ਏਅਰਬਸ C295 ਪਲਾਂਟ ''ਨਿਊ ਇੰਡੀਆ'' ਦਾ ਉਦਾਹਰਣ : PM ਮੋਦੀ

ਨਵੀਂ ਦਿੱਲੀ- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਉਨ੍ਹਾਂ ਦੇ ਸਪੇਨਿਸ਼ ਹਮਰੁਤਬਾ ਪੇਡਰੋ ਸਾਂਚੇਜ ਨੇ ਗੁਜਰਾਤ ਦੇ ਵਡੋਦਰਾ 'ਚ ਟਾਟਾ ਏਅਰਕ੍ਰਾਫਟ ਕੰਪਲੈਕਸ ਦਾ ਸੰਯੁਕਤ ਰੂਪ ਨਾਲ ਉਦਘਾਟਨ ਕੀਤਾ। ਸਾਂਚੇਜ ਦੀ ਇਹ ਯਾਤਰਾ 18 ਸਾਲਾਂ 'ਚ ਕਿਸੇ ਸਪੇਨਿਸ਼ ਨੇਤਾ ਦੀ ਪਹਿਲੀ ਯਾਤਰਾ ਹੈ। ਪ੍ਰਧਾਨ ਮੰਤਰੀ ਮੋਦੀ ਦੇ ਨਵੇਂ ਏਅਰਬਸ C295 ਪਲਾਂਟ ਨੂੰ 'ਨਿਊ ਇੰਡੀਆ' ਦਾ ਉਦਾਹਰਣ ਦੱਸਿਆ। ਸਾਂਚੇਜ ਨੇ ਟਾਟਾ ਐਡਵਾਂਸਡ ਸਿਸਟਮ ਲਿਮਟਿਡ (TASL) ਨੂੰ ਤਕਨਾਲੋਜੀ ਦਾ ਪੂਰਾ ਬਦਲਾਅ ਕਰਨ ਦਾ ਭਰੋਸਾ ਦਿੱਤਾ, ਜੋ 2026 ਅਤੇ 2031 ਦਰਮਿਆਨ 40 ਜਹਾਜ਼ ਬਣਾਏਗੀ।  ਦੱਸ ਦੇਈਏ ਕਿ C295 ਪਹਿਲਾਂ ਤੋਂ ਹੀ ਭਾਰਤੀ ਹਵਾਈ ਫ਼ੌਜ (IAF) ਦੀ ਸਮਰੱਥਾ ਨੂੰ ਮਜ਼ਬੂਤ ਕਰ ਰਿਹਾ ਹੈ। ਰੱਖਿਆ ਅਤੇ ਏਅਰੋਸਪੇਸ ਖੇਤਰ ਆਉਣ ਵਾਲੇ ਸਾਲਾਂ 'ਚ ਭਾਰਤ ਨੂੰ ਆਤਮਨਿਰਭਰ ਬਣਾਉਣ ਲਈ ਦੋ ਮਹੱਤਵਪੂਰਨ ਥੰਮ ਹਨ। 

PM ਮੋਦੀ ਦੇ ਉਤਸ਼ਾਹਪੂਰਵਕ ਸ਼ਬਦ
C295 ਜਹਾਜ਼ਾਂ ਦੇ ਨਿਰਮਾਣ ਲਈ ਕੰਪਲੈਕਸ ਦੇ ਉਦਘਾਟਨ ਦੌਰਾਨ ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਇਹ ਨਾ ਸਿਰਫ਼ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ਨੂੰ ਮਜ਼ਬੂਤ ​​ਕਰੇਗਾ ਸਗੋਂ 'ਮੇਕ ਇਨ ਇੰਡੀਆ, ਮੇਕ ਫਾਰ ਦਿ ਵਰਲਡ' ਦੇ ਮਿਸ਼ਨ ਨੂੰ ਵੀ ਰਫ਼ਤਾਰ ਦੇਵੇਗਾ, ਕਿਉਂਕਿ ਉਹ ਇਕ ਦਿਨ ਨਿਰਯਾਤ ਕੀਤਾ ਜਾਵੇ। ਅਕਤੂਬਰ 2022 ਵਿਚ ਫੈਕਟਰੀ ਦੇ ਨੀਂਹ ਪੱਥਰ ਨੂੰ ਯਾਦ ਕਰਦੇ ਹੋਏ ਦੇਸ਼ ਵਿਚ ਕਿਸੇ ਵੀ ਪ੍ਰਾਜੈਕਟ ਨੂੰ ਲਾਗੂ ਕਰਨ ਲਈ ਵਿਚਾਰ ਤੋਂ ਲੈ ਕੇ ਭਾਰਤ ਦੀ ਰਫ਼ਤਾਰ ਨੂੰ ਇੱਥੇ ਦੇਖਿਆ ਜਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਦਾ ਰੱਖਿਆ ਨਿਰਮਾਣ ਈਕੋਸਿਸਟਮ ਅੱਜ ਨਵੀਆਂ ਸਿਖਰਾਂ ਨੂੰ ਛੂਹ ਰਿਹਾ ਹੈ।

ਰੱਖਿਆ ਖੇਤਰ ਵਿਚ ਭਾਰਤ ਦਾ ਬਦਲਾਅ ਇਸ ਗੱਲ ਦੀ ਉਦਾਹਰਨ ਦਿੰਦਾ ਹੈ ਕਿ ਕਿਵੇਂ ਇਕ ਸਹੀ ਯੋਜਨਾ ਅਤੇ ਭਾਈਵਾਲੀ ਸੰਭਾਵਨਾਵਾਂ ਨੂੰ ਖੁਸ਼ਹਾਲੀ 'ਚ ਬਦਲ ਸਕਦੀ ਹੈ। ਅਸੀਂ ਰੱਖਿਆ ਨਿਰਮਾਣ 'ਚ ਨਿੱਜੀ ਖੇਤਰ ਦੀ ਭਾਗੀਦਾਰੀ ਦਾ ਵਿਸਥਾਰ ਕੀਤਾ, ਜਨਤਕ ਖੇਤਰ ਦੀਆਂ ਇਕਾਈਆਂ ਨੂੰ ਵਧੇਰੇ ਕੁਸ਼ਲ ਬਣਾਇਆ, ਸੱਤ ਵੱਡੀਆਂ ਕੰਪਨੀਆਂ 'ਚ ਆਰਡੀਨੈਂਸ ਫੈਕਟਰੀਆਂ ਦਾ ਪੁਨਰਗਠਨ ਕੀਤਾ। 

ਪ੍ਰਧਾਨ ਮੰਤਰੀ ਨੇ ਹੁਨਰ ਅਤੇ ਰੁਜ਼ਗਾਰ ਸਿਰਜਣ 'ਤੇ ਜ਼ੋਰ ਦਿੱਤਾ ਅਤੇ ਕਿਹਾ ਕਿ ਏਅਰਬੱਸ-ਟਾਟਾ ਫੈਕਟਰੀ ਵਰਗੇ ਪ੍ਰਾਜੈਕਟ ਹਜ਼ਾਰਾਂ ਨੌਕਰੀਆਂ ਪੈਦਾ ਕਰਨਗੇ। ਉਨ੍ਹਾਂ ਕਿਹਾ ਕਿ ਇਹ ਫੈਕਟਰੀ 18,000 ਜਹਾਜ਼ਾਂ ਦੇ ਪੁਰਜ਼ਿਆਂ ਦੇ ਸਵਦੇਸ਼ੀ ਨਿਰਮਾਣ ਦਾ ਸਮਰਥਨ ਕਰੇਗੀ।  ਭਾਰਤ ਅੱਜ ਵੀ ਦੁਨੀਆ ਦੀਆਂ ਪ੍ਰਮੁੱਖ ਏਅਰਕ੍ਰਾਫਟ ਕੰਪਨੀਆਂ ਲਈ ਪਾਰਟਸ ਦੇ ਸਭ ਤੋਂ ਵੱਡੇ ਸਪਲਾਇਰਾਂ ਵਿਚੋਂ ਇਕ ਹੈ। ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ ਕਿ ਨਵੀਂ ਏਅਰਕ੍ਰਾਫਟ ਫੈਕਟਰੀ ਭਾਰਤ ਵਿਚ ਨਵੇਂ ਹੁਨਰ ਅਤੇ ਨਵੇਂ ਉਦਯੋਗਾਂ ਨੂੰ ਵੱਡਾ ਹੁਲਾਰਾ ਦੇਵੇਗੀ।