ਵੈੱਬ ਡੈਸਕ - ਗਰਮੀਆਂ ਦੇ ਮੌਸਮ 'ਚ ਜੇਕਰ ਘਰ 'ਚ ਕੋਈ ਪਾਰਟੀ ਹੋਵੇ ਜਾਂ ਖ਼ਾਸ ਮਹਿਮਾਨ ਆਉਣੇ ਹੋਣ, ਤਾਂ ਸਟਾਰਟਰ ਨੂੰ ਲੈ ਕੇ ਅਕਸਰ ਸਾਰੇ ਪਰੇਸ਼ਾਨ ਰਹਿੰਦੇ ਹਨ। ਜੇਕਰ ਤੁਸੀਂ ਵੀ ਸਮੋਸੇ-ਪਕੌੜੇ ਖਾ ਕੇ ਬੋਰ ਹੋ ਚੁੱਕੇ ਹੋ ਅਤੇ ਕੁਝ ਕ੍ਰਿਸਪੀ ਤੇ ਲਾਜਵਾਬ ਬਣਾਉਣਾ ਚਾਹੁੰਦੇ ਹੋ, ਤਾਂ 'ਦਹੀਂ ਦੇ ਕਬਾਬ' ਇਕ ਬਿਹਤਰੀਨ ਵਿਕਲਪ ਹੈ। ਇਹ ਕਬਾਬ ਉੱਪਰੋਂ ਬਹੁਤ ਹੀ ਕੁਰਕੁਰੇ ਅਤੇ ਅੰਦਰੋਂ ਇੰਨੇ ਨਰਮ ਹੁੰਦੇ ਹਨ ਕਿ ਮੂੰਹ 'ਚ ਪਾਉਂਦੇ ਹੀ ਘੁਲ ਜਾਂਦੇ ਹਨ। ਆਓ ਜਾਣਦੇ ਹਾਂ ਬਾਜ਼ਾਰ ਵਰਗੇ ਸੁਆਦੀ ਦਹੀਂ ਦੇ ਕਬਾਬ ਘਰ 'ਚ ਬਣਾਉਣ ਦਾ ਬਿਲਕੁਲ ਆਸਾਨ ਤਰੀਕਾ :-

ਕਬਾਬ ਬਣਾਉਣ ਲਈ ਜ਼ਰੂਰੀ ਸਮੱਗਰੀ :-

ਹੰਗ ਕਰਡ - 2 ਕੱਪ (ਦਹੀਂ ਨੂੰ ਸੂਤੀ ਕੱਪੜੇ ਵਿੱਚ ਬੰਨ੍ਹ ਕੇ 3-4 ਘੰਟੇ ਲਈ ਲਟਕਾ ਦਿਓ ਤਾਂ ਜੋ ਸਾਰਾ ਪਾਣੀ ਨਿਕਲ ਜਾਵੇ।
ਪਨੀਰ - 1 ਕੱਪ (ਇਸ ਨਾਲ ਬਾਈਡਿੰਗ ਵਧੀਆ ਹੁੰਦੀ ਹੈ)।
ਬਰੀਕ ਕੱਟਿਆ ਪਿਆਜ਼ - 1/2 ਕੱਪ
ਬਰੀਕ ਕੱਟੀਆਂ ਹਰੀਆਂ ਮਿਰਚਾਂ - 2
ਹਰਾ ਧਨੀਆ - ਬਰੀਕ ਕੱਟਿਆ ਹੋਇਆ
ਕਾਜੂ - 8-10 (ਬਰੀਕ ਕੱਟੇ ਹੋਏ)
ਭੁੰਨਿਆ ਹੋਇਆ ਬੇਸਨ/ਸੱਤੂ - 2 ਤੋਂ 3 ਚੱਮਚ
ਕੌਰਨ ਫਲੋਰ ਜਾਂ ਬ੍ਰੈੱਡ ਕਰੰਬਸ - ਕੋਟਿੰਗ ਲਈ
ਮਸਾਲੇ- ਸਵਾਦ ਅਨੁਸਾਰ ਲੂਣ, ਕਾਲੀ ਮਿਰਚ ਪਾਊਡਰ (1/2 ਚੱਮਚ), ਗਰਮ ਮਸਾਲਾ (1/2 ਚੱਮਚ), ਚਾਟ ਮਸਾਲਾ (1 ਚੱਮਚ)।
ਤੇਲ - ਫ੍ਰਾਈ ਕਰਨ ਲਈ।

ਬਣਾਉਣ ਦਾ ਸਹੀ ਤਰੀਕਾ :-

- ਸਭ ਤੋਂ ਪਹਿਲਾਂ ਇਕ ਵੱਡੇ ਭਾਂਡੇ 'ਚ ਪਾਣੀ ਨਿਚੋੜਿਆ ਹੋਇਆ ਗਾੜ੍ਹਾ ਦਹੀਂ ਅਤੇ ਕੱਦੂਕਸ ਕੀਤਾ ਪਨੀਰ ਪਾ ਕੇ ਚੰਗੀ ਤਰ੍ਹਾਂ ਮਿਕਸ ਕਰ ਲਓ।
- ਹੁਣ ਇਸ 'ਚ ਬਰੀਕ ਕੱਟਿਆ ਪਿਆਜ਼, ਹਰੀ ਮਿਰਚ, ਹਰਾ ਧਨੀਆ, ਕਾਜੂ ਦੇ ਟੁਕੜੇ, ਲੂਣ, ਕਾਲੀ ਮਿਰਚ, ਗਰਮ ਮਸਾਲਾ ਅਤੇ ਚਾਟ ਮਸਾਲਾ ਪਾ ਦਿਓ।
- ਦਹੀਂ ਦੇ ਗਿੱਲੇਪਨ ਨੂੰ ਸੁਕਾਉਣ ਅਤੇ ਕਬਾਬ ਨੂੰ ਟੁੱਟਣ ਤੋਂ ਬਚਾਉਣ ਲਈ ਇਸ 'ਚ 2-3 ਚੱਮਚ ਭੁੰਨਿਆ ਹੋਇਆ ਬੇਸਨ ਮਿਲਾਓ ਅਤੇ ਹਲਕੇ ਹੱਥਾਂ ਨਾਲ ਨਰਮ ਆਟੇ ਵਾਂਗ ਗੁੰਨ੍ਹ ਲਓ।
- ਆਪਣੀਆਂ ਹਥੇਲੀਆਂ 'ਤੇ ਥੋੜ੍ਹਾ ਜਿਹਾ ਤੇਲ ਲਗਾਓ ਅਤੇ ਮਿਸ਼ਰਣ 'ਚੋਂ ਛੋਟੀਆਂ-ਛੋਟੀਆਂ ਲੋਈਆਂ ਲੈ ਕੇ ਉਨ੍ਹਾਂ ਨੂੰ ਗੋਲ ਜਾਂ ਕਬਾਬ ਦੀ ਸ਼ੇਪ (ਟਿੱਕੀ ਵਾਂਗ) ਦਿਓ। ਹੁਣ ਇਨ੍ਹਾਂ ਕਬਾਬਾਂ ਨੂੰ ਬ੍ਰੈੱਡ ਕਰੰਬਸ ਜਾਂ ਕੌਰਨ ਫਲੋਰ ਵਿੱਚ ਚੰਗੀ ਤਰ੍ਹਾਂ ਲਪੇਟ ਲਓ, ਤਾਂ ਜੋ ਇਹ ਬਾਹਰੋਂ ਕੁਰਕੁਰੇ ਬਣਨ।
- ਇਕ ਪੈਨ 'ਚ ਤੇਲ ਗਰਮ ਕਰੋ। ਕਬਾਬਾਂ ਨੂੰ ਮੀਡੀਅਮ ਸੇਕ 'ਤੇ ਸੁਨਹਿਰੀ ਹੋਣ ਤੱਕ ਸ਼ੈਲੋ ਫ੍ਰਾਈ ਜਾਂ ਡੀਪ ਫ੍ਰਾਈ ਕਰੋ। ਧਿਆਨ ਰਹੇ ਕਿ ਸੇਕ ਤੇਜ਼ ਨਾ ਹੋਵੇ, ਨਹੀਂ ਤਾਂ ਕਬਾਬ ਬਾਹਰੋਂ ਸੜ ਜਾਣਗੇ ਅਤੇ ਅੰਦਰੋਂ ਕੱਚੇ ਰਹਿ ਜਾਣਗੇ।

ਸਰਵਿੰਗ ਟਿਪ

- ਤੁਹਾਡੇ ਗਰਮਾ-ਗਰਮ ਰੈਸਟੋਰੈਂਟ ਸਟਾਈਲ 'ਦਹੀਂ ਦੇ ਕਬਾਬ' ਤਿਆਰ ਹਨ। ਇਨ੍ਹਾਂ ਨੂੰ ਪਲੇਟ 'ਚ ਕੱਢੋ, ਉੱਪਰੋਂ ਥੋੜ੍ਹਾ ਜਿਹਾ ਚਾਟ ਮਸਾਲਾ ਛਿੜਕੋ ਅਤੇ ਪੁਦੀਨੇ ਦੀ ਤਿੱਖੀ ਹਰੀ ਚਟਨੀ ਤੇ ਪਿਆਜ਼ ਦੇ ਲੱਛਿਆਂ ਨਾਲ ਗਰਮਾ-ਗਰਮ ਸਰਵ ਕਰੋ।