ਕਾਕਰੋਚ ਜਨਤਾ ਪਾਰਟੀ ਵੱਲੋਂ ਨਵੀਂ ਰਾਸ਼ਟਰੀ ਕਾਰਜਕਾਰਨੀ ਦਾ ਐਲਾਨ, ਅਭਿਜੀਤ ਦੀਪਕੇ ਬਣੇ ਨੈਸ਼ਨਲ ਕਨਵੀਨਰ

ਨੈਸ਼ਨਲ ਡੈਸਕ : ਕਾਕਰੋਚ ਜਨਤਾ ਪਾਰਟੀ (CJP) ਨੇ ਆਪਣੀ ਨਵੀਂ ਰਾਸ਼ਟਰੀ ਕਾਰਜਕਾਰਨੀ ਦਾ ਐਲਾਨ ਕਰ ਦਿੱਤਾ ਹੈ। 6 ਅਗਸਤ 2026 ਨੂੰ ਛਤਰਪਤੀ ਸੰਭਾਜੀਨਗਰ ਤੋਂ ਜਾਰੀ ਕੀਤੀ ਗਈ ਸੂਚੀ ਮੁਤਾਬਕ, ਪਾਰਟੀ ਦੇ ਸੰਸਥਾਪਕ ਅਭਿਜੀਤ ਦੀਪਕੇ ਨੂੰ ਨੈਸ਼ਨਲ ਕਨਵੀਨਰ (ਰਾਸ਼ਟਰੀ ਸੰਯੋਜਕ) ਦੀ ਜ਼ਿੰਮੇਵਾਰੀ ਸੌਂਪੀ ਗਈ ਹੈ, ਜਦਕਿ ਆਸ਼ੂਤੋਸ਼ ਰਾਂਕਾ ਅਤੇ ਸੌਰਵ ਦਾਸ ਨੂੰ ਕੋ-ਕਨਵੀਨਰ ਬਣਾਇਆ ਗਿਆ ਹੈ।

ਪਾਰਟੀ ਵੱਲੋਂ ਰਾਸ਼ਟਰੀ ਪੱਧਰ ਦੇ ਪ੍ਰਮੁੱਖ ਅਹੁਦਿਆਂ ਲਈ ਨਾਮ ਘੋਸ਼ਿਤ ਕੀਤੇ ਗਏ ਹਨ:

•  ਅਜਿੰਕਿਆ ਸ਼ਿੰਦੇ: ਰਾਸ਼ਟਰੀ ਸੰਗਠਨ ਇੰਚਾਰਜ
•  ਦੀਪਕ ਬਾਲਿਆਨ: ਸੰਗਠਨ ਸਹਿ-ਇੰਚਾਰਜ
•  ਆਫ਼ਰੀਨ ਨਵਾਜ਼: ਰਾਸ਼ਟਰੀ ਸਕੱਤਰ
•  ਵਿਜੇ ਰੈੱਡੀ ਮੱਲਾਂਗੀ: ਮੀਡੀਆ ਲੀਡ
•  ਰਤਨਾ ਸਿੰਘ: ਕਾਨੂੰਨੀ ਮਾਮਲਿਆਂ ਦੀ ਲੀਡ
•  ਵੈਸ਼ਨਵੀ ਗੌਰ: ਰਿਸਰਚ ਅਤੇ ਪਾਲਿਸੀ ਲੀਡ
•  ਰੋਹਨ ਦੇਸ਼ਪਾਂਡੇ: ਟੈਕਨਾਲੋਜੀ ਲੀਡ
•  ਯੋਗੇਸ਼ ਇੰਗਲੇ: ਫਾਈਨਾਂਸ ਲੀਡ

ਨਵੀਂ ਕਾਰਜਕਾਰਨੀ ਵਿੱਚ ਵੱਖ-ਵੱਖ ਸਮਾਜਿਕ ਅਤੇ ਜਾਤੀ ਭਾਈਚਾਰਿਆਂ ਦੇ ਚਿਹਰਿਆਂ ਨੂੰ ਸ਼ਾਮਲ ਕੀਤਾ ਗਿਆ ਹੈ। ਹਾਲਾਂਕਿ, ਜਾਤੀ ਨਾਲ ਸਬੰਧਤ ਇਹ ਵੇਰਵਾ ਪਾਰਟੀ ਦੀ ਅਧਿਕਾਰਤ ਸੂਚੀ ਵਿੱਚ ਦਰਜ ਨਹੀਂ ਹੈ, ਪਰ ਜਨਤਕ ਪ੍ਰੋਫ਼ਾਈਲਾਂ ਦੇ ਅਧਾਰ 'ਤੇ ਚਰਚਾ ਹੈ ਕਿ ਇਸ ਟੀਮ ਵਿੱਚ ਬ੍ਰਾਹਮਣ ਭਾਈਚਾਰੇ ਦੇ ਮੈਂਬਰਾਂ ਦੀ ਗਿਣਤੀ ਸਭ ਤੋਂ ਵੱਧ (ਤਿੰਨ) ਹੈ।

ਵੇਰਵਿਆਂ ਮੁਤਾਬਕ, ਅਭਿਜੀਤ ਦੀਪਕੇ ਦਲਿਤ ਭਾਈਚਾਰੇ ਨਾਲ, ਅੰਕਿਤ ਭਾਰਦਵਾਜ, ਰੋਹਨ ਦੇਸ਼ਪਾਂਡੇ ਅਤੇ ਵੈਸ਼ਨਵੀ ਗੌਰ ਬ੍ਰਾਹਮਣ ਭਾਈਚਾਰੇ ਨਾਲ, ਵਿਜੇ ਰੈੱਡੀ ਮੱਲਾਂਗੀ ਰੈੱਡੀ ਭਾਈਚਾਰੇ ਨਾਲ, ਦੀਪਕ ਬਾਲਿਆਨ ਜਾਟ ਭਾਈਚਾਰੇ ਨਾਲ, ਰਤਨਾ ਸਿੰਘ ਠਾਕੁਰ ਭਾਈਚਾਰੇ ਨਾਲ, ਆਫ਼ਰੀਨ ਨਵਾਜ਼ ਮੁਸਲਿਮ ਭਾਈਚਾਰੇ ਨਾਲ ਅਤੇ ਅਜਿੰਕਿਆ ਸ਼ਿੰਦੇ ਮਰਾਠਾ ਭਾਈਚਾਰੇ ਨਾਲ ਸਬੰਧਤ ਦੱਸੇ ਗਏ ਹਨ।

ਦੇਸ਼ ਭਰ ਵਿੱਚ ਪਾਰਟੀ ਦਾ ਵਿਸਤਾਰ ਕਰਨ ਲਈ ਦੇਸ਼ ਨੂੰ ਚਾਰ ਜ਼ੋਨਾਂ ਵਿੱਚ ਵੰਡਿਆ ਗਿਆ ਹੈ:
1. ਉੱਤਰੀ ਜ਼ੋਨ: ਦੀਪਕ ਬਾਲਿਆਨ
2. ਦੱਖਣੀ ਜ਼ੋਨ: ਵਿਜੇ ਰੈੱਡੀ ਮੱਲਾਂਗੀ
3. ਪੂਰਬੀ ਅਤੇ ਉੱਤਰ-ਪੂਰਬੀ ਜ਼ੋਨ: ਅੰਕਿਤ ਭਾਰਦਵਾਜ
4. ਪੱਛਮੀ ਜ਼ੋਨ: ਯੋਗੇਸ਼ ਇੰਗਲੇ

ਪਾਰਟੀ ਦੀ ਯੋਜਨਾ ਅਗਲੇ ਛੇ ਮਹੀਨਿਆਂ ਵਿੱਚ ਰਾਜ ਪੱਧਰ 'ਤੇ ਕੋਆਰਡੀਨੇਸ਼ਨ ਕਮੇਟੀਆਂ ਬਣਾਉਣ ਅਤੇ ਲੋਕ ਸਭਾ ਤੇ ਸ਼ਹਿਰ ਪੱਧਰ 'ਤੇ ਸੰਗਠਨ ਦੀਆਂ ਇਕਾਈਆਂ ਖੜ੍ਹੀਆਂ ਕਰਨ ਦੀ ਹੈ।

CJP ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਤੁਰੰਤ ਚੋਣ ਰਾਜਨੀਤੀ ਵਿੱਚ ਉਤਰਨ ਦੀ ਬਜਾਏ ਰਾਸ਼ਟਰੀ ਪੱਧਰ 'ਤੇ ਇੱਕ ਜਨਤਕ ਦਬਾਅ ਸਮੂਹ ਵਜੋਂ ਕੰਮ ਕਰਨਾ ਚਾਹੁੰਦੀ ਹੈ। ਨੌਜਵਾਨਾਂ, ਵਿਦਿਆਰਥੀਆਂ ਅਤੇ ਆਮ ਲੋਕਾਂ ਨੂੰ ਆਪਣੇ ਨਾਲ ਜੋੜਨ ਲਈ ਪਾਰਟੀ ਵੱਲੋਂ 'ਕਿਆ ਬੋਲਤੀ ਪਬਲਿਕ' ਨਾਮਕ ਇੱਕ ਰਾਸ਼ਟਰੀ ਮੈਂਬਰਸ਼ਿਪ ਮੁਹਿੰਮ ਵੀ ਸ਼ੁਰੂ ਕੀਤੀ ਗਈ ਹੈ।