ਸੁਨਹਿਰੀ ਜਿੱਤ ਦੀ ਮਸ਼ਾਲ: ਮੁੰਬਈ ’ਚ ਆਯੋਜਿਤ ਹੋਈ ‘ਮਿੰਨੀ ਮੈਰਾਥਨ’

ਮੁੰਬਈ— ਦੇਸ਼ ਭਰ ’ਚ 1971 ਦੀ ਭਾਰਤ-ਪਾਕਿਸਤਾਨ ਜੰਗ ਦੀ 50ਵੀਂ ਵਰ੍ਹੇਗੰਢ ’ਤੇ ਸੁਨਹਿਰੀ ਜਿੱਤ ਦੀ ਮਸ਼ਾਲ ਕੱਢੀ ਜਾ ਰਹੀ ਹੈ। ਇਸ ਨੂੰ ਹੋਰ ਯਾਦਗਾਰ ਬਣਾਉਣ ਲਈ ਦੇਸ਼ ਭਰ ਵਿਚ ਥਾਂ-ਥਾਂ ਪ੍ਰੋਗਰਾਮ ਆਯੋਜਿਤ ਕੀਤੇ ਜਾ ਰਹੇ ਹਨ। ਦੇਸ਼ ਵਿਚ ਵਿਜੇ ਮਸ਼ਾਲ ਦੇ ਨਾਲ ‘ਰਨ ਫ਼ਾਰ ਫਨ ਮਿੰਨੀ-ਮੈਰਾਥਨ’ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਸੇ ਕ੍ਰਮ ’ਚ ਮੁੰਬਈ ’ਚ ‘ਸੁਨਹਿਰੀ ਜਿੱਤ ਸਾਲ’ ਤਹਿਤ ਨਰੀਮਨ ਪੁਆਇੰਟ ਤੋਂ ਆਰ. ਸੀ. ਚਰਚ ਹੁੰਦੇ ਹੋਏ ਕੋਲਾਬਾ ਤੱਕ ‘ਰਨ ਫ਼ਾਰ ਫਨ ਮਿੰਨੀ-ਮੈਰਾਥਨ’  ਦਾ ਆਯੋਜਨ ਕੀਤਾ ਗਿਆ। 

ਇਸ ਪ੍ਰੋਗਰਾਮ ਵਿਚ ਸੈਂਕੜਿਆਂ ਦੀ ਗਿਣਤੀ ਵਿਚ ਲੋਕ ਸ਼ਾਮਲ ਹੋਏ। ਪ੍ਰੋਗਰਾਮ ਵਿਚ ਸ਼ਾਮਲ ਹੋਣ ਆਏ ਲੋਕਾਂ ਦਾ ਉੱਥੋਂ ਦੇ ਸਥਾਨਕ ਲੋਕਾਂ ਨੇ ਗਰਮਜੋਸ਼ੀ ਨਾਲ ਸਵਾਗਤ ਕੀਤਾ। ਦੱਸ ਦੇਈਏ ਕਿ ਇਹ ਸਾਲ 1971 ਦੀ ਜੰਗ ਵਿਚ ਭਾਰਤ ਦੀ ਸ਼ਾਨਦਾਰ ਜਿੱਤ ਦੀ 50ਵੀਂ ਵਰ੍ਹੇਗੰਢ ਹੈ। ਜਿਸ ਨੂੰ ਦੇਸ਼ਵਾਸੀ ਮਾਣ ਨਾਲ ਮਨਾ ਰਹੇ ਹਨ। 

ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ 1971 ਦੀ ਭਾਰਤ-ਪਾਕਿਸਤਾਨ ਜੰਗ ਦੀ 50ਵੀਂ ਵਰ੍ਹੇਗੰਢ ਦੇ ਉਤਸਵ ਨੂੰ ਮਨਾਉਣ ਲਈ ਪਿਛਲੇ ਸਾਲ 16 ਦਸੰਬਰ 2020 ਨੂੰ ਵਿਜੇ ਦਿਵਸ ’ਤੇ ਰਾਸ਼ਟਰੀ ਯੁੱਧ ਸਮਾਰਕ ’ਤੇ ‘ਸੁਨਹਿਰੀ ਜਿੱਤ ਦੀ ਮਸ਼ਾਲ’ ਜਗਾਈ ਸੀ।