''ਕਾਕਰੋਚ ਜਨਤਾ ਪਾਰਟੀ''! ਸਿਸਟਮ ਤੋਂ ਪਰੇਸ਼ਾਨ ਨੌਜਵਾਨਾਂ ਨੇ ਸ਼ੁਰੂ ਕੀਤੀ ਵਿਅੰਗਮਈ ਮੁਹਿੰਮ, ਜਾਣੋ ਕੀ ਹੈ ਪੂਰਾ ਮਾਮਲਾ

ਨੈਸ਼ਨਲ ਡੈਸਕ : ਭਾਰਤੀ ਸੋਸ਼ਲ ਮੀਡੀਆ 'ਤੇ ਅੱਜਕੱਲ੍ਹ ਇੱਕ ਨਵੀਂ ਸਿਆਸੀ ਪਾਰਟੀ 'ਕਾਕਰੋਚ ਜਨਤਾ ਪਾਰਟੀ' (CJP) ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ। ਇਹ ਕੋਈ ਰਵਾਇਤੀ ਪਾਰਟੀ ਨਹੀਂ, ਸਗੋਂ ਇੱਕ ਵਿਅੰਗਮਈ (Satirical) ਆਨਲਾਈਨ ਗਰੁੱਪ ਹੈ, ਜੋ ਸਿਸਟਮ ਅਤੇ ਬੇਰੁਜ਼ਗਾਰੀ ਤੋਂ ਪਰੇਸ਼ਾਨ ਨੌਜਵਾਨਾਂ ਦੀ ਆਵਾਜ਼ ਬਣ ਕੇ ਉਭਰਿਆ ਹੈ। ਜਾਣਕਾਰੀ ਅਨੁਸਾਰ, ਇਸ ਦੇ ਲਾਂਚ ਹੋਣ ਦੇ ਕੁਝ ਹੀ ਦਿਨਾਂ ਵਿੱਚ 1 ਲੱਖ ਤੋਂ ਵੱਧ ਮੈਂਬਰ ਬਣ ਗਏ ਹਨ।

ਕੌਣ ਹੈ ਇਸ ਦਾ ਸੰਸਥਾਪਕ?
ਇਸ ਅਨੋਖੀ ਪਾਰਟੀ ਦੀ ਸ਼ੁਰੂਆਤ 30 ਸਾਲਾ ਅਭਿਜੀਤ ਦਿਪਕੇ ਨੇ ਕੀਤੀ ਹੈ, ਜੋ ਪਹਿਲਾਂ ਆਮ ਆਦਮੀ ਪਾਰਟੀ ਦੀ ਸੋਸ਼ਲ ਮੀਡੀਆ ਟੀਮ ਨਾਲ ਜੁੜੇ ਰਹੇ ਹਨ। ਦਿਪਕੇ ਫਿਲਹਾਲ ਅਮਰੀਕਾ ਦੀ ਬੋਸਟਨ ਯੂਨੀਵਰਸਿਟੀ ਤੋਂ ਪਬਲਿਕ ਰਿਲੇਸ਼ਨਜ਼ ਦੀ ਪੜ੍ਹਾਈ ਕਰ ਰਹੇ ਹਨ। ਉਨ੍ਹਾਂ ਨੇ 16 ਮਈ ਨੂੰ ਸੋਸ਼ਲ ਮੀਡੀਆ 'ਤੇ ਇੱਕ ਫਾਰਮ ਜਾਰੀ ਕਰਕੇ ਲੋਕਾਂ ਨੂੰ ਇਸ ਨਾਲ ਜੁੜਨ ਦਾ ਸੱਦਾ ਦਿੱਤਾ ਸੀ।

ਕਿਉਂ ਰੱਖਿਆ ਗਿਆ 'ਕਾਕਰੋਚ' ਨਾਂ?
ਇਹ ਨਾਂ ਚੀਫ਼ ਜਸਟਿਸ ਸੁਰਿਆ ਕਾਂਤ ਨਾਲ ਜੁੜੇ ਇੱਕ ਵਿਵਾਦਿਤ ਮਾਮਲੇ ਤੋਂ ਬਾਅਦ ਚੁਣਿਆ ਗਿਆ ਹੈ, ਜਿੱਥੇ ਕਥਿਤ ਤੌਰ 'ਤੇ ਬੇਰੁਜ਼ਗਾਰ ਨੌਜਵਾਨਾਂ ਦੀ ਤੁਲਨਾ 'ਕਾਕਰੋਚ' ਨਾਲ ਕੀਤੀ ਗਈ ਸੀ। ਅਭਿਜੀਤ ਦਿਪਕੇ ਅਨੁਸਾਰ, ਕਾਕਰੋਚ ਗੰਦਗੀ ਅਤੇ ਸੜਨ ਵਿੱਚ ਹੀ ਪੈਦਾ ਹੁੰਦੇ ਹਨ, ਜਿਸ ਦਾ ਮਤਲਬ ਹੈ ਕਿ ਦੇਸ਼ ਦਾ ਸਿਸਟਮ ਇੰਨਾ ਖਰਾਬ ਹੋ ਚੁੱਕਾ ਹੈ ਕਿ ਹੁਣ ਨੌਜਵਾਨਾਂ ਨੂੰ ਕਾਕਰੋਚ ਬਣ ਕੇ ਹੀ ਬਾਹਰ ਆਉਣਾ ਪਿਆ।

ਕੀ ਹਨ ਪਾਰਟੀ ਦੀਆਂ ਮੁੱਖ ਮੰਗਾਂ?
ਭਾਵੇਂ ਇਹ ਇੱਕ ਵਿਅੰਗਮਈ ਗਰੁੱਪ ਹੈ, ਪਰ ਇਸ ਦਾ ਮਨੋਰਥ ਪੱਤਰ (Manifesto) ਕਾਫੀ ਗੰਭੀਰ ਮੁੱਦਿਆਂ 'ਤੇ ਕੇਂਦਰਿਤ ਹੈ:
ਕੈਬਨਿਟ ਅਹੁਦਿਆਂ ਵਿੱਚ ਔਰਤਾਂ ਲਈ 50 ਫੀਸਦੀ ਰਾਖਵਾਂਕਰਨ।
ਪਾਰਟੀ ਬਦਲਣ ਵਾਲੇ ਵਿਧਾਇਕਾਂ ਅਤੇ ਸੰਸਦ ਮੈਂਬਰਾਂ 'ਤੇ 20 ਸਾਲ ਦੀ ਚੋਣ ਪਾਬੰਦੀ।
ਚੀਫ਼ ਜਸਟਿਸਾਂ ਲਈ ਸੇਵਾਮੁਕਤੀ ਤੋਂ ਬਾਅਦ ਰਾਜ ਸਭਾ ਸੀਟਾਂ 'ਤੇ ਰੋਕ।
NEET ਵਰਗੇ ਪ੍ਰੀਖਿਆ ਵਿਵਾਦਾਂ ਦੀ ਜਾਂਚ ਅਤੇ ਬੇਰੁਜ਼ਗਾਰੀ ਵਿਰੁੱਧ ਆਵਾਜ਼ ਬੁਲੰਦ ਕਰਨਾ।

ਦਿੱਗਜ ਨੇਤਾਵਾਂ ਨੇ ਵੀ ਦਿਖਾਈ ਦਿਲਚਸਪੀ
ਇਸ ਵਾਇਰਲ ਟ੍ਰੈਂਡ ਵਿੱਚ ਤ੍ਰਿਣਮੂਲ ਕਾਂਗਰਸ (TMC) ਦੀ ਸਾਂਸਦ ਮਹੂਆ ਮੋਇਤਰਾ ਅਤੇ ਕੀਰਤੀ ਆਜ਼ਾਦ ਵਰਗੇ ਨੇਤਾਵਾਂ ਨੇ ਵੀ ਦਿਲਚਸਪੀ ਦਿਖਾਈ ਹੈ। ਜਦੋਂ ਕੀਰਤੀ ਆਜ਼ਾਦ ਨੇ ਇਸ ਵਿੱਚ ਸ਼ਾਮਲ ਹੋਣ ਦੀ ਇੱਛਾ ਜਤਾਈ, ਤਾਂ ਪਾਰਟੀ ਨੇ ਮਜ਼ਾਕ ਵਿੱਚ ਜਵਾਬ ਦਿੱਤਾ ਕਿ 1983 ਦਾ ਵਿਸ਼ਵ ਕੱਪ ਜਿੱਤਣਾ ਇਸ ਲਈ ਕਾਫੀ ਯੋਗਤਾ ਹੈ। ਪਾਰਟੀ ਦੀ ਵੈੱਬਸਾਈਟ ਖੁਦ ਨੂੰ 'ਆਲਸੀਆਂ ਅਤੇ ਬੇਰੁਜ਼ਗਾਰਾਂ ਦੀ ਆਵਾਜ਼' ਦੱਸਦੀ ਹੈ।