ਇਟਲੀ ਦੀ PM ਮੇਲੋਨੀ ‘ਤੇ ਦਿਖੀ ਭਾਰਤ ਦੀ ਛਾਪ, G7 ‘ਚ ਆਏ ਵਿਦੇਸ਼ੀ ਮਹਿਮਾਨਾਂ ਨੂੰ ਕੀਤੀ ‘ਨਮਸਤੇ’
Thursday, Jun 13, 2024 - 06:21 PM (IST)
ਨਵੀਂ ਦਿੱਲੀ, 50ਵਾਂ ਜੀ7 ਸਿਖਰ ਸੰਮੇਲਨ ਅੱਜ 13 ਜੂਨ ਤੋਂ 15 ਜੂਨ ਤੱਕ ਇਟਲੀ ਦੇ ਅਪੁਲੀਆ ਖੇਤਰ ਦੇ ਬੋਰਗੋ ਐਗਨੇਜ਼ੀਆ ਦੇ ਰਿਜ਼ੋਰਟ ਵਿੱਚ ਆਯੋਜਿਤ ਹੋ ਰਿਹਾ ਹੈ। ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡੇਨ, ਫਰਾਂਸ ਦੇ ਰਾਸ਼ਟਰਪਤੀ ਇਮੈਨੁਅਲ ਮੈਕਰੋਨ, ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਰਿਸ਼ੀ ਸੁਨਕ, ਜਾਪਾਨ ਦੇ ਪ੍ਰਧਾਨ ਮੰਤਰੀ ਫੂਮਿਓ ਕਿਸ਼ਿਦਾ, ਕੈਨੇਡੀਅਨ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਅਤੇ ਜਰਮਨੀ ਦੇ ਚਾਂਸਲਰ ਓਲਾਫ ਸਕੋਲਜ਼ ਇਸ ਸੰਮੇਲਨ ਵਿੱਚ ਹਿੱਸਾ ਲੈਣ ਲਈ ਇਟਲੀ ਪਹੁੰਚ ਚੁੱਕੇ ਹਨ। ਇਸ ਦੌਰਾਨ ਇਟਲੀ ਦੇ ਪੀਐਮ ਮੇਲੋਨੀ 'ਤੇ ਭਾਰਤ ਦਾ ਪ੍ਰਭਾਵ ਦੇਖਣ ਨੂੰ ਮਿਲਿਆ। ਕਿਉਂਕਿ, ਉਨ੍ਹਾਂ ਨੇ ਕਾਨਫਰੰਸ ਵਿੱਚ ਸ਼ਾਮਲ ਹੋਣ ਲਈ ਆਏ ਵਿਦੇਸ਼ੀ ਮਹਿਮਾਨਾਂ ਨੂੰ ਨਮਸਤੇ ਕਹਿ ਕੇ ਸਵਾਗਤ ਕੀਤਾ।
ਦਰਅਸਲ, ਇਟਲੀ ਦੇ ਪ੍ਰਧਾਨ ਮੰਤਰੀ ਜੌਰਜੀਆ ਮੇਲੋਨੀ ਨੇ ਮਹਿਮਾਨਾਂ ਦਾ ਸਵਾਗਤ ਵੱਖਰੇ ਤਰੀਕੇ ਨਾਲ ਕੀਤਾ। ਉਨ੍ਹਾਂ ਨੇ ਜਰਮਨ ਚਾਂਸਲਰ ਓਲਾਫ ਸਕੋਲਜ਼ ਅਤੇ ਯੂਰਪੀਅਨ ਕਮਿਸ਼ਨ ਦੇ ਪ੍ਰਧਾਨ ਉਰਸੁਲਾ ਵਾਨ ਡੇਰ ਲੇਅਨ ਨੂੰ ਨਮਸਤੇ ਕਰਦਿਆਂ ਸੁਆਗਤ ਕੀਤਾ। ਉਨ੍ਹਾਂ ਦੇ ਇਸ ਅੰਦਾਜ਼ 'ਚ ਸਵਾਗਤ ਕਰਨ ਦੀਆਂ ਵੀਡੀਓਜ਼ ਵੀ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਹੀਆਂ ਹਨ ਅਤੇ ਭਾਰਤੀ ਵੀ ਮੇਲੋਨੀ ਦੀ ਕਾਫੀ ਤਾਰੀਫ ਕਰ ਰਹੇ ਹਨ।
ਜੋਅ ਬਿਡੇਨ ਅਤੇ ਰਿਸ਼ੀ ਸੁਨਕ ਦਾ ਵੀ ਨਿੱਘਾ ਸਵਾਗਤ ਕੀਤਾ ਗਿਆ। ਸਵਾਗਤ ਤੋਂ ਬਾਅਦ ਬਿਡੇਨ ਨੇ ਮੇਲੋਨੀ ਨੂੰ ਸਲੂਟ ਕੀਤਾ। ਪੀਐਮ ਮੋਦੀ ਵੀ ਅੱਜ 13 ਜੂਨ ਨੂੰ ਕਾਨਫਰੰਸ ਵਿੱਚ ਸ਼ਾਮਲ ਹੋਣਗੇ ਅਤੇ 14 ਜੂਨ ਨੂੰ ਦੇਰ ਰਾਤ ਵਾਪਸ ਪਰਤਣਗੇ। ਤੀਜੀ ਵਾਰ ਪ੍ਰਧਾਨ ਮੰਤਰੀ ਦਾ ਅਹੁਦਾ ਸੰਭਾਲਣ ਤੋਂ ਬਾਅਦ ਮੋਦੀ ਦੀ ਇਹ ਪਹਿਲੀ ਵਿਦੇਸ਼ ਯਾਤਰਾ ਹੈ। ਦਰਅਸਲ, ਭਾਰਤ ਜੀ-7 ਸੰਮੇਲਨ ਵਿੱਚ ਮਹਿਮਾਨ ਦੇਸ਼ ਦੇ ਰੂਪ ਵਿੱਚ ਹਿੱਸਾ ਲੈਂਦਾ ਹੈ। ਇਹ 11ਵੀਂ ਵਾਰ ਹੈ ਜਦੋਂ ਭਾਰਤ ਨੂੰ ਜੀ7 ਸੰਮੇਲਨ ਵਿੱਚ ਹਿੱਸਾ ਲੈਣ ਦਾ ਸੱਦਾ ਮਿਲਿਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਕਾਨਫਰੰਸ 'ਚ ਪੀਐੱਮ ਮੋਦੀ ਕਈ ਮੁੱਦਿਆਂ 'ਤੇ ਗੱਲ ਕਰਨਗੇ। ਉਹ ਜੀ-7 ਸੰਮੇਲਨ 'ਚ ਭਾਰਤ ਸਮੇਤ ਗਲੋਬਲ ਸਾਊਥ ਦੇ ਮੁੱਦੇ ਵੀ ਉਠਾਉਣਗੇ।
G7 ਕੀ ਹੈ?
G7 ਵਿੱਚ ਅਮਰੀਕਾ, ਬ੍ਰਿਟੇਨ, ਫਰਾਂਸ, ਇਟਲੀ, ਜਰਮਨੀ, ਕੈਨੇਡਾ ਅਤੇ ਜਾਪਾਨ ਸ਼ਾਮਲ ਹਨ। ਇਟਲੀ ਇਸ ਸਮੇਂ G7 (ਸੱਤ ਦੇਸ਼ਾਂ ਦੇ ਸਮੂਹ) ਦੀ ਪ੍ਰਧਾਨਗੀ ਸੰਭਾਲ ਰਿਹਾ ਹੈ ਅਤੇ ਸੰਮੇਲਨ ਦੀ ਮੇਜ਼ਬਾਨੀ ਕਰ ਰਿਹਾ ਹੈ। G-7 ਮੈਂਬਰ ਦੇਸ਼ ਇਸ ਸਮੇਂ ਗਲੋਬਲ ਜੀਡੀਪੀ ਦੇ ਲਗਭਗ 45% ਅਤੇ ਵਿਸ਼ਵ ਦੀ ਆਬਾਦੀ ਦੇ 10% ਤੋਂ ਵੱਧ ਦੀ ਪ੍ਰਤੀਨਿਧਤਾ ਕਰਦੇ ਹਨ। ਆਪਣੀ ਪਰੰਪਰਾ ਦੇ ਮੁਤਾਬਕ, ਮੇਜ਼ਬਾਨ ਦੇਸ਼ ਵਲੋਂ ਸੰਮੇਲਨ ਵਿੱਚ ਬਹੁਤ ਸਾਰੇ ਦੇਸ਼ਾਂ ਅਤੇ ਅੰਤਰਰਾਸ਼ਟਰੀ ਸੰਸਥਾਵਾਂ ਦੇ ਪ੍ਰਤੀਨਿਧਾਂ ਨੂੰ ਸੱਦਾ ਦਿੱਤਾ ਜਾਂਦਾ ਹੈ। ਇਸ ਤੋਂ ਪਹਿਲਾਂ 1997 ਅਤੇ 2013 ਦੇ ਵਿਚਕਾਰ, ਇਹ ਰੂਸ ਦੇ ਇਸ ਵਿੱਚ ਸ਼ਾਮਲ ਹੋਣ ਕਾਰਨ ਇਸ ਦਾ ਨਾਮ ਜੀ8 ਸੀ। ਹਾਲਾਂਕਿ ਕ੍ਰੀਮੀਆ 'ਤੇ ਕਬਜ਼ੇ ਤੋਂ ਬਾਅਦ 2014 'ਚ ਰੂਸ ਦੀ ਮੈਂਬਰਸ਼ਿਪ ਮੁਅੱਤਲ ਕਰ ਦਿੱਤੀ ਗਈ ਸੀ।
ਆਰਥਿਕ ਮੁੱਦਿਆਂ 'ਤੇ ਆਪਣੇ ਸ਼ੁਰੂਆਤੀ ਫੋਕਸ ਤੋਂ, G-7 ਹੌਲੀ ਹੌਲੀ ਸ਼ਾਂਤੀ ਅਤੇ ਸੁਰੱਖਿਆ, ਅੱਤਵਾਦ ਵਿਰੋਧੀ, ਵਿਕਾਸ, ਸਿੱਖਿਆ, ਸਿਹਤ, ਵਾਤਾਵਰਣ ਤਬਦੀਲੀ ਸਣੇ ਪ੍ਰਮੁੱਖ ਵਿਸ਼ਵ ਚੁਣੌਤੀਆਂ 'ਤੇ ਹੱਲ ਅਤੇ ਸਹਿਮਤੀ ਲੱਭਣ ਲਈ ਵਿਚਾਰਾਂ ਦਾ ਇੱਕ ਮੰਚ ਬਣ ਗਿਆ ਹੈ। 2003 ਤੋਂ, ਗੈਰ-ਮੈਂਬਰ ਦੇਸ਼ਾਂ (ਏਸ਼ੀਆ ਅਤੇ ਅਫਰੀਕਾ ਵਿੱਚ ਰਵਾਇਤੀ ਤੌਰ 'ਤੇ ਵਿਕਾਸਸ਼ੀਲ ਦੇਸ਼) ਨੂੰ 'ਆਊਟਰੀਚ' ਸੈਸ਼ਨਾਂ ਲਈ ਸੱਦਾ ਦਿੱਤਾ ਗਿਆ ਹੈ। G-7 ਨੇ ਸਰਕਾਰਾਂ ਅਤੇ ਵਿਧੀਆਂ ਤੋਂ ਪਰੇ ਗੈਰ-ਸਰਕਾਰੀ ਹਿੱਸੇਦਾਰਾਂ ਨਾਲ ਗੱਲਬਾਤ ਨੂੰ ਅੱਗੇ ਵਧਾਇਆ, ਜਿਸ ਨਾਲ ਵਪਾਰ, ਸਿਵਲ ਸੁਸਾਇਟੀ, ਲੇਬਰ, ਵਿਗਿਆਨ ਅਤੇ ਸਿੱਖਿਆ, ਥਿੰਕ-ਟੈਂਕ, ਔਰਤਾਂ ਦੇ ਅਧਿਕਾਰਾਂ ਅਤੇ ਨੌਜਵਾਨਾਂ ਦੇ ਸਮੂਹਾਂ ਨਾਲ ਜੁੜੇ ਮੁੱਦਿਆਂ 'ਤੇ ਕਈ ਭਾਈਚਾਰਕ ਸਾਂਝਾ ਵਾਲੇ ਸਮੂਹਾਂ ਦਾ ਨਿਰਮਾਨ ਹੋਇਆ ਹੈ। ਉਹ ਜੀ-7 ਦੇ ਪ੍ਰਧਾਨ ਦੇਸ਼ ਨੂੰ ਆਪਣੀਆਂ ਸਿਫ਼ਾਰਸ਼ਾਂ ਪ੍ਰਦਾਨ ਕਰਦੇ ਹਨ।
