ਚੌਕੀਦਾਰ ਦੇ ਪਰਿਵਾਰ ਨੂੰ ਇਨਸਾਫ ਦਿਵਾਉਣ ਲਈ  ਡੀ. ਸੀ. ਦਫਤਰ ਅੱਗੇ ਡਟੇ ਕਿਸਾਨ

ਸੰਗਰੂਰ, (ਬੇਦੀ, ਹਰਜਿੰਦਰ)– ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾਂ ਜ਼ਿਲਾ ਸੰਗਰੂਰ ਵੱਲੋਂ ਜ਼ਿਲਾ ਪ੍ਰਧਾਨ ਅਮਰੀਕ ਸਿੰਘ ਗੰਢੂਆਂ ਦੀ ਅਗਵਾਈ ਹੇਠ ਡੀ. ਸੀ. ਦਫ਼ਤਰ ਅੱਗੇ ਧਰਨਾ ਦਿੱਤਾ ਗਿਆ। ਇਹ ਧਰਨਾ ਪਿਛਲੇ  5 ਦਿਨਾਂ ਤੋਂ ਡੀ. ਐੱਮ. ਪਨਸਪ ਦੇ ਦਫ਼ਤਰ ਅੱਗੇ ਚੱਲਦਾ ਆ ਰਿਹਾ ਸੀ, ਜਿਸ ਬਾਰੇ ਸਰਕਾਰ ਅਤੇ ਪ੍ਰਸ਼ਾਸਨ ਨੇ ਕੋਈ ਗੰਭੀਰਤਾ ਨਹੀਂ ਦਿਖਾਈ। ਆਗੂਆਂ ਨੇ ਕਿਹਾ ਕਿ ਪਿੰਡ ਲੱਡਾ ਦਾ ਚੌਕੀਦਾਰ ਅਕਬਰ ਖਾਂ ਪਨਸਪ ਦੇ ਗੋਦਾਮ ਵਿਚ ਨੌਕਰੀ ਕਰਦਾ ਸੀ, ਜਿਸ ਨੂੰ ਚੋਰਾਂ  ਨੇ ਮੌਤ ਦੇ ਘਾਟ ਉਤਾਰ ਦਿੱਤਾ ਪਰ ਅਜੇ ਤੱਕ ਉਸ ਦੇ ਪਰਿਵਾਰ ਨੂੰ ਸਰਕਾਰ ਅਤੇ ਡੀ. ਐੱਮ. ਤੋਂ ਇਨਸਾਫ ਨਹੀਂ ਮਿਲਿਆ। ਦਲਬਾਰਾ ਸਿੰਘ ਛਾਜਲਾ ਜ਼ਿਲਾ ਜਨਰਲ ਸੈਕਟਰੀ ਨੇ ਕਿਹਾ  ਕਿ ਜਦੋਂ ਤੱਕ ਸਰਕਾਰ ਅਕਬਰ ਖਾਂ ਦੇ ਪਰਿਵਾਰ ਨੂੰ ਇਨਸਾਫ ਦਿਵਾਉਣ ਲਈ ਰੱਖੀਆਂ ਮੰਗਾਂ  ਨਹੀਂ ਮੰਨਦੀ ਅਤੇ ਅਕਬਰ ਖਾਂ ਦੇ ਕਾਤਲਾਂ ਨੂੰ ਗ੍ਰਿਫਤਾਰ ਨਹੀਂ ਕਰਦੀ ਉਦੋਂ ਤੱਕ ਅਕਬਰ ਖਾਂ ਦਾ ਸਸਕਾਰ ਨਹੀਂ ਕੀਤਾ ਜਾਵੇਗਾ। 
  ਆਗੂਆਂ ਨੇ ਕਿਹਾ ਕਿ ਅੱਜ ਡੀ. ਸੀ. ਦਫ਼ਤਰ ਅੱਗੇ ਦਿਨ-ਰਾਤ ਦਾ ਧਰਨਾ ਸ਼ੁਰੂ ਕਰ ਦਿੱਤਾ ਹੈ। ਜੇਕਰ ਸਰਕਾਰ ਨੇ ਕੋਈ ਵੀ ਕਾਰਵਾਈ ਨਹੀਂ ਕੀਤੀ ਤਾਂ ਆਉਣ ਵਾਲੇ ਦਿਨਾਂ ਵਿਚ ਸਖ਼ਤ ਪ੍ਰੋਗਰਾਮ ਉਲੀਕਿਆ ਜਾਵੇਗਾ। ਧਰਨੇ ਵਿਚ ਅਕਬਰ ਖਾਂ ਦੀ ਪਤਨੀ ਅਤੇ ਰਿਸ਼ਤੇਦਾਰ ਵੀ ਸ਼ਾਮਲ ਹੋਏ। ਆਗੂਆਂ ਨੇ  ਮੰਗ ਕੀਤੀ ਸਰਕਾਰ ਤੁਰੰਤ ਕਾਤਲਾਂ ਨੂੰ ਗ੍ਰਿਫਤਾਰ ਕਰੇ। ਕਾਤਲਾਂ ਨੂੰ ਗ੍ਰਿਫਤਾਰ ਨਾ ਕਰਨ ਦਾ ਨਤੀਜਾ 3-4 ਸਤੰਬਰ 2018 ਦੀ ਰਾਤ ਨੂੰ ਚੋਰਾਂ ਨੇ  ਪਿੰਡ ਭੋਜੋਵਾਲੀ ਪਿੰਡ ਪੰਜਾਬ ਸਟੇਟ ਵੇਅਰ ਹਾਊਸ ਗੋਦਾਮ ਵਿਚ ਚੋਰੀ ਦੀ ਇਕ ਹੋਰ ਘਟਨਾ ਨੂੰ ਅੰਜਾਮ ਦਿੱਤਾ। 
ਅੱਜ ਧਰਨੇ ਵਿਚ ਹੋਰਨਾਂ ਆਗੂਆਂ ਤੋਂ ਇਲਾਵਾ ਜਸਵਿੰਦਰ ਸਿੰਘ ਸੋਮਾ, ਜ਼ਿਲਾ ਆਗੂ ਕਿਰਪਾਲ ਸਿੰਘ ਧੂਰੀ, ਹਰਭਗਵਾਨ ਮੂਣਕ, ਧਰਮਿੰਦਰ ਸਿੰਘ ਪਸ਼ੋਰ, ਕਰਮ ਸਿੰਘ, ਬਲਿਆਲ ਬੀ. ਕੇ. ਯੂ. ਡਕੌਂਦਾ, ਸਿਆਮ ਦਾਸ ਕਾਂਝਲੀ, ਅਜੈਬ ਸਿੰਘ ਲੱਖੇਵਾਲ, ਗੁਰਵਿੰਦਰ ਸਿੰਘ, ਮੰਗਵਾਲ, ਗੁਰਮੇਲ ਸਿੰਘ, ਜਸਵੰਤ ਸਿੰਘ ਤੋਲੇਵਾਲ, ਗੁਰਵਿੰਦਰ ਸਿੰਘ ਬਡਰੁੱਖਾਂ, ਰਾਮਸ਼ਰਨ ਸਿੰਘ ਉਗਰਾਹਾਂ, ਸਰਬਜੀਤ ਸਿੰਘ ਭੂਰਥਲਾ ਵੀ ਸ਼ਾਮਲ ਸਨ।