ਵੈੱਬ ਡੈਸਕ - ਅੱਜ-ਕੱਲ੍ਹ ਹਰ ਕੋਈ ਚਾਹੁੰਦਾ ਹੈ ਕਿ ਉਸਦਾ ਚਿਹਰਾ ਬਿਨਾਂ ਕਿਸੇ ਦਾਗ-ਧੱਬੇ ਦੇ ਚਮਕਦਾ ਰਹੇ। ਇਸ ਤੁਰੰਤ ਨਿਖਾਰ ਲਈ ਸਭ ਤੋਂ ਸੌਖਾ ਤਰੀਕਾ 'ਫੇਸ਼ੀਅਲ ਬਲੀਚ' ਮੰਨਿਆ ਜਾਂਦਾ ਹੈ ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਬਲੀਚ 'ਚ ਮੌਜੂਦ ਤੇਜ਼ ਕੈਮੀਕਲ ਤੁਹਾਡੀ ਕੋਮਲ ਚਮੜੀ ਨੂੰ ਨੁਕਸਾਨ ਵੀ ਪਹੁੰਚਾ ਸਕਦੇ ਹਨ?  ਆਓ ਜਾਣਦੇ ਹਾਂ ਬਲੀਚ ਨਾਲ ਜੁੜੀਆਂ ਕੁਝ ਅਹਿਮ ਗੱਲਾਂ ਅਤੇ ਇਸ ਨੂੰ ਵਰਤਣ ਦੇ ਸਹੀ ਬਿਊਟੀ ਟਿਪਸ :-

ਬਲੀਚ ਕਿਵੇਂ ਕਰਦੀ ਹੈ ਕੰਮ? 

ਬਲੀਚ ਚਿਹਰੇ ਦੇ ਵਾਲਾਂ ਨੂੰ ਕੱਟਦੀ ਨਹੀਂ, ਸਗੋਂ ਉਨ੍ਹਾਂ ਦੇ ਕੁਦਰਤੀ ਕਾਲੇ ਰੰਗ ਨੂੰ ਹਲਕਾ (ਸੁਨਹਿਰੀ) ਕਰ ਦਿੰਦੀ ਹੈ। ਇਸ ਨਾਲ ਵਾਲ ਚਮੜੀ ਦੇ ਰੰਗ ਨਾਲ ਮਿਲ ਜਾਂਦੇ ਹਨ ਅਤੇ ਚਿਹਰਾ ਸਾਫ਼ ਤੇ ਚਮਕਦਾਰ ਦਿਖਾਈ ਦੇਣ ਲੱਗਦਾ ਹੈ। ਇਹ ਚਮੜੀ ਦੀ ਉੱਪਰਲੀ 'ਟੈਨਿੰਗ' (ਧੁੱਪ ਨਾਲ ਹੋਇਆ ਕਾਲਾਪਨ) ਨੂੰ ਵੀ ਸਾਫ਼ ਕਰਦੀ ਹੈ।

ਬਲੀਚ ਕਰਨ ਵੇਲੇ ਰੱਖੋ ਇਨ੍ਹਾਂ ਗੱਲਾਂ ਦਾ ਖ਼ਾਸ ਖ਼ਿਆਲ :-

ਪੈਚ ਟੈਸਟ ਹੈ ਜ਼ਰੂਰੀ
- ਬਲੀਚ ਨੂੰ ਸਿੱਧਾ ਚਿਹਰੇ 'ਤੇ ਲਗਾਉਣ ਤੋਂ ਪਹਿਲਾਂ ਕੰਨ ਦੇ ਪਿੱਛੇ ਜਾਂ ਹੱਥ 'ਤੇ ਥੋੜ੍ਹੀ ਜਿਹੀ ਲਗਾ ਕੇ 10 ਮਿੰਟ ਚੈੱਕ ਕਰੋ। ਜੇਕਰ ਜ਼ਿਆਦਾ ਜਲਣ ਜਾਂ ਲਾਲੀ ਹੋਵੇ, ਤਾਂ ਇਸ ਨੂੰ ਨਾ ਵਰਤੋ।

ਸਮੇਂ ਦੀ ਸੀਮਾ
- ਬਲੀਚ ਨੂੰ ਕਦੇ ਵੀ 15 ਮਿੰਟ ਤੋਂ ਜ਼ਿਆਦਾ ਚਿਹਰੇ 'ਤੇ ਨਾ ਰੱਖੋ। ਜ਼ਿਆਦਾ ਦੇਰ ਰੱਖਣ ਨਾਲ ਚਮੜੀ ਸੜ ਸਕਦੀ ਹੈ ਜਾਂ ਕਾਲੇ ਨਿਸ਼ਾਨ ਪੈ ਸਕਦੇ ਹਨ।

ਅੱਖਾਂ ਤੋਂ ਬਚਾਅ
- ਬਲੀਚ ਨੂੰ ਅੱਖਾਂ ਦੇ ਨੇੜੇ, ਭਰਵੱਟਿਆਂ (Eyebrows) ਅਤੇ ਸਿਰ ਦੇ ਵਾਲਾਂ 'ਤੇ ਲਗਾਉਣ ਤੋਂ ਬਚੋ।

ਧੁੱਪ ਤੋਂ ਪ੍ਰਹੇਜ਼
- ਬਲੀਚ ਕਰਨ ਤੋਂ ਤੁਰੰਤ ਬਾਅਦ ਧੁੱਪ 'ਚ ਨਾ ਨਿਕਲੋ। ਕੋਸ਼ਿਸ਼ ਕਰੋ ਕਿ ਬਲੀਚ ਸ਼ਾਮ ਜਾਂ ਰਾਤ ਦੇ ਸਮੇਂ ਕੀਤੀ ਜਾਵੇ ਤਾਂ ਜੋ ਚਮੜੀ ਨੂੰ ਆਰਾਮ ਮਿਲੇ।

ਸਾਬਣ ਦੀ ਵਰਤੋਂ
- ਬਲੀਚ ਕਰਨ ਤੋਂ ਬਾਅਦ ਘੱਟੋ-ਘੱਟ 5-6 ਘੰਟੇ ਚਿਹਰੇ 'ਤੇ ਸਾਬਣ ਜਾਂ ਫੇਸਵਾਸ਼ ਨਾ ਲਗਾਓ, ਸਿਰਫ਼ ਸਾਦੇ ਪਾਣੀ ਨਾਲ ਮੂੰਹ ਧੋਵੋ।

ਕੁਦਰਤੀ ਨਿਖਾਰ ਲਈ ਘਰੇਲੂ ਬਲੀਚ 

ਜੇਕਰ ਤੁਹਾਡੀ ਚਮੜੀ ਬਹੁਤ ਜ਼ਿਆਦਾ ਸੰਵੇਦਨਸ਼ੀਲ (Sensitive) ਹੈ, ਤਾਂ ਤੁਸੀਂ ਬਾਜ਼ਾਰੀ ਕੈਮੀਕਲ ਦੀ ਬਜਾਏ ਇਹ ਘਰੇਲੂ ਨੁਸਖ਼ੇ ਅਪਣਾ ਸਕਦੇ ਹੋ :-

- ਆਲੂ ਇਕ ਕੁਦਰਤੀ ਬਲੀਚਿੰਗ ਏਜੰਟ ਹੈ। ਇਸ ਦਾ ਰਸ ਚਿਹਰੇ 'ਤੇ ਲਗਾਉਣ ਨਾਲ ਦਾਗ-ਧੱਬੇ ਹਲਕੇ ਹੁੰਦੇ ਹਨ।
-  ਨਿੰਬੂ ਦਾ ਰਸ ਚਮੜੀ ਨੂੰ ਸਾਫ਼ ਕਰਦਾ ਹੈ ਅਤੇ ਸ਼ਹਿਦ ਨਮੀ ਬਣਾਈ ਰੱਖਦਾ ਹੈ।
-  ਟਮਾਟਰ ਲਗਾਉਣ ਨਾਲ ਚਮੜੀ ਦੀ ਟੈਨਿੰਗ ਦੂਰ ਹੁੰਦੀ ਹੈ ਅਤੇ ਕੁਦਰਤੀ ਗਲੋ ਆਉਂਦਾ ਹੈ।

ਮਾਹਿਰਾਂ ਦੀ ਸਲਾਹ

- ਮਹੀਨੇ ਵਿਚ ਇਕ ਤੋਂ ਵੱਧ ਵਾਰ ਬਲੀਚ ਨਾ ਕਰੋ। ਬਹੁਤ ਜ਼ਿਆਦਾ ਬਲੀਚ ਕਰਨ ਨਾਲ ਚਮੜੀ ਪਤਲੀ ਹੋ ਜਾਂਦੀ ਹੈ ਅਤੇ ਸਮੇਂ ਤੋਂ ਪਹਿਲਾਂ ਝੁਰੜੀਆਂ ਆ ਸਕਦੀਆਂ ਹਨ।