ਰੱਖਿਆ ਸਹਿਯੋਗ ਵੱਲ ਭਾਰਤ ਤੇ ਅਮਰੀਕਾ ਦਾ ਇਕ ਹੋਰ ਵੱਡਾ ਕਦਮ ! 7995 ਕਰੋੜ ਦੇ ਸਮਝੌਤੇ ''ਤੇ ਕੀਤੇ ਦਸਤਖ਼ਤ

ਨਵੀਂ ਦਿੱਲੀ- ਭਾਰਤ ਤੇ ਅਮਰੀਕਾ ਦਰਮਿਆਨ ਰੱਖਿਆ ਸਹਿਯੋਗ ਨੂੰ ਹੋਰ ਡੂੰਘਾ ਕਰਨ ਵੱਲ ਇਕ ਕਦਮ ਵਧਾਉਂਦੇ ਹੋਏ ਰੱਖਿਆ ਮੰਤਰਾਲਾ ਨੇ ਭਾਰਤੀ ਸਮੁੰਦਰੀ ਫੌਜ ਦੇ ਐੱਮ. ਐੱਚ -60 ਰੋਮੀਓ ਮਲਟੀ-ਰੋਲ ਹੈਲੀਕਾਪਟਰਾਂ ਦੀ ਦੇਖਭਾਲ ਲਈ 7995 ਕਰੋੜ ਰੁਪਏ ਦੇ ਸਮਝੌਤੇ ’ਤੇ ਸ਼ੁੱਕਰਵਾਰ ਹਸਤਾਖਰ ਕੀਤੇ ਹਨ।

ਇਹ ਹਸਤਾਖਰ ਅਮਰੀਕੀ ਫੌਜੀ ਵਿਕਰੀ ਪ੍ਰੋਗਰਾਮ ਅਧੀਨ ਰੱਖਿਆ ਸਕੱਤਰ ਰਾਜੇਸ਼ ਕੁਮਾਰ ਸਿੰਘ ਦੀ ਮੌਜੂਦਗੀ ’ਚ ਕੀਤੇ ਗਏ। 5 ਸਾਲਾਂ ਦਾ ਇਹ ਸਮਝੌਤਾ ਸਪੇਅਰ ਪਾਰਟਸ ਦੀ ਸਪਲਾਈ, ਸਿਖਲਾਈ, ਤਕਨੀਕੀ ਮਦਦ ਤੇ ਜ਼ਰੂਰੀ ਹਿੱਸਿਆਂ ਦੀ ਮੁਰੰਮਤ ਨੂੰ ਕਵਰ ਕਰਦਾ ਹੈ।

ਇਸ ਤੋਂ ਇਲਾਵਾ ਭਾਰਤ ’ਚ ਵਿਚਕਾਰਲੇ ਪੱਧਰ ਦੀ ਮੁਰੰਮਤ ਤੇ ਸਮੇਂ-ਸਮੇਂ ’ਤੇ ਰੱਖ-ਰਖਾਅ ਦੇ ਨਾਲ ਹੀ ਨਿਰੀਖਣ ਸਹੂਲਤਾਂ ਵੀ ਵਿਕਸਤ ਕੀਤੀਆਂ ਜਾਣਗੀਆਂ। ਇਹ ਘਰੇਲੂ ਸਹੂਲਤਾਂ ਨਾ ਸਿਰਫ਼ ਭਾਰਤ ਦੀ ਸਮਰੱਥਾ ਨੂੰ ਵਧਾਉਣਗੀਆਂ ਸਗੋਂ ਅਮਰੀਕੀ ਸਪਲਾਈ ’ਤੇ ਇਸ ਦੀ ਨਿਰਭਰਤਾ ਨੂੰ ਵੀ ਘਟਾਉਣਗੀਆਂ।