ਭਾਜਪਾ ਨੂੰ ਪੰਜਾਬ ’ਚ ਇਕ ਚਿਹਰੇ ਦੀ ਭਾਲ

ਜਿਵੇਂ-ਜਿਵੇਂ ਭਾਜਪਾ ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਆਪਣੀ ਰਣਨੀਤੀ ਨੂੰ ਸੁਧਾਰ ਰਹੀ ਹੈ, ਇਸ ਬਾਰੇ ਕਿਆਸ ਅਰਾਈਆਂ ਜ਼ੋਰਾਂ ’ਤੇ ਹਨ ਕਿ ਕੀ ਪਾਰਟੀ ਮੁੱਖ ਮੰਤਰੀ ਦੇ ਅਹੁਦੇ ਦਾ ਚਿਹਰਾ ਪੇਸ਼ ਕਰੇਗੀ ਜਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਚੋਣਾਂ ਲੜੇਗੀ।

ਦਹਾਕਿਆਂ ਤੋਂ ਪੰਜਾਬ ’ਚ ਭਾਜਪਾ ਨੂੰ ਵੱਡੇ ਪੱਧਰ ’ਤੇ ਸ਼ਹਿਰੀ ਤੇ ਗੈਰ-ਸਿੱਖ ਹਿੰਦੂ ਪਾਰਟੀ ਵਜੋਂ ਵੇਖਿਆ ਜਾਂਦਾ ਸੀ ਜੋ ਆਪਣੇ ਸਹਿਯੋਗੀ ਸ਼੍ਰੋਮਣੀ ਅਕਾਲੀ ਦਲ ’ਤੇ ਨਿਰਭਰ ਸੀ। ਹਾਲਾਂਕਿ, ਪਾਰਟੀ ਦੇ ਨੇਤਾਵਾਂ ਦਾ ਮੰਨਣਾ ਹੈ ਕਿ ਸਿਆਸੀ ਮਾਹੌਲ ਹੁਣ ਕਾਫ਼ੀ ਬਦਲ ਗਿਆ ਹੈ।

ਪਿਛਲੇ ਕੁਝ ਸਾਲਾਂ ’ਚ ਭਾਜਪਾ ਨੇ ਚੁੱਪ-ਚਾਪ ਆਪਣਾ ਸਮਾਜਿਕ ਅਧਾਰ ਵਧਾਇਆ ਹੈ। ਪ੍ਰਭਾਵਸ਼ਾਲੀ ਸਿੱਖ ਨੇਤਾਵਾਂ, ਦਲਿਤ ਹਸਤੀਆਂ, ਜੱਟ ਸਿੱਖ ਪ੍ਰਤੀਨਿਧੀਆਂ ਤੇ ਵੱਖ-ਵੱਖ ਜਾਤੀ ਗਰੁੱਪਾਂ ਦੇ ਨੇਤਾਵਾਂ ਨੂੰ ਪਾਰਟੀ ’ਚ ਸ਼ਾਮਲ ਕੀਤਾ ਹੈ।

ਤਾਜ਼ਾ ਚਰਚਾ ਸੀਨੀਅਰ ਵਕੀਲ ਤੇ ਪ੍ਰਸਿੱਧ ਮਨੁੱਖੀ ਅਧਿਕਾਰ ਕਾਰਕੁਨ ਐੱਚ. ਐੱਸ. ਫੂਲਕਾ ਬਾਰੇ ਹੈ, ਜੋ ਆਮ ਆਦਮੀ ਪਾਰਟੀ ਨਾਲ ਕੰਮ ਕਰਨ ਤੋਂ ਬਾਅਦ ਭਾਜਪਾ ’ਚ ਸ਼ਾਮਲ ਹੋਏ ਸਨ। ਕੇਵਲ ਸਿੰਘ ਢਿੱਲੋਂ ਪੰਜਾਬ ਭਾਜਪਾ ਦੇ ਪ੍ਰਧਾਨ ਬਣੇ। ਬਹੁਤ ਸਾਰੇ ਲੋਕ ਉਨ੍ਹਾਂ ਨੂੰ ਮੁੱਖ ਮੰਤਰੀ ਦੇ ਸੰਭਾਵੀ ਚਿਹਰੇ ਵਜੋਂ ਦੇਖਦੇ ਹਨ।

ਇਕ ਹੋਰ ਉਦਾਹਰਣ ਹੈ। ਅੰਮ੍ਰਿਤਸਰ ਭਾਰਤ ਦਾ ਸਭ ਤੋਂ ਵੱਧ ਸਿਆਸੀ ਪੱਖੋਂ ‘ਦਾਨ ਦੇਣ ਵਾਲਾ’ ਲੋਕ ਸਭਾ ਹਲਕਾ ਹੋ ਸਕਦਾ ਹੈ। ਇਕ ਅਜਿਹਾ ਹਲਕਾ ਜਿੱਥੇ ਇਹ ਜ਼ਰੂਰੀ ਨਹੀਂ ਕਿ ਚੋਣਾਂ ’ਚ ਹਾਰ ਕਿਸੇ ਦੇ ਕਰੀਅਰ ਨੂੰ ਖਤਮ ਕਰ ਦੇਵੇ। ਉਹ ਉਸ ਨੂੰ ਉੱਪਰ ਵੀ ਚੁੱਕਦੀ ਹੈ। ਪੰਜਾਬ ਦੀ ਇਸ ਹਾਈ-ਪ੍ਰੋਫਾਈਲ ਸੀਟ ਨੇ ਚੁੱਪ-ਚਾਪ ਚੰਗੇ ਉਮੀਦਵਾਰ ਪੈਦਾ ਕਰਨ ਲਈ ਪ੍ਰਸਿੱਧੀ ਹਾਸਲ ਕੀਤੀ ਹੈ।

2014 ’ਚ ਅਰੁਣ ਜੇਤਲੀ ਨੇ ਅੰਮ੍ਰਿਤਸਰ ਸੀਟ ਹਾਰਨ ਤੋਂ ਬਾਅਦ ਕੈਬਨਿਟ ਮੰਤਰੀ ਦਾ ਅਹੁਦਾ ਹਾਸਲ ਕੀਤਾ ।2019 ’ਚ ਸਾਬਕਾ ਰਾਜਦੂਤ ਹਰਦੀਪ ਸਿੰਘ ਪੁਰੀ ਨੂੰ ਕੈਬਨਿਟ ਮੰਤਰੀ ਨਿਯੁਕਤ ਕੀਤਾ ਗਿਆ। ਸਾਬਕਾ ਰਾਜਦੂਤ ਤਰਨਜੀਤ ਸਿੰਘ ਸੰਧੂ 2024 ਦੀਆਂ ਲੋਕ ਸਭਾ ਚੋਣਾਂ ਹਾਰਨ ਤੋਂ ਬਾਅਦ 2026 ’ਚ ਦਿੱਲੀ ਦੇ ਉਪ ਰਾਜਪਾਲ ਬਣੇ।

ਭਾਜਪਾ ਦੇ ਅੰਦਰੂਨੀ ਸੂਤਰਾਂ ਦਾ ਕਹਿਣਾ ਹੈ ਕਿ ਪਾਰਟੀ ਵੱਲੋਂ ਅਧਿਕਾਰਤ ਰੂਪ ’ਚ ਮੁੱਖ ਮੰਤਰੀ ਦੇ ਅਹੁਦੇ ਲਈ ਉਮੀਦਵਾਰ ਦੇ ਨਾਂ ਦਾ ਐਲਾਨ ਕਰਨ ਦੀ ਸੰਭਾਵਨਾ ਨਹੀਂ ਹੈ ਕਿਉਂਕਿ ਖੋਜ ਜਾਰੀ ਹੈ। ਇਹ ਸਪੱਸ਼ਟ ਹੈ ਕਿ ਚੋਣ ਵੱਡੇ ਪੱਧਰ ’ਤੇ ਮੋਦੀ ਦੀ ਲੀਡਰਸ਼ਿਪ, ਸ਼ਾਸਨ ਦੇ ਮੁੱਦਿਆਂ ਤੇ ਰਾਸ਼ਟਰੀ ਅਪੀਲ ਦੇ ਆਲੇ-ਦੁਆਲੇ ਗਠਜੋੜ ਦੇ ਨਾਲ ਜਾਂ ਬਿਨਾਂ ਲੜੇ ਜਾਣ ਦੀ ਉਮੀਦ ਹੈ।