SBI ਨੇ ਗਾਹਕਾਂ ਲਈ ਜਾਰੀ ਕੀਤਾ ਅਲਰਟ! ਰੋਜ਼ ਕੁਝ ਸਮੇਂ ਲਈ ਬੰਦ ਰਹੇਗੀ ਇਹ ਸਰਵਿਸ

ਨੈਸ਼ਨਲ ਡੈਸਕ- ਦੇਸ਼ ਦੇ ਸਭ ਤੋਂ ਵੱਡੇ ਸਰਕਾਰੀ ਬੈਂਕ, ਸਟੇਟ ਬੈਂਕ ਆਫ ਇੰਡੀਆ ਨੇ ਆਪਣੇ ਗਾਹਕਾਂ ਲਈ ਇਕ ਐਡਵਾਈਜ਼ਰੀ ਜਾਰੀ ਕੀਤੀ ਹੈ, ਜਿਸ ਵਿਚ ਦੱਸਿਆ ਗਿਆ ਹੈ ਕਿ ਸਟੇਟ ਬੈਂਕ ਆਫ ਇੰਡੀਆ ਦੀ ਬੈਂਕਿੰਗ ਸਰਵਿਸ 24 ਘੰਟਿਆਂ 'ਚ ਕੁਝ ਸਮੇਂ ਲਈ ਰੋਜ਼ਾਨਾ ਬੰਦ ਹੋ ਸਕਦੀ ਹੈ। ਜੇਕਰ ਤੁਸੀਂ ਵੀ ਸਟੇਟ ਬੈਂਕ ਆਫ ਇੰਡੀਆ ਦੇ ਗਾਹਕ ਹੋ ਤਾਂ ਤੁਹਾਨੂੰ ਇਸ ਬਾਰੇ ਜ਼ਰੂਰ ਜਾਣਨਾ ਚਾਹੀਦਾ ਹੈ ਕਿਉਂਕਿ ਕਿਤੇ ਅਜਿਹਾ ਨਾ ਹੋਵੇ ਕਿ ਤੁਸੀਂ ਨੈੱਟ ਬੈਂਕਿੰਗ ਰਾਹੀ ਟ੍ਰਾਂਜੈਕਸ਼ਨ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹੋਵੋ ਅਤੇ ਉਹ ਹੋ ਨਾ ਸਕੇ। 

SBI ਨੇ ਦੱਸਿਆ ਕਿ ਉਸਦੀ ਸਰਵਿਸ ਰੋਜ਼ਾਨਾ ਵਸਵੇਰੇ 4:45 ਵਜੇ ਤੋਂ 5:45 ਵਜੇ ਦੇ ਵਿਚਕਾਰ ਕਦੇ ਵੀ ਬੰਦ ਹੋ ਸਕਦੀ ਹੈ, ਇਹ ਰੁਕਾਵਟ ਨੈੱਟ ਬੈਂਕਿੰਗ ਦੀ ਵਰਤੋਂ ਕਰਨ ਵਾਲੇ ਗਾਹਕਾਂ ਨੂੰ 3 ਤੋਂ 4 ਮਿੰਟਾਂ ਲਈ ਮਹਿਸੂਸ ਹੋ ਸਕਦੀ ਹੈ। ਇਸ ਦੇ ਨਾਲ ਹੀ SBI ਵੱਲੋਂ ਕਿਹਾ ਗਿਆ ਹੈ ਕਿ 3 ਤੋਂ 4 ਮਿੰਟਾਂ ਤੋਂ ਬਾਅਦ ਬੈਂਕਿੰਗ ਪਹਿਲਾਂ ਦੀ ਤਰ੍ਹਾਂ ਸੁਚਾਰੂ ਰੂਪ ਨਾਲ ਕੰਮ ਕਰਨਾ ਸ਼ੁਰੂ ਕਰ ਦੇਵੇਗੀ। 

SBI ਦੀ ਵੈੱਬਸਾਈਟ 'ਤੇ ਲਿਖਿਆ ਗਿਆ ਹੈ, ਪਿਆਰੇ ਗਾਹਕ, ਸਾਡੀਆਂ ਨਿਯਮਤ ਰੱਖ-ਰਖਾਅ ਗਤੀਵਿਧੀਆਂ ਦੇ ਕਾਰਨ ਹਰ ਰੋਜ਼ ਸਵੇਰੇ 4:45 ਵਜੇ ਤੋਂ 5:45 ਵਜੇ ਦੇ ਵਿਚਕਾਰ 3 ਤੋਂ 4 ਮਿੰਟ ਲਈ ਨੈੱਟ ਬੈਂਕਿੰਗ ਸੇਵਾਵਾਂ ਵਿੱਚ ਥੋੜ੍ਹਾ ਜਿਹਾ ਵਿਘਨ ਪੈ ਸਕਦਾ ਹੈ। ਇਸ ਕਾਰਨ ਹੋਈ ਅਸੁਵਿਧਾ ਲਈ ਅਸੀਂ ਮੁਆਫ਼ੀ ਚਾਹੁੰਦੇ ਹਾਂ। ਤੁਹਾਨੂੰ ਦੱਸ ਦੇਈਏ ਕਿ SBI ਵਾਂਗ, ਹੋਰ ਵੱਡੇ ਬੈਂਕ ਵੀ ਸਮੇਂ-ਸਮੇਂ 'ਤੇ ਸਿਸਟਮ ਨੂੰ ਅਪਡੇਟ ਕਰਨ ਅਤੇ ਸੁਰੱਖਿਆ ਵਧਾਉਣ ਲਈ ਤਕਨੀਕੀ ਸੁਧਾਰ ਕਰਦੇ ਹਨ। ਇਹ ਅਪਡੇਟਸ ਆਫ-ਪੀਕ ਟਾਈਮ (ਘੱਟ ਲੈਣ-ਦੇਣ ਵਾਲਾ ਸਮਾਂ) ਦੌਰਾਨ ਕੀਤੇ ਜਾਂਦੇ ਹਨ ਤਾਂ ਜੋ ਗਾਹਕਾਂ ਨੂੰ ਘੱਟੋ-ਘੱਟ ਅਸੁਵਿਧਾ ਦਾ ਸਾਹਮਣਾ ਕਰਨਾ ਪਵੇ ਅਤੇ ਸੇਵਾ ਦਿਨ ਭਰ ਆਮ ਰਹੇ।