ਹੈਲੋ ਅਤੇ ਬਾਏ-ਬਾਏ ਸ਼ਬਦ ਬੋਲਦੀ ਹੈ ਫੀਮੇਲ ਓਰਕਾ ਵੇਲ੍ਹ

ਨਵੀਂ ਦਿੱਲੀ - ਕਈ ਜਾਨਵਰ ਇਨਸਾਨਾਂ ਵਾਂਗ ਆਵਾਜ਼ ਕੱਢਣ 'ਚ ਮਾਹਿਰ ਮੰਨੇ ਜਾਂਦੇ ਹਨ ਪਰ ਸ਼ਾਇਦ ਪਹਿਲੀ ਵਾਰ ਕਿਸੇ ਕਿਲਰ ਵੇਲ੍ਹ ਨੂੰ ਇਨਸਾਨੀ ਆਵਾਜ਼ ਕੱਢਦੇ ਹੋਏ ਦੇਖਿਆ ਗਿਆ ਹੈ। ਫਰਾਂਸ 'ਚ ਇਕ ਕਿਲਰ ਵੇਲ੍ਹ ਦਾ ਪਤਾ ਲੱਗਾ ਹੈ, ਜੋ ਇਨਸਾਨੀ ਭਾਸ਼ਾ ਵਿਚ ਬੋਲ ਸਕਦੀ ਹੈ। ਇਸ ਫੀਮੇਲ ਓਰਕਾ ਵੇਲ੍ਹ ਨੂੰ ਕੌਮਾਂਤਰੀ ਖੋਜਕਾਰਾਂ ਦੀ ਇਕ ਟੀਮ ਨੇ ਇਨਸਾਨੀ ਭਾਸ਼ਾ ਦੇ ਕੁਝ ਸ਼ਬਦ ਸਿਖਾਏ ਹਨ। ਮੀਡੀਆ ਰਿਪੋਰਟਸ ਵਿਚ ਇਸ ਦੀ ਉਮਰ 16 ਸਾਲ ਦੱਸੀ ਜਾ ਰਹੀ ਹੈ।
ਇਸ ਫੀਮੇਲ ਵੇਲ੍ਹ ਦਾ ਨਾਂ ਵਿਕੀ ਹੈ, ਜੋ ਅੰਗਰੇਜ਼ੀ ਦੇ ਕੁਝ ਸ਼ਬਦਾਂ ਨੂੰ ਬੋਲ ਸਕਦੀ ਹੈ। ਇਹ ਹੈਲੋ, ਬਾਏ-ਬਾਏ, ਵਨ-ਟੂ ਅਤੇ ਐਮੀ ਵਰਗੇ ਸ਼ਬਦਾਂ ਨੂੰ ਬੋਲ ਲੈਂਦੀ ਹੈ। ਇਸ ਦੇ ਲਈ ਇਨ੍ਹਾਂ ਖੋਜਕਾਰਾਂ ਨੇ ਹਾਲ ਹੀ ਵਿਚ ਉਸ ਨੂੰ ਟ੍ਰੇਨਿੰਗ ਦਿੱਤੀ। ਮੀਡੀਆ ਰਿਪੋਰਟਸ ਮੁਤਾਬਕ ਇਹ ਵੇਲ੍ਹ ਆਵਾਜ਼ ਕੱਢਣ ਲਈ ਆਪਣੇ ਬਲੋਹੋਲ ਦਾ ਸਹਾਰਾ ਲੈਂਦੀ ਹੈ। ਆਵਾਜ਼ ਕੱਢਣ ਸਮੇਂ ਇਸ ਵੇਲ੍ਹ ਦੇ ਸਰੀਰ ਦਾ ਪੂਰਾ ਹਿੱਸਾ ਪਾਣੀ ਵਿਚ ਹੁੰਦਾ ਹੈ। ਬਸ ਉਸ ਦੇ ਸਾਹ ਲੈਣ ਵਾਲਾ ਹਿੱਸਾ ਪਾਣੀ ਤੋਂ ਬਾਹਰ ਹੁੰਦਾ ਹੈ। ਸਾਹ ਲੈਣ ਵਾਲੇ ਹਿੱਸੇ ਨੂੰ ਹੀ ਬਲੋਹੋਲ ਕਿਹਾ ਜਾਂਦਾ ਹੈ।