'ਕੂੜਾ ਲਿਆਓ, ਖਾਣਾ ਖਾਓ' ! ਭਾਰਤ 'ਚ ਖੁੱਲ੍ਹਿਆ ਅਨੋਖਾ ਕੈਫੇ, ਕੂੜੇ ਬਦਲੇ ਮਿਲਦੈ ਪੇਟ ਭਰ ਭੋਜਨ

ਨੈਸ਼ਨਲ ਡੈਸਕ - ਅਸੀਂ ਅਕਸਰ ਵਰਤੀਆਂ ਹੋਈਆਂ ਪਲਾਸਟਿਕ ਦੀਆਂ ਬੋਤਲਾਂ ਅਤੇ ਕੂੜਾ ਸੜਕਾਂ ਅਤੇ ਗਲੀਆਂ ਵਿਚ ਸੁੱਟ ਦਿੰਦੇ ਹਾਂ ਪਰ ਛੱਤੀਸਗੜ੍ਹ ਦੇ ਅੰਬਿਕਾਪੁਰ ’ਚ ਇਕ ਕੈਫੇ ਨੇ ਇਸ ਸਮੱਸਿਆ ਦਾ ਇਕ ਸ਼ਾਨਦਾਰ ਹੱਲ ਲੱਭਿਆ ਹੈ। ਇੱਥੇ ਇਕ ਵਿਲੱਖਣ "ਗਾਰਬੇਜ ਕੈਫੇ" ਖੁੱਲ੍ਹਿਆ ਹੈ, ਜੋ ਪਲਾਸਟਿਕ ਦੇ ਕੂੜੇ ਦੇ ਬਦਲੇ ਮੁਫਤ ਪੌਸ਼ਟਿਕ ਭੋਜਨ ਦੀ ਪੇਸ਼ਕਸ਼ ਕਰਦਾ ਹੈ। ਇਸ ਪਹਿਲਕਦਮੀ ਨੇ ਇਕੋ ਸਮੇਂ ਦੋ ਵੱਡੀਆਂ ਸਮੱਸਿਆਵਾਂ ਦਾ ਹੱਲ ਕੀਤਾ ਹੈ  ਜੋ ਕਿ ਹੈ ਪਲਾਸਟਿਕ ਪ੍ਰਦੂਸ਼ਣ ਅਤੇ ਭੁੱਖਮਰੀ।

ਇਹ ਵਿਲੱਖਣ ਪਹਿਲ ਅੰਬਿਕਾਪੁਰ ਨਗਰ ਨਿਗਮ ਵੱਲੋਂ 2019 ਵਿੱਚ "ਸਵੱਛ ਭਾਰਤ" ਮੁਹਿੰਮ ਨੂੰ ਉਤਸ਼ਾਹਿਤ ਕਰਨ ਲਈ ਸ਼ੁਰੂ ਕੀਤੀ ਗਈ ਸੀ। ਇਸ ਦਾ ਮੁੱਖ ਉਦੇਸ਼ ਵਾਤਾਵਰਣ ਨੂੰ ਸਾਫ਼ ਕਰਨਾ ਅਤੇ ਬੇਘਰਾਂ ਅਤੇ ਗਰੀਬਾਂ ਨੂੰ ਭੋਜਨ ਪ੍ਰਦਾਨ ਕਰਨਾ ਹੈ। ਕੈਫੇ ਦਾ ਕੂੜੇ ਲਈ ਭੋਜਨ ਨਿਯਮ ਸਧਾਰਨ ਹੈ ਜਿਵੇਂ 1 ਕਿਲੋ ਪਲਾਸਟਿਕ ਜਮ੍ਹਾਂ ਕਰਨ ’ਤੇ ਤੁਹਾਨੂੰ ਢਿੱਡ ਭਰ ਕੇ ਪੌਸ਼ਟਿਕ ਥਾਲੀ ਮਿਲਦੀ ਹੈ ਅਤੇ ਅੱਧਾ ਕਿਲੋ ਪਲਾਸਟਿਕ ਜਮ੍ਹਾਂ ਕਰਨ ’ਤੇ ਸਵੇਰ ਦਾ ਨਾਸ਼ਤਾ ਜਿਵੇਂ ਕਿ ਵੜਾ ਪਾਓ ਜਾਂ ਸਮੋਸਾ ਦਿੱਤਾ  ਜਾਂਦਾ ਹੈ. ਇਹ ਪਹਿਲ ਇੰਨੀ ਸਫਲ ਰਹੀ ਹੈ ਕਿ ਅੰਬਿਕਾਪੁਰ ਵਿਚ ਪਲਾਸਟਕ ਕੂੜੇ ਦਾ ਢੇਰ ਕਾਫੀ ਘੱਟ ਹੋ ਗਿਆ ਹੈ।

ਕੀ ਹੈ ਇਸ ਕੈਫੇ ਦੀ ਖਾਸੀਅਤ 

- ਇਹ ਕੈਫੇ ਲੋਕਾਂ ਨੂੰ ਪਲਾਸਟਿਕ ਦਾ ਕੂੜਾ ਇਕੱਠਾ ਕਰਨ ਲਈ ਉਤਸ਼ਾਹਿਤ ਕਰਦਾ ਹੈ, ਜਿਸ ਨਾਲ ਇਸ ਨੂੰ ਆਸਾਨੀ ਨਾਲ ਰੀਸਾਈਕਲ ਕੀਤਾ ਜਾ ਸਕਦਾ ਹੈ। ਇਸ ਪਹਿਲਕਦਮੀ ਨੇ ਅੰਬਿਕਾਪੁਰ ਸ਼ਹਿਰ ਨੂੰ ਸਾਫ਼ ਅਤੇ ਹਰਾ-ਭਰਾ ਬਣਾਉਣ ’ਚ ਮਦਦ ਕੀਤੀ ਹੈ।

- ਇਹ ਕੈਫੇ ਉਨ੍ਹਾਂ ਲੋਕਾਂ ਲਈ ਇਕ ਵਰਦਾਨ ਹੈ ਜੋ ਗਰੀਬੀ ਕਾਰਨ ਭੁੱਖੇ ਸੌਣ ਲਈ ਮਜਬੂਰ ਹਨ। ਇਹ ਉਨ੍ਹਾਂ ਲੋਕਾਂ ਨੂੰ ਭੋਜਨ ਪ੍ਰਦਾਨ ਕਰਦਾ ਹੈ ਜੋ ਕੂੜਾ ਚੁੱਕ ਕੇ ਆਪਣੀ ਰੋਜ਼ੀ-ਰੋਟੀ ਕਮਾਉਂਦੇ ਹਨ, ਇਹ ਯਕੀਨੀ ਬਣਾਉਂਦੇ ਹਨ ਕਿ ਉਨ੍ਹਾਂ ਨੂੰ ਆਪਣੀ ਮਿਹਨਤ ਦਾ ਸਹੀ ਮੁੱਲ ਮਿਲੇ। ਗਾਰਬੇਜ ਕੈਫੇ ਇਕ ਸ਼ਾਨਦਾਰ ਵਿਚਾਰ ਅਤੇ ਜਨਤਕ ਭਲਾਈ ਲਈ ਇਕ ਉੱਤਮ ਪਹਿਲਕਦਮੀ ਦੀ ਇਕ ਉਦਾਹਰਣ ਹੈ। ਇਹ ਸਾਬਤ ਕਰਦਾ ਹੈ ਕਿ ਉੱਤਮ ਇਰਾਦਿਆਂ ਨਾਲ, ਰਸਤੇ ਆਪਣੇ ਆਪ ਬਣ ਜਾਂਦੇ ਹਨ।