ਦਿੱਲੀ ਬਲਾਸਟ ਮਗਰੋਂ LG ਸਕਸੈਨਾ ਦਾ ਵੱਡਾ ਫੈਸਲਾ, ਪੁਲਸ ਤੇ ਪ੍ਰਸ਼ਾਸਨ ਨੂੰ ਦਿੱਤੇ ਸਖਤ ਆਦੇਸ਼

ਨੈਸ਼ਨਲ ਡੈਸਕ : ਇਸੇ ਮਹੀਨੇ 10 ਨਵੰਬਰ 2025 ਨੂੰ ਦਿੱਲੀ ਦੇ ਲਾਲ ਕਿਲ੍ਹੇ (Red Fort) ਦੇ ਨੇੜੇ ਹੋਏ ਭਿਆਨਕ ਧਮਾਕੇ ਨੇ ਪੂਰੀ ਦਿੱਲੀ ਨੂੰ ਦਹਿਲਾ ਦਿੱਤਾ ਸੀ। ਇਸ ਹਾਦਸੇ 'ਚ ਕਈ ਲੋਕਾਂ ਦੀ ਮੌਤ ਵੀ ਹੋ ਗਈ ਸੀ। ਇਸ ਵੱਡੀ ਘਟਨਾ ਤੋਂ ਬਾਅਦ ਦਿੱਲੀ ਦੇ ਉਪ-ਰਾਜਪਾਲ (LG) ਵਿਨੈ ਕੁਮਾਰ ਸਕਸੈਨਾ ਨੇ ਸ਼ਹਿਰ ਨੂੰ ਹੋਰ ਵੀ ਸੁਰੱਖਿਅਤ ਬਣਾਉਣ ਲਈ ਇੱਕ ਵੱਡਾ ਫੈਸਲਾ ਲਿਆ ਹੈ। 21 ਨਵੰਬਰ 2025 ਨੂੰ LG ਨੇ ਦਿੱਲੀ ਪੁਲਸ ਤੇ ਪ੍ਰਸ਼ਾਸਨ ਨੂੰ ਕਈ ਜ਼ਰੂਰੀ ਹੁਕਮ ਜਾਰੀ ਕੀਤੇ ਹਨ। ਇਸ ਮਾਮਲੇ ਵਿੱਚ ਨੈਸ਼ਨਲ ਇਨਵੈਸਟੀਗੇਸ਼ਨ ਏਜੰਸੀ (NIA) ਵੱਲੋਂ ਹੁਣ ਤੱਕ 6 ਮੁਲਜ਼ਮਾਂ ਨੂੰ ਗ੍ਰਿਫਤਾਰ ਕੀਤਾ ਜਾ ਚੁੱਕਾ ਹੈ ਅਤੇ ਅੱਗੇ ਦੀ ਜਾਂਚ ਜਾਰੀ ਹੈ।
ਦਿੱਲੀ ਪੁਲਸ ਨੂੰ LG ਦੇ ਆਦੇਸ਼:
ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ LG ਨੇ ਦਿੱਲੀ ਪੁਲਸ ਨੂੰ ਹੇਠ ਲਿਖੇ ਨਿਰਦੇਸ਼ ਦਿੱਤੇ ਹਨ:
• ਅਮੋਨੀਅਮ ਨਾਈਟ੍ਰੇਟ ਦਾ ਡਿਜੀਟਲ ਰਿਕਾਰਡ: ਅਮੋਨੀਅਮ ਨਾਈਟ੍ਰੇਟ ਖਰੀਦਣ ਅਤੇ ਵੇਚਣ ਵਾਲਿਆਂ ਦਾ ਇੱਕ ਡਿਜੀਟਲ ਰਿਕਾਰਡ ਰੱਖਿਆ ਜਾਵੇਗਾ, ਜਿਸ ਵਿੱਚ ਉਨ੍ਹਾਂ ਦੀ ਫੋਟੋ ਅਤੇ ਪੂਰੀ ਜਾਣਕਾਰੀ ਸ਼ਾਮਲ ਹੋਵੇਗੀ।
• ਸੋਸ਼ਲ ਮੀਡੀਆ ਟਰੈਕਿੰਗ: ਪੁਲਸ ਅਧਿਕਾਰੀਆਂ ਨੂੰ ਮੈਟਾ (Meta) ਅਤੇ ਐਕਸ (X, ਪਹਿਲਾਂ ਟਵਿੱਟਰ) ਵਰਗੀਆਂ ਕੰਪਨੀਆਂ ਨਾਲ ਇੱਕ ਬੈਠਕ ਕਰਨ ਲਈ ਕਿਹਾ ਗਿਆ ਹੈ, ਤਾਂ ਜੋ ਉਗਰ ਅਤੇ ਭੜਕਾਊ ਸਮੱਗਰੀ ਨੂੰ ਟਰੈਕ ਕਰਨ ਦਾ ਪ੍ਰਬੰਧ ਸਥਾਪਤ ਕੀਤਾ ਜਾ ਸਕੇ।
• ਨਿਗਰਾਨੀ ਅਤੇ ਇੰਟੈਲੀਜੈਂਸ ਮਜ਼ਬੂਤ: ਖਾਸ ਤੌਰ 'ਤੇ ਉਨ੍ਹਾਂ ਇਲਾਕਿਆਂ ਵਿੱਚ ਇੰਟੈਲੀਜੈਂਸ ਅਤੇ ਨਿਗਰਾਨੀ ਨੂੰ ਮਜ਼ਬੂਤ ਕੀਤਾ ਜਾਵੇਗਾ, ਜਿੱਥੇ ਕੱਟੜਪੰਥ ਫੈਲਣ ਦਾ ਖਤਰਾ ਜ਼ਿਆਦਾ ਹੈ।
• ਕਮਿਊਨਿਟੀ ਪੁਲਿਸਿੰਗ: ਲੋਕਾਂ ਨਾਲ ਜੁੜ ਕੇ ਅਤੇ ਗੱਲਬਾਤ ਕਰਕੇ 'ਕਮਿਊਨਿਟੀ ਪੁਲਿਸਿੰਗ' ਨੂੰ ਬਿਹਤਰ ਬਣਾਇਆ ਜਾਵੇ।
ਪ੍ਰਸ਼ਾਸਨ ਨੂੰ ਦਿੱਤੇ ਗਏ ਜ਼ਰੂਰੀ ਆਦੇਸ਼:
LG ਨੇ ਪ੍ਰਸ਼ਾਸਨ ਨੂੰ ਸੁਰੱਖਿਆ ਅਤੇ ਜਾਂਚ ਦੇ ਮੱਦੇਨਜ਼ਰ ਹੇਠ ਲਿਖੇ ਆਦੇਸ਼ ਦਿੱਤੇ ਹਨ:
• ਡਾਕਟਰਾਂ ਦਾ ਕੇਂਦਰੀ ਡਾਟਾ: ਪ੍ਰਸ਼ਾਸਨ ਸਾਰੇ ਸਰਕਾਰੀ ਅਤੇ ਨਿੱਜੀ ਹਸਪਤਾਲਾਂ ਦੇ ਡਾਕਟਰਾਂ ਅਤੇ ਪੈਰਾਮੈਡੀਕਲ ਸਟਾਫ ਦੀ ਡਿਗਰੀ ਸਮੇਤ ਇੱਕ ਕੇਂਦਰੀ ਡਾਟਾ ਰਿਕਾਰਡ ਤਿਆਰ ਕਰੇ।
• ਵਿਦੇਸ਼ੀ ਡਿਗਰੀ ਵਾਲੇ ਡਾਕਟਰਾਂ ਦੀ ਜਾਂਚ: ਜਿਨ੍ਹਾਂ ਡਾਕਟਰਾਂ ਦੀ ਡਿਗਰੀ ਵਿਦੇਸ਼ ਤੋਂ ਹੈ, ਉਨ੍ਹਾਂ ਦੀ ਜਾਣਕਾਰੀ ਪੁਲਿਸ ਨੂੰ ਦਿੱਤੀ ਜਾਵੇਗੀ ਤਾਂ ਜੋ ਉਨ੍ਹਾਂ ਦੀ ਚੰਗੀ ਤਰ੍ਹਾਂ ਜਾਂਚ ਕੀਤੀ ਜਾ ਸਕੇ।
• ਸੈਕਿੰਡ ਹੈਂਡ ਵਾਹਨਾਂ 'ਤੇ ਸਖਤੀ: ਸੈਕਿੰਡ-ਹੈਂਡ ਗੱਡੀਆਂ ਵੇਚਣ-ਖਰੀਦਣ ਵਾਲੇ ਡਿਜੀਟਲ ਪਲੇਟਫਾਰਮਾਂ ਅਤੇ ਫਾਈਨੈਂਸਰਾਂ ਨਾਲ ਬੈਠਕ ਕਰਕੇ ਇਹ ਸਪੱਸ਼ਟ ਨਿਰਦੇਸ਼ ਦਿੱਤੇ ਜਾਣ ਕਿ ਗੱਡੀ ਸਿਰਫ਼ ਉਹੀ ਵਿਅਕਤੀ ਚਲਾਏ ਜਿਸ ਦਾ ਨਾਮ ਰਜਿਸਟ੍ਰੇਸ਼ਨ ਵਿੱਚ ਹੈ। ਇਹ ਨਿਯਮ ਖਾਸ ਕਰਕੇ ਆਟੋ ਰਿਕਸ਼ਾ 'ਤੇ ਸਖਤੀ ਨਾਲ ਲਾਗੂ ਹੋਵੇਗਾ।