ਰਣਜੀਤ ਐਵੇਨਿਊ ਦੀ ਬਾਰ ’ਤੇ ਪੁਲਸ ਛਾਪੇਮਾਰੀ ਨੂੰ ਚੁਣੌਤੀ, ਨਹੀਂ ਵੇਖਿਆ ਲਾਇਸੈਂਸ ਤੇ ਬੇਕਸੂਰ ਕੀਤੇ ਗ੍ਰਿਫ਼ਤਾਰ

ਅੰਮ੍ਰਿਤਸਰ (ਇੰਦਰਜੀਤ/ਜਸ਼ਨ)- ਅੰਮ੍ਰਿਤਸਰ ਪੁਲਸ ਅਤੇ ਆਬਕਾਰੀ ਵਿਭਾਗ ਨੇ ਤਿੰਨ ਦਿਨ ਪਹਿਲਾਂ ਰਣਜੀਤ ਐਵੇਨਿਊ ਦੇ ਡੀ-ਬਲਾਕ ਸਥਿਤ ‘ਹੌਪਰਜ਼’ ਬਾਰ ’ਤੇ ਛਾਪੇਮਾਰੀ ਕਰ ਕੇ ਭਾਰੀ ਮਾਤਰਾ ਵਿਚ ਸ਼ਰਾਬ ਅਤੇ ਬੀਅਰ ਬਰਾਮਦ ਕਰਨ ਬਾਅਦ ਬਾਰ ਦੇ ਮੈਨੇਜਰ ਖ਼ਿਲਾਫ਼ ਕੇਸ ਦਰਜ ਕੀਤਾ ਗਿਆ ਸੀ। ਇਸ ਮਾਮਲੇ ਸਬੰਧੀ ਆਪਣਾ ਪੱਖ ਰੱਖਦਿਆਂ ਬਾਰ ਮਾਲਕਾਂ ਦਾ ਕਹਿਣਾ ਹੈ ਕਿ ਪੁਲਸ ਨੇ ਕਾਨੂੰਨ ਨੂੰ ਤਾਕ ਵਿਚ ਰੱਖ ਕੇ ਕਾਰਵਾਈ ਕੀਤੀ ਹੈ, ਜਿਸ ਵਿਚ ਬਾਰ ਵਿਚ ਛਾਪੇਮਾਰੀ ਦੌਰਾਨ ਨਾ ਤਾਂ ਆਬਕਾਰੀ ਵਿਭਾਗ ਦਾ ਕੋਈ ਅਧਿਕਾਰੀ ਸ਼ਾਮਲ ਸੀ ਅਤੇ ਨਾ ਹੀ ਪੁਲਸ ਨੇ ਬਾਰ ਦਾ ਲਾਇਸੈਂਸ ਦੇਖਿਆ ਹੈ, ਜੋ ਕਿ ਰੈਗੂਲਰ ਸੀ। ਦੂਜੇ ਪਾਸੇ ਇਕਤਰਫ਼ਾ ਕਾਰਵਾਈ ਕਰਦੇ ਹੋਏ ਬਾਰ ਦੇ ਬੇਕਸੂਰ ਮੈਨੇਜਰ ਨੂੰ ਵੀ ਗ੍ਰਿਫ਼ਤਾਰ ਕਰ ਕੇ ਮਾਮਲਾ ਦਰਜ ਕਰ ਲਿਆ ਗਿਆ ਹੈ। ਇਸ ਮਾਮਲੇ ਵਿਚ ਉਨ੍ਹਾਂ ਨੇ ਅੰਮ੍ਰਿਤਸਰ ਦੇ ਪੁਲਸ ਕਮਿਸ਼ਨਰ ਤੋਂ ਇਨਸਾਫ਼ ਦੀ ਅਪੀਲ ਕੀਤੀ ਹੈ।

ਬੀਤੇ ਦਿਨ ਡੀ-ਬਲਾਕ ਵਿਖੇ ਕੀਤੀ ਪ੍ਰੈੱਸ ਕਾਨਫਰੰਸ ਦੌਰਾਨ ‘ਹੌਪਰਜ਼ ਬਾਰ’ ਦੇ ਮਾਲਕ ਰਾਜਨ ਵੀਰ ਸਿੰਘ ਵੜੈਚ ਨੇ ਥਾਣਾ ਰਣਜੀਤ ਐਵੇਨਿਊ ਦੀ ਪੁਲਸ ਵਲੋਂ ਕੀਤੀ ਗਈ ਕਾਰਵਾਈ ਨੂੰ ਚੁਣੌਤੀ ਦਿੱਤੀ। ਉਨ੍ਹਾਂ ਨਾਲ ਅੰਮ੍ਰਿਤਸਰ ਹੋਟਲ ਰੈਸਟੋਰੈਂਟ ਐਸੋਸੀਏਸ਼ਨ ਦੇ ਪ੍ਰਧਾਨ ਏ. ਪੀ. ਸਿੰਘ ਚੱਠਾ ਅਤੇ ਪ੍ਰੇਮ ਕੁਮਾਰ ਨੇ ਵੀ ਸੰਬੋਧਨ ਕੀਤਾ। ਬਾਰ ਦੇ ਮਾਲਕ ਨੇ ਦੱਸਿਆ ਕਿ 27 ਮਈ ਨੂੰ ਰਾਤ 12 ਵਜੇ ਦੇ ਕਰੀਬ ਪੁਲਸ ਵੱਲੋਂ ਅਚਾਨਕ ਛਾਪੇਮਾਰੀ ਕੀਤੀ ਗਈ, ਜਦੋਂ ਕਿ ਉਨ੍ਹਾਂ ਕੋਲ ਐੱਲ.3/4/5 ਤਿੰਨਾਂ ਦਾ ਲਾਇਸੈਂਸ ਹੈ, ਜਿਸ ਅਨੁਸਾਰ ਰਾਤ 1 ਵਜੇ ਤੱਕ ਬਾਰ ਖੋਲ੍ਹ ਸਕਦੇ ਹਨ। ਪੁਲਸ ਨੇ ਆਉਂਦਿਆਂ ਹੀ ਬਾਰ ਤੋਂ ਬੀਅਰ ਅਤੇ ਸ਼ਰਾਬ ਚੁੱਕਣੀ ਸ਼ੁਰੂ ਕਰ ਦਿੱਤੀ ਅਤੇ ਸਾਨੂੰ ਕਿਹਾ ਗਿਆ ਕਿ ਤੁਹਾਡੇ ਕੋਲ ਇਸ ਦਾ ਲਾਇਸੈਂਸ ਨਹੀਂ ਹੈ। ਉਨ੍ਹਾਂ ਪੁਲਸ ਨੂੰ ਕਿਹਾ ਕਿ ਸਾਡੇ ਕੋਲ ਲਾਇਸੈਂਸ ਹੈ ਜੋ ਕਿ ਬੰਦ ਕੀਤੀ ਗਈ ਅਲਮਾਰੀ ਵਿਚ ਪਿਆ ਹੋਇਆ ਹੈ ਪਰ ਪੁਲਸ ਨੇ ਉਨ੍ਹਾਂ ਦੀ ਇਕ ਨਾ ਸੁਣੀ।

ਇਹ ਵੀ ਪੜ੍ਹੋ- ਅਮਰੀਕਾ 'ਚ ਰਾਹੁਲ ਗਾਂਧੀ ਵੱਲੋਂ ਸ੍ਰੀ ਗੁਰੂ ਨਾਨਕ ਦੇਵ ਜੀ ਬਾਰੇ ਕੀਤੀ ਟਿੱਪਣੀ 'ਤੇ SGPC ਦਾ ਤਿੱਖਾ ਪ੍ਰਤੀਕਰਮ

ਬਾਰ ਮਾਲਕ ਨੇ ਕਿਹਾ ਕਿ ਜਦੋਂ ਮੈਂ ਪੁਲਸ ਨੂੰ ਦੱਸਿਆ ਕਿ ਮੇਰੇ ਮੋਬਾਇਲ ਫ਼ੋਨ ਵਿਚ ਲਾਇਸੈਂਸ ਦੀ ਕਾਪੀ ਹੈ ਤਾਂ ਉਨ੍ਹਾਂ ਨੇ ਮੇਰਾ ਮੋਬਾਇਲ ਫ਼ੋਨ ਹੀ ਖੋਹ ਲਿਆ। ਉਨ੍ਹਾਂ ਦੋਸ਼ ਲਾਇਆ ਕਿ ਇੱਕ ਹੋਲਦਾਰ ਅਤੇ ਮਹਿਲਾ ਅਧਿਕਾਰੀ ਨੇ ਇੰਨੀ ਬਦਸਲੂਕੀ ਕੀਤੀ ਕਿ ਉਸ ਦਾ ਵਰਨਣ ਨਹੀਂ ਕੀਤਾ ਜਾ ਸਕਦਾ। ਪ੍ਰੈਸ ਕਾਨਫਰੰਸ ਦੌਰਾਨ ਰਾਜਨ ਵੀਰ ਨੇ ਦੱਸਿਆ ਕਿ ਪੁਲਸ ਵੱਲੋਂ ਕੀਤੀ ਗਈ ਕਾਰਵਾਈ ਦੌਰਾਨ ਜੋ ਸ਼ਰਾਬ ਦੀ ਬਰਾਮਦਗੀ ਕੀਤੀ ਗਈ ਹੈ, ਜਿਸ ਵਿਚ ਸ਼ਰਾਬ ਦੀ ਮਾਤਰਾ ਘੱਟ ਦਿਖਾਈ ਗਈ ਹੈ, ਜਦਕਿ ਸ਼ਰਾਬ ਦੀ ਮਾਤਰਾ ਜ਼ਿਆਦਾ ਹੈ। ਜਾਂਦੇ ਸਮੇਂ ਪੁਲਸ ਕਰਮਚਾਰੀ ਉਸ ਦਾ ਸਟਾਕ ਰਜਿਸਟਰ ਵੀ ਨਾਲ ਲੈ ਗਏ। ਉਨ੍ਹਾਂ ਕਿਹਾ ਕਿ ਪੁਲਸ ਕਾਰਵਾਈ ਦੌਰਾਨ ਉਥੇ ਕੋਈ ਵੀ ਆਬਕਾਰੀ ਅਧਿਕਾਰੀ ਉੱਥੇ ਨਹੀਂ ਪਹੁੰਚਿਆ, ਜਿਸ ਕਾਰਨ ਪੁਲਸ ਦੀ ਕਾਰਵਾਈ ਨੂੰ ਕਾਨੂੰਨ ਦੁਆਰਾ ਗੈਰ-ਕਾਨੂੰਨੀ ਮੰਨਿਆ ਜਾਂਦਾ ਹੈ।

ਇਸ ਮਾਮਲੇ ਵਿਚ ਥਾਣਾ ਰਣਜੀਤ ਐਵੇਨਿਊ ਦੀ ਇੰਚਾਰਜ ਮੈਡਮ ਅਮਨਜੋਤ ਨੇ ਕਿਹਾ ਕਿ ਜੋ ਲਾਇਸੈਂਸ ਉਨ੍ਹਾਂ ਨੂੰ ਦਿਖਾਇਆ ਹੈ, ਉਸ ਦੀ ਫੀਸ ਬਾਅਦ ’ਚ ਭਰੀ ਹੈ। ਇਸ ਲਈ ਉਸ ਨੂੰ ਗੈਰ-ਕਾਨੂੰਨੀ ਮੰਨਿਆ ਜਾਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਆਬਕਾਰੀ ਵਿਭਾਗ ਦੇ ਇੰਸਪੈਕਟਰ ਰਾਜੀਵ ਮਰਵਾਹਾ ਉਨ੍ਹਾਂ ਦੇ ਨਾਲ ਸਨ ਅਤੇ ਸਾਰੀ ਕਾਰਵਾਈ ਦੀ ਦੇਖ-ਰੇਖ ਹੇਠ ਕੀਤੀ ਗਈ ਹੈ ਅਤੇ ਪੂਰੀ ਰਿਕਾਰਡਿੰਗ ਹੋਈ ਹੈ।

ਇੰਸਪੈਕਟਰ ਐਕਸਾਈਜ਼ ਰਾਜੀਵ ਮਰਵਾਹਾ ਨੇ ਕਿਹਾ ਹੈ ਕਿ ਉਹ ਪੁਲਸ ਕਾਰਵਾਈ ਸ਼ੁਰੂ ਹੋਣ ਤੋਂ ਬਾਅਦ ਅੱਧੇ-ਪੌਣੇ ਘੰਟੇ ਬਾਅਦ ਪੁੱਜਾ। ਇਸ ਦੌਰਾਨ ਕਾਫ਼ੀ ਹੱਦ ਤੱਕ ਕਾਰਵਾਈ ਹੋ ਚੁੱਕੀ ਸੀ ਅਤੇ ਪੁਲਸ ਬਾਰ ਦਾ ਸਾਮਾਨ ਲੈ ਜਾ ਰਹੀ ਸੀ। ਉਨ੍ਹਾਂ ਪੁਲਸ ਨੂੰ ਕਿਹਾ ਸੀ ਕਿ ਉਨ੍ਹਾਂ ਕੋਲ ਰੈਗੂਲਰ ਲਾਇਸੈਂਸ ਚੱਲਦਾ ਆ ਰਿਹਾ ਹੈ, ਇਸ ਲਈ ਇੱਥੋਂ ਮਾਲ ਚੁੱਕਣਾ ਅਣ-ਉਚਿਤ ਹੈ। ਮੈਂ ਪੁਲਸ ਨੂੰ ਵੀ ਕਿਹਾ ਸੀ ਕਿ ਬਾਰ ਨੂੰ ਸੀਲ ਕਰਕੇ ਸਵੇਰੇ ਉਨ੍ਹਾਂ ਤੋਂ ਹਿਸਾਬ ਲਿਆ ਜਾਵੇ, ਪਰ ਪੁਲਸ ਨਹੀਂ ਮੰਨੀ।

ਇਹ ਵੀ ਪੜ੍ਹੋ-  ਤੰਬਾਕੂ ਦੀ ਗ੍ਰਿਫ਼ਤ ’ਚ ਪੰਜਾਬ, 13 ਸਾਲ ਦੀ ਉਮਰ ਤੋਂ ਲੈ ਕੇ ਬਜ਼ੁਰਗ ਤੱਕ ਹੋਏ ਕੈਂਸਰ ਦਾ ਸ਼ਿਕਾਰ

ਅਬਕਾਰੀ ਅਧਿਕਾਰੀ ਨੇ ਲਾਇਸੈਂਸ ਫੀਸ ਬਾਰੇ ਕਿਹਾ ਜੇਕਰ ਫੀਸ ਦੇਰੀ ਨਾਲ ਅਦਾ ਕੀਤੀ ਜਾਂਦੀ ਹੈ ਤਾਂ ਉਸ ’ਤੇ ਜੁਰਮਾਨਾ ਜਾਂ ਜੁਰਮਾਨਾ ਲਿਆ ਜਾ ਸਕਦਾ ਹੈ ਪਰ ਲਾਇਸੈਂਸ ਨੂੰ ਗੈਰ-ਕਾਨੂੰਨੀ ਨਹੀਂ ਕਿਹਾ ਜਾ ਸਕਦਾ ਅਤੇ ਨਾ ਹੀ ਇਹ ਅਪਰਾਧ ਦੀ ਸ਼੍ਰੇਣੀ ਵਿਚ ਆਉਂਦਾ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਨਿਯਮਤ ਲਾਇਸੈਂਸ ਧਾਰਕ ਕਿਸੇ ਵੀ ਸਮੇਂ ਫ਼ੀਸ ਦਾ ਭੁਗਤਾਨ ਕਰ ਸਕਦਾ ਹੈ, ਇਹ ਆਬਕਾਰੀ ਵਿਭਾਗ ਦੇ ਨਿਯਮ ਅਤੇ ਕਾਨੂੰਨੀ ਅਧਿਕਾਰ ਵਿਚਕਾਰ ਹੈ। ਇੰਸਪੈਕਟਰ ਮਰਵਾਹਾ ਨੇ ਕਲੀਨ ਚਿੱਟ ਦਿੰਦਿਆਂ ਸਪੱਸ਼ਟ ਕਿਹਾ ਕਿ ਬਾਰ ਦਾ ਲਾਇਸੈਂਸ ਬਿਲਕੁਲ ਸਹੀ ਹੈ ਅਤੇ ਬਾਰ ਵੱਲੋਂ ਖ਼ਰੀਦਿਆ ਗਿਆ ਸਾਮਾਨ ਵੀ ਰਿਕਾਰਡ ਅਨੁਸਾਰ ਸਹੀ ਹੈ, ਇਸ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਟੈਕਸ ਚੋਰੀ ਨਹੀਂ ਹੈ ਅਤੇ ਸਰਕਾਰ ਨੂੰ ਪੂਰਾ ਟੈਕਸ ਮਿਲਿਆ ਹੈ।

ਪੁਲਸ ਕਮਿਸ਼ਨਰ, ਇਕ ਕਾਬਲ ਅਤੇ ਵਧੀਆ ਅਧਿਕਾਰੀ, ਥਾਣੇ ਦੇ ਮੁਲਾਜ਼ਮਾਂ ਨੇ ਕੀਤੀ ਧੱਕੇਸ਼ਾਹੀ : ਏ. ਪੀ. ਸਿੰਘ ਚੱਠਾ

ਅੰਮ੍ਰਿਤਸਰ ਹੋਟਲ ਰਿਜ਼ੋਰਟ ਐਸੋਸੀਏਸ਼ਨ ਸਿਵਲ ਲਾਈਨ ਦੇ ਪ੍ਰਧਾਨ ਏ. ਪੀ. ਸਿੰਘ ਚੱਠਾ ਨੇ ਕਿਹਾ ਕਿ ਵਧੀਕ ਡਾਇਰੈਕਟਰ ਜਨਰਲ ਪੁਲਸ ਅਤੇ ਕਮਿਸ਼ਨਰ ਅੰਮ੍ਰਿਤਸਰ ਨੌਨਿਹਾਲ ਸਿੰਘ ਆਈ. ਪੀ. ਐੱਸ. ਇਕ ਕਾਬਲ, ਈਮਾਨਦਾਰ ਅਧਿਕਾਰੀ ਹਨ। ਉਨ੍ਹਾਂ ਦੇ ਆਉਣ ਨਾਲ ਗੁਰੂ ਕੀ ਨਗਰੀ ਨੂੰ ਟ੍ਰੈਫਿਕ ਜਾਮ ਅਤੇ ਲੁੱਟਾਂ-ਖੋਹਾਂ ਕਰਨ ਵਾਲਿਆਂ ਤੋਂ ਰਾਹਤ ਮਿਲੀ ਹੈ ਅਤੇ ਕਾਨੂੰਨ ਵਿਵਸਥਾ ਵਿਚ ਸੁਧਾਰ ਹੋਇਆ ਹੈ। ਇਸ ਤੋਂ ਪਹਿਲਾਂ 2 ਸਾਲਾਂ ’ਚ ਬੁਰਾ ਹਾਲ ਹੋ ਚੁੱਕਿਆ ਸੀ ਅਤੇ ਸੈਲਾਨੀ ਵੀ ਗਾਇਬ ਹੋ ਗਏ ਸਨ। ਉਨ੍ਹਾਂ ਕਿਹਾ ਕਿ ਥਾਣਾ ਰਣਜੀਤ ਐਵੇਨਿਊ ਦੀ ਪੁਲਸ ਵਲੋਂ ਜੋ ‘ਹੌਪਰਜ਼ ਬਾਰ’ ’ਤੇ ਕਾਰਵਾਈ ਕੀਤੀ ਗਈ ਹੈ, ਉਹ ਸਰਾਸਰ ਧੱਕੇਸ਼ਾਹੀ ਹੈ। ਉਨ੍ਹਾਂ ਕਿਹਾ ਕਿ ਰਣਜੀਤ ਐਵੇਨਿਊ ਥਾਣਾ ਅਧਿਕਾਰੀ ਨੇ ਆਖਿਰਕਾਰ ਲਾਇਸੈਂਸ ਦੇਖਣ ਤੋਂ ਕਿਉਂ ਮਨ੍ਹਾ ਕਰ ਦਿੱਤਾ। ਇਹ ਇਕ ਜਾਂਚ ਦਾ ਵਿਸ਼ਾ ਹੈ ਅਤੇ ਉਨ੍ਹਾਂ ਦਾ ਕੀ ਇਰਾਦਾ ਸੀ? ਉਨ੍ਹਾਂ ਕਿਹਾ ਕਿ ਪੁਲਸ ਅਧਿਕਾਰੀ ਨੇ ਆਬਕਾਰੀ ਇੰਸਪੈਕਟਰ ਦੀ ਗੱਲ ਕਿਉਂ ਨਹੀਂ ਸੁਣੀ ਅਤੇ ਕਿਉਂ ਕਾਹਲੀ ਨਾਲ ਲਾਇਸੈਂਸ ਅਨੁਸਾਰ ਸਹੀ ਖ਼ਰੀਦ ਕੀਤੇ ਗਏ ਸਮਾਨ ਨੂੰ ਗੈਰਕਾਨੂੰਨੀ ਦੱਸ ਕੇ ਚੁੱਕ ਲਿਆ? ਚੱਠਾ ਨੇ ਕਿਹਾ ਕਿ ਇਸ ਜਿਆਦਤੀ ਲਈ ਉਹ ਪੁਲਸ ਕਮਿਸ਼ਨਰ ਤੋਂ ਇਨਸਾਫ਼ ਦੀ ਉਮੀਦ ਰੱਖਦੇ ਹਨ।

ਸਾਖ ਨੂੰ ਪਹੁੰਚੀ ਠੇਸ, ਕਾਰੋਬਾਰ ਹੋਇਆ 70 ਫ਼ੀਸਦੀ ਘੱਟ

ਬਾਰ ਦੇ ਮਾਲਕ ਰਾਜਨ ਵੀਰ ਨੇ ਦੱਸਿਆ ਕਿ ਇਸ ਕਾਰਵਾਈ ਤੋਂ ਬਾਅਦ ਉਨ੍ਹਾਂ ਦੇ ਰੈਸਟੋਰੈਂਟ ਅਤੇ ਬਾਰ ’ਚ ਆਉਣ ਵਾਲੇ ਗਾਹਕਾਂ ਦੀ ਗਿਣਤੀ ਵਿਚ 70 ਫ਼ੀਸਦੀ ਤੋਂ ਵੱਧ ਕਮੀ ਆਈ ਹੈ। ਪੁਲਸ ਦੀ ਇਸ ਕਾਰਵਾਈ ਕਾਰਨ ਜਿੱਥੇ ਸ਼ਹਿਰ ਵਿਚ ਉਨ੍ਹਾਂ ਦੀ ਸਾਖ ਨੂੰ ਠੇਸ ਪੁੱਜੀ ਹੈ, ਉਥੇ ਉਨ੍ਹਾਂ ਦੇ ਕਾਰੋਬਾਰ ਨੂੰ ਵੀ ਭਾਰੀ ਨੁਕਸਾਨ ਪੁੱਜਾ ਹੈ।

ਨੋਟ- ਇਸ ਖ਼ਬਰ ਸਬੰਧੀ ਤੁਹਾਡੀ ਕੀ ਹੈ ਰਾਏ, ਕੁਮੈਂਟ ਬਾਕਸ 'ਚ ਦੱਸੋ।