾਰ ਕਰ ਸਕਦਾ ਹੈ।
ਸਟੀਕ ਨਿਸ਼ਾਨਾ: ਇਹ ਬੰਬ INS (ਇਨਰਸ਼ੀਅਲ ਨੇਵੀਗੇਸ਼ਨ ਸਿਸਟਮ) ਅਤੇ GNSS (ਸੈਟੇਲਾਈਟ ਨੇਵੀਗੇਸ਼ਨ ਸਿਸਟਮ) ਦੀ ਆਧੁਨਿਕ ਤਕਨੀਕ ਨਾਲ ਲੈਸ ਹੈ, ਜਿਸ ਦੀ ਮਦਦ ਨਾਲ ਇਹ 10 ਮੀਟਰ ਤੋਂ ਵੀ ਘੱਟ ਦੇ ਦਾਇਰੇ ਵਿੱਚ ਆਪਣੇ ਟੀਚੇ 'ਤੇ ਅਚੂਕ ਨਿਸ਼ਾਨਾ ਲਗਾਉਣ ਦੀ ਤਾਕਤ ਰੱਖਦਾ ਹੈ।
ਇਸ ਘਾਤਕ ਹਥਿਆਰ ਨੂੰ ਨਾਗਪੁਰ ਦੀ ਪ੍ਰਾਈਵੇਟ ਕੰਪਨੀ 'JSR Dynamics' ਨੇ 'ਭਾਰਤ ਇਲੈਕਟ੍ਰਾਨਿਕਸ ਲਿਮਟਿਡ' (BEL) ਨਾਲ ਮਿਲ ਕੇ ਸਾਂਝੇ ਤੌਰ 'ਤੇ ਵਿਕਸਿਤ ਕੀਤਾ ਹੈ। ਰੱਖਿਆ ਮਾਹਿਰਾਂ ਅਨੁਸਾਰ ਇਹ ਸਫ਼ਲ ਪਰੀਖਣ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ 'ਆਤਮਨਿਰਭਰ ਭਾਰਤ' ਅਭਿਆਨ ਨੂੰ ਹੋਰ ਮਜ਼ਬੂਤ ਕਰਦਾ ਹੈ ਅਤੇ ਭਾਰਤੀ ਫ਼ੌਜ ਦੀ ਤਾਕਤ ਵਿੱਚ ਇੱਕ ਬੇਹੱਦ ਮਹੱਤਵਪੂਰਨ ਦੇਸੀ ਹਥਿਆਰ ਨੂੰ ਸ਼ਾਮਲ ਕਰਦਾ ਹੈ।
