ਦੇਸ਼ ''ਚੋਂ ਨਕਸਲਵਾਦ ਦਾ ਖਾਤਮਾ: 10 ਸਾਲਾਂ ''ਚ 10,000 ਤੋਂ ਵੱਧ ਮਾਓਵਾਦੀਆਂ ਨੇ ਕੀਤੇ ਆਤਮ-ਸਮਰਪਣ

ਨਵੀਂ ਦਿੱਲੀ- ਕੇਂਦਰੀ ਗ੍ਰਹਿ ਮੰਤਰਾਲੇ ਵੱਲੋਂ ਦੇਸ਼ 'ਚੋਂ ਨਕਸਲਵਾਦ ਨੂੰ ਪੂਰੀ ਤਰ੍ਹਾਂ ਖਤਮ ਕਰਨ ਲਈ 31 ਮਾਰਚ ਤੱਕ ਦੀ ਸਮਾਂ ਸੀਮਾ ਨਿਰਧਾਰਤ ਕੀਤੀ ਗਈ ਹੈ। ਸੁਰੱਖਿਆ ਫ਼ੋਰਸਾਂ ਦੇ ਵਧਦੇ ਦਬਾਅ ਅਤੇ ਸਰਕਾਰ ਦੀਆਂ ਮੁੜ ਵਸੇਬੇ ਦੀਆਂ ਨੀਤੀਆਂ ਸਦਕਾ ਪਿਛਲੇ ਇਕ ਦਹਾਕੇ (2014-2026) 'ਚ 10,000 ਤੋਂ ਵੱਧ ਮਾਓਵਾਦੀਆਂ ਨੇ ਆਪਣੇ ਹਥਿਆਰ ਸੁੱਟ ਦਿੱਤੇ ਹਨ ਅਤੇ ਮੁੱਖ ਧਾਰਾ 'ਚ ਸ਼ਾਮਲ ਹੋ ਗਏ ਹਨ। ਸਰਕਾਰੀ ਅੰਕੜਿਆਂ ਅਨੁਸਾਰ, ਸਾਲ 2025 'ਚ 2,300 ਮਾਓਵਾਦੀਆਂ ਨੇ ਆਤਮ-ਸਮਰਪਣ ਕੀਤਾ, ਜਦੋਂ ਕਿ 2026 ਦੇ ਪਹਿਲੇ ਤਿੰਨ ਮਹੀਨਿਆਂ 'ਚ ਹੀ 630 ਤੋਂ ਵੱਧ ਨਕਸਲੀਆਂ ਨੇ ਹਿੰਸਾ ਦਾ ਰਸਤਾ ਛੱਡ ਦਿੱਤਾ ਹੈ।

ਸਰਕਾਰ ਨੇ ਨਕਸਲਵਾਦ ਵਿਰੁੱਧ ਇਕ ਇਕਜੁੱਟ ਅਤੇ ਨਿਰਣਾਇਕ ਰਣਨੀਤੀ ਅਪਣਾਈ ਹੈ। ਇਸ ਤਹਿਤ 'ਰੈੱਡ ਕਾਰੀਡੋਰ' ਵਜੋਂ ਜਾਣੇ ਜਾਂਦੇ ਇਲਾਕਿਆਂ 'ਚ ਸੜਕਾਂ ਦਾ ਜਾਲ ਵਿਛਾਇਆ ਗਿਆ ਹੈ। ਪਿਛਲੇ 10 ਸਾਲਾਂ 'ਚ ਹੀ 12,250 ਕਿਲੋਮੀਟਰ ਸੜਕਾਂ ਦਾ ਨਿਰਮਾਣ ਮੁਕੰਮਲ ਕੀਤਾ ਗਿਆ ਹੈ। ਇਸ ਤੋਂ ਇਲਾਵਾ, ਨਕਸਲ ਪ੍ਰਭਾਵਿਤ ਇਲਾਕਿਆਂ 'ਚ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ ਪਿਛਲੇ ਇਕ ਦਹਾਕੇ 'ਚ 586 ਨਵੇਂ ਥਾਣੇ ਬਣਾਏ ਗਏ ਹਨ, ਜਦਕਿ 2014 'ਚ ਇਨ੍ਹਾਂ ਦੀ ਗਿਣਤੀ ਸਿਰਫ਼ 66 ਸੀ। ਅਪਰੇਸ਼ਨਾਂ ਨੂੰ ਤੇਜ਼ ਕਰਨ ਲਈ 361 ਨਵੇਂ ਸੁਰੱਖਿਆ ਕੈਂਪ ਅਤੇ 68 ਅਜਿਹੇ ਹੈਲੀਪੈਡ ਸਥਾਪਤ ਕੀਤੇ ਗਏ ਹਨ ਜਿੱਥੇ ਰਾਤ ਨੂੰ ਵੀ ਹੈਲੀਕਾਪਟਰ ਉਤਰ ਸਕਦੇ ਹਨ।

ਇਨ੍ਹਾਂ ਕੋਸ਼ਿਸ਼ਾਂ ਦੇ ਨਤੀਜੇ ਵਜੋਂ, ਨਕਸਲੀ ਹਿੰਸਾ ਦਾ ਦਾਇਰਾ ਕਾਫੀ ਸੁੰਗੜ ਗਿਆ ਹੈ। ਸਾਲ 2013 'ਚ ਜਿੱਥੇ ਨਕਸਲੀ ਘਟਨਾਵਾਂ 76 ਜ਼ਿਲ੍ਹਿਆਂ ਦੇ 330 ਥਾਣਿਆਂ 'ਚ ਦਰਜ ਹੁੰਦੀਆਂ ਸਨ, ਉਹ ਜੂਨ 2025 ਤੱਕ ਘੱਟ ਕੇ ਸਿਰਫ਼ 22 ਜ਼ਿਲ੍ਹਿਆਂ ਦੇ 52 ਥਾਣਿਆਂ ਤੱਕ ਸੀਮਿਤ ਰਹਿ ਗਈਆਂ ਹਨ। ਸਰਕਾਰ ਨੇ ਨਕਸਲਵਾਦ ਦੇ ਜੜ੍ਹੋਂ ਖਾਤਮੇ ਲਈ ਸਿੱਖਿਆ ਅਤੇ ਸਿਹਤ ਸਹੂਲਤਾਂ 'ਤੇ ਵੀ ਵਿਸ਼ੇਸ਼ ਧਿਆਨ ਦਿੱਤਾ ਹੈ। ਪ੍ਰਧਾਨ ਮੰਤਰੀ ਆਵਾਸ ਯੋਜਨਾ ਤਹਿਤ ਮਨਜ਼ੂਰਸ਼ੁਦਾ ਘਰਾਂ ਦੀ ਗਿਣਤੀ ਮਾਰਚ 2024 'ਚ 92,847 ਸੀ, ਜੋ ਅਕਤੂਬਰ 2025 ਤੱਕ ਵਧ ਕੇ 2,54,045 ਹੋ ਗਈ ਹੈ। ਇਨ੍ਹਾਂ ਇਲਾਕਿਆਂ 'ਚ 21.44 ਲੱਖ ਆਯੁਸ਼ਮਾਨ ਕਾਰਡ ਜਾਰੀ ਕੀਤੇ ਗਏ ਹਨ ਅਤੇ ਆਧਾਰ ਰਜਿਸਟ੍ਰੇਸ਼ਨ ਵੀ 24.85 ਲੱਖ ਤੱਕ ਪਹੁੰਚ ਗਈ ਹੈ। ਪਿਛਲੇ 10 ਸਾਲਾਂ 'ਚ 250 ਤੋਂ ਵੱਧ ਇਕਲਵਿਆ ਸਕੂਲਾਂ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ, ਜਿਨ੍ਹਾਂ 'ਚੋਂ 179 ਚਾਲੂ ਹੋ ਚੁੱਕੇ ਹਨ। ਇਸ ਦੇ ਨਾਲ ਹੀ 11 ਕੇਂਦਰੀ ਸਕੂਲ ਅਤੇ 6 ਨਵੋਦਿਆ ਸਕੂਲ ਵੀ ਖੋਲ੍ਹੇ ਗਏ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e