ਅਜਨਾਲਾ ਦੇ ਬਾਹਰੀ ਪਿੰਡ ਗੁੱਜਰਪੁਰਾ ਨੇੜੇ ਮਿਲੀ ਨੌਜਵਾਨ ਦੀ ਲਾਸ਼

ਅਜਨਾਲਾ,(ਬਾਠ)— ਅਜਨਾਲਾ/ਡੇਰਾ ਬਾਬਾ ਨਾਨਕ ਰੋਡ 'ਤੇ ਪਿੰਡ ਗੁੱਜਰਪੁਰਾ ਦੇ ਨਾਲ ਲੱਗਦੀ ਦਰਗਾਹ ਨੇੜੇ ਇਕ ਅਣਪਛਾਤੇ ਨੌਜਵਾਨ ਦੀ ਲਾਸ਼ ਪਈ ਹੋਣ ਦੀ ਖਬਰ ਮਿਲਦਿਆਂ ਹੀ ਸਨਸਨੀ ਫੈਲ ਗਈ। ਘਟਨਾ ਸਥਾਨ 'ਤੇ ਪੁਲਸ ਪਾਰਟੀ ਸਮੇਤ ਪਹੁੰਚੇ ਡੀ. ਐੱਸ. ਪੀ. ਡੀ ਗੁਰਪ੍ਰਤਾਪ ਸਿੰਘ ਸਹੋਤਾ ਤੇ ਥਾਣਾ ਅਜਨਾਲਾ ਦੇ ਮੁੱਖ ਅਫਸਰ ਇੰਸਪੈਕਟਰ ਐੱਸ. ਐੱਚ. ਓ. ਪਰਮਜੀਤ ਸਿੰਘ ਵਿਰਦੀ ਨੇ ਲਾਸ਼ ਨੂੰ ਆਪਣੇ ਕਬਜ਼ੇ 'ਚ ਲੈ ਲਿਆ । ਜਾਣਕਾਰੀ ਮੁਤਾਬਕ ਅਜਨਾਲਾ ਦੇ ਬਾਹਰੀ ਪਿੰਡ ਗੁੱਜਰਪੁਰਾ ਨੇੜੇ ਇੱਕ ਦਰਗਾਹ ਕੋਲ ਭੇਦਭਰੇ ਹਾਲਾਤ 'ਚ ਇੱਕ 22 ਕੁ ਸਾਲ ਦੇ ਨੌਜਵਾਨ ਦੀ ਲੋਈ 'ਚ ਲਪੇਟੀ ਹੋਈ ਲਾਸ਼ ਪਈ ਹੋਈ ਸੀ। ਲਾਸ਼ ਨੇੜੇ ਇਕ ਮੋਟਰਸਾਇਕਲ ਤੇ ਵਰਤੋਂ 'ਚ ਲਿਆਂਦੀ ਗਈ ਇਕ ਸਰਿੰਜ ਬਰਾਮਦ ਹੋਈ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਇੰਸਪੈਕਟਰ ਵਿਰਦੀ ਨੇ ਦੱਸਿਆ ਕਿ ਉਕਤ ਮ੍ਰਿਤਕ ਵਿਅਕਤੀ ਦੀ ਪਛਾਣ ਗੁਰਭੇਜ ਸਿੰਘ ਪੁੱਤਰ ਲਖਵਿੰਦਰ ਸਿੰਘ ਵਾਸੀ ਸੂਫੀਆਂ ਥਾਣਾ ਅਜਨਾਲਾ ਵਜੋਂ ਹੋਈ ਹੈ। ਉਨ੍ਹਾਂ ਦੱਸਿਆ ਕਿ ਬਣਦੀ ਕਾਨੂੰਨੀ ਪ੍ਰਕਿਰਿਆ ਮੁਕੰਮਲ ਕਰਕੇ ਮ੍ਰਿਤਕ ਦੀ ਲਾਸ਼ ਉਸਦੇ ਵਾਰਸਾਂ ਹਵਾਲੇ ਕਰ ਦਿੱਤੀ ਗਈ ਹੈ।ਮ੍ਰਿਤਕ ਦੇ ਵਾਰਸਾਂ ਦਾ ਮੰਨਣਾ ਹੈ ਕਿ ਉਨ੍ਹਾਂ ਦੇ ਪੁੱਤਰ ਦੀ ਮੌਤ ਰਾਤ ਬਾਹਰ ਠੰਡ 'ਚ ਰਹਿਣ ਕਾਰਨ ਹੋਈ ਹੈ।