ਮਹਿੰਗੇ ਬ੍ਰਾਂਡਾਂ ਦੀਆਂ ਖਾਲੀ ਬੋਤਲਾਂ ’ਚ ਸਸਤੀ ਸ਼ਰਾਬ ਦੀ ‘ਖੇਡ’, ਸ਼ਾਤਿਰਾਂ ਨੇ ਲੱਭਿਆ ਠੱਗੀ ਦਾ ਫਾਰਮੂਲਾ

ਅੰਮ੍ਰਿਤਸਰ (ਇੰਦਰਜੀਤ)- ਸ਼ਹਿਰ ’ਚ ਨਾਜਾਇਜ਼ ਸ਼ਰਾਬ ਦਾ ਧੰਦਾ ਕਰਨ ਵਾਲੇ ਮਾਫੀਆ ਨੇ ਠੱਗੀ ਦਾ ਇਕ ਬਹੁਤ ਹੀ ਸ਼ਾਤਿਰ ਤਰੀਕਾ ਲੱਭ ਲਿਆ ਹੈ। ਹੁਣ ਨਕਲੀ ਸ਼ਰਾਬ ਬਣਾਉਣ ਦੀ ਬਜਾਏ, ਮਹਿੰਗੇ ਅਤੇ ਨਾਮੀ ਬ੍ਰਾਂਡਾਂ ਦੀਆਂ ਖਾਲੀ ਬੋਤਲਾਂ ’ਚ ਸਸਤੀ ਬ੍ਰਾਂਡਿਡ ਸ਼ਰਾਬ ਭਰ ਕੇ ਗਾਹਕਾਂ ਨੂੰ ਹਜ਼ਾਰਾਂ ਰੁਪਏ ਦਾ ਚੂਨਾ ਲਾਇਆ ਜਾ ਰਹੀ ਹੈ। ਇਸ ਖੇਡ ’ਚ ਕਬਾੜੀਆਂ ਤੋਂ ਲੈ ਕੇ ਹੋਟਲ-ਰੈਸਟੋਰੈਂਟਾਂ ਤੱਕ ਦੀਆਂ ਕੜੀਆਂ ਜੁੜੀਆਂ ਹੋਈਆਂ ਹਨ, ਜਿਸ ਕਾਰਨ ਅਮੀਰ ਅਤੇ ਸ਼ੌਕੀਨ ਲੋਕ ਵੀ ਆਸਾਨੀ ਨਾਲ ਧੋਖਾ ਖਾ ਰਹੇ ਹਨ। ਇਹ ਸਮੱਸਿਆ ਸਿਰਫ਼ ਅੰਮ੍ਰਿਤਸਰ ’ਚ ਹੀ ਨਹੀਂ ਸਗੋਂ ਪੂਰੇ ਪੰਜਾਬ ’ਚ ਹੈ ਅਤੇ ਇਹ ਰਵਾਇਤ ਸਾਲਾਂ ਤੋਂ ਚੱਲਦੀ ਆ ਰਹੀ ਹੈ।

ਇਹ ਵੀ ਪੜ੍ਹੋ- ਪਟਿਆਲਾ ਵਿੱਚ ਈ-ਰਿਕਸ਼ਾ ਚਾਲਕ ਦਾ ਬੇਰਹਿਮੀ ਨਾਲ ਕਤਲ, ਕੁੜੀ ਨੂੰ ਛੁਡਾਉਣ ਦੀ ਰੰਜਿਸ਼ ਕਾਰਨ ਵਾਪਰੀ ਵਾਰਦਾਤ

ਕਬਾੜੀਆਂ ਅਤੇ ਹੋਟਲਾਂ ਤੋਂ 50-100 ’ਚ ਖਰੀਦ, ਹਜ਼ਾਰਾਂ ਦਾ ਮੁਨਾਫ਼ਾ

ਜਾਣਕਾਰੀ ਮੁਤਾਬਕ ਸ਼ਹਿਰਾਂ ’ਚ ਸਰਗਰਮ ਇਸ ਧੰਦੇ ਦੇ ਮਾਸਟਰਮਾਈਂਡ ਕਬਾੜੀਆਂ ਦੀਆਂ ਦੁਕਾਨਾਂ, ਹੋਟਲਾਂ, ਬਾਰਾਂ ਅਤੇ ਰੈਸਟੋਰੈਂਟਾਂ ਤੋਂ ਮਹਿੰਗੇ ਬ੍ਰਾਂਡਾਂ ਦੀਆਂ ਖਾਲੀ ਬੋਤਲਾਂ ਇਕੱਠੀਆਂ ਕਰਦੇ ਹਨ। ਜ਼ਿਆਦਾਤਰ ਅਮੀਰ ਲੋਕ ਜਿਨ੍ਹਾਂ ਮਹਿੰਗੇ ਬ੍ਰਾਂਡਾਂ (ਜਿਵੇਂ ਬਲੈਕ ਡੌਗ, ਚਿਵਾਸ ਰੀਗਲ, ਬਲੈਕ ਲੇਬਲ, ਡਬਲ ਬਲੈਕ ਅਤੇ ਰਾਇਲ ਸਲਿਊਟ, ਮੰਕੀ ਸ਼ੋਲਡਰ, ਸਿੰਗਲ ਮਾਲਟ ਗਲੈਨਫਿਡਿਕ 18-ਈਅਰ) ਦੀ ਵਰਤੋਂ ਕਰਦੇ ਹਨ, ਉਨ੍ਹਾਂ ਦੀ ਬਾਜ਼ਾਰ ’ਚ ਕੀਮਤ 3 ਤੋਂ 15 ਹਜ਼ਾਰ ਰੁਪਏ ਪ੍ਰਤੀ ਬੋਤਲ ਤੱਕ ਹੁੰਦੀ ਹੈ। ਇਨ੍ਹਾਂ ਸ਼ਾਤਿਰਾਂ ਨੂੰ ਅਜਿਹੇ ਮਹਿੰਗੇ ਬ੍ਰਾਂਡਾਂ ਦੀਆਂ ਖਾਲੀ ਬੋਤਲਾਂ ਕਬਾੜ ਦੇ ਭਾਅ ’ਚ ਮਾਤਰ 50-100 ਤੋਂ ਲੈ ਕੇ 200-300 ਰੁਪਏ ’ਚ ਮਿਲ ਜਾਂਦੀਆਂ ਹਨ। ਇਸ ਤੋਂ ਬਾਅਦ ਇਨ੍ਹਾਂ ਕੋਲ ਮੌਜੂਦ ਸੀਲਿੰਗ ਦੇ ਆਧੁਨਿਕ ‘ਜੁਗਾੜ’ ਅਤੇ ਉਪਕਰਨਾਂ ਨਾਲ ਬੋਤਲਾਂ ਨੂੰ ਇਸ ਤਰ੍ਹਾਂ ਪੈਕ ਕੀਤਾ ਜਾਂਦਾ ਹੈ ਕਿ ਅਸਲੀ ਅਤੇ ਨਕਲੀ ਦਾ ਫ਼ਰਕ ਕਰਨਾ ਅਸੰਭਵ ਹੋ ਜਾਂਦਾ ਹੈ।

ਇਹ ਵੀ ਪੜ੍ਹੋ-  ਪੰਜਾਬ ਦੇ DCs ਨੂੰ 'ਓ.ਪੀ. ਜਿੰਦਲ ਪੁਰਸਕਾਰ' ਨਾਲ ਕੀਤਾ ਜਾਵੇਗਾ ਸਨਮਾਨਿਤ

ਬਦਲਿਆ ਪੈਂਤੜਾ : ਨਕਲੀ ਕੈਮੀਕਲ ਨਹੀਂ, ਹੁਣ ਸਸਤੀ (ਬ੍ਰਾਂਡਿਡ) ਸ਼ਰਾਬ ਨਾਲ ਰਿਫਿਲਿੰਗ

ਪਹਿਲਾਂ ਦੇ ਸਮੇਂ ’ਚ ਮਾਫੀਆ ਅਸਲੀ ਬੋਤਲਾਂ ’ਚ ਜ਼ਹਿਰੀਲੀ ਜਾਂ ਘਰੇਲੂ ਨਕਲੀ ਸ਼ਰਾਬ ਭਰਦੇ ਸਨ, ਜਿਸ ਨਾਲ ਸਵਾਦ ਅਤੇ ਸਿਹਤ ਦੋਵਾਂ ਪੱਖੋਂ ਤੁਰੰਤ ਪਕੜ ’ਚ ਆ ਜਾਂਦੇ ਸਨ ਪਰ ਹੁਣ ਇਨ੍ਹਾਂ ਸ਼ਾਤਿਰਾਂ ਨੇ ਆਪਣੀ ਰਣਨੀਤੀ ਬਦਲ ਲਈ ਹੈ। ਜਾਣਕਾਰਾਂ ਦਾ ਕਹਿਣਾ ਹੈ ਕਿ 4 ਹਜ਼ਾਰ ਰੁਪਏ ਵਾਲੇ ਬ੍ਰਾਂਡ ਦੀ ਅਸਲੀ ਸ਼ਰਾਬ ਦੀ ਖਾਲੀ ਬੋਤਲ ’ਚ ਇਹ ਲੋਕ 300-400 ਰੁਪਏ ਵਾਲੀ ਸ਼ਰਾਬ (ਜਿਵੇਂ ਮੈਕਡੌਵਲ ਨੰਬਰ ਵਨ, ਬਲੈਂਡਰਸ ਪ੍ਰਾਈਡ, ਰਾਇਲ ਸਟੈਗ, ਓਕਨਗਲੋ, ਇੰਪੀਰੀਅਲ ਬਲੂ) ਭਰ ਦਿੰਦੇ ਹਨ।

ਇਹ ਵੀ ਪੜ੍ਹੋ- ਬਾਰਿਸ਼ ਮਗਰੋਂ ਗੁਰਦਾਸਪੁਰ 'ਚ ਨਾਗਾਂ ਦਾ ਜੋੜਾ ਮਸਤੀ ਕਰਦਾ ਆਇਆ ਨਜ਼ਰ, ਲੋਕਾਂ ਨੇ ਮੋਬਾਈਲਾਂ 'ਚ ਬਣਾਈ ਵੀਡੀਓ

ਫਲੇਵਰ ਅਤੇ ਐਸੈਂਸ ਦੀ ਖੇਡ!

ਮਹਿੰਗੇ ਬ੍ਰਾਂਡ ਨਾਲ ਸਵਾਦ ਮਿਲਾਉਣ ਲਈ ਇਸ ’ਚ ਕੁਝ ਖ਼ਾਸ ਕਿਸਮ ਦੇ ਖੁਸ਼ਬੂਦਾਰ ਤਰਲ (ਐਸੈਂਸ) ਮਿਲਾਏ ਜਾਂਦੇ ਹਨ, ਜਿਸ ਨਾਲ ਪੀਣ ਵਾਲੇ ਨੂੰ ਜ਼ਰਾ ਵੀ ਸ਼ੱਕ ਨਹੀਂ ਹੁੰਦਾ ਅਤੇ ਮਾਫੀਆ ਪ੍ਰਤੀ ਬੋਤਲ ਹਜ਼ਾਰਾਂ ਰੁਪਏ ਦੀ ਨਾਜਾਇਜ਼ ਕਮਾਈ ਕਰ ਜਾਂਦਾ ਹੈ।

ਐਕਸ਼ਨ ’ਚ ਆਬਕਾਰੀ ਵਿਭਾਗ : ਬੋਤਲਾਂ ਤੋੜਨ ਲਈ ਉਤਾਰੀਆਂ ਗਈਆਂ ਟੀਮਾਂ

ਇਸ ਗੰਭੀਰ ਮਾਮਲੇ ’ਤੇ ਜ਼ਿਲ੍ਹਾ ਆਬਕਾਰੀ ਵਿਭਾਗ ਪੂਰੀ ਤਰ੍ਹਾਂ ਚੌਕਸ ਹੈ। ਸਹਾਇਕ ਈ. ਟੀ. ਓ. ਰਮਨ ਸ਼ਰਮਾ ਨੇ ਦੱਸਿਆ ਕਿ ‘ਆਬਕਾਰੀ ਵਿਭਾਗ ਅਜਿਹੇ ਸ਼ੱਕੀ ਲੋਕਾਂ ਅਤੇ ਟਿਕਾਣਿਆਂ ’ਤੇ ਤਿੱਖੀ ਨਜ਼ਰ ਰੱਖ ਰਿਹਾ ਹੈ। ਇਸ ਗੋਰਖਧੰਦੇ ਨੂੰ ਰੋਕਣ ਲਈ ਮੌਜੂਦਾ ਸਮੇਂ ’ਚ ਦਰਜਨਾਂ ਵਿਸ਼ੇਸ਼ ਟੀਮਾਂ ਦੀ ਮਦਦ ਲਈ ਜਾ ਰਹੀ ਹੈ। ਇਹ ਟੀਮਾਂ ਲਗਾਤਾਰ ਹੋਟਲਾਂ, ਬਾਰਾਂ, ਰੈਸਟੋਰੈਂਟਾਂ ਅਤੇ ਅਹਾਤਿਆਂ ’ਚ ਜਾ ਕੇ ਖਾਲੀ ਬੋਤਲਾਂ ਨੂੰ ਮੌਕੇ ’ਤੇ ਹੀ ਤੋੜ (ਸਮੈਸ਼) ਰਹੀਆਂ ਹਨ, ਤਾਂ ਜੋ ਕੋਈ ਵੀ ਇਨ੍ਹਾਂ ਦੀ ਦੁਬਾਰਾ ਰਿਫਿਲਿੰਗ ਲਈ ਦੁਰਵਰਤੋਂ ਨਾ ਕਰ ਸਕੇ। ਉਨ੍ਹਾਂ ਕਿਹਾ ਕਿ ਆਬਕਾਰੀ ਵਿਭਾਗ ਵੱਲੋਂ ਲਗਾਤਾਰ ਸਰਗਰਮੀ ਅਤੇ ਸਖ਼ਤ ਕਾਰਵਾਈ ਕਾਰਨ ਰਿਫਿਲਿੰਗ ਕਰਨ ਵਾਲੇ ਨੌਸਰਬਾਜ਼ ਹੁਣ ਭੱਜ ਚੁੱਕੇ ਹਨ।

ਕੀ ਕਹਿੰਦੇ ਹਨ ਸ਼ਰਾਬ ਕਾਰੋਬਾਰ ਦੇ ਪੁਰਾਣੇ ਜਾਣਕਾਰ?

ਦੂਜੇ ਪਾਸੇ ਸ਼ਰਾਬ ਦੇ ਧੰਦੇ ਨਾਲ ਲੰਮੇ ਸਮੇਂ ਤੋਂ ਜੁੜੇ ਜਾਣਕਾਰ ਯੋਗੇਸ਼ ਮਹਿਰਾ, ਪੁਨੀਤ ਮਹਿਰਾ ਦਾ ਮੰਨਣਾ ਹੈ ਕਿ ਵਿਭਾਗ ਦੀ ਇਹ ਮੁਹਿੰਮ ਸ਼ਲਾਘਾਯੋਗ ਹੈ ਪਰ ਚੁਣੌਤੀ ਅਜੇ ਵੀ ਵੱਡੀ ਹੈ। ਉਪਰੋਕਤ ਜਾਣਕਾਰਾਂ ਅਨੁਸਾਰ ਵਿਭਾਗ ਦੀ ਸਖ਼ਤੀ ਦੇ ਬਾਵਜੂਦ ਸਿਰਫ਼ 10 ਫੀਸਦੀ ਖਾਲੀ ਬੋਤਲਾਂ ਹੀ ਨਸ਼ਟ ਹੋ ਪਾਉਂਦੀਆਂ ਹਨ। ਇਸ ਦਾ ਕਾਰਨ ਇਹ ਹੈ ਕਿ ਲੋਕ ਮਹਿੰਗੀ ਸ਼ਰਾਬ ਅਕਸਰ ਆਪਣੇ ਘਰਾਂ ’ਚ ਪੀਂਦੇ ਹਨ। ਘਰਾਂ ’ਚੋਂ ਨਿਕਲਣ ਵਾਲੀਆਂ ਇਹ ਬੋਤਲਾਂ ਸਿੱਧੀਆਂ ਗਲੀ-ਮੁਹੱਲਿਆਂ ਦੇ ਕਬਾੜੀਆਂ ਤੱਕ ਪਹੁੰਚਦੀਆਂ ਹਨ, ਜੋ ਇਨ੍ਹਾਂ ਨੂੰ ਦੋ ਨੰਬਰ ਵਾਲੇ ਪੈਕਰਾਂ ਨੂੰ ਵੇਚ ਦਿੰਦੇ ਹਨ।

ਫੜੇ ਜਾਣ ਦਾ ਖ਼ਤਰਾ ਨਾਂਹ ਦੇ ਬਰਾਬਰ!

ਜਾਣਕਾਰਾਂ ਨੇ ਇਕ ਹੋਰ ਹੈਰਾਨੀਜਨਕ ਪਹਿਲੂ ਦੱਸਿਆ ਕਿ ਕਿਉਂਕਿ ਪੈਕਰ ਨਕਲੀ ਕੈਮੀਕਲ ਦੀ ਬਜਾਏ ਸਸਤੀ ‘ਬ੍ਰਾਂਡਿਡ’ ਸ਼ਰਾਬ ਦੀ ਵਰਤੋਂ ਕਰਦੇ ਹਨ, ਇਸ ਲਈ ਇਹ ਸਰੀਰ ਲਈ ਤੁਰੰਤ ਨੁਕਸਾਨਦੇਹ ਜਾਂ ਜਾਨਲੇਵਾ ਨਹੀਂ ਹੁੰਦੀ। ਸਵਾਦ ’ਚ ਮਾਮੂਲੀ ਫ਼ਰਕ ਹੋਣ ਕਾਰਨ ਪੀਣ ਵਾਲੇ ਨੂੰ ਅਕਸਰ ਆਪਣੀ ਹੀ ਜ਼ੁਬਾਨ ’ਤੇ ਸ਼ੱਕ ਹੁੰਦਾ ਹੈ, ਜਿਸ ਕਾਰਨ ਇਹ ਨੈਕਸਸ ਬਿਨਾਂ ਕਿਸੇ ਸ਼ਿਕਾਇਤ ਦੇ ਧੜੱਲੇ ਨਾਲ ਚੱਲ ਰਿਹਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e