‘ਬਸਪਾ’ ਵਲੋਂ ਉੱਤਰ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ ਲਈ ਉਮੀਦਵਾਰਾਂ ਦੀ ਪਹਿਲੀ ਸੂਚੀ ਜਾਰੀ

ਲਖਨਊ– ਬਹੁਜਨ ਸਮਾਜ ਪਾਰਟੀ (ਬਸਪਾ) ਮੁਖੀ ਮਾਇਆਵਤੀ ਨੇ ਸ਼ਨੀਵਾਰ ਨੂੰ ਆਪਣੇ ਜਨਮਦਿਨ ਮੌਕੇ ਉੱਤਰ ਪ੍ਰਦੇਸ਼ ਵਿਧਾਨ ਸਭਾ ਚੋਣਾਂ ਦੇ ਪਹਿਲੇ ਪੜਾਅ ਦੀਆਂ 58 ਸੀਟਾਂ ’ਚੋਂ 53 ਸੀਟਾਂ ਲਈ ਉਮੀਦਵਾਰਾਂ ਦਾ ਐਲਾਨ ਕਰ ਦਿੱਤਾ ਹੈ। ਮਾਇਆਵਤੀ ਨੇ ਪ੍ਰੈੱਸ ਕਾਨਫਰੰਸ ’ਚ ਆਉਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ’ਚ ਜਿੱਤ ਦਾ ਦਾਅਵਾ ਕਰਦੇ ਹੋਏ ਕਿਹਾ ਕਿ ਸੂਬੇ ’ਚ ਪਹਿਲੇ ਪੜਾਅ ਦੀਆਂ 5 ਬਚੀਆਂ ਹੋਈਆਂ ਸੀਟਾਂ ’ਤੇ ਉਮੀਦਵਾਰਾਂ ਦੇ ਨਾਮਾਂ ਦਾ ਐਲਾਨ ਜਲਦ ਕਰ ਦਿੱਤਾ ਜਾਵੇਗਾ। 

ਬਸਪਾ ਦਫਤਰ ਦੁਆਰਾ ਜਾਰੀ ਪਹਿਲੀ ਸੂਚੀ ’ਚ ਨੋਇਡਾ ਤੋਂ ਕਿਰਪਾ ਰਾਮ ਸ਼ਰਮਾ, ਦਾਦਰੀ ਤੋਂ ਮਨਵੀਰ ਸਿੰਘ ਭਾਟੀ ਅਤੇ ਜੇਵਰ ਤੋਂ ਨਰਿੰਦਰ ਭਾਟੀ ‘ਦਾਦਾ’ ਦਾ ਨਾਮ ਸ਼ਾਮਲ ਹੈ। ਗੌਤਮਬੁੱਧ ਨਗਰ ਜ਼ਿਲ੍ਹੇ ’ਚ ਦਾਦਰੀ ਬਸਪਾ ਸੁਪਰੀਮੋ ਮਾਇਆਵਤੀ ਦਾ ਗ੍ਰਹਿ ਖੇਤਰ ਵੀ ਹੈ। ਬਸਪਾ ਦੀ ਸੂਚੀ ਮੁਤਾਬਕ, ਸ਼ਾਮਲੀ ਦੀ ਕੈਰਾਨਾ ਸੀਟ ਤੋਂ ਰਾਜਿੰਦਰ ਸਿੰਘ ਉਪਾਧਿਆਏ, ਸ਼ਾਮਲੀ ਸੀਟ ਤੋਂ ਬ੍ਰਿਜੇਂਦਰ ਮਲਿਕ, ਮੁਜ਼ੱਫਰਨਗਰ ਤੋਂ ਪੁਸ਼ਪਾਕੰਰ ਪਾਲ, ਸਰਧਾਨ ਤੋਂ ਸੰਜੀਵ ਕੁਮਾਰ ਧਾਮਾਕ, ਮੇਰਠ ਕੈਂਟ ਤੋਂ ਅਮਿਤ ਸ਼ਰਮਾ ਅਤੇ ਮੇਰਠ ਦੱਖਣ ਤੋਂ ਕੁਵੰਰ ਦਿਲਸ਼ਾਨ ਅਲੀ, ਮੁਰਾਦਨਗਰ ਤੋਂ ਅਇਯੂਬ ਇਦਰੀਸ਼ੀ, ਗਾਜ਼ੀਆਬਾਦ ਤੋਂ ਸੁਰੇਸ਼ ਬੰਸਲ ਅਤੇ ਮੋਦੀਨਗਰ ਤੋਂ ਪੂਨਮ ਗਰਗ ਉਮੀਦਵਾਰ ਹੋਣਗੇ। 

ਬਸਪਾ 15 ਜਨਵਰੀ ਨੂੰ ਮਾਇਆਵਤੀ ਦੇ ਜਨਮਦਿਨ ਨੂੰ ‘ਜਨਕਲਿਆਣਕਾਰੀ ਦਿਵਸ’ ਦੇ ਰੂਪ ’ਚ ਮਨਾਉਂਦੀ ਹੈ। ਉੱਤਰ ਪ੍ਰਦੇਸ਼ ’ਚ ਪਹਿਲੇ ਪੜਾਅ ਦੀਆਂ ਵਿਧਾਨ ਸਭਾ ਚੋਣਾਂ ਦੀ ਵੋਟਿੰਗ 10 ਫਰਵਰੀ ਨੂੰ ਹੈ। ਚੋਣ ਨਤੀਜਿਆਂ ਦਾ ਐਲਾਨ 10 ਮਾਰਚ ਨੂੰ ਹੋਵੇਗਾ।