ਪੰਜਾਬ ਸਮੇਤ 5 ਸੂਬਿਆਂ ’ਚ ਇਸ ਸਾਲ ਨਵੰਬਰ ’ਚ ਹੋ ਸਕਦੀਆਂ ਹਨ ਵਿਧਾਨ ਸਭਾ ਚੋਣਾਂ

ਨੈਸ਼ਨਲ ਡੈਸਕ- 5 ਸੂਬਿਆਂ ’ਚ ਅਗਲੇ ਸਾਲ ਫਰਵਰੀ-ਮਾਰਚ ’ਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਕੁਝ ਮਹੀਨੇ ਪਹਿਲਾਂ ਨਵੰਬਰ ਤੋਂ ਜਨਵਰੀ ਦਰਮਿਅਾਨ ਹੋ ਸਕਦੀਆਂ ਹਨ। ਇਨ੍ਹਾਂ ’ਚ ਪੰਜਾਬ, ਉਤਰਾਖੰਡ, ਉੱਤਰ ਪ੍ਰਦੇਸ਼, ਗੋਆ ਤੇ ਮਣੀਪੁਰ ਹਨ। ਰਾਸ਼ਟਰੀ ਮਰਦਮਸ਼ੁਮਾਰੀ ਵਰਗੇ ਅਹਿਮ ਕਾਰਜ ਕਾਰਨ ਚੋਣਾਂ ਪਹਿਲਾਂ ਹੋ ਸਕਦੀਆਂ ਹਨ । ਮਰਦਮਸ਼ੁਮਾਰੀ 9 ਫਰਵਰੀ 2027 ਤੋਂ 28 ਫਰਵਰੀ 2027 ਤੱਕ ਜਾਰੀ ਰਹਿਣੀ ਹੈ।

ਸਿਆਸੀ ਚਰਚਿਆਂ ਅਨੁਸਾਰ ਉਕਤ ਸੂਬਿਆਂ ’ਚ ਵਿਧਾਨ ਸਭਾ ਚੋਣ ਮਾਰਚ ਦੀ ਬਜਾਏ ਜਨਵਰੀ ਦੇ ਅੰਤ ਤੱਕ ਖਤਮ ਹੋ ਸਕਦੀਆਂ ਹਨ। ਵਿਧਾਨ ਸਭਾ ਚੋਣਾਂ ਤੇ ਮਰਦਮਸ਼ੁਮਾਰੀ ਕਿਉਂਕਿ ਇੱਕੋ ਟਾਸਕ-ਫੋਰਸ ਭਾਵ ਜ਼ਿਲਾ ਮੈਜਿਸਟ੍ਰੇਟ, ਪ੍ਰਸ਼ਾਸਨਿਕ ਸਟਾਫ਼ ਤੇ ਸਕੂਲ ਅਧਿਆਪਕਾਂ 'ਤੇ ਨਿਰਭਰ ਕਰਦੀਆਂ ਹਨ, ਇਸ ਲਈ ਸਰਕਾਰਾਂ ਦੋਵੇਂ ਜ਼ਿੰਮੇਵਾਰੀਆਂ ਇੱਕੋ ਸਮੇਂ ਨਹੀਂ ਨਿਭਾ ਸਕਦੀ।

ਇਸ ਅਹਿਮ ਪ੍ਰਸ਼ਾਸਕੀ ਓਵਰਲੈਪ ਦਾ ਪ੍ਰਬੰਧ ਕਰਨ ਲਈ ਚੋਣ ਕਮਿਸ਼ਨ ਅਤੇ ਗ੍ਰਹਿ ਮੰਤਰਾਲਾ ਤਾਲਮੇਲ ਕਰ ਰਹੇ ਹਨ। ਕੋਈ ਤਰੀਕਾ ਲੱਭਣ ਲਈ ਉਹ ਕੰਮ ਕਰ ਰਹੇ ਹਨ। ਉਤਰਾਖੰਡ ਵਰਗਾ ਸੂਬਾ ਜਿੱਥੇ ਸਰਦੀਆਂ ’ਚ ਤਾਪਮਾਨ ਜ਼ੀਰੋ ਡਿਗਰੀ ਤੋਂ ਹੇਠਾਂ ਚਲਾ ਜਾਂਦਾ ਹੈ, ’ਚ ਗ੍ਰਹਿ ਮੰਤਰਾਲਾ ਨੇ ਮਰਦਮਸ਼ੁਮਾਰੀ ਦਾ ਕੰਮ ਇਸ ਸਾਲ ਸਤੰਬਰ ਤੱਕ ਵਧਾ ਦਿੱਤਾ ਹੈ।

ਇਸ ਤੋਂ ਇਹ ਯਕੀਨੀ ਹੋ ਜਾਂਦਾ ਹੈ ਕਿ ਸਰਕਾਰ ਚਾਹੁੰਦੀ ਹੈ ਕਿ ਮੌਸਮ ਦੀਆਂ ਦਿੱਕਤਾਂ ਕਾਰਨ ਡਾਟਾ ਇੱਕਠਾ ਕਰਨ ’ਚ ਰੁਕਾਵਟ ਨਾ ਅਾਏ ਭਾਵੇਂ ਸਥਾਨਕ ਵਿਧਾਨ ਸਭਾ ਚੋਣਾਂ ਅਧਿਕਾਰਤ ਰੂਪ ’ਚ ਕਦੇ ਵੀ ਹੋ ਜਾਣ।

ਘਰਾਂ ਦੀ ਸੂਚੀ ਤੇ ਗਿਣਤੀ ਦਾ ਪੜਾਅ ਜੋ 15 ਮਈ ਨੂੰ ਸੂਬਿਆਂ ’ਚ ਸ਼ੁਰੂ ਹੋਇਆ ਸੀ, ਵਧੇਰੇ ’ਚ 13 ਜੂਨ ਨੂੰ ਖਤਮ ਹੋ ਗਿਆ। ਇਸ ਤੋਂ ਪਹਿਲਾਂ ਇਕ ਅਾਨਲਾਈਨ ਸਵੈ-ਗਣਨਾ ਵਿੰਡੋ 30 ਅਪ੍ਰੈਲ ਤੋਂ 14 ਮਈ ਤੱਕ ਚੱਲੀ ਸੀ।

ਵਧੇਰੇ ਸੂਬਿਆਂ ’ਚ ਮਰਦਮਸ਼ੁਮਾਰੀ 9 ਫਰਵਰੀ, 2027 ਨੂੰ ਸ਼ੁਰੂ ਹੋਣ ਵਾਲੀ ਹੈ ਤੇ 28 ਫਰਵਰੀ, 2027 ਤੱਕ ਜਾਰੀ ਰਹਿਣੀ ਹੈ। ਮੌਜੂਦਾ ਨਿਯਮਾਂ ਅਧੀਨ ਚੋਣ ਕਮਿਸ਼ਨ ਕਿਸੇ ਵੀ ਸੂਬਾਈ ਵਿਧਾਨ ਸਭਾ ਦੇ ਕਾਰਜਕਾਲ ਦੇ ਅੰਤ ਤੋਂ 6 ਮਹੀਨੇ ਪਹਿਲਾਂ ਤੱਕ ਚੋਣਾਂ ਕਰਵਾ ਸਕਦਾ ਹੈ। ਇਸੇ ਕਾਰਨ ਚੋਣ ਸ਼ਡਿਊਲ ਬਾਰੇ ਕਿਆਸਅਰਾਈਆਂ ਵਧ ਗਈਆਂ ਹਨ।

ਉੱਤਰ ਪ੍ਰਦੇਸ਼ ਤੇ ਪੰਜਾਬ ਵਰਗੇ ਸੂਬਿਆਂ ’ਚ ਮੁੱਖ ਸਿਆਸੀ ਪਾਰਟੀਆਂ ਪਹਿਲਾਂ ਹੀ ਸਰਦੀਆਂ ਦੇ ਸ਼ੁਰੂਆਤੀ ਪੋਲਿੰਗ ਸ਼ਡਿਊਲ ਨੂੰ ਅਨੁਕੂਲ ਬਣਾਉਣ ਲਈ ਆਪਣੇ ਪ੍ਰਚਾਰ ਕੈਲੰਡਰਾਂ ਨੂੰ ਮੁੜ ਤੈਅ ਕਰ ਰਹੀਆਂ ਹਨ। ਸਮਾਜਵਾਦੀ ਪਾਰਟੀ ਤੇ ਕਾਂਗਰਸ ਇਸ ਦੇ ਵਿਰੁੱਧ ਨਹੀਂ ਹਨ। ਪੰਜਾਬ ’ਚ ਸੱਤਾਧਾਰੀ ਪਾਰਟੀ ਨੇ ਵੀ ਆਪਣੀ ਤਿਆਰੀ ਵਿਖਾਈ ਹੈ।