ਨਜਾਇਜ਼ ਮਾਈਨਿੰਗ ਕਰਦੇ ਤਿੰਨ ਟਿੱਪਰ, ਇਕ ਪੋਕਲਾਈਨ ਮਸ਼ੀਨ ਸਮੇਤ ਇਕ ਕੀਤਾ ਕਾਬੂ

ਲੁਧਿਆਣਾ (ਜਗਰੂਪ) : ਥਾਣਾ ਕੂੰਮ ਕਲਾਂ ਦੀ ਪੁਲਸ ਨੇ ਨਜਾਇਜ਼ ਮਾਈਨਿੰਗ ਖ਼ਿਲਾਫ ਕਾਰਵਾਈ ਕਰਦੇ ਹੋਏ ਤਿੰਨ ਟਿੱਪਰ ਅਤੇ ਇਕ ਪੋਕਲਾਈਨ ਮਸ਼ੀਨ ਸਮੇਤ ਇਕ ਵਿਅਕਤੀ ਨੂੰ ਕਾਬੂ ਕੀਤਾ ਹੈ। ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਥਾਣੇਦਾਰ ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਪੁਲਸ ਪਾਰਟੀ ਗਸ਼ਤ ਦੇ ਸਬੰਧੀ ਸ੍ਰੀ ਭੈਣੀ ਸਾਹਿਬ ਕੱਟ 'ਤੇ ਮੌਜੂਦ ਸੀ। ਇਸ ਦੌਰਾਨ ਮੁਖਬਰ ਨੇ ਇਤਲਾਹ ਦਿੱਤੀ ਕਿ ਮਾਛੀਵਾੜਾ ਰੋਡ 'ਤੇ ਪਿੰਡ ਪੰਜੇਟਾ ਪਟਾਕਾ ਫੈਕਟਰੀ ਦੀ ਬੈਕਸਾਈਡ 'ਤੇ ਕੁਝ ਨਾਮਲੂਮ ਵਿਅਕਤੀ ਰਾਤ ਸਮੇਂ ਟਿੱਪਰਾਂ ਅਤੇ ਪੋਕਲਾਈਨ ਮਸ਼ੀਨਾਂ ਨਾਲ ਮਿੱਟੀ ਦੀ ਨਜਾਇਜ਼ ਮਾਈਨਿੰਗ ਕਰ ਰਹੇ ਹਨ।

ਇਸ 'ਤੇ ਪੁਲਸ ਬੀਤੀ ਰਾਤ ਮਾਈਨਿੰਗ ਕਰ ਰਹੇ ਤਿੰਨ ਟਿੱਪਰ ਅਤੇ ਪੋਕਲਾਈਨ ਮਸ਼ੀਨ ਟਾਟਾ ਹਿਟੈਚੀ ਨੂੰ ਕਬਜ਼ੇ 'ਚ ਲੈ ਲਿਆ। ਥਾਣੇਦਾਰ ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਇਸ ਦੌਰਾਨ ਉਨ੍ਹਾਂ ਇਕ ਵਿਅਕਤੀ ਨੂੰ ਵੀ ਕਾਬੂ ਕੀਤਾ ਹੈ ਜਿਸ ਦਾ ਨਾਂ ਅਮਰਜੀਤ ਸਿੰਘ ਪੁੱਤਰ ਰਜਿੰਦਰ ਸਿੰਘ ਵਾਸੀ ਪਿੰਡ ਜੰਡਿਆਲੀ ਵਜੋਂ ਹੋਈ ਹੈ ਅਤੇ ਕੁਝ ਨਾਮਲੂਮ ਹਨ। ਜਿਨਾਂ ਦੀ ਪਹਿਚਾਣ ਕਰਕੇ ਨਾਮਜ਼ਦ ਕੀਤਾ ਜਾਵੇਗਾ।