ਪਿਆਰ ਦਾ ਜਾਲ ਵਿਛਾ ਕੇ 15 ਔਰਤਾਂ ਨੂੰ ਬਣਾਇਆ ਸ਼ਿਕਾਰ, ਕੀਤੀ ਕਰੋੜਾਂ ਦੀ ਠੱਗੀ

ਫਰੀਦਾਬਾਦ : ਨੋਇਡਾ ਦੀ ਸਾਈਬਰ ਕ੍ਰਾਈਮ ਥਾਣਾ ਪੁਲਸ ਨੇ ਇੱਕ ਵੱਡੀ ਕਾਰਵਾਈ ਕਰਦਿਆਂ ਇੱਕ ਅੰਤਰਰਾਸ਼ਟਰੀ ਸਾਈਬਰ ਠੱਗ ਨੂੰ ਗ੍ਰਿਫ਼ਤਾਰ ਕੀਤਾ ਹੈ, ਜੋ ਮੈਟਰੀਮੋਨੀਅਲ ਸਾਈਟਾਂ ਅਤੇ ਸੋਸ਼ਲ ਮੀਡੀਆ ਰਾਹੀਂ ਔਰਤਾਂ ਨੂੰ ਆਪਣੇ ਪਿਆਰ ਦੇ ਜਾਲ ਵਿੱਚ ਫਸਾ ਕੇ ਕਰੋੜਾਂ ਰੁਪਏ ਦੀ ਠੱਗੀ ਮਾਰਦਾ ਸੀ। ਮੁਲਜ਼ਮ ਦੀ ਪਛਾਣ ਸੈਮੂਅਲ ਔਗੁਨ ਉਰਫ਼ ਸਟੈਫਨੀ ਡੇਰਿਕ ਵਜੋਂ ਹੋਈ ਹੈ, ਜੋ ਮੂਲ ਰੂਪ ਵਿੱਚ ਨਾਈਜੀਰੀਆ ਦੇ ਬੇਨਿਨ ਸ਼ਹਿਰ ਦਾ ਰਹਿਣ ਵਾਲਾ ਹੈ। ਪੁਲਸ ਨੇ ਇਸ ਨੂੰ ਫਰੀਦਾਬਾਦ ਤੋਂ ਕਾਬੂ ਕੀਤਾ ਹੈ।

ਡੀਸੀਪੀ ਸਾਈਬਰ ਕ੍ਰਾਈਮ ਸ਼ੈਵਿਆ ਗੋਇਲ ਅਨੁਸਾਰ, ਮੁਲਜ਼ਮ ਮੈਟਰੀਮੋਨੀਅਲ ਸਾਈਟਾਂ 'ਤੇ ਖ਼ੁਦ ਨੂੰ ਇੱਕ ਅਮੀਰ ਵਿਦੇਸ਼ੀ ਕਾਰੋਬਾਰੀ ਦੱਸ ਕੇ ਔਰਤਾਂ ਨਾਲ ਸੰਪਰਕ ਕਰਦਾ ਸੀ। ਉਹ ਵੱਖ-ਵੱਖ ਨਾਵਾਂ ਅਤੇ ਫਰਜ਼ੀ ਪ੍ਰੋਫਾਈਲਾਂ ਰਾਹੀਂ ਔਰਤਾਂ ਦਾ ਭਰੋਸਾ ਜਿੱਤਦਾ ਸੀ ਅਤੇ ਫਿਰ ਉਨ੍ਹਾਂ ਨੂੰ ਵਿਆਹ ਦਾ ਝਾਂਸਾ ਦੇ ਕੇ ਭਾਵਨਾਤਮਕ ਤੌਰ 'ਤੇ ਆਪਣੇ ਨਾਲ ਜੋੜ ਲੈਂਦਾ ਸੀ। ਉਹ ਔਰਤਾਂ ਨੂੰ ਵਾਅਦਾ ਕਰਦਾ ਸੀ ਕਿ ਉਹ ਜਲਦ ਹੀ ਭਾਰਤ ਆ ਕੇ ਉਨ੍ਹਾਂ ਨਾਲ ਵੱਸ ਜਾਵੇਗਾ।

ਜਦੋਂ ਪੀੜਤ ਔਰਤ ਉਸ 'ਤੇ ਪੂਰੀ ਤਰ੍ਹਾਂ ਭਰੋਸਾ ਕਰ ਲੈਂਦੀ ਸੀ, ਤਾਂ ਉਹ ਆਪਣੀ ਖੇਡ ਸ਼ੁਰੂ ਕਰਦਾ ਸੀ। ਉਹ ਔਰਤਾਂ ਨੂੰ ਕਹਿੰਦਾ ਸੀ ਕਿ ਉਸ ਨੇ ਵਿਦੇਸ਼ ਤੋਂ ਉਨ੍ਹਾਂ ਲਈ ਬਹੁਤ ਮਹਿੰਗੇ ਤੋਹਫ਼ੇ ਜਾਂ ਪਾਰਸਲ ਭੇਜੇ ਹਨ, ਪਰ ਉਹ ਕਸਟਮ ਵਿਭਾਗ ਕੋਲ ਫਸ ਗਏ ਹਨ। ਇਨ੍ਹਾਂ ਨੂੰ ਛੁਡਾਉਣ ਦੇ ਬਹਾਨੇ ਉਹ ਵਾਰ-ਵਾਰ ਲੱਖਾਂ ਰੁਪਏ ਮੰਗਵਾਉਂਦਾ ਸੀ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਮੁਲਜ਼ਮ ਹੁਣ ਤੱਕ 15 ਔਰਤਾਂ ਨੂੰ ਆਪਣਾ ਸ਼ਿਕਾਰ ਬਣਾ ਚੁੱਕਾ ਹੈ। ਸਿਰਫ਼ ਦੋ ਮਾਮਲਿਆਂ ਵਿੱਚ ਹੀ ਉਸ ਨੇ 1.82 ਕਰੋੜ ਰੁਪਏ (ਇੱਕ ਮਹਿਲਾ ਤੋਂ 56.46 ਲੱਖ ਅਤੇ ਦੂਜੀ ਤੋਂ 1.26 ਕਰੋੜ) ਦੀ ਠੱਗੀ ਕੀਤੀ ਹੈ।

ਪੁਲਸ ਪੁੱਛਗਿੱਛ ਦੌਰਾਨ ਮੁਲਜ਼ਮ ਨੇ ਕਬੂਲਿਆ ਹੈ ਕਿ ਉਹ ਲੋਕਾਂ ਨੂੰ ਘੱਟ ਵਿਆਜ 'ਤੇ ਫਰਜ਼ੀ ਲੋਨ ਦਿਵਾਉਣ ਦਾ ਲਾਲਚ ਦੇ ਕੇ ਵੀ ਪੈਸੇ ਐਂਠਦਾ ਸੀ। ਪੁਲਸ ਨੇ ਮੁਲਜ਼ਮ ਕੋਲੋਂ ਕਈ ਫਰਜ਼ੀ ਪਾਸਪੋਰਟ, ਲੈਪਟਾਪ ਅਤੇ ਟੈਬਲੇਟ ਬਰਾਮਦ ਕੀਤੇ ਹਨ, ਜਿਨ੍ਹਾਂ ਵਿੱਚ ਠੱਗੀ ਨਾਲ ਜੁੜੇ ਕਈ ਡਿਜੀਟਲ ਸਬੂਤ ਮਿਲੇ ਹਨ। ਸਾਈਬਰ ਪੁਲਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਮੈਟਰੀਮੋਨੀਅਲ ਸਾਈਟਾਂ 'ਤੇ ਅਣਜਾਣ ਲੋਕਾਂ ਤੋਂ ਸਾਵਧਾਨ ਰਹਿਣ ਅਤੇ ਕਿਸੇ ਵੀ ਸ਼ੱਕੀ ਗਤੀਵਿਧੀ ਦੀ ਸੂਚਨਾ ਤੁਰੰਤ ਪੁਲਸ ਨੂੰ ਦੇਣ।